Iof‘ȧk Ma Kikia ‘Ou A‘häe se Garue Rē Tisaipeli
1. Ka tes ta ‘is kop la rē la famori la sại?
1 Ripot ne fạu fak garue ne 2014 kel‘ạkia huạg fe‘en ma huạg toa‘ ne famör ‘on ‘Ạitu la marag‘ạkia rog heg ne Pure‘aga. (Mat. 24:14) ‘E rēko ‘os garue ‘e rīit-se-rīit, kämpein a‘pumuạ‘ạki la nā‘ia tracts ma ‘ih tē, ma ‘os la uetnes ofrạu, famör ma‘oi pạu pō ma a‘fại se rog heg ta la a‘tatạu‘ȧk se ‘on mumua. La famori la sại, ‘is kop la hạiasoag iris la tisaipel ‘on Jisu ‘e ‘os la rak Puk Ha‘ ma irisa.—1 Tim. 2:4.
2. Sạio‘ tese täla hạiasoagan ‘is la noh iạtiạt la rē ta rak Puk Ha‘a?
2 Noh Iạtiạt la Rē ta Rak Puk Ha‘a: ‘E avat ne famör ta kel‘ȧk ne iạ ‘oaf, teka ‘äe ȧs‘ȧk la pō nampa ne ‘on telefon ta, e-mail ta ma utut ne iạ noho la pō la ‘äe la hö‘ mij pạu la kamatan ta rak Puk Ha‘ het? Ka ‘äe ȧs‘ȧk fakmür ‘e av hes la kel‘ạkia rērē ne rak Puk Ha‘a ‘e ‘ou ȧs a‘ mumue ta? ‘Äe ‘ea fakmür ‘e av hes se iris ne ‘äe nā mekasin fūmou se la rak Puk Ha‘? Teka ‘äe kel‘ȧk vȧh se ‘ou kạu garueag ta, kạu rakoag ta, hại‘eleag ta, kạinaga, ma iris ‘e ‘on rereag ne ‘äe hạipoag vȧh vitio ta Rakoa Puk Ha‘a, Pō ‘e Tese? ma Ka Rakoag ne Puk Ha‘a A‘sok Tapen? ‘E avat ne ‘äe ‘es‘av‘ȧk tē nāag puku, teka ‘äe rak‘ȧk se iris ne hoa‘ puk ne ‘es‘av‘ȧk se rak Puk Ha‘a, ne iris la pō la rak Puk Ha‘ ka kat tög ra?
3. ‘E ‘os la rak‘ȧk a‘lelei ne aier ta, tes ta ‘is kop la rē?
3 Hạiasoag ne Leum ‘e Jihova ma Jisu: ‘E kamatag ne ‘on fäeag fas‘ạki la ‘rē tisaipel’ ‘e fäeag te‘ ‘la‘’, Jisu kel‘ȧk ne ‘is kop la fe‘en ma la rē‘ia huạlā mumue ta la kamatan rak puk ha‘a. Ka iạ kat roua ra ‘is la ‘is ‘esea, ka iạ fäeag porȧk ne iạ la ma ‘is. (Mat. 28:19, 20) Ka tape‘ma, Jihova nā se ‘isa ‘on ‘at ha‘a ag‘esea ma tē garueag ma rak‘ȧk tē la pō la ‘is la rak‘ạkia aier ta se famori. (Sek. 4:6; 2 Kor. 4:7) ‘Is la pō la ro‘ạit la ‘es ‘e “huget ma ne‘ne‘it” la ‘es väeag ‘e garue pumuạ te‘is.—Fil. 2:13 NW.
4. Hün se tese ta ‘is nonoj la iof‘ȧk ma kikia ‘os a‘häe se garue rē tisaipeli?
4 Marag‘ȧk ne rog heg ta ho‘am se ‘isa ta ‘oaf‘oaf ti‘ut. Ka ‘os ‘oaf‘ofa ti‘ se‘ ‘e avat ne ‘is rak‘ạkia aier ta se ta le‘et ma ho‘am iạ la tē ag‘esea ma ‘is ‘e “sal ta, ne hoa‘ se mạuri.” (Mat. 7:14; 1 Tes. 2:19, 20) Tēet ne pumuạ se‘, ‘os la iof‘ȧk ma kikia ‘os a‘häe se garue rē tisaipeli, ‘is a‘ofan Jihova ne “kat ‘oaf ra la ta le‘ ‘esea la mao, iạ ‘oaf ma la te‘ ne famör ‘atakoa la holieris se huạha‘a.”—2 Pit. 3:9.