Yehova yoba yishura amasengesho yacu?

1-2. Kubera iki twoshobora kwiyumvira ko Yehova atariko arishura amasengesho yacu?

«NUHIMBARWE cane na Yehova, na we azoguha ivyo umutima wawe wipfuza.» (Zab. 37:4) Umve nawe ico kintu ciza Yehova adusezeranira! None twoba dukwiye kwitega ko Yehova aca aduha ubwo nyene ivyo tumusavye vyose? Kubera iki twokwibaza ico kibazo? Raba uburorero bukurikira. Mushiki wacu umwe atarubaka urwiwe arasenga asaba ko yokwitaba Ishure ry’abamamaji b’Ubwami, ariko rero hagaca imyaka itari mike ataratumirwa. Umuvukanyi umwe akiri muto arasenga Yehova amusaba ko yomukiza indwara ikomeye kugira ngo arushirize gufasha ishengero, ariko ntihagire igihinduka. Abavyeyi bakirisu barasenga basaba ko umwana wabo yoguma mu kuri, ariko nya mwana agafata ingingo yo guheba Yehova.

² Kumbure nawe hari ikintu umaze gusaba Yehova mugabo ukaba utarakironka. Ivyo vyoshobora gutuma wiyumvira ko Yehova yishura amasengesho y’abandi mugabo rwawe ntayishure. Canke na ho vyoshobora gutuma wiyumvira ko hari ikintu kibi woba warakoze. Ivyo nyene ni vyo vyashikiye mushiki wacu yitwa Janice.b We n’umugabo wiwe barasenze basaba Yehova ko bokorera kuri Beteli. Avuga ati: «Nabona ko vuba tugiye gukorera kuri Beteli.» Ariko rero amezi yarakunkumutse n’imyaka irajako, kandi ntibigeze batumirwa. Janice avuga ati: «Sinavyumva kandi vyarambabaje. Naribaza ico nari nacumuye kuri Yehova. Nari nasenze ndomako ico nshaka ico ari co. Kubera iki atishuye isengesho ryanje?»

3. Twihweza ibiki muri iki kiganiro?

³ Vyoshobora gushika tukibaza nimba Yehova yumviriza amasengesho yacu. Ivyo vyarashikiye n’abagabo bamwebamwe bo mu bihe vya kera. (Yobu 30:20; Zab. 22:2; Hab. 1:2) Ni ibiki none vyokujijura ko Yehova azokwishura amasengesho yawe? (Zab. 65:2) Kurimbura ibi bintu bikurikira biradufasha kwishura ico kibazo: (1) Ni ibiki twokwitega kuri Yehova? (2)  Yehova atwitezeko iki? (3) Kubera iki vyoshobora kuba ngombwa ko duhindura bimwebimwe mu vyo dusaba?

NI IBIKI TWOKWITEGA KURI YEHOVA?

4. Twisunze Yeremiya 29:​12, Yehova adusezeranira iki?

⁴ Yehova adusezeranira kwumviriza amasengesho yacu. (Soma Yeremiya 29:12.) Kubera ko Imana yacu ikunda abasavyi bayo b’intahemuka, ntiyigera yirengagiza amasengesho yabo. (Zab. 10:17; 37:28) Naho ari ukwo, ntibisigura ko ica iduha ibintu vyose tuyisavye. Ibintu bimwebimwe dusaba vyoshobora gushika ntitubironke muri iki gihe, kiretse mw’isi nshasha.

5. Ni igiki Yehova araba igihe aba ariko arumviriza amasengesho yacu? Sigura.

⁵ Yehova araraba nimba amasengesho yacu ahuye n’umugambi wiwe. (Yes. 55:​8, 9) Kimwe mu bigize umugambi wiwe ni uko isi yuzura abantu bunze ubumwe, bahimbawe kandi bamuyobokera. Ariko Shetani avuga ko abantu borushiriza guhimbarwa ari uko bitegeka. (Ita. 3:​1-5) Kugira ngo Yehova abeshuze Shetani, yarahaye abantu umwanya wo kwitegeka. Ariko rero intwaro z’abantu ni zo zakweze ingorane nyinshi tubona muri iki gihe. (Umus. 8:9) Turazi ko Yehova atazokuraho izo ngorane zose muri iki gihe. Hamwe yobigira, hari abohava biyumvira ko intwaro z’abantu zaroraniwe, ko zishoboye gutorera umuti ingorane zihanze abantu.

6. Kubera iki dukwiye kwemera tudakeka ko Yehova yama akora ibiranga urukundo kandi bigororotse?

⁶ Yehova yoshobora kwishura mu buryo butandukanye abantu basavye ibintu bisa. Nk’akarorero, igihe umwami Hezekiya yari aremvye cane, yarasenze Yehova amusaba ko yomukiza, kandi Yehova yaramukijije. (2 Abm. 20:​1-6) Ariko igihe intumwa Pawulo yatakambira Yehova ngo amukize «ihwa [yari afise] mu mubiri», kumbure ikaba yari indwara kanaka, Yehova ntiyamukuyeko iyo ngorane. (2 Kor. 12:​1-9) Zirikana kandi ku karorero k’intumwa Yakobo be na Petero. Bompi umwami Herodi yaragize umugambi wo kubica. Ishengero ryarasengeye Petero kumbure na Yakobo. Ariko Yakobo yarishwe, Petero na we ararusimba ku gitangaro. (Ivyak. 12:​1-11) Twoshobora rero kwibaza duti: “Kubera iki Yehova yakijije Petero ariko ntakize Yakobo?” Bibiliya nta co ibivugako.c Ico tuzi tudakeka coco ni uko Yehova “atigera arenganya.” (Gus. 32:4) Vyongeye, turazi ko Petero na Yakobo bompi bashimwa na Yehova. (Ivyah. 21:14) Rimwe na rimwe Yehova yoshobora kutwishura mu buryo tutari twiteze. Mugabo kubera ko twizigira ko yama yishura amasengesho yacu mu buryo buranga urukundo kandi bubereye, ntitwidogera uburyo aba yahisemwo kutwishura.—Yobu 33:13.

7. Ni igiki tugerageza kwirinda gukora, kandi kubera iki?

⁷ Turagerageza kwirinda kugereranya uko ivyacu vyifashe be n’ivy’abandi. Nk’akarorero, twoshobora gusaba Yehova ikintu kanaka tudomako, mugabo ntakidukorere. Mu nyuma twoshobora kumenya ko hari uwundi muntu yasavye ikintu nk’ico nyene, mugabo Yehova akakimukorera. Ivyo nyene ni vyo vyashikiye mushiki wacu yitwa Anna. Yarasenze asaba yuko umugabo wiwe yitwa Matthew yokira indwara ya kanseri. Muri ico gihe nyene, hari bashiki bacu babiri bitereye mu myaka na bo nyene bari bagwaye kanseri. Anna yarasengeye cane Matthew be n’abo bashiki bacu. Abo bashiki bacu bahavuye bakira mugabo Matthew arapfa. Mu ntango, Anna yaribajije nimba abo bashiki bacu bakize kubera Yehova yabafashije. Nimba ari Yehova yabafashije, kubera iki none atafashije umugabo wiwe gukira? Mu vy’ukuri ntituzi ingene vyagenze kugira ngo abo bashiki bacu babiri bakire. Ariko ico tuzi, ni uko Yehova azodukiza burundu imibabaro yose dufise be n’uko ashashaye kuzura abagenzi biwe bose bapfuye.—Yobu 14:15.

8. (a) Twisunze Yesaya 43:​2, Yehova adufasha gute? (b) Gusenga bishobora gute kudufasha igihe dushikiwe n’ingorane zikomeye? (Raba ividewo ivuga ngo Isengesho riradufasha kwihangana.)

⁸ Yehova azokwama adufasha. Kubera ko Yehova ari Umuvyeyi adukunda, ntiyipfuza kubona tumererwa nabi. (Yes. 63:9) Naho ari ukwo, ntaca adukingira ingorane zose zidushikira, izo twogereranya n’inzuzi canke urubeya. (Soma Yesaya 43:2.) Ariko rero, aradusezeranira kudufasha “nitwaca” muri izo ngorane. Vyongeye ntazoreka ngo izo ngorane zitwonkore kuri we. Yehova araturonsa kandi impwemu yiwe nyeranda y’ububasha kugira ngo idufashe kwihangana. (Luka 11:13; Flp. 4:13) Ivyo bituma twizigira ko azokwama aturonsa ivyo dukeneye vyose kugira ngo twihangane kandi tugume turi intahemuka kuri we.d

YEHOVA ATWITEZEKO IKI?

9. Twisunze Yakobo 1:​6, 7, kubera iki dukwiye kwizigira ko Yehova azodufasha?

⁹ Yehova yiteze ko tumwizigira. (Heb. 11:6) Rimwe na rimwe turashikirwa n’ingorane zisa n’iziturengeye. Twoshobora mbere gutangura gukekeranya nimba Yehova azodufasha. Ariko rero Bibiliya iradukura amazinda ko dushobora «kwurira uruzitiro» tubifashijwemwo n’ububasha bw’Imana. (Zab. 18:29) Aho gukekeranya rero, turakwiye gusenga Yehova tubigiranye ukwizera gukomeye, twizigiye ko yishura amasengesho yacu.—Soma Yakobo 1:​6, 7.

10. Tanga akarorero kerekana ingene twokora duhuza n’ivyo tuba twasavye mw’isengesho.

¹⁰ Yehova yiteze ko dukora duhuza n’ivyo tuba twamusavye mw’isengesho. Nk’akarorero, umuvukanyi yoshobora gusaba Yehova ngo amufashe kuronka agakonji kugira ngo yitabe ihwaniro ry’akarere. None Yehova ashobora kumwishura gute? Yoshobora guha uwo muvukanyi umutima rugabo wotuma aja kwitura umukoresha wiwe. Ariko uwo muvukanyi arakwiye kugira ico akoze akaja gusaba urwo ruhusha. Ivyo yoshobora no kubigerageza incuro zitari nke. Yoshobora no kurondera uwundi mukozi bakorana yohamubera. Mbere bibaye ngombwa, yoshobora gusaba kutazohemberwa imisi y’ako gakonje.

11. Kubera iki dukwiye kuguma dushira mw’isengesho ibituraje ishinga?

¹¹ Yehova yiteze ko tuguma dushira mw’isengesho ibituraje ishinga. (1 Tes. 5:17) Yezu yaraseruye iciyumviro c’uko bimwebimwe mu vyo twosavye bitociye vyishurwa ubwo nyene. (Luka 11:9) Ntucike intege rero! Nugume usenga kandi ubigiranye ubwira. (Luka 18:​1-7) Igihe tugumye dusenga ku bijanye n’ikintu kanaka, tuba tweretse Yehova ko ico kintu tugishashaye. Tuba twerekanye kandi ko twizigiye ko afise ububasha bwo kudufasha.

KUBERA IKI VYOSHOBORA KUBA NGOMBWA KO DUHINDURA BIMWEBIMWE MU VYO DUSABA?

12. (a) Ni ikibazo ikihe twokwibaza ku bijanye n’ivyo dusaba, kandi kubera iki? (b) Twokora iki kugira ngo amasengesho dutura yerekane ko twubaha Yehova? (Raba uruzitiro ruvuga ngo «Amasengesho yanje yoba yerekana ko nubaha Yehova?»)

¹² Tutaronse ivyo tuba twasavye mw’isengesho, turakwiye kwibaza ibibazo bitatu. Ica mbere, “Ivyo ndiko ndasaba vyoba bibereye?” Akenshi usanga twiyumvira ko tuzi ivyotubera vyiza kuruta. Ariko rero hari igihe ivyo dusaba wosanga bitatugiriye akamaro nk’uko twavyibaza. Iyo dusenze dusaba ko ingorane dufise yotorerwa umuti mu buryo kanaka, hoshobora kuba hariho ubundi buryo bwiza kuruta bwo kuyitorera umuti. Vyongeye, ibintu bimwebimwe dusaba, hari igihe usanga bidahuye n’ivyo Yehova agomba. (1 Yoh. 5:14) Zirikana nk’akarorero kuri ba bavyeyi twavuga mu ntango. Bari basavye Yehova ko yofasha umwana wabo kuguma mu kuri. Ico kintu basavye gisa n’ikibereye. Ariko rero, nta n’umwe muri twebwe Yehova ahatira kumukorera. Yipfuza ko umwumwe wese muri twebwe, ushizemwo n’abana bacu, yihitiramwo kumusenga. (Gus. 10:​12, 13; 30:​19, 20) Abo bavyeyi rero bari bakwiye nyabuna gusaba Yehova ko yobafasha gukora ku mutima umwana wabo, kugira bitume akunda Yehova, abe n’umugenzi wiwe.—Imig. 22:6; Ef. 6:4.

13. Twisunze Abaheburayo 4:​16, Yehova adufasha ryari? Sigura.

¹³ Ikibazo ca kabiri twokwibaza ni iki: “Yehova yoba abona ko ari co gihe kibereye ko anyishura?” Hari igihe twobona ko amasengesho yacu akwiye guca yishurwa ubwo nyene. Ariko mu vy’ukuri, Yehova ni we azi igihe ciza co kudufasha. (Soma Abaheburayo 4:16.) Igihe tudaciye turonka ivyo twasavye, twoshobora kwiyumvira ko Yehova yanse kutwishura. Ariko wewe ashobora kuba gusa yivugiye ati: “Ntiharagera.” Nk’akarorero, subira uzirikane kuri wa muvukanyi akiri muto yasenga asaba ko yokira indwara yari arwaye. Iyo Yehova aca amukiza ku gitangaro, Shetani yari guca avuga ko uwo muvukanyi abandanya gukorera Yehova kubera gusa yari yamukijije. (Yobu 1:​9-11; 2:4) Vyongeye, Yehova yaramaze gushinga igihe aho azokiza indwara zose. (Yes. 33:24; Ivyah. 21:​3, 4) Magingo ico gihe kitarashika, ntitwokwitega ko tuzokira indwara ku gitangaro. Uwo muvukanyi rero yari gusaba Yehova ko yomuha inkomezi n’amahoro yo mu mutima, kugira ngo yihanganire iyo ndwara yongere abandanye kumukorera adahemuka.—Zab. 29:11.

14. Ivyashikiye Janice bikwigisha iki?

¹⁴ Subira wibuke ivyashikiye Janice, umwe yasenga asaba gukorera kuri Beteli. Haraciye imyaka itanu ataratahura ingene Yehova yari yishuye isengesho ryiwe. Avuga ati: «Yehova yarakoresheje ico gihe kugira ngo anyigishe yongere amfashe kuba umukirisu ahumuye. Nari nkeneye kurushiriza kumwizigira. Nari nkeneye kurushiriza kwiyigisha neza. Vyongeye, nari nkeneye kugira umunezero wo mu mutima, umwe utavana n’ukuntu ibintu biba vyifashe.» Haciye igihe, Janice n’umugabo wiwe bahavuye baterwa agateka ko kugendera amashengero. Janice asubije amaso inyuma avuga ati: «Yehova yarishuye amasengesho yanje naho yabigize mu buryo ntari niteze. Naho vyansavye igihe kugira mbone ko yari yanyishuye mu buryo bwiza kuruta, ndamushimira cane kubona vyarampaye akaryo ko kwibonera urukundo rwiwe n’ubuntu bwiwe.»

15. Igihe dusenga, kubera iki bitoba vyiza dushingiye ku kintu kimwe gusa? (Raba n’amashusho.)

¹⁵ Ikibazo ca gatatu twokwibaza ni iki: “Noba nkwiye kuguma nsaba ikintu kimwe gusa?” Naho ari vyiza gusenga tudomako, rimwe na rimwe vyoba vyiza dusenze dusaba ibintu bitandukanye kugira ngo tumenye ico Yehova agomba ku bitwerekeye. Rimbura akarorero k’umwe mushiki wacu atubatse yasenga asaba kwitaba Ishure ry’abamamaji b’Ubwami. Yipfuza kwitaba iryo shure kugira ngo ashobore gukorera ahari inkenero kuruta. Mu kiringo cose rero yagumye asenga Yehova amusaba ko yokwitaba iryo shure, yari gushobora no kumusaba ko yomufasha kubona ibindi bintu yokora kugira yagure umurimo. (Ivyak. 16:​9, 10) Mu nyuma yari guca ahuza n’iryo sengesho mu kwitura umucungezi w’umuzunguruko wabo, akamubaza nimba hari irindi shengero ryo mu micungararo ryoba rikeneye abandi batsimvyi. Canke na ho yari gushobora kwandikira ibiro vy’ishami akabaza ahoba hakenewe abamamaji b’Ubwamie kugira ngo aze gufashayo.

16. Ni igiki twemera tudakeka?

¹⁶ Nk’uko twabibonye, turemera tudakeka ko Yehova azokwishura amasengesho yacu mu buryo buranga urukundo kandi bubereye. (Zab. 4:3; Yes. 30:18) Rimwe na rimwe, yoshobora kutwishura mu buryo tutari twiteze. Naho ari ukwo, Yehova ntiyigera yirengagiza amasengesho yacu kuko adukunda cane. Vyongeye ntazokwigera aduheba. (Zab. 9:10) Nugume rero “umwizigira ibihe vyose”, umusukire ibiri ku mutima wawe.—Zab. 62:8.