Woba uvyibuka?

Woba warinovoye ugusoma inomero z’Umunara w’Inderetsi za vuba? Raba nimba ushobora kwishura ibibazo bikurikira:

• Ni ibiki bishobora gufasha umukirisu w’ukuri iyo hari uwiwe ahevye Yehova?

Niwiyubake wongere wubake n’abagize umuryango bagumye ari intahemuka. Nugume ufise vyinshi ukora mu vy’impwemu. Niwitange mu gufasha abandi. Ntiwigere uta icizigiro c’uko uwo muntu wawe ashobora kugaruka. Ntiwiyagirize. Niwubahe indinganizo Imana yashizeho yo gutozwa indero kandi userurire abagenzi bawe ukuntu wiyumva.​—1/9, urupapuro 18-21.

• Ni mu buryo bubiri ubuhe Ivyanditswe bidufasha kumenya “imisi y’iherezo”?

Bibiliya yaravuze imbere y’igihe ibintu vyoshitse mu gihe c’“insozero y’ivy’isi” (Matayo 24:3, 7, 8, NW; Luka 21:11). Yaravuze kandi ibijanye n’amahinduka mu vy’inyifato z’abantu bo mu “misi y’iherezo” be n’ivyo bobaye bakora (2 Timoteyo 3:1-5). Igishimishije, inkuru nziza y’Ubwami yotegerejwe kwamamazwa muri iki gihe.​—15/9, urupapuro 4-6.

• Ishengero ryokora iki mu gihe umukirisu yariko atwara umuduga agize isanganya rigahitana ubuzima bw’umuntu?

Abakurambere batohoza ivy’iryo sanganya boshobora gusanga atagirwa n’amaraso kubera ko uwo mushoferi ata kintu kinini yari gushobora gukora ngo abuze ivyatumye iryo sanganya riba canke mbere yuko ata n’ico yari gushobora gukora. Ariko mu gihe uwo muntu yagirwa n’amaraso kandi akaba yigaye, araheza akaronka igikangiro gishingiye ku Vyanditswe akongera agahagarikwa mu mabanga yarangura mw’ishengero.​—15/9, urupapuro 30.

• Ni kubera iki ubuzima budahera budahagaze ku materambere yo mu vya siyansi?

Hariho utwigoro abanyasiyansi bariko baragira two kwongereza ikiringo c’ubuzima bw’umuntu, nko mu kugerageza kwongereza incuro utugingo ngengabuzima twiyubura canke gufata akagingo ngengabuzima k’ikiremwa kinaka, ku bw’imvo z’ivy’ubuvuzi, bakagakuramwo igisa na co neza na neza (ivyo bita clonage) mu ntumbero yo gutuma abarwayi baronka ibihimba vy’umubiri vyo gusubiriza ibindi kandi bihuza n’umubiri wabo. Ariko Bibiliya yerekana ko abantu bashobora kuronka ubuzima budahera biciye ku ncungu ya Yezu gusa.​—1/10, urupapuro 3-5.

• Umugenzo w’Abayuda wo kwiyuhagira woba wari integuza y’ibatisimu ya gikirisu?

Oyaye. Abayuda baragira imigenzo ijanye no kwihumanura, iyo ikaba itasabwa n’ibatisimu ya Yohani. Ukwihumanura kwasabwa n’Ivyagezwe vya Musa kwategerezwa kuza kurasubirwamwo ariko ibatisimu ya gikirisu igirwa rimwe rizima.​—15/10, urupapuro 12-13.

• Ishure rimenyereza abasuku ni iki?

Ni ivyigwa bimara amayinga umunani, bikaba bihabwa abakurambere be n’abakozi b’ishengero batarubaka kandi bashobora kugenwa ngo baje gukorera ahakeneye abamamaji kuruta ahandi. Bashobora kurungikwa mu mashengero basanzwe bavamwo, canke ahandi aho ari ho hose mu gihugu babamwo kibure mu kindi gihugu.​—15/11, urupapuro 10-11.

• Antikristo avugwa muri 1 Yohana 2:18; 4:3 ni nde?

Mu nsobanuro yagutse, “antikristo” yerekeza kuri abo bose barwanya canke bivugisha ko ari ba Kristu canke abamuserukira. Amajambo ya Yezu na Yohani arerekana ko antikristo ari umugwi ugizwe n’abantu benshi barwanya Kristu, bakwiragiza ibinyoma vy’amadini bakongera bagatera akagere Ubwami bw’Imana.​—1/12, urupapuro 4-6.