Amambo Waciwiri

7 Elizeu alonga: “Bveserani mafala a Yahova. Ipi ndi pidalonga Yahova: ‘Mangwana pa ndzidzi ninga uno, pansuwo ukulu wa* Samariya, seya ibodzi* ya ufa wadidi inadzaguliswa na siklo ibodzi,* pontho maseya mawiri a sevadha anadzaguliswa na siklo ibodzi.’”+ 2 Natenepa, ntsogoleri m’bodzi wakuti mambo akhan’nyindira apanga ntumiki wa Mulungu wandimomwene: “Ngakhale Yahova afungule kudzulu,* kodi pyenepi pinacitikadi?”+ Penepo Elizeu alonga: “Iwe unadzaona pyenepi na maso ako,+ mbwenye nee unadzapidya.”+

3 Pansuwo ukulu wa nzinda pakhali na anyamatanya anai,+ pontho iwo abvundzana unango na ndzace: “Thangwi yanji tinakhala pano mpaka kufa? 4 Ife tingaenda mu nzinda, uku mu nzinda muli na njala,+ tinafera mwenemu. Tingakhala pano, tinafa basi. Natenepa, tendeni ku misasa ya anyankhondo a ku Sirya. Iwo angatisiya, ife tinapitiriza na umaso, mbwenye angakhonda kutisiya, ife tinafa.” 5 Natenepa iwo abuluka mu ndzidzi ukhadoka dzuwa, mbaenda ku misasa ya anyankhondo a ku Sirya. Pidafika iwo dhuzi na misasa ya anyankhondo a ku Sirya, iwo aona kuti m’misasa ineyi nee mukhali na anthu.

6 Yahova akhadacitisa ale akhali m’misasa ya anthu a ku Sirya kubva kutitima kwa ngolo za nkhondo na makavalo, na n’khuwo wa nsoka ukulu wa anyankhondo.+ Natenepa iwo alonga kuna unango na ndzace: “Onani! Mambo wa Izraeli acemeresa amambo a Aeti na amambo a ku Ejitu toera adzamenyane na ife!” 7 Mwakukhonda dembuka, iwo athawa mu ndzidzi ukhadoka dzuwa, mbasiya misasa yawo, makavalo awo, maburu awo, pontho misasa yawo aisiya ninga mukhali iyo toera kupulumusa umaso wawo.

8 Anyamatanya pidafika iwo dhuzi na misasa, apita mu nsasa ubodzi mbatoma kudya na kumwa. Iwo akwata mu nsasa unoyu parata, ouro na nguwo mbaenda kapibisa. Pidamala iwo abwerera mbapita mu nsasa unango. Mwenemu iwo akwatamo pinthu pinango mbaenda kapibisa.

9 Pakumalisa iwo alonga kuna unango na ndzace: “Pinacita ife si pyadidi tayu. Tendeni tikapange anango mphangwa izi zadidi. Tingakhonda kuenda kalonga mphangwa zenezi mpaka mangwana namacibese, tinadzakhala na mulando. Tendeni cincino tikadziwise panyumba ya mambo.” 10 Natenepa iwo aenda, acemera anyakuonera nsuwo ukulu wa nzinda mbaapanga: “Ife taenda ku misasa ya anyankhondo a ku Sirya, mbwenye nee tagumanako munthu, pontho nee tabva fala ya munthu. Basi ene tagumana makavalo na maburu akumangirirwa, pontho misasa iri ninga mudaisiyira iwo.” 11 Penepo pene anyakuonera misuwo aenda kalonga mphangwa zenezi kuna anthu akhali n’nyumba ya mambo.

12 Mambo alamuka mwakucimbiza namasiku mbapanga atumiki ace: “Dikhirani ndikupangeni pinafuna kucita anyankhondo a ku Sirya. Iwo asadziwa kuti ife tiri na njala,+ na thangwi ineyi iwo asiya misasa yawo, aenda kabisala mbalonga: ‘Iwo anabuluka mu nzinda, ife mbatiaphata, buluka penepo tinapita mu nzinda unoyu.’”+ 13 Penepo m’bodzi wa atumiki ace alonga: “Ndaphata miyendo, tawirisani kuti amuna angasi akwate makavalo maxanu mwa ale adasala mu nzinda. Amuna anewa anadzafa munjira ibodzi ene ninga inafuna kufera mwinji wa Aizraeli anafuna kusala kuno. Mamalisiro awo anadzakhala mabodzi ene na mwinji wa Aizraeli udamala kufa. Natenepa tendeni tiatume toera tidziwe pidacitika.” 14 Iwo akwata ngolo ziwiri za nkhondo na makavalo, pontho mambo aatuma toera aende ku misasa ya anyankhondo a ku Sirya mbalonga: “Ndokoni mukaone.” 15 Amuna anewa atowerera anyankhondo a ku Sirya mpaka ku Yordani, pontho n’njira iwo akhaona nguwo na pinthu pikhataya anyankhondo anewa mu ndzidzi ukhathawa iwo. Amuna anewa abwerera mbalonga pyenepi kuna mambo.

16 Buluka penepo mbumba yaenda katapata misasa ya anyankhondo a ku Sirya. Natenepa seya ibodzi ya ufa wadidi ikhaguliswa na siklo ibodzi, pontho maseya mawiri a sevadha akhaguliswa na siklo ibodzi, mwakubverana na mafala a Yahova.+ 17 Mambo akhadapanga ntsogoleri akhanyindira iye toera aonere nsuwo ukulu wa nzinda, mbwenye anthu amponda-ponda pansuwo ukulu mbafa, mwakubverana na mafala adalonga ntumiki wa Mulungu wandimomwene kuna mambo mu ndzidzi udaenda mambo kuna iye. 18 Pyacitika ninga mudalongera ntumiki wa Mulungu wandimomwene kuna mambo: “Mangwana pa ndzidzi ninga uno, pansuwo ukulu wa Samariya,+ maseya mawiri a sevadha anadzaguliswa na siklo ibodzi, pontho seya ibodzi ya ufa wadidi inadzaguliswa na siklo ibodzi.” 19 Natenepa, ntsogoleri apanga ntumiki wa Mulungu wandimomwene: “Ngakhale Yahova afungule kudzulu,* kodi pinthu ninga pyenepi pinacitikadi?” Penepo Elizeu alonga: “Iwe unadzaona pyenepi na maso ako, mbwenye nee unadzapidya.” 20 Pyenepi ndipyo pidacitikadi kuna iye, thangwi anthu amponda-ponda pansuwo ukulu mbafa.