Amambo Waciwiri

18 Mu caka cacitatu ca Ozeya+ mwana wa Ela mambo wa Izraeli, Ezekiya+ mwana wa Mambo Ahazi+ wa ku Yuda adzakhala mambo. 2 Iye akhali na pyaka 25 pyakubalwa pidakhazikiswa iye ninga mambo, pontho atonga pyaka 29 mu Yerusalemu. Mai wace akhacemerwa Abhi* mwana wa Zakariya.+ 3 Iye akhacita pinthu pyadidi pamaso pa Yahova,+ ninga pidacita mbuyace akhacemerwa Dhavidhi.+ 4 Iye afudza mbuto za padzulu,+ agomola mizati yakulambirwa yakucitwa na miyala, pontho agwisa miti yakulambirwa.*+ Kusiyapo pyenepi, iye anyedza nyoka ya nkuwa idacita Mose;+ thangwi mpaka pa ndzidzi unoyu, mbumba ya Izraeli ikhapereka ntsembe kuna nyoka ineyi, pontho iyo ikhacemerwa dzimunthu ya nyoka ya nkuwa.* 5 Iye akhanyindira Yahova+ Mulungu wa Izraeli; nee pakhali unango ninga na iye pakati pa amambo onsene a ku Yuda, adatonga iye mbadzati kukhala mambo na adatonga patsogolo pace. 6 Iye akhali wakukhulupirika kuna Yahova.+ Ndzidzi onsene iye akhambvera; Iye akhapitiriza kubvera matongero adapereka Yahova kuna Mose. 7 Pontho Yahova akhali na iye. Konsene kwene kukhaenda iye akhacita pinthu mwandzeru. Iye asandukira mambo wa Asirya mbakhonda kuntumikira.+ 8 Kusiyapo pyenepi, iye apha Afilisti+ mpaka ku Gaza na pisa pya cifupi na kweneko, kutomera panyumba yandzulu ya nyakuonera mpaka mu nzinda wakuwanga.*

9 Mu caka cacinai ca Mambo Ezekiya, cakuti cikhali caka cacinomwe ca Ozeya+ mwana wa Ela mambo wa Izraeli, Mambo Salimanezere wa Asirya abwera kudzazungulira nzinda wa Samariya toera kumenyana nawo.+ 10 Iwo aukwata+ kunkhomo kwa pyaka pitatu; mu caka cacitanthatu ca Ezekiya, cakuti cikhali caka cacipfemba ca Mambo Ozeya wa Izraeli, nzinda wa Samariya wakwatwa. 11 Buluka penepo, mambo wa Asirya akwata Aizraeli mbaenda nawo ku ubitcu+ ku Asirya, pontho aenda kaaikha ku Ala, ku Abhori dhuzi na nkulo wa Gozani na m’mizinda ya Amedhi.+ 12 Pyenepi pyacitika thangwi iwo nee abvera mafala a Yahova Mulungu wawo, pontho nee abvera cibverano cace cakuti ndi pyonsene pidalonga Mose, ntumiki wa Yahova.+ Iwo nee abvesera, pontho nee abvera.

13 Mu caka 14 ca Mambo Ezekiya, Senakeribhe mambo wa Asirya+ abwera kudzamenyana na mizinda yonsene yakuwanga ya ku Yuda mbaikwata.+ 14 Natenepa Mambo Ezekiya wa ku Yuda atumiza mphangwa izi ku Lakisi kuna mambo wa Asirya: “Ndadawa. Lekani kumenyana na ine, pontho ndinakupasani pyonsene pinafuna imwe kundiphemba.” Penepo mambo wa Asirya apanga Mambo Ezekiya wa ku Yuda toera ampase matalento* 300 a parata na matalento 30 a ouro. 15 Natenepa Ezekiya apereka parata yonsene ikhali panyumba ya Yahova na ikhali m’mbuto yakukoyera mpfuma panyumba ya mambo.+ 16 Mu ndzidzi unoyu Ezekiya abulusa* misuwo ya templo+ ya Yahova na maaro akuti iye ene Mambo Ezekiya wa ku Yuda akhadaakhwaza ouro,+ mbapipereka kuna mambo wa Asirya.

17 Buluka penepo mambo wa Asirya atuma Tartani,* Rabhisari* na Rabhisake* pabodzi na nsoka ukulu wa anyankhondo kubulukira ku Lakisi+ toera kuenda kuna Mambo Ezekiya ku Yerusalemu.+ Iwo aenda ku Yerusalemu mbalimira pa mbuto inapita na madzi anabuluka pa thawala yakuti iri pa nthunda, pa nseu ukulu dhuzi na mbuto inaphata basa mamuna wakuti ndi nyakufula nguwo.+ 18 Pidacemera iwo mambo toera abuluke kunja, Eliyakimu+ mwana wa Hilkiya wakuti akhali ntsogoleri wa anthu a panyumba ya mambo, Sebhina+ wakuti akhali mulembi na Yowa mwana wa Azafe wakuti akhali nyakulemba pyonsene pikhacitika, abuluka mbaenda kaonana nawo.

19 Natenepa Rabhisake aapanga: “Ndaphata miyendo, pangani Ezekiya kuti: ‘Mambo wankulu, mambo wa Asirya alonga: “Ninji cinanyindira iwe?+ 20 Iwe usalonga: ‘Ine ndiri na maluso na mphambvu yakumenya nkhondo,’ mbwenye mafala ako ndi apezi. Mbani ananyindira iwe toera undisandukire?+ 21 Iwe usanyindira ciphedzo ca Ejitu,+ ntete wakupanduka wakuti usaphola manja a ule anauphata toera kutsidzikizika. Farau mambo wa ku Ejitu ndi ninga ntete unoyu kuna onsene anan’nyindira. 22 Imwe mungalonga kuti: ‘Tisanyindira Yahova Mulungu wathu,’+ kodi siye tayu adafudzirwa na Ezekiya mbuto zace zaulambiri na maguwa ace,+ mbapanga anthu a ku Yuda na a ku Yerusalemu kuti: ‘Musafunika kulambira Mulungu pa guwa iyi mu Yerusalemu’?”’+ 23 Natenepa ndaphata miyendo, cita bhetci na mbuyanga mambo wa Asirya: Ine ndinakupasa makavalo 2.000 toera ndione khala iwe unagumana amuna akukwana toera kuafambisa.+ 24 Iwe unakwanisa tani kubweza m’bodzi mwa atsogoleri ang’ono kakamwe a mbuyanga, mu ndzidzi wakuti iwe usanyindira Ejitu toera akupase ngolo za nkhondo na anyamakavalo? 25 Iwe usanyerezera kuti Yahova nee anditawirisa toera ndibwere kudzamenyana na dziko ino mbandiifudza? Yahova ndiye adandipanga: ‘Ndoko kamenyane na dziko ineyi mbuifudza.’”

26 Penepo Eliyakimu mwana wa Hilkiya, Sebhina+ na Yowa apanga Rabhisake:+ “Taphata miyendo, longani na atumiki anu Muciaramaki,*+ thangwi ife tisabva cilongero ceneci; lekani kulonga na ife mu cilongero ca Ayuda, thangwi anthu adalimira padzulu pa mpanda ali kubva pinalonga ife.”+ 27 Mbwenye Rabhisake aabvundza: “Kodi mbuyanga andituma toera ndidzapange imwe basi na mbuyanu mafala anewa? Nee anditumambo toera ndidzapange amuna awa adakhala pantsi padzulu pa mpanda, akuti anadzadya matubzwi awo, mbamwa mitindo yawo pabodzi na imwe?”

28 Buluka penepo Rabhisake alimira mbakhuwa mu cilongero ca Ayuda mbalonga: “Bveserani mafala a mambo wankulu, mambo wa Asirya.+ 29 Mambo alonga tenepa: ‘Lekani kunyengezwa na Ezekiya, thangwi iye nee anakwanisa kukupulumusani m’manja mwanga.+ 30 Pontho lekani kutawirisa kuti Ezekiya akucitiseni kunyindira Yahova, mbalonga: “Mwakukhonda penula, Yahova anatipulumusa, pontho nzinda uno nee unadzaperekwa m’manja mwa mambo wa Asirya.”+ 31 Lekani kubvera Ezekiya, thangwi mambo wa Asirya alonga tenepa: “Khazikisani ntendere na ine mbamuperekeka,* natenepa m’bodzi na m’bodzi wa imwe anadzadya misapo ya muti wace wa mauva na misapo ya muti wace wa masambvu, mbamwa madzi a mu ncera wace, 32 mpaka ine ndibwere mbandikuendesani ku dziko yakulandana na yanu,+ dziko yakuti isabala tirigu na sevadha toera mucite nayo mikate, mauva toera mucite nawo vinyu, pontho dziko yakuti iri na miti ya milivera na uci. Penepo imwe munadzapitiriza na umaso mbamukhonda kufa. Lekani kubvera Ezekiya, thangwi iye asakunyengezani angalonga kuti: ‘Yahova anatipulumusa.’ 33 Kodi alipo alungu a madzindza anango adapulumusa dziko yawo m’manja mwa mambo wa Asirya? 34 Ali kupi alungu a Amati+ na Arpadhi? Ali kupi alungu a Sefarvaimu,+ Ena na Iva? Kodi iwo apulumusa Samariya m’manja mwanga?+ 35 Pakati pa alungu onsene a madziko anewa, mbani adakwanisa kupulumusa dziko yawo m’manja mwanga? Mphapo Yahova anakwanisa kupulumusa Yerusalemu m’manja mwanga?”’”+

36 Mbwenye mbumba yamatama pyayo mbikhonda kuntawira, thangwi mambo akhadabulusa ntemo uyu: “Lekani kuntawira.”+ 37 Mbwenye Eliyakimu mwana wa Hilkiya, wakuti akhali ntsogoleri wa anthu a panyumba ya mambo, Sebhina wakuti akhali mulembi na Yowa mwana wa Azafe wakuti akhali nyakulemba pyonsene pikhacitika, apandula nguwo zawo mbaenda kapanga Ezekiya pidalonga Rabhisake.