Ezekiyeli

20 Pa ntsiku yacikhumi ya mwezi wacixanu wa caka cacinomwe, akulu-akulu angasi a Izraeli abwera, mbakhala patsogolo panga toera kusaka ciphedzo kuna Yahova. 2 Penepo Yahova andipanga: 3 “Iwe mwana wa munthu, longa na akulu-akulu a Izraeli, pontho apange kuti: ‘Ipi ndi pidalonga Yahova, Mbuya Wankulu Kakamwe: “Kodi imwe muli kubwera kudzasaka ciphedzo kuna ine? ‘Ndiri kudumbira mu dzina yanga kuti ine nee ndinakutawirani,’+ alonga Yahova, Mbuya Wankulu Kakamwe.”’

4 “Kodi uli dzololo toera kuatonga? Iwe mwana wa munthu, uli dzololo toera kuatonga? Apange pinthu pyakunyanyasa pidacita ambuyawo.+ 5 Apange kuti: ‘Ipi ndi pidalonga Yahova, Mbuya Wankulu Kakamwe: “Pa ntsiku idasankhula ine Izraeli,+ ine ndadumbira kuna dzindza ya Yakobe, pontho ndapangizika kuna iwo mu dziko ya Ejitu.+ Inde, ine ndadumbira kuna iwo, mbandiapanga: ‘Ine ndine Yahova Mulungu wanu.’ 6 Pa ntsiku ineyi, ine ndadumbira kuna iwo kuti mbidaabulusa mu dziko ya Ejitu, mbandiaendesa ku dziko idaasankhulira ine,* dziko ya nkaka na uci.+ Iyo ikhali yakubalika kakamwe kupiringana madziko anango onsene. 7 Penepo ine ndaapanga kuti: ‘Mʼbodzi na mʼbodzi wa imwe asafunika kutaya madzimunthu akunyanyasa analambira iye; lekani kupswipisika na madzimunthu akunyanyasa* a ku Ejitu.+ Ine ndine Yahova Mulungu wanu.’+

8 “‘“Mbwenye iwo andisandukira, mbakhonda kundibvera. Iwo nee ataya madzimunthu akunyanyasa akhalambira iwo, pontho nee asiya madzimunthu akunyanyasa a ku Ejitu.+ Na thangwi ineyi, ine ndapikira kuti ndinaipirwa na iwo, pontho ndinapangiza ukali wanga onsene kuna iwo mu dziko ya Ejitu. 9 Mbwenye pinthu pidacita ine, ndapicita thangwi ya dzina yanga, toera dzina yanga ikhonde kupswipiswa pakati pa anthu a madzindza anango akakhala na iwo.+ Thangwi ine ndapangizika kuna iwo pamaso pa madzindza anewa pidaabulusa ine mu dziko ya Ejitu.+ 10 Natenepa, ine ndaabulusa mu dziko ya Ejitu, mbandiaendesa nʼthando.+

11 “‘“Ine ndaapasa mitemo yanga, mbandiadziwisa matongero anga,+ toera ale anaaphatisira akhale na umaso.+ 12 Ine ndaapasambo masabudu anga toera akhale+ cidzindikiro pakati pa ine na iwo;+ toera iwo adziwe kuti ine Yahova, ndine anaacenesa.

13 “‘“Mbwenye mbumba ya Izraeli yandisandukira nʼthando.+ Iwo nee abvera matongero anga, pontho akhonda mitemo yanga, yakuti munthu angaibvera anakhala na umaso. Iwo apswipisa kakamwe masabudu anga. Na thangwi ineyi, ine ndapikira kuti ndinapangiza ukali wanga kuna iwo nʼthando toera kuafudza onsene.+ 14 Mbwenye pinthu pidacita ine, ndapicita thangwi ya dzina yanga; toera dzina yanga ikhonde kupswipiswa pakati pa anthu a madzindza anango adaona na maso awo pidaabulusa ine pakati pawo.+ 15 Ine ndadumbirambo kuna iwo nʼthando kuti nee mbidaapitisa mu dziko idaapasa ine,+ dziko ya nkaka na uci,+ yakubalika kakamwe kupiringana madziko anango onsene. 16 Thangwi iwo akhonda mitemo yanga, nee abvera matongero anga, pontho apswipisa masabudu anga, mitima yawo mbitowera madzimunthu awo akunyanyasa.+

17 “‘“Mbwenye ine ndaabvera ntsisi, mbandikhonda kuafudza; nee ndaafudza onsene nʼthando. 18 Ine ndapanga anawo nʼthando+ kuti lekani kutoweza mitemo ya ambuyanu,+ nee kubvera matongero awo, lekani kupswipisika na madzimunthu awo akunyanyasa. 19 Ine ndine Yahova Mulungu wanu, towezani mitemo yanga, koyani matongero anga, mbamuabvera.+ 20 Lemedzani* masabudu anga,+ iwo anadzakhala cidzindikiro pakati pa ine na imwe toera kukukumbusani kuti ine ndine Yahova Mulungu wanu.’+

21 “‘“Ngakhale tenepo, anawo andisandukira.+ Iwo akhonda mitemo yanga, nee abvera matongero anga, pontho nee aakoya, akuti munthu angaabvera anakhala na umaso. Iwo apswipisa masabudu anga. Na thangwi ineyi, ine ndapikira kuti ndinaipirwa na iwo, pontho ndinapangiza ukali wanga onsene kuna iwo nʼthando.+ 22 Mbwenye ine, nee ndacita pyenepi+ thangwi ya dzina yanga,+ toera iyo ikhonde kupswipiswa pamaso pa anthu a madzindza anango adaona mu ndzidzi udaaombola ine pamaso pawo.* 23 Ine ndadumbirambo kuna iwo nʼthando kuti mbidaamwaza pakati pa anthu a madzindza anango, pontho mbidaabalalisa mʼmadziko anango,+ 24 thangwi iwo nee abvera matongero anga, akhonda mitemo yanga,+ apswipisa masabudu anga, mbalambira madzimunthu akunyanyasa a ambuyawo.+ 25 Ine ndaasiya toera iwo atoweze mitemo yakuti nee ndi yadidi, na matongero akuti nee mbadaaphedza toera kukhala na umaso.+ 26 Ine ndaasiya kuti apswipisike na ntsembe zawo, pikhapisa iwo pa moto+ anawo onsene autombo toera ine ndiafudze, munjira ineyi, iwo mbadadziwa kuti ine ndine Yahova.”’

27 “Natenepa, iwe mwana wa munthu, panga mbumba ya Izraeli kuti: ‘Ipi ndi pidalonga Yahova, Mbuya Wankulu Kakamwe: “Munjira ibodzi ene, ambuyanu anditikana thangwi yakukhonda kukhala akukhulupirika kuna ine. 28 Ine ndaapitisa mu dziko idaapikira ine kuti mbidaapasa.+ Pidaona iwo mapiri onsene akulapha na miti mikulu+ ya masamba akubithimira, iwo atoma kupereka ntsembe zawo na miyoni yawo yakuti ine nkhabe kukomerwa nayo. Iwo akhapereka penepo ntsembe zawo za khwema yakununkhira na miyoni yawo ya pyakumwa. 29 Natenepa ine ndaabvundza: ‘Thangwi yanji imwe musaenda ku mbuto ineyi yaulambiri? (Iyo isapitiriza kucemerwa Mbuto Yaulambiri mpaka lero.)’”’+

30 “Cincino panga mbumba ya Izraeli kuti: ‘Ipi ndi pidalonga Yahova, Mbuya Wankulu Kakamwe: “Kodi imwe nee muli kupswipisika ninga pidacita ambuyanu, thangwi yakulambira madzimunthu anu, mbamucita uputa wauzimu na iwo?+ 31 Kodi imwe nee muli kupswipisika mpaka lero, thangwi yakupereka ntsembe kuna madzimunthu anu onsene akunyanyasa, mbamupisa ananu pa moto?+ Mphapo cincino, imwe mbumba ya Izraeli, kodi ine ndisafunika kutawirisa kuti mubwere kudzasaka ciphedzo kuna ine?”’+

“‘Ndiri kudumbira mu dzina yanga,’ alonga Yahova, Mbuya Wankulu Kakamwe: ‘Ine nee ndinakutawirani.+ 32 Pinanyerezera imwe cipo pinacitika, imwe musalonga: “Tendeni tikhale ninga anthu a madzindza anango, ninga mbumba za madziko anango, akuti asalambira* miti na miyala.”’”+

33 “‘Ine ndiri kudumbira mu dzina yanga,’ alonga Yahova, Mbuya Wankulu kakamwe: ‘Ine ndinadzakutongani na djanja yanga yamphambvu, na nkono wanga wamphambvu toera kukutcunyusani, pontho ndinadzapangiza ukali wanga kuna imwe.+ 34 Na djanja yanga yamphambvu, na nkono wanga wamphambvu, pontho na ukali wanga, ine ndinakubulusani pakati pa mbumba zinango, mbandikugumanyani buluka mʼmadziko adabalaliswa imwe.+ 35 Ine ndinadzakuendesani kuthando ya mbumba zinango, pontho kweneko, ine ndinadzakutongani nkhope na nkhope.+

36 “‘Ine ndinakutongani ninga mudatonga ine ambuyanu nʼthando mu dziko ya Ejitu,’ alonga Yahova, Mbuya Wankulu Kakamwe. 37 ‘Ndinakupitisani na pantsi pa mpswimbo ya nkumbizi,+ mbandicitisa kuti mukakamizwe toera kubvera cibverano canga. 38 Mbwenye ine ndinadzabulusa pakati panu anthu akukhonda bvera na ale anandidawira.+ Ine ndinadzaabulusa mu dziko inakhala iwo ninga alendo, mbwenye iwo nee anadzapita mu dziko ya Izraeli;+ penepo, imwe munadzadziwa kuti ine, ndine Yahova.’

39 “Mbwenye imwe mbumba ya Izraeli, ipi ndi pidalonga Yahova, Mbuya Wankulu Kakamwe: ‘Mʼbodzi na mʼbodzi wa imwe, mbaende kalambire madzimunthu ace akunyanyasa.+ Mbwenye buluka penepo, mungakhonda kundibvesera, imwe cipo munapswipisa pontho dzina yanga yakucena, thangwi ya ntsembe zanu na madzimunthu anu akunyanyasa.’+

40 “‘Thangwi paphiri yanga yakucena, padzulu paphiri ya Izraeli,’+ alonga Yahova, Mbuya Wankulu Kakamwe: ‘Ndi penepo pakuti mbumba yonsene ya Izraeli inadzanditumikira mu dziko ineyi.+ Ine ndinadzakomerwa nawo penepo, pontho ndinadzaphemba ntsembe zawo na miyoni yawo yadidi kakamwe.+ 41 Thangwi ya khwema yakununkhira mwadidi, ine ndinadzakomerwa na imwe ndingakubulusani pakati pa mbumba zinango, mbandikugumanyani buluka mʼmadziko adabalaliswa imwe;+ ine ndinadzaceneswa pakati panu pamaso pa anthu a madzindza anango.’+

42 “‘Pontho imwe munadzadziwa kuti ine ndine Yahova,+ ndingakuendesani ku dziko ya Izraeli,+ dziko idapikira ine kuti mbidaipereka kuna ambuyanu. 43 Kweneko, imwe munadzakumbuka makhaliro anu na pinthu pyonsene pidacita imwe, pyakuti pyakucitisani kukhala akukhonda cena;+ pontho imwe munadzapasika manyadzo thangwi ya pinthu pyonsene pyakuipa pidacita imwe.+ 44 Natenepa, imwe mbumba ya Izraeli, munadzadziwa kuti ine ndine Yahova, ndingadzakutcunyusani thangwi ya dzina yanga,+ tayu thangwi ya makhaliro anu akuipa peno thangwi ya pinthu pyakuipa pidacita imwe,’ alonga Yahova, Mbuya Wankulu Kakamwe.”

45 Yahova alonga pontho na ine, mbandipanga: 46 “Iwe mwana wa munthu, yangʼana kukhundu yakunterero, mbulonga mphangwa thangwi yakunterero, longa profesiya thangwi ya nsitu wa dziko yakunterero. 47 Panga nsitu wakunterero kuti: ‘Bvesera mafala a Yahova. Ipi ndi pidalonga Yahova, Mbuya Wankulu Kakamwe: “Ine ndiri kukugasira moto wakuti unadzapisa miti yako yonsene,+ miti yakuuma na miwisi ene. Malirimi a moto unoyu nee anadzathimiswa,+ pontho iwo anadzapisa nkhope zonsene, kutomera kunterero mpaka kunkwiriro. 48 Pontho, anthu onsene anadzaona kuti ine Yahova, ndine adagasa moto unoyu; natenepa, iwo nee unadzathimiswa.”’”+

49 Penepo ine ndalonga: “Mama ine pano Yahova, Mbuya Wankulu Kakamwe! Iwo asandilonga kuti: ‘Basi ene iye asalonga misangani yakunentsa!’”