Kronika Wakutoma

20 Pakutoma kwa caka,* mu ndzidzi ukhaenda amambo kunkhondo, Yoabhe+ atsogolera nsoka wa anyankhondo kuenda ku dziko ya Aamoni, mbaifudza. Iye aenda kazungulira nzinda wa Rabha,+ mbwenye Dhavidhi asala ku Yerusalemu.+ Yoabhe amenya nkhondo mu nzinda wa Rabha mbaufudza.+ 2 Dhavidhi akwata nthimba yaumambo ikhali munsolo mwa Malkamu, mbaona kuti ikhalemera talento ibodzi* ya ouro, pontho ikhali na miyala ya ntengo ukulu; nthimba ineyi yaikhwa munsolo mwa Dhavidhi. Iye akwatambo pinthu pizinji kakamwe pidatapata iwo mu nzinda unoyu.+ 3 Iye akwata anthu akhali mwenemu mbaenda kaaphatisa basa+ yakugwanda miyala, yakuphata basa na macado na mafaramentu anango akutwa a utale. Dhavidhi acita pyenepi na anthu a m’mizinda yonsene ya Aamoni. Pakumalisa Dhavidhi na anyankhondo ace onsene abwerera ku Yerusalemu.

4 Buluka penepo, kwaoneka nkhondo na Afilisti ku Jezeri. Pa ndzidzi unoyu, Sibhekai+ wa ku Usa* apha Sipai wa dzindza ya Refaimu,+ natenepa Afilisti akundwa.

5 Yaoneka nkhondo inango na Afilisti, Elanani mwana wa Yaire apha Lami m’bale wace Goliyati+ wa ku Gati, wakuti dipa yace ikhali na muti ninga unaphatisirwa na ale analuka nguwo.+

6 Yaoneka nkhondo inango ku Gati,+ kweneko kukhali na mamuna wankulu kakamwe,+ iye akhali na pyala pitanthatu mu djanja ibodzi na ibodzi, pontho akhali na pyala pitanthatu m’mwendo ubodzi na ubodzi, pyala pyace pyonsene pikhali 24; iye akhalimbo wa dzindza ya Refaimu.+ 7 Iye akhapitiriza kutikana+ Izraeli. Natenepa Yonatani mwana wa Simeya,+ wakuti ndi m’bale wace Dhavidhi amupha.

8 Anewa akhali a dzindza ya Refaimu+ ku Gati,+ iwo aphiwa na Dhavidhi pabodzi na atumiki ace.