IGICE CA 5

Imbere ya rya Segenya rikomeye: Ni bande bumvirije? Ni bande batumvirije?

Benshi mu bantu bo mu gihe ca Nowa bakora ibibi. Itanguriro 6:5

Abamarayika babi bariyambitse imibiri y’abantu baca barongora abagore bo kw’isi

Adamu na Eva baravyaye abana, maze abantu baba benshi kw’isi. Mu nyuma, abamarayika bamwebamwe barifatanije na Shetani mu bugarariji bwiwe.

Baraje kw’isi maze biyambika imibiri y’abantu kugira ngo bashobore kurongora abagore. Abo bagore bavyaye abana bafise ubushobozi burengeye ubw’abantu, abo bana bakaba bari inkazi kandi bakomeye cane.

Agahungu kariko karakubita umugore afise umwana; Abanefilimu, ari bo bana b’abamarayika babi, ni inkozi z’ikibi

Isi yaciye yuzura abantu bakora ibintu bibi. Bibiliya ivuga iti: “Ububi bw’umuntu bwari bugwiriye mw’isi [kandi] impengamiro yose y’ivyiyumviro vy’umutima wiwe yari mbi gusa igihe cose.”

Nowa yarumvirije Imana maze arubaka ubwato. Itanguriro 6:13, 14, 18, 19, 22

Nowa yari umuntu ameze neza. Yehova yabwiye Nowa yuko yagira atikize ababisha akoresheje Isegenya rikomeye.

Nowa n’umuryango wiwe bariko barubaka ubwato

Imana yabwiye kandi Nowa ngo yubake ubwato amahero, abwinjizemwo umuryango wiwe be n’ibikoko vy’ubwoko bwose.

Nowa arabwira abantu ko hari mu gutera Isegenya bagaca bamutwenga

Nowa yaraburiye abantu ku bijanye n’Isegenya ryagira rize, mugabo ntibumvirije. Bamwe baramutwenze, abandi baramwanka.

Nowa n’umuryango wiwe bariko barinjiza ibikoko mu bwato

Ubwato bumaze kwuzura, Nowa yarinjijemwo ibikoko.