Kes Sạio‘ Heta
◼ Teka nonoj la ‘is la ‘es‘av‘ȧk Internet ta la uetnes ne la rak Puk Ha‘ ma famör ne ‘is kat ‘inea ra ka noh ‘e ta hanuạ hoi‘ạkit?
Iris heuạ ne marag‘ạkia rog heg ta garue‘ȧk Internet ta la pō ‘oris rak Puk Ha‘ ‘e hanuạ ne ‘os garue ta ha‘ȧk ne ‘e hanuạ ne iris ne marag‘ạkia rog heg ta kat ti‘ ra. ‘E fūfū ‘on rereag rērē hete‘, pō ma la‘ lelei. Ka ma ‘on mamạr het ‘e av ne ta le‘ hoa‘ maragat la e-mail ne la ‘es‘av‘ȧk chat-room ta la hạifäegag ma le‘et ne iạ kat ‘inea ra. (‘Io se ‘Os Garue Marag ne Pure‘aga ne Julai 2007, rp. 3 ‘e fäeag fifis ta.) ‘Oris ‘amnạki la rog heg ne Pure‘ag ta la hele‘ se iris ne huạg aire, ka kạinag hạifäegag ‘i la pō la tạkia ta sạsig fāat ne ta sạsiạg hȧn het la hạipoag ma kạumane‘ag se lelei, ka tape‘ma se iris ne rou vȧh aier ta. (1 Kor. 1:19-25; Kol. 2:8) Hoi‘ȧk, ‘e hanuạ ne garue ne Pure‘ag ta ha‘ȧk ne pā, iris ne ‘es puer ‘e hanuạ ‘og kop ma la pō la kel ne hat se rogrog ne ‘is nā ma iạ la ma ‘on mamạr het se hensạsiạg ‘e hanue ta‘ag. Ta ‘on‘on, ‘is la se a‘es‘av‘ạkia internet ta la ao famör ‘e ta hanuạ hoi‘ạkit la hạiväegan rog heg ta.
La pō ke kepoi ka ofes ne maja aier‘ȧk, ne kepoi ka ‘is la uetnes se ta le‘ helavat ne ạsim ‘e ta hanuạ hoi‘ạkit, ‘is kal sok‘ȧk ra ‘os hạifäegag ta ma ia ‘e avat ne iạ la ho‘i e se ‘on hanue ta. Ka ‘is la kel‘ạkia se iạ ‘on la a‘es‘av‘ȧk ne jw.org la ‘inea‘ia tē hoi‘ȧk, ne salat ne iạ la pō la hạifäegag ma ofes ne maja ‘e ‘on hanue ta. ‘Is la pō la a‘ne‘ne‘ȧk iạ la la‘ se Rī ne Pure‘aga ne ‘eleaf se ‘on hanue ta. Aier, ne kat ‘es Rī ne Pure‘ag ra ‘e hanuạ ‘on rereag. Kepoi ka iạ pa ‘es la Uetnes ta la ạsiof se ia ‘e utut ne iạ noho, ‘is la a‘vȧh se Please Follow Up (S-43) fom heta ma nā se iạ ne matạ‘ua puk ne kạurotuga, iạ täla nā‘ia ‘e ‘es‘av‘ȧk ne jw.org. Ofes ne maja ne matạ‘ se garue ta ‘e hanuet ne iạ ne ‘ofa noho e ta ‘inea lelei fūfū he ta, iris ta fū lelei la hạiasoag fak‘atan iạ.—‘Io se ‘Os Garue Marag ne Pure‘aga ne June 2014, rp. 7, ma Novempa 2011, rp. 2 e fäeag fifis ta.
Kepoi ka ta famorit ne ‘is ȧsȧs se la‘an se ta hanuạ hoi‘ạkit ne kepoi ka ‘is rak Puk Ha‘ la‘ mo ma ta famorit ‘e ta hanuạ hoi‘ạkit ne ‘it hại‘ineag ma ‘e internet ta, nonoj la ‘is la tạupir se juj‘ạkiget ne kel‘ạkim ‘e rere. Kop ma ‘is pa ‘es la ‘ut‘ȧk ma kikia se muạ ‘on ‘ofa la hele‘ se avat ne ta sạsigit la ạsiof se iạ ‘e ‘on hanue ta. Ka kepoi ka iạ noh ‘e utut ne garue ta ha‘ȧk ne pā, ‘is kop la matạ‘ se hạifäegag fak Puk Ha‘a ne ‘is a‘sok ‘e puk ne ‘is fạ‘i, telefon ta, ne internet ta.—Mat. 10:16.