Umusi wo kuronka impapuro z’umutsindo ni umusi w’akaroruhore

“TWAHEZAGIWE mu kuronka umusi w’akaroruhore. Akazuba karaka. Ijuru rirakeye. Ivyatsi biratotahaye. Inyoni ziriko ziraririmba. Uravye ukuntu hameze biboneka ko ari umusi w’akaroruhore, ari co gituma ibintu biza kugenda neza. Kwa Yehova Imana ibintu ntivyobura kugenda neza. Ni Imana itanga imihezagiro”.

Ayo majambo yavuzwe n’umuvukanyi Samuel Herd, umwe mu bagize Inama Nyobozi y’Ivyabona vya Yehova, mu gutanguza porogarama yo gutanga impapuro z’umutsindo ku mugwi ugira 117 wa rya Shure ry’ivya Bibiliya ry’i Gileyadi rya Watchtower. Hari kw’igenekerezo rya 11 Nyakanga 2004. Iyo porogarama nziza yarimwo impanuro ziremesha zishingiye kuri Bibiliya hamwe n’ivyo abanyeshure biboneye mu kiringo c’iryo shure, be n’ivyabonywe vyashikirijwe n’abasanzwe ari abamisiyonari. Ego cane, wari umusi w’akaroruhore ku bantu 6.974 bari aho ku Kigo ntanganyigisho c’Ivyabona vya Yehova c’i Patterson i New York, no ku bari ku nyubakwa z’i Brooklyn n’i Wallkill bariko bakurikirana iyo porogarama biciye ku vyuma bisohora amajwi n’ivyerekana amasanamu.

Abanyeshure barashikirijwe amajambo aremesha

John Kikot, uno akaba ari mu bagize Komite y’ishami rya Leta Zunze Ubumwe za Amerika, yarashikirije amajambo aremesha ashingiye ku mutwe-shimikiro uvuga ngo “Nugumane umunezero w’umumisiyonari”. Yarerekanye yuko abanyeshure b’i Gileyadi bazwi yuko ari abantu bafise umunezero, nk’uko vyagaragariye kuri iryo tangwa ry’impapuro z’umutsindo. Inyigisho yo mu Vyanditswe yatanzwe mu kiringo c’iryo shure yararonkeje abo banyeshure umunezero, bakaba rero bari bakwije ibisabwa kugira ngo bafashe abandi kuronka umunezero nk’uwo. Uti gute? Mu kwitanga mu busuku bwabo bw’ubumisiyonari. Yezu yavuze ati: “Gutanga kuzana umugisha [canke, “agahimbare”, NW], kuruta guhabga” (Ivyakozwe 20:35). Uko abo bamisiyonari bashasha bigana Yehova Imana, we “Mana ihimbawe” kandi itanga cane ituma abandi bashobora kuronka ukuri, bazoshobora kugumana umunezero wabo.—1Timote 1:11, UB.

Uwakurikiye kuri iyo porogarama yari uwundi muvukanyi wo mu bagize Inama Nyobozi ari we David Splane, akaba yashikirije insiguro ifise umutwe uvuga ngo “Uzokora iki kugira ngo ubane neza n’abandi?”. Nta mazinda yuko ari vyiza kandi ari ivy’igikundiro kubana nya kubana canke kubana mu bumwe, naho ivyo bishobora gusaba ko umuntu aba ‘vyose kuri bose’ (1Ab’i Korinto 9:22; Zaburi 133:1). Umuvukanyi Splane yavuze yuko abo bene gusohoka iryo shure bohuye n’abandi bantu benshi mu gikorwa c’ubumisiyonari, uri abo mu cibare, uri abamisiyonari bagenzi babo, uri abavukanyi n’abavukanyikazi bo mu mashengero barungitswemwo, be n’abo ku biro vy’ishami bihagarikiye igikorwa co kwamamaza no kwigisha. Yaratanze inama ngirakamaro z’ingene bogiranira n’abandi imigenderanire myiza uko bishoboka kwose. Izo nama ni izi: Kumenya ururimi rw’aho bakorera, kutirengagiza no kumenyera imico kama y’aho bakorera, kutisuka mu buzima bw’abandi bamisiyonari, no kugamburukira abaganza canke ababaja imbere.—Abaheburayo 13:17.

Ubukurikira, umwigisha w’i Gileyadi ari we Lawrence Bowen, yabajije ati: “Ufise ivyiyumviro vya nde?”. Yaribukije abo banyeshure yuko ‘abaciye urw’amaso’ batemeye Yezu nka we Mesiya (Yohani 7:24, UB). Kubera yuko twese turi abanyagasembwa, dutegerezwa kwirinda ‘kwiyumvira ivyiyumviro vy’abantu’ ahubwo tukiyumvira ‘ivyiyumviro vy’Imana’ (Matayo 16:22, 23, UB). Mbere n’abantu bakomeye mu vy’impwemu bategerezwa kubandanya kubogora ivyiyumviro vyabo. Nka kurya kw’ubwato buri mu kiyaga, kugira ivyo umuntu abogoye birashobora gutuma ashika ku mugambi wiwe canke bigatuma asâba nk’ubwato mu vy’impwemu. Kubandanya kwiga Bibiliya twihweza ivyiyumviro biri mu mirongo ikikije aho tuba turiko turiga biradufasha kwiyumvira ‘ivyiyumviro vy’Imana’.

Uwitwa Wallace Liverance, akaba ari uwundi mwigisha mw’Ishure ry’i Gileyadi, ni we yasozereye ico gihimba ca nya porogarama. Insiguro yiwe yari ishingiye kuri Yesaya 55:1, ikaba yavuga ngo “Uzogura iki?”. Yaremesheje abanyeshure ‘kugura’ ugushira akanyota, umunezero, be n’ukubungabungwa biva mu butumwa bw’ubuhanuzi bw’Imana bwerekeye igihe cacu. Ubuhanuzi bwa Yesaya bwasanishije iryo jambo ry’Imana n’amazi, na vino be n’amata. Iryo jambo rishobora kugurwa gute ‘hadatanzwe amahera canke ibiguzi’? Umuvukanyi Liverance yasiguye yuko rishobora kugurwa mu gutega yompi ubuhanuzi bwa Bibiliya no mu gufata ivyiyumviro be n’inzira bitari ivy’impwemu tukabisubiriza ivyiyumviro vy’Imana be n’inzira zayo (Yesaya 55:2, 3, 6,7). Babigize gutyo, abo bamisiyonari bashasha barashobora kubungabungwa mu bikebere bahawe mu mahanga. Akenshi abantu b’abanyagasembwa usanga biyumvira yuko agahimbare kazanwa no kwiruka inyuma y’amatungo y’ivy’umubiri. Uwo mushikirizansiguro yabakebuye ati: “Ntimuze mugure ivyo bintu. Ntimuze mwemere ivyo vyiyumviro. Murarabe neza ko mufata umwanya wo kwiyigisha Ijambo ry’ubuhanuzi ry’Imana mu buryo bwimbitse. Birashobora gutuma mushira akanyota, bikabakomeza, bikongera bikabaronsa umunezero mu gikorwa canyu c’ubumisiyonari”.

Ivyabonywe n’abanyeshure vyeza umutima be n’ibiganiro bihimbaye vyo kubaza ibibazo

Abo banyeshure baragize uruhara badahorereza mu gikorwa co kwamamaza. Umuvukanyi Mark Noumair, akaba ari uwundi mwigisha w’i Gileyadi, yarahagarikiye ikiganiro aho abatari bake bo muri iryo shure bakinye udukino dusubiramwo ivyo biboneye vyashimitse ku mutwe-shimikiro uvuga ngo “Ubutumwa bwiza ntibudutera isoni” (Abaroma 1:16). Abari aho barahimbawe no kwumviriza ingene abo basuku bazi utuntu n’utundi bashinze intahe inzu ku nzu, mu mabarabara, no mu bibanza bigirirwamwo ubudandaji. Abanyeshure bazi izindi ndimi baribwirije gushikira abantu bavuga izo ndimi baba mu cibare c’ishengero barimwo. Abandi barakoresheje neza ibitabu bishingiye kuri Bibiliya bisohorwa n’Ivyabona vya Yehova, mu kubikoresha igihe basubiye kugendera abantu be n’igihe batanguza inyigisho za Bibiliya. ‘Ntibatewe isoni’ n’ukwamamaza inkuru nziza.

Umuvukanyi William Nonkes, akaba ari mu bagize Urwego rujejwe umurimo, yarabajije ibibazo abamisiyonari baciye uruma bakorera muri Burukina Faso, muri Letoniya no mu Burusiya. Baratanze inama ngirakamaro zishingiye ku mutwe-shimikiro uvuga ngo “Yehova abigiranye urukundo araha impera abizigirwa”. Umwe muri abo bavukanyi babajijwe yaremesheje abanyeshure kwibuka za ngabo 300 za Gideyoni. Umusoda umwumwe wese yari afise igikorwa ashinzwe cagize ico giterera ku ntsinzi Gideyoni yatahukanye mu rugamba yarwanye (Abacamanza 7:19-21). Muri ubwo buryo nyene, abamisiyonari baguma ku gikorwa bashinzwe bararonka impera.

“Nimube vyose kuri bose”. Uwo ni wo mutwe washimitsweko mu biganiro vyo kubaza ibibazo vyahagarikiwe na Samuel Roberson, na we akaba ari umwigisha w’i Patterson. Yabajije ibibazo abagize Komite y’ishami bane, bava muri Senegali, Guam, Liberiya no muri Madagasikari. Abamisiyonari bakorera muri ivyo bihugu bose hamwe ni 170. Biciye ku vyavuzwe, abo banyeshure bari bimirije kuronka impapuro z’umutsindo baramenye ingene Amakomite y’amashami afasha abamisiyonari bashasha kumenyera mu gikorwa cabo. Ivyo kenshi bisaba kumenyera imigenzo abava iBuraya bashobora kubona ko idasanzwe. Nk’akarorero, mu bihugu bimwebimwe ni ibisanzwe cane kubona abagabo, harimwo n’abo mw’ishengero rya gikirisu, bagenda bafatanye amaboko nk’abagenzi. Mu mihingo imwimwe ikukira ishami ry’i Guam bararya imfungurwa zitamenyerewe. Mugabo n’abandi baramenyereye, kandi n’abo bamisiyonari bashasha na bo nyene barabishoboye.

Uwitwa Guy Pierce, akaba ari mu bagize Inama Nyobozi, yaciye irya n’ino ikiganiro gifise umutwe uvuga ngo “Nugume uri intahemuka ku ‘Bwami bw’Umukama wacu’”. Yibukije abumviriza ati: “Yehova yaremye ibintu afise umugambi. Yari afitiye umugambi ibiremwa vyiwe. Umugambi afitiye iyi si ntiwahindutse. Ugenda ugana kw’iranguka ryawo ata kiwutangira. Nta na kimwe gishobora kuwuhindura” (Itanguriro 1:28). Umuvukanyi Pierce yaremesheje bose kuyobokera ubusegaba bw’Imana badahemuka naho hariho ingorane zatewe n’icaha ca wa muntu wa mbere Adamu. Umuvukanyi Pierce yahimirije ati: “Tubayeho mu gihe co guca amateka. Dusigaranye umwanya muto wo gushikira abafise imitima nziraburyarya kugira tubafashe kumenya ukuri. Nukoreshe neza uwo mwanya usigaye mu gushira abandi inkuru nziza y’Ubwami”. Abashigikira Ubwami bw’Imana badahemuka barashobora kwizigira ko izobafata mu mugongo.—Zaburi 18:25.

Mu gice gisozera, umuhagarikizi yarasomye indamukanyo be n’amajambo yo kubipfuriza kuroranirwa, vyavuye ku biro vy’amashami yo hirya no hino kw’isi. Yaciye ashikiriza impapuro z’umutsindo abanyeshure bari barangije ivyo vyigwa, umwe muri bo akaba yaciye asoma ikete ryanditswe n’abo banyeshure, baserura yuko bakenguruka bivuye ku mutima inyigisho baronse. Iyo yari insozero iberanye n’uwo musi w’akaroruhore w’intibagirwa ku bari ng’aho bose.

[Uruzitiro ku rup. 23]

IBIRANGA ABARI BITAVYE IRYO SHURE

Igitigiri c’ibihugu bavuyemwo: 11

Igitigiri c’ibihugu barungitswemwo: 22

Igitigiri c’abanyeshure: 48

Incahagati y’imyaka y’amavuka: 34,8

Incahagati y’imyaka bamaze mu kuri: 18,3

Incahagati y’imyaka bamaze mu busuku bw’igihe cose: 13,4

[Ifoto ku rup. 24]

Umugwi ugira 117 w’abasohoka Ishure ry’ivya Bibiliya ry’i Gileyadi rya Watchtower

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K.; (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.