Rue‘ạkia Huạg ‘on Iris ne ‘Is Rak‘ȧk Tē Sin
1. Ka rak‘ȧk tē ‘on Jisu täe tapen se huạg ‘on iris ne a‘fại tē?
1 Rak‘ȧk tē ‘on Jisu täe se huạg ‘on iris ne a‘fại tē. ‘E ta te a‘ het, huạg ‘on tisaipeli “sun” ‘e vạhiạg ne ‘on sui‘ȧk a‘taf se irisa Ut ne Puku. (Luke 24:32) ‘E rēko tovavhina se ‘Ạitu kop la leum ‘e ‘os huga, ‘is la rue‘ȧk tapen a‘häe ‘on iris ne ‘is rak‘ȧk tē sin la pō la iris la jenea ‘oris mạuri?—Roma 6:17.
2. Ka tes tä ‘on pumuạ ne la rē a‘häe a‘huạg ‘atmại?
2 Rē A‘häe A‘huạg ‘Atmại: Se famör ma‘oi, la ‘eakia se irisa tēet ne nonojo ma tēet ne kat nonojo, kal rue‘ạkia ra iris la rē‘ia ta tēet. Ka, ‘ou la ‘es‘av‘ȧk ne ut ne puk ma‘oi la kel‘ạkia ne ‘on pilif ta sir, kop ma iạ kal a‘fại ra. La rue‘ạkia ta famorit, ‘is kop la ‘inea mumuạ ‘on hün ne iạ pilifi ma ag tape‘i e. Sạio‘ ne nā ‘e huạg ‘atmại täla rue‘ạkia iạ la fäeag‘ạkia tē ne täe ‘e ‘on huga. (FEFuạga 20:5) Ma kotä ‘is la pō la ao ‘e fäeag ‘on ‘Ạitu, tē ne pō la täe se ‘on huga. Ta ‘on‘on, ‘is kop la kel‘ȧk ne ‘is kokon‘ȧk iạ ka la huạg lal. (FEFuạga 25:15) ‘Is kop la a‘häe‘ȧk ne ‘os ‘ut fak‘ata kat tatạu ra. Nā av la ‘at ha‘ ‘on Jihova la rue‘ạkia ‘on a‘häe ma ‘on gargarue.—Mareko 4:26-29.
3. Ka ‘is la hạiasoag tapen iris ne ‘is rak‘ȧk tē sin la kel‘ạkia ag lelei?
3 Hạiasoagan Iris la Kel‘ạkia Ag Lelei: Ut ne puk ‘e Puk Ha‘a ne kel‘ạkia lelei ma hanis ‘on Jihova la pō la hạiasoagan iris ne ‘is rak‘ȧk tē sin la hue‘ȧk ag lelei. ‘Is la pō la garue‘ȧk ut ne puk fak se Salamo 139:1-4 ne Luke 12:6, 7 la kel‘ạkia salat ne Jihova kokon‘ȧk ‘is le‘et se le‘et. ‘E avat ne iris kel‘ȧk ‘oris ‘uạ‘uạ‘ȧk ti‘u se hanis fak keres ‘on Jihova, ‘oris hanisi ma agag fak‘ạitu la ‘ut se muạ. (Rom. 5:6-8; 1 Jone 4:19) Tape‘ma, ‘e avat ne iris ‘inea e ne ‘oris aga a‘rū‘ạkia Jihova, iạ la pō la rue‘ạkia iris la rē‘ia tē ‘e sal het ne la a‘oaf ka la faktē‘ȧk iạ.—Sal. 78:40, 41; FEFuạga 23:15.
4. ‘E avat ne ‘is la rak‘ȧk tēan ta le‘et ‘e garue marag ta, ‘is la kel‘ȧk ne ‘is ‘ē‘ȧk tapen ‘on rē pure ‘on iris?
4 Jihova kat has‘ȧk ra ta le‘et la tovavhiạn se ‘on foho. Ka iạ far‘ȧk se irisa ‘e ‘on kel‘ạkiạg ne poto kepoi ka iris la tạupir se ‘on puer‘ȧk tē. (Ais. 48:17, 18) ‘Is rakoa Jihova ‘e avat ne ‘is rak‘ȧk tē ‘e sal het ne hạiasoagan famori la a‘väh ‘e irisa ne tē ne ‘is rak‘ạki noj. ‘E avat ne iris aier‘ȧk ne iris kop la jen ‘oris mạuri, ‘es‘ao ne iris la pō kal ‘es tohiget ra. (Roma 12:2) Iạ a‘el‘ȧk tape‘ma irisa se iạ ne “ạsia ‘os huga,” Jihova.—FEFuạga 17:3.