Fā mamfuạ ne ‘otomis kạutạunạ‘iạg ta kat tög ra. ‘Ạmis tạupir se tē ne soko ‘e avat ne kạurotuạg ‘on lelea‘ rot fak Karisto kamata e, iris hilia huȧ‘ ne potsusunu la “huạ‘ia ‘ekaresaia ‘on ‘Ạitu.” (Garue 20:28) Fā mamfuạ ma‘at fak‘at ‘i muạ‘ȧk ma huạ‘ia kạurotuạg ta, “ ‘eake ‘e hasaga, ka ‘e ‘ofa; ‘eake ‘e ‘oaf se koroa pearpera ka ‘e huạg ririfa.” (1 Pita 5:1-3)Ka iris matạ‘ tapen se ‘ạmisa ?

Iris kokon‘ȧk ma pärea ‘ạmisa. Fā mamfua nā muạ‘ạkiạg ne täe ‘e Puk Ha‘a  ma hạiasoagan kạurotuạg ta la fumou ka la hại‘eleag ma ‘Ạitu. Fā mamfua ‘inea ne ‘Ạitu ta nā se irisa garue pumuạ te‘is. Iris tape’ma kat rē puer fakgagaj ra ‘on famori, ka iris matạ‘ se ‘otomis mȧür fak‘ata ma pa ‘es la ‘ạmis la ‘oaf‘oaf. (2 Korinita 1:24) La fak se fā huȧ‘ sipit ne kokon‘ȧk ‘on hag sip ta, fā mamfua ȧs‘ȧk la hại‘ineag a‘lelei ma iris hensạsiạg ne täe ‘e kạurotuga.​—Fäeag ‘es Fuạga 27:23.

Iris rak‘ạkia se ‘ạmisa la rē‘ia fiongar ‘on ‘Ạitu. ‘E te‘ ne gasav ‘i, fā mamfua rak‘ȧk tē ‘e ‘otomis tạunȧ‘ ne kạurotuga, la a‘ne‘ne‘ạkia ‘otomis pilifi. (Garue 15:32) Fā mamfuạ huạg aier ‘i muạ‘ȧk ma garue ag‘esea ma ‘ạmis ‘e garue marag ta, ka hạiasoagan ‘ạmis ‘e te‘ ne väeag ne mou se garue marag ta.

Iris a‘ne‘ne‘ạkia ‘ạmis. Fā mamfua a‘mou leum la hạifäegag ma ‘ạmis ‘e ‘otomis hanua, ne ‘e Rī ne Pure‘ag ta, la hạiasoag ma a‘fürmarien ‘ạmis ‘e fäeag ne Puk Ha‘a.​—Jemesa 5:14, 15.

Fā mamfua matạ‘ se kạurotuga, ma‘oi tē irisa garue tög ka matạ‘ tape‘ma se ‘oris kạunohoga ne ‘es‘ao‘ȧk a‘ti‘ ‘oris ava. Iạ tē nonojot la faktē‘ȧk hensạsiạg fā ‘i ‘e reko ‘oris garue fe‘eni.​—1 Tesalonaika 5:12, 13.

• Ka tes ta väeag garue ‘on fā mamfuạ ne kạurotuga?

• Ka fā mamfua kel‘ȧk tapen ‘oris kokon‘ȧk ne ‘ạmisa?

Puk Ha‘a foar ne iris fā agag rot fak Karisto ne a‘sokoa garue ne kạurotuga väe se ruạ​—‘ovasia ma fā agaga’. (Filipai 1:1) Iris hensạsiag fā his garue hạiasoag ‘e laloag ne ta kạurotuget. Ka garue tese ta fā agaga a‘sok la pō la ‘is la pō ‘on ‘es‘ao?

Iris hạiasoag se fā mamfua. ‘Is pō la tua‘nȧk se fā agag ne kạurotuga, iris a‘häe fak‘at ka garue lelei, iris ‘on rereag lelea‘ haharȧg ka iris ‘e ‘on rereag mafuạ‘ȧk se‘. Iris matạ‘ se väeag pumuạ ne fūfū‘ȧk vȧh la a‘sok hạisokoag ‘e kạurotuga. Tē te‘is a‘sok la pō la fā mamfua la ‘iof se rak‘ȧk tē ma garue huạ‘i.

‘Oris garue ‘es‘ao. Fā agag ‘on rereag väe la tạria ma ‘uạ‘uạ‘ạkia iris ne leum se tạunạ‘i. Iris ‘on rereag matạ‘ se misin ne maik heta, väeväe ne puku, matạ‘ se tē fak selene, ma väeväe ne ut ne garue marag ta se hensạsiag ne kạurotuga. Iris hạiasoag tape‘ma se a‘lelei ne Rī ne Pure‘ag ta. Fā mamfua la pō la far se irisa la hạiasoag se hensạsiạg mamfua. Fā agaga noh iạtiạt la a‘sokoa garuet ma ne nā se irisa, ma hele‘ue la kạurotuạg ta la ‘e‘ȧk iris ‘e rēko ‘oris garue fe‘eni.​—1 Timoti 3:13.

Iris kel‘ȧk ta mạl lelei het la fak ma ne iris fā rot fak Karisto. Fā agaga hil ‘e rēko ‘oris ag pumuạ fak‘ata. ‘E av ne iris a‘sokoa väega ‘e tạunạ‘i, iris a‘ne‘ne‘ia ‘otomis mā. ‘Oris fe‘eni se garue marag ta, tä rue‘ạkia ‘ạmis la huạg fe‘en. ‘Oris hạigarueag ma fā mamfua ta hū ne ‘ofa ma hugag ‘esea. (Efeso 4:16) Ma ‘e ta av het ka iris täla hele‘ la fā mamfuạ ne kạurotuga.

• Ka kạinag lelea‘ tapene ta fā agaga?

• Ka fā agaga hạiasoag tapen se garue ne kạurotuga la la‘ lelei?

Puk Ha‘ fo‘ou ta fȧ‘ tē ma‘oi hün se Parnapasa ma ‘apostol ta Paula. Fa ruạ ‘i rē garue ne huȧ‘ ne ȧs tē, iriạ hö‘ ma ạsia kạurotuạg ne fū‘ȧk mumua. Ka pō ‘e tese? Iriạ kokon‘ȧk aier mäur fak‘at ne ‘oriạ hensạsiga. Paula ‘ea ne iạ pa ‘es la “hö‘ la ạsia hensạsiga” ne iris tapen. Iạ värvär la la‘ȧk mäel tarạu his la a‘ne‘ne‘ia irisa. (Garue 15:36) Ta‘ag tēet ne ‘otomis huȧ‘ ne kạugarueaga a‘a‘sok ‘e terạni te ‘i.

Iris leum la a‘ne‘ne‘ạkia ‘ạmis. Huȧ‘ ne kạugarueaga ȧs se kạurotuạg 20 ma fumā ‘e ta ȧs a‘at. ‘E laloag ne fạut, iạ ȧs a‘ruạ kạurotuget, ma la noh‘ȧk gasavat. ‘Ạmis rak tē ‘e mạl lelei ne hensạsiạg ‘i kel‘ạki, ma ‘oris hạina tape‘ma kepoi ka iris ‘inos. Iris nā vahiạ la hại‘ineag ma iris ne riri‘i ka tape‘ma se iris ne mamfua. Iris ‘iạt la garue ag‘esea ma ‘ạmis, ‘e garue marag ta ma a‘sok ne hat puku. Huȧ‘ ‘i garue ag‘esea ma fā mamfua la ȧs ma fäeag a‘ne‘ne‘ạkia ‘ạmis, ka nā marag ne put fak‘atan ‘ạmis ‘e tạunạ‘i ma  kato‘aga.​—Garue 15:35.

Iris kokon‘ȧk a‘ti‘ lelea‘ ‘atakoa. Huȧ‘ ne kạugarueaga kokon‘ȧk a‘ti‘ mȧür fak‘at ne kạurotuga. Iris tạunȧ‘ ma fā mamfua ma fā agaga la ‘io hö‘ se garue ne kạurotuạg ta, ma nā se irisa muạ‘ạkiag ‘es‘ao, la iris la a‘sok a‘lelei ‘oris garue agag ta. Iris hạiasoagan iris ne painia la pō hue lelei ‘e ‘oris garue marag ta, ma iris ‘oaf la hại‘ineag, ma a‘fại se rogrog ne fup fak‘at ‘on iris ne kotä kamat la tē ag‘eseam. Te‘ ne hensạsiạg fā ‘i ‘hạigarueag la matạ‘ se ‘ạmisa,’ ‘e huạg ‘ofa. (2 Korinita 8:23) ‘Is noj la rakoa ‘oris mā, ma huạg fe‘eni se ‘Ạitu.​—Hiperiu 13:7.

• Ka tes ta ‘amnȧk ‘on iris Huȧ‘ ne kạugarueaga, ‘e ‘oris ȧs ne kạurotuga?

• Ka ȧs ne iris rē ‘es‘ao tapen se ‘äeag?

‘E avat ne pefä‘e soko, Uetnes ‘on Jihova kat fep ra la hạiasoag se ‘oris hensạsiạg ne noh ‘e ut ne pefä‘e soko. Garue fe‘en tape‘i kel‘ạkia ‘otomis hạihanisiạg aire le‘et se le‘et. (Jone 13:34, 35; 1 Jone 3:17, 18) Ka ‘ạmis hạiasoag tapen?

‘Ạmis hạiasoag fak selen. ‘E avat ne sög ti‘ut sok ‘e Jutia, hensạsiạg rot fak Karisto ‘e Antioki, nā selen la hạiasoagan ‘oris hensạsiạg fak‘ata. (Garue 11:27-30) ‘E ‘on ‘i‘i tape‘ma, ‘ạmis nā ‘otomis tē fakhanisi se kạurotuga la hạiasogan ‘otomis hensạsiạg ne täe ‘e rȧn te‘ ‘atakoa ne agtạu ma pefä‘e.​—2 Korinita 8:13-15.

‘Ạmis nā hạiasoag ne la ‘es‘ao. Fā mamfuạ ne täe ‘e utut ne pefä‘e soko, täla aoa la pō‘ia hensạsiạg ne täe ‘e kạurotuạg ta, ma la a‘fumou‘ạkia ne iris sại ‘atakoa. Av ne pefä‘e soko komiti ne nā hạiasoaga (relief) täla matạ‘ se väeväe ne tēla‘ā, tạn la ‘imo, hạ‘u, ut la noho ma garue ne tạku. Lelea‘ Uetnes ma‘oi nā ‘oris ava, ‘oris fạiva ma koroa la hạiasoag la a‘leleia Rī ne Pure‘aga ma rī ne ‘otomis hensạsiga. ‘Otomis hugag‘esea fak kạutạunạ‘iga ma ‘otomis garue ag‘esea, a‘vavhinen ‘otomis garue ‘e av tape‘i. ‘Ạmis hạiasoagan iris ne ‘ ‘ạmis pilif ag‘esea ma,’ ma hạiasoag tape‘ma se iris ne rot tū ‘e avat ne ‘ạmis pō e.​—Kalatia 6:10.

‘Ạmis nā fäeag a‘fürmaria‘ȧk huạg ‘e Puk Ha‘a. Iris ne agtạu ma pefä‘e pa pō fürmaria. ‘E av tape‘i, ‘ạmis pō ne‘ne‘ ‘e Jihova, “ ‘Ạitut ne a‘hele‘ua fürmaria.” (2 Korinita 1:3, 4) ‘Ạmis ‘oaf la hạiväegan fäeag porȧk ne Puk Ha‘a se iris ne ‘oris huga rū, ‘e ‘otomis a‘ne‘ne‘ȧk ne ‘oris huga ne Pure‘ag ‘on ‘Ạitu täla a‘ofia te‘ ne tē a‘rū ma pefä‘ ‘atakoa.​—Kel‘ȧk tē 21:4.

• Ka ‘e rēko tese ta Uetnes ‘on Jihova mij pạu la hạiasoag ‘e av ne pefä‘e soko?

• Ka rogrog a‘fürmariạ huạg tese ta ‘ạmis pō la hạiväeag ma iris ne agtạu ma pefä‘e?

Mumuạ la Jisu la al, iạ hạifäegag a‘pū‘ata ma iris häk ‘e ‘on tisaipeli​—Pita, Jemesa, Jone, ma Anriu. Avat ne Jisu fäeag‘ạkia faki‘oag ne ‘on la mariugame ‘e terȧn fakmuri, iạ nā se sạio‘ pumuạ het: “Sei ta le‘ ea‘ huạg aier ka huạg ‘atmại ta, ne ‘on gagaja hil vạhia la puer se ‘on kạunohoag ta, ma nā ‘eris tēla‘ā ‘e ‘on ava?” (Mataio 24:3, 45; Mareko 13:3, 4) Jisu a‘fumou‘ȧk se ‘on tisaipeli ne iạ ta ‘oris “gagaja”, ma iạ täla hilia iris ne la osia tēla‘ā fak‘ata se ‘on lelea‘ rak tē ‘e terȧn fakmuri. Ka sei ta le‘ ea‘ te‘?

Iạ ta kauạg mea‘mea‘ het ne nin ka tạupir se Jisu. “Le‘ ea‘” te‘ ta Kạupuer ne Muạ‘ȧk tē ne Uetnes ‘on Jihova. Ia na‘ia tēla‘ā fak‘ata se ‘oris hensạsiga ‘e ‘on av noj pạu heta. ‘Ạmis tua‘nȧk se le‘ ea‘ huạg aier te‘ la nā‘ia ‘etemis “väeag ne tēla‘ā ‘e ‘on av lelei.”​—Luke 12:42.

Iạ matạ‘ se kạunohoag ‘on ‘Ạitu. (1 Timoti 3:15) Jisu nā se le‘ ea‘ ta väeag pumuet la matạ‘ se garue ne kạutạunạ‘iạg ‘on Jihova ‘e rȧn te‘​—matạ‘ua ‘on koroa fakforo, muạ‘ạkia garue marag ta ma rak‘ȧk tēan ‘ạmis ‘e laloag ne kạurotuga. La nā se ‘ạmisa tē ne ‘ạmis kop la ‘ese ‘e av het ma ne pa ‘ese , “le‘ ea‘ huạg aier ka huạg ‘atmại ta” nāam tēla‘ā fak‘ata, ‘e puk ne ‘ạmis garue‘ȧk ‘e garue marag ta, ka tape‘ma se prokräm ne a‘sok ‘e tạunȧ‘ ne kạurotuga ma kato‘aga.

Le‘ ea‘ ta huạg aier se aier ne Puk Ha‘a ma ‘on fäeag fas‘ạki la marag‘ạkia rog heg ta. Iạ huạg ‘atmại tape‘ma ‘e ‘on matạ‘ a‘lelei se te‘ ne tē ne mou se Karisto ta ‘e rȧn te‘. (Garue 10:42) Jihova ạlạlum‘ạkia garue ‘on le‘ ea‘ ta ‘e ‘on ös a‘fuạmamạu ne tēla‘ā fak‘ata.​—Aisea 60:22; 65:13.

• Ka sei ta Jisu hilia la hag fak‘atan ‘on tisaipeli?

• Ka sal tese täe le‘ ea‘ ta hat la huạg aier ka huạg ‘atmại?

‘E senjuri mumue ta, kạugarueag mea‘mea‘ het, “iris ‘apostolo ma fā mamfuạ ne Jerusalemi” ta kạupuer ne muạ‘ȧk tē ne a‘sokoa rē pure ‘e fạ‘ ne kạurotuạg fak Karisto ne nini. (Garue 15:2) Iris sạkior mumuạ se Puk Ha‘a, ma tä iris tạupir se muạ‘ạkiạg ne ‘at ha‘ ‘on ‘Ạitu ma hele‘ue la iris la a‘häe hugag‘esea ‘e ‘oris rērē pure. (Garue 15:25) Te‘is mạl het ne tạupir sin ‘e terạni tē ‘i.

‘Ạitu a‘es‘ao‘ạkia kạupuer ne muạ‘ȧk tē la a‘sokoa ‘on fiongaro. Hensạsiạg fā ne nini ne garue ‘e Kạupuer ne Muạ‘ȧk tē, kokon‘ȧk a‘ti‘ aier ne Fäeag ‘on ‘Ạitu, ma iris ‘inea lelei la matạ‘ se garuet ne ‘ạmis a‘soko ma se sại‘o ne mou se ‘otomis pilifi. Iris tạunȧ‘ ‘e te‘ ne gasav ‘i la hạifäegagan pa ‘es ‘on hensạsiga ‘e rȧn te‘ ‘atakoa. La fak se senjuri mumue ta, muạ‘ạkiạg ne puk ha‘a nā ‘e puk ne fạ‘i, ne ‘e huȧ‘ ne ȧs tē ma ‘e sal hoi‘ȧk. Tē te‘is hạiasoagan famör ‘on ‘Ạitu la hugag ‘esea ‘e a‘häe ma garue. (Garue 16:4, 5) Kạupuer ne Muạ‘ȧk tē ta matạ‘ se ös ne tēla‘ā fak‘ata, a‘ne‘ne‘ạkia marag‘ạkiạg ne rog heg ta la muạ ma ‘io tape‘ma se hiliạg ne hensạsiạg fā la a‘sokoa väeag garue.

Kạupuer ne muạ‘ȧk tē tạupir se muạ‘ạkiạg ne ‘at ha‘ ‘on ‘Ạitu. Kạupuer ne Muạ‘ȧk tē aoa muạ‘ạkiạg ‘on iạ ne Puer Purere ‘e Lạgi ma ‘e Rȧn te‘, ‘Ạitu Jihova ma Filo‘ ne kạurotuga Jisu Karisto. (1 Korinita 11:3; Efeso 5:23) Iris ‘i kat hat ra iris la puer se famör ‘on ‘Ạitu. Iris, “tạupir ma kikia Läm ta [Jisu] ka ‘inea ne iạ la‘ se tei,” la fak ma se iris lelea‘ rot fak Karisto ‘atakoa ne nini. (Kel‘ȧk tē 14:4) Kạupuer ne Muạ‘ȧk tē ‘uạ‘uạ‘ȧk se ‘ạmisa ‘e ‘otomis ro‘ạit‘ȧk ne iris ma garue ne iris a‘soko.

• Ka sei täe ‘e laloag ne Kạupuer ne Muạ‘ȧk tē ‘e senjuri mumue ta?

• Ka Kạupuer ne Muạ‘ȧk tē ao tapen muạ‘ạkiạg ‘on ‘Ạitu ‘e terạni te ‘i?

Peteli, iạ as Hiperiu, ma ‘on fuạga “Rī ‘on ‘Ạitu.” (Kamataga 28:​17, 19) As te‘ hạitạuạg lelei se ofes ne maja ne Uetnes ‘on Jihova fū‘ạki, ‘e ut tūtū ne rȧn te‘, la muạ‘ạkia ma tokoa garue marag ta. Kạupuer ne Muạ‘ȧk tē garue ‘e ofes ti‘ ta ‘e New York State, Mereke, ma ‘e täe iạ matạ‘um se la‘la‘ ne garue ‘e maj ne ofese ‘e hanuạ ma‘oi ‘e rȧn te‘. Te‘ ne iris ‘atakoa ne garue ‘e ut ‘i, hat iris la kạunohoag ne Peteli. La fak ma se ta kạunohogat, iris noh ma garue ag‘esea, ‘atē ag‘esea ma hat Puk Ha‘ ag‘esea.​—Salamo 133:1.

Ut te‘is tak tū ‘e rēko iris ‘atakoa ‘e kạunohoag te‘, hạigarueag. ‘E te‘ ne Peteli, ma ‘on fā ma hạiạn fak Karisto, ne nā ‘atakoa ‘oris ava la a‘sokoa fiongar ‘on ‘Ạitu ma agag se te‘ ne tē ‘atakoa ne mou se Pure‘ag ta. (Mataio 6:33) Kat ‘es ra ta le‘et garue tög, iris ma ut nā la noh ma ‘atē, ma iris pō ta pȧn mea‘mea‘ het la rē‘ia tē ne mou se irisa. Le‘et ma ‘e Peteli ma ‘on garue väet, ‘e ofese, ‘e rī kuk ta ne ‘e ut ‘atēag ta. Iris ‘e ‘on rerege garue ‘e utut ne pạnia ma rē‘ia puku, ne a‘ma‘ma‘ tē , sopoa hạ‘u, a‘lelei tē ne garue tū hoi‘ȧk.

Ut popot pạut ne tokoa marag‘ạkiạg ne Pure‘ag ta. ‘Amnȧk pạu ne te‘ ne ut ‘atakoa ne Peteli, la forȧs‘ạkia aier ne Puk Ha‘a se te‘ ne famör ‘atakoa. La fak se puk hete‘, iạ fȧ‘ ‘e fȧn puer ne Kạupuer Muạ‘ȧk tē ta, ma nā ‘e e-mail ta se ut ‘atakoa ne rȧn te‘ ne ma‘on tim höl‘ȧk fäegat. Puku pȧn ‘e misin pạniag puk ne väv pạu ‘e ut his ‘e Peteli ne ma ‘on misini, ma mel se kạurotuga ne sir ‘e 110,000. ‘E te‘ ne tē ‘atakoa, kạunohoag ne Peteli nā pạu ‘oris vahia la tokoa garuet ne ti‘ pumuạ se‘​—marag‘ạkiag ne rog heg ta.​—Mareko 13:10.

• Ka sei ta iris ne garue ‘e Peteli, ma tes ta nā se irisa?

• Ka tes ta garue a‘pumuạ‘ạkit ne Peteli nā vahiạ la tokoa?

Kạunohoag ne Peteli garue ‘e maj ma‘oi ne matạ‘ se garue marag ta ‘e hanuet ne hanuạ his. Iris agag ‘e höl‘ȧk fäega, pȧn ne puku, matạ‘ ne puku, rē ne mạlu ma tē hoi‘ȧk ne mou se garue ta ‘e hanuạ ạfu.

Maj ne komiti ne tior‘ạkia garue. Kạupuer ne Muạ‘ȧk tē väe garue ne mou se maj ne ofese se  fā mafuạ fak‘at fol ne siriạf se muạ, ne täe ‘e Komiti ne Maja. Komiti rak‘ȧk se Kạupuer ne Muạ‘ȧk tē fup ne garue ta ma pefä‘ ne a‘mou soksok ‘e hanuạ ne iris matạ‘ sin. Rogrog ‘i hạiasoagan Kạupuer ne Muạ‘ȧk tē la rē a‘häe ne hạiasoag tapene täe la pạnim ‘e puku ‘e avat ‘ut‘utum ma nā ‘e tạunạ‘i ma kato‘aga. Mat ne Kạupuer ne Muạ‘ȧk tē, ta fekạu‘ȧk la ạsia maj tūtū ma nā muạ‘ạkiag se Komiti ne Maja, ‘e garue‘ȧk ne väeag ne mou se irisa. (Fäeag ‘Es Fuạga 11:14) ‘E laloag ne prokräm ta, mat ne ofes puer ta, la nā ta maragat ne ös la a‘ne‘ne‘ạkia iris ne noh ‘e ut ‘atakoa ne ofes ne maja matạ‘ sin.

Hạiasoag ne nā se kạurotuga. Hensạsiạg fā huạg mafuạ ne täe ‘e maj ne ofese kạu‘ȧk ma fū‘ȧk kạurotuạg fo‘ou. Hensạsiag fā muạ‘ȧk garue ne painia, lelea‘ ne fekạu‘ạki, huȧ‘ ne kạugarueaga ‘e ut ne mou se maj ne garue. Iris fū‘ȧk la‘la‘ ne kato‘aga, hạisok‘ạkigan garue ne mou se fū‘ȧk ne Rī ne Pure‘ag fo‘ou ma ‘io la puku la mel se kạurotuga. Te‘ ne tē ne rē ‘e ofes ne maja, a‘sok ‘e hạihi‘agat ne tạu la vȧh‘ạkia garue marag ta.​—1 Koronita 14:33, 40.

• Ka Komiti ne Maja hạiasoag tapen Kạupuer ne Muạ‘ȧk te?

• Ka väeag ne garue tese ta ofes ne maja matạ‘ sin?

Puk ne ‘ạmis pạni ‘el se fäeag 700, la pō la “rog heg ta” la marag‘ȧk  se “te‘ ne pure‘ag ‘atakoa, ma te‘ ne kạinaga, ma te‘ ne fäeag tūtū, ma te‘ ne kakại.” (Kel‘ȧk tē 14:6) Ka ‘ạmis pō tapen la a‘sokoa garue te‘? ‘Ạmis a‘sok ‘e hạiasoag ‘on iris ne fȧ‘ tē ‘e rȧn te‘ ‘atakoa, ma ‘el se 3,300 famör höl‘ȧk te​—iris ‘atakoa Uetnes ‘on Jihova.

Puku fȧ‘ mumuạ ‘e fäeag Fifis ta. Kạupuer ne Muạ‘ȧk tē ta muạ‘ạkia garue ne Maj ne Fȧ‘ tē ta ‘e ‘otomis ofes ti‘ ta. Maj ne fȧ‘ tē ta, ta väea  garue ‘on iris ne fȧ‘ tē ‘e ‘otomis ofes ti‘ ta, ma iris ne täe ‘e ofes ne maja ‘e ut hoi‘ȧk ‘e rȧn te‘. Iris ne fȧ‘ tē leum ‘e hanuạ tūtū, ta ‘on‘on rogrog ne fạ‘i täe se te‘ ne kạinag famori, la pō la famör ‘e rȧn te‘ la ‘oaf la hat ‘e ‘otomis puku.

Tē ne fạ‘i nā se iris ne höl‘ạkia fäega. ‘E avat ne tē ne fạ‘i a‘nonoj‘ȧk ma aier‘ȧk vạhia, ma tä nāaf ‘e e-mail se tim tūtū ne höl‘ạkia fäega ‘e rȧn te‘. Iris höl‘ȧk, jek, ma a‘nonoj‘ȧk. Iris fe‘en la hilia ‘fäeag ne noj ka aier’ ka ‘es ‘e a‘häe ‘eseat ma ne täe ‘e fäeag fifis ta ‘e av ne iris la höl‘ạki e se ‘oris fäeag tūtū.​—Le‘ Marag ta 12:10.

Kompiuta a‘väv garue ta. Kompiuta kal pō ra la rē‘ia garue ‘on iạ ne fȧ‘ tē ma iạ ne höl‘ȧk tē. A‘es‘av‘ȧk ne kompiuta ma prokräm hoi‘ȧk ne täe ‘e ‘on laloga, a‘väv pạu ‘oris garue. Uetnes ‘on Jihova ös se ta prokräm het ‘e kompiuta Multilanguage Electronic Publishing System (MEPS), ne pō la häe‘ȧk fäeag tarạu ma fumā, la‘oag ‘esea ma mạlu, ma kotä a‘potsusun la pȧn.

Ka pō ‘e tese ta ‘ạmis fe‘en la höl‘ạkia puku se kạinag fäeag ma‘oi? ‘E rēko te‘is  fiongar ‘on Jihova la “te‘ ne famör ‘atakoa la pō‘ia mạuri, ma hele‘ueris se ‘ineag ne aier ta.”​—1 Timoti 2:3, 4.

• Ka ‘otomis puku fȧ‘ tapen?

• Ka pō ‘e tese ta ‘ạmis höl‘ȧk ‘otomis puku se kạinag fäeag ma‘oi?

‘Otomis kạutạunạ‘iag ta pȧn ma fuạp‘ȧk miliön his ‘e Puk Ha‘a ma puk tūtū hoi‘ȧk, ka kat tög‘ȧk ra. ‘Ạmis fū‘ȧk ma a‘lelei Rī ne Pure‘aga ma ofes ne maja. ‘Ạmis hạiasoag äf his ‘e kạunohoag ne Peteli ma iris ne fekạu‘ạki, ma nā hạiasoag ‘e av ne pefä‘e soko. Kop ma ‘äe la a‘häe ‘e ‘ou huga, ka te‘ ne tē ‘i tög tapen?

‘Ạmis kat nā tā ‘on saghul ra, kat ‘es tȧr‘ȧk ‘umefe, ne ta tög foh‘ạki. Aier tög ne a‘sokoag ne garue ne marag ta hạihạia pạu, ka ‘ạmis kat ao selen ra. ‘Sir ‘e fạu tarạut ne ofiof, ruạ ne pȧn a‘at ne Watchtower fȧ‘ ne ‘ạmis aier‘ȧk ne Jihova ta hạiasoagan garue te‘ ma ‘ạmis “kal  far tē ra ne far hạiasoag ra ‘e famori”​—ma ‘ạmis kat far tē ra ‘e ta av!​—Mataio 10:8.

‘Otomis garue ‘atakoa, tok ‘e tē fakhanis ne famori nā ‘e ‘oris ‘oaf la nā tē. Famör ma‘oi kel‘ȧk ‘oris ‘uạ‘uạ‘ạki se garue te‘, rak‘ạkiag ne Puk Ha‘a, ma nā tē fakhanis. Famör Uetnese nā ‘e ‘ofa ‘oris ava, ne‘ne‘i, mone, ma koroa hoi‘ȧk se a‘sokoag ne fiongar ‘on ‘Ạitu ‘e rȧn te‘ ‘atakoa. (1 Puk Asoat se Puk ‘on Sạu 29:9) Ma ‘on kes ‘e Rī ne Pure‘ag ta ma ‘e ‘otomis kato‘aga, se iris ne värvär la nā tē fakhanisi. Ti‘ ne tē fakhanis ne pō kat leum ra ‘e famör ‘es tē, ti‘ ta leum kikia ‘e famör se ‘es tē ne fak se hȧn takfuạ keiet ne Jisu voi‘ạki, ne nā se kikia pȧn mea‘mea‘ he ruạ se jes nāag mone ta. (Luke 21:1-4 ) Le‘et ma la pō la “a‘pā‘ȧk tē la ȧf‘ȧk” la nā “la fak ma ne iạ ‘amnȧk vȧh ‘e ‘on huga.”​—1 Korinita 16:2; 2 Korinita 9:7.

‘Ạmis aier‘ȧk pạu ne Jihova la rue‘ȧk ma kikia huạg ‘on te‘ ne iris ne pa ‘fakeanean se iạ ‘e ‘oris koroa’ la tokoa garue ne Pure‘ag ta, la pō la ‘on rērē la sok.​—Fäeag ‘es Fuạga 3:9.

• Ka tes ta tū ‘e ‘otomis kạutạnạ‘iag ta ma rot tūtū ne tore?

• Ka tē fakhanis ne nā ‘es‘ao‘ȧk tapen?

Rak‘ȧk tē ne a‘sok ‘e Rī ne Pure‘aga, iof‘ȧk ma kikia se Pure‘ag ‘on ‘Ạitu​—filo‘ ne garue marag ‘on Jisu.​—Luke 8:1.

Iạ ta utut ne titi‘ȧk aire a‘a‘soko. Te‘is ta utut ne fūfū‘ạkia la marag‘ạkia Pure‘ag ta. (Mataio 24:14) Rī ne Pure‘aga kat tatạu ra ‘on ti‘u ma ‘on ös heta, ka fū‘ȧk a‘lelei la pō la ‘es‘ao‘ȧk ‘e kạurotuag he his. ‘E fạu his ne vȧh se,‘ạmis fu‘ȧk vạhia Rī ne Pure‘ag äf hisaghul (hạila‘oag ma rī liạm ‘e terạnit) ‘e rēko ma‘oi ne kạurotuga. Ka tē te‘is pō tapen?​—Mataio 19:26.

Fū‘ȧk ‘e tē fakhanis ne nā la mou se fūfū‘ȧk ne Rī ne Pure‘aga. Tē fakhanis ‘i nā se maj ne ofese la selene la garue‘ȧk la fū‘ȧk ma a‘fo‘oua Rī ne Pure‘aga.

Iris ne fū‘ạkia leum ‘e hanuạ tūtū ma nā ‘oris ava la garue ka kat tög ra. ‘E hanuạ ma‘oi, fūfū‘ȧk vạhia la ma ‘on Kạugarueag fū‘ȧk Rī ne Pure‘aga. Iris la‘‘e kạurotuget se kạurotuget ‘e hanue ta, ka hele‘ ‘e ut pū‘ata, la hạiasoagan iris la fū‘ạkia ‘oris Rī ne Pure‘aga. ‘E hanuạ ‘on rereag, iris Uetnes ne potsusunu, ta hil la matạ‘ se fūfū‘ȧk ma a‘lelei ne Rī ne Pure‘aga ‘e ut ne väe se irisa. Aier iris ne majạu se garue fū‘ȧk rī leum ‘e itu‘ tūtū la haiasoag ‘e te‘ ne ut ne fū‘ȧk tē ta rē, iris ne mou se kạurotuạg ta, ta tạria mah ne garue ta. ‘At ha‘ ‘on Jihova ma huạg ‘atakoa ne ‘on famori, ta a‘vavhinen la sok te‘ ne tē ‘atakoa ‘i.​—Salamo 127:1; Kolosa 3:23.

• Ka ‘e rēko tese ta ‘ạmis he‘ ‘otomis ut ne titi‘ạkiga Rī ne Pure‘aga?

• Ka pō tapen la fū‘ȧk Rī ne Pure‘aga ‘e rȧn te ‘atakoa?

Rī ne Pure‘ag ‘atakoa ne Uetnes ‘on Jihova ‘es ‘e as ha‘ ‘on ‘Ạitu. Iạ tē faktē‘ạkit la a‘ma‘ma‘, ma a‘leleia ‘otomis Rī ne Pure‘ag ta, pō ‘e iạ väeag a‘pumuạ‘ạkit ne la‘oag ‘esea ma ‘otomis titi‘ạkiga. ‘Ạmis ‘atakoa pō la ‘es väeag.

Hạiasoag la a‘ma‘ma‘ tē ‘e vạhiạg ne tạunạ‘i. ‘Otomis hensạsiạg fā ma hạina ‘oaf la a‘ma‘ma‘ Rī ne Pure‘ag ta ‘e av ne tạunạ‘i vạhi. Rī ne Pure‘ag ta a‘ma‘ma‘ a‘lelei pạu a‘esea ‘e gasavat. Ta fā mafuet, ne ta fā agagat ta muạ‘ạkia garue ta, ‘e ‘on tạupir se fūfū‘ȧk tēet ne ös vạhia. Iris he his tȧf tē, i‘ ne vacuum pupui ta, jạkoa päega, a‘ma‘ma‘a rī la‘oga, i‘ua tiro, ‘aoa mofa ma a‘ma‘ma‘oa lag pā ta. Ma ‘on terạnit ‘e fạu ta fū‘ȧk a‘vȧh la kạurotuạg ‘atakoa la ‘es väeag ‘e a‘ma‘ma‘ ne Rī ne Pure‘ag ta. Lä‘riri‘i täla rak la faktē‘ȧk ut ne titi‘ạkiga, ‘e av ne iris la ‘es väeag hạisokoag ‘e a‘ma‘ma‘ tē ta.​—Le‘ Marag ta 5:1.

Hạiasoag la a‘lelei tē. ‘E te‘ ne fạu ‘i, ma ‘on ȧs tēet rē la sạkior a‘lelei se laloag ne Rī ne Pure‘ag ta ma sisi. Ȧs tē te‘ rē, la a‘leleiag ne rī ta la a‘sok hạisokoag la pō la nōnō lelei ma, ka kal tör selen ra. (2 Puk Asoat se Puk ‘on Sạu 24:13; 34:10) Titi‘ạkiga hạitạuạg la rē se ‘Ạitu ‘e Rī ne Pure‘agat ne matạ‘ a‘lelei pạu ka ma‘ma‘. ‘Otomis ‘es väega ‘e garue te‘, ‘ạmis kel‘ȧk ‘otomis hanisi ma a‘pumuạ‘ȧk ne Jihova ‘e ut ne titi‘ạkiga. (Salamo 122:1) Tē te‘is tē keleag helavat se iris ne noh ‘el se Rī ne Pure‘ag ta.​—2 Korinita 6:3.

• Ka ‘e rēko tese ta ‘ạmis kat a‘sạunoa‘ȧk ra ‘otomis ut ne titi‘ạkiga?

• Ka fūfū‘ȧk tese ta rē la Rī ne Pure‘ag ta la nōnō ma‘ma‘ ma?

Ka te‘ ka ‘äe pa a‘ti‘ua ‘ou ‘inea ‘e Puk Ha‘a? Te‘ ka ‘äe pa ‘inea ta ut ne pukut, famorit, hanuet, ne tēet ne fäeag‘ȧk ‘e Puk Ha‘a? Ne, te‘ ka ‘äe rē a‘häe ne fäeag ‘on ‘Ạitu la pō la hạiasoag se tēet ne a‘kokonoa ‘äe? Ma ‘äe la pō la ‘es‘ao‘ȧk laipri ne Rī ne Pure‘ag ta.

Tē garueag ma‘oi la hạiasoagan ‘ou sạkior tē ta. Kop ma, ‘äe kat ‘es ra ‘e te‘ ne puk sui ‘atakoa ne Puk Ha‘a, ne Uetnes ‘on Jihova pạni ‘e ‘ou fäeag ta. Ka ‘e laipri ne Rī ne Pure‘ag ta, ‘el se ma la te‘ ne puk ne pạni, täe ‘e ‘on laloga. Kop ma kạinag Puk Ha‘ ma‘oi ‘e täe, puk ne fäega, ma puk hạiasoag hoi‘ȧk. Sại se ‘äea la ‘es‘ao‘ȧk ut te‘ ‘e av ne tạunạ‘i kat seminte kamat ra ne ‘e vạhiạg ne tạunạ‘i. Kepoi ka ma ‘on kompiuta, kop ma Watchtower Library täe ‘e ‘on laloga. Iạ prokräm ne kompiuta het ne hoi se ma ‘e te‘ ne kạinag puku ma vavhiạn pạu la garue‘ạkia la sạkiroa ta resonit, fäeag het, ne ta ut ne pukut.

Iạ ‘es‘ao se lelea‘ rako ne täe ‘e Rak ne Garue Marag ta. Kepoi ka ‘äe sur se rak ta, ‘äe la pō la garue‘ȧk a‘lelei tē ne täe ‘e laipri ne Rī ne Pure‘ag ta ‘e av ne ‘äe osia ‘ou toko. Ovasia ne rak ta, tä puer se laipri ta. ‘On garue la ho‘am puk fo‘ou ne toa‘ pạni ma jạk a‘leleia puku. Iạ ne ‘ou le‘ rē hat puk ta la pō la kel‘ȧk se ‘äea ne la ao tapen rogrog ne ‘äe pa ‘ese. Ka ha‘ la hot‘ȧk puku ‘e laipri ne Rī ne Pure‘ag ta. Tape‘ma, ‘is noj la matạ‘ a‘lelei puku la se pearpear‘ia.

Puk Ha‘a rak‘ȧk ne ‘os la “hại‘ineag ma ‘Ạitu,” ‘is kop la ao la fak se ‘is aoa “koroa ne näe.” (Fäeag ‘es Fuạga 2:1-5) Laipri ne Rī ne Pure‘ag ta la pō la hạiasoagan ‘äe la kamatan ‘ou sạkior tē ta.

• Ka tē garueag ne sạkior tē tese täe ‘e laipri ne Rī ne Pure‘ag ta?

• Ka sei täla pō la hạiasoagan ‘äe la ‘es‘ao‘ȧk a‘leleia laipri ta?

Jisu ‘ea se ‘on lelea‘ rak tē: “‘Omus tafa kop la puạlpuạl ‘e muạ ‘on famori, la iris la räe se ‘omus garue lelei, ma a‘kölör‘ạkia ‘omus Ö‘fāat ne täe ‘e lạgi.” (Mataio 5:16) Ta ‘on‘on ‘ạmis a‘es‘ao‘ȧk a‘lelei tē garueag fo‘ou la fak se Internet ta. ‘Otomis Web site ta, jw.org, ‘es ‘e rogrog ne sui‘ạkia pilifi ma garue ne Uetnes ‘on Jihova. Ka tes ta tē hoi‘ȧk ne täe ‘e ‘on laloga?

Tög ne Puk Ha‘a nā se sạio‘ ne fa‘ sại‘o. ‘Äe la pō la räe se tög ne sại‘o ne famori a‘mou sạisạio‘. La fak se tög ne sạio‘ he on ne täe ‘e laloag ne tract hete‘ Ka tei ka ‘Äe pa ‘Inea Aier Ta? ne täe ‘e internet ta ne sir ‘e kạinag fäeag 400. ‘Äe la pō la hat New World Translation ne sir ‘e kạinag fäeag 100 ma puk he his ne ‘es‘ao‘ȧk la rakoa Puk Ha‘a, la fak se puk hete‘ Ka Tes Tä Puk Ha‘a ‘Ea Aire? ma issues fo‘ou ne mekasin rua The Watchtower ma Awake! Puk ma‘oi la pō la hat ne la a‘fại ‘e internet ta, ‘e prokräm fak se PDF, ne EPUB. ‘Äe la pō la pȧn rạu peap he his la hạiväeag se iris ne ‘oaf la hat ‘e ‘oris fäeag ta! Ma ‘on mạl la kel se iris ne fäeag ‘u‘u. ‘Äe la pō la download la a‘fại se hatag ne Puk Ha‘a, drama ne Puk Ha‘a ma mak helav ‘e ‘ou av tafa.

Rogrog ne mou se Uetnes ‘on Jihova. Ma ‘on rogrog ma mạl luạk fo‘ou ‘e internet ta, ‘e rēko ‘otomis garue marag ta ne a‘sok ‘e rȧn te‘ ‘atakoa, ma tē ne lelea‘ Uetnes ‘on Jihova agtạu mar, tape‘ma se ‘otomis garue hạiasoag ‘e av ne pefä‘e soko. ‘Äe la pō la hat tape‘ma se rogrog ne ut ne kato‘ag ti‘ ta la a‘soko, ma tape‘ma se rogrog hoi‘ȧk ne mou se ofes ne maja.

Te‘is salat, ‘ạmis pȧn‘ạkia taf ne aier ta se ut sousou pạu ne rȧn te‘. Tē te‘is ‘es‘ao se famör ne te‘ ne hanua, tape‘ma se ut fak se Antarctica. ‘Otomis ro‘ạitu te‘is la ‘a‘väv forȧs‘ȧk ne fäeag ‘on Jihova’ se rȧn te‘ ‘atakoa, la a‘kölör‘ạkia ‘Ạitu.​—2 Tesalonaika 3:1.

• Ka tapen ‘es‘ao ne jw.org ‘e hạiasoag ne famori la rakoa aier ne Puk Ha‘a?

• Ka tes ta ‘äe oaf la kel ‘e ‘otomis Web site ta?