Kronika Waciwiri

18 Yosafate akhali wakupfuma na wakubvekera kakamwe,+ mbwenye iye acita cibverano toera kusemberana na Akabu.+ 2 Pidapita pyaka pingasi, iye aenda kaona Akabu ku Samariya,+ Akabu apereka ntsembe za mabira mazinji na ng’ombe zizinji thangwi ya Yosafate na anthu akhali na iye. Pontho iye akakamiza Yosafate toera aende naye pabodzi ku Ramoti-Jiliyadhi.+ 3 Akabu mambo wa ku Izraeli abvundza Yosafate Mambo wa ku Yuda: “Munaenda pabodzi na ine ku Ramoti-Jiliyadhi?” Iye atawira: “Ine ndinadzakhala na imwe,* mbumba yanga inadzakhala na mbumba yanu, pontho inadzakuphedzani pakumenya nkhondo.”

4 Mbwenye Yosafate apanga mambo wa Izraeli: “Ndaphata miyendo, pakutoma bvundzani Yahova+ thangwi ya pyenepi.” 5 Natenepa mambo wa Izraeli acemeresa aprofeta akukwana 400, mbaabvundza: “Tiende kamenyana na nzinda wa Ramoti-Jiliyadhi peno nkhabe?” Iwo atawira: “Ndokoni, pontho Mulungu wandimomwene anaupereka m’manja mwanu mambo.”

6 Buluka penepo Yosafate abvundza: “Kuno nkhabe mprofeta wa Yahova?+ Tendeni tibvundze Mulungu kubulukira kuna iye.”+ 7 Natenepa mambo wa Izraeli apanga Yosafate: “Pana mamuna unango m’bodzi+ wakuti ife tinakwanisa kubvundzisa Yahova kubulukira kuna iye; mbwenye ine ndisamuida thangwi angalonga pya ine, nee asalonga maprofesiya adidi, mbwenye ndzidzi onsene asalonga akuipa.+ Iye ndi Mikaya mwana wa Imila.” Mbwenye Yosafate ampanga: “Mambo, lekani kulonga pyenepi.”

8 Mambo wa Izraeli acemera ntumiki wace, mbampanga: “Cimbiza,+ ndoko kacemere Mikaya mwana wa Imila.” 9 Mambo wa Izraeli na Yosafate mambo wa ku Yuda akhali nawa m’mipando yawo yaumambo, pontho akhadabvala nguwo zawo za umambo. Iwo akhali nawa pa mbuwa* dhuzi na nsuwo ukulu wa nzinda wa Samariya, pontho aprofeta onsene akhalonga maprofesiya patsogolo pawo. 10 Penepo Zedhekiya mwana wa Kenana asasanya nyanga za utale mbalonga: “Yahova alonga tenepa: ‘Na nyanga izi, imwe munadzapha* anthu a ku Sirya mpaka kuamalisa.’” 11 Aprofeta anango onsene akhalonga maprofesiya munjira ibodzi ene kuti: “Ndokoni ku Ramoti-Jiliyadhi, imwe munawina+ thangwi Yahova anapereka nzinda unoyu m’manja mwanu.”

12 Natenepa, munthu adaenda kacemera Mikaya ampanga: “Dziwa kuti mafala onsene adalonga aprofeta ndi adidi kuna mambo. Ndaphata miyendo, mafala ako mbakhale sawasawa na awo,+ mbulongambo pinthu pyadidi.”+ 13 Mbwenye Mikaya alonga: “Ndiri kudumbira mu dzina ya Yahova Mulungu wa m’maso kuti pire pinafuna kundipanga Mulungu wanga ndipyo pinafuna ine kulonga.”+ 14 Buluka penepo iye aenda kuna mambo, mambo mbambvundza: “Mikaya, tiende kamenyane na nzinda wa Ramoti-Jiliyadhi peno nkhabe?” Penepo pene iye atawira: “Ndokoni, imwe munawina thangwi iwo anadzaperekwa m’manja mwanu.” 15 Penepo mambo ambvundza: “Kodi ndisafunika kukucitisa kudumbira kangasi toera undipange undimomwene mu dzina ya Yahova?” 16 Penepo iye atawira: “Ndikuona Aizraeli onsene balala m’mapiri ninga mabira akusowa nkumbizi. Yahova alonga: ‘Iwo nkhabebve ntsogoleri.+ M’bodzi na m’bodzi mbabwerere kunyumba kwace muntendere.’”

17 Buluka penepo, mambo wa Izraeli apanga Yosafate: “Ine nee ndakupangani kuti: ‘Iye angalonga pya ine nee asalonga maprofesiya adidi, basi ene asalonga akuipa’?”+

18 Penepo Mikaya alonga: “Cincino bveserani mafala a Yahova: Ine ndaona Yahova akhali nawa pa mpando wace waumambo,+ pontho ndaona anyankhondo onsene akudzulu+ akhali dzololo n’khundu mwace, anango kukhundu yamadyo anango kukhundu yabzwere.+ 19 Yahova abvundza: ‘Mbani anafuna kuenda kanyengeza Mambo Akabu wa ku Izraeli toera aende ku Ramoti-Jiliyadhi mbafera kweneko?’ Anju m’bodzi akhalonga ipi, unango akhalonga pinango. 20 Buluka penepo, anju m’bodzi+ aenda kutsogolo, alimira pamaso pa Yahova mbalonga: ‘Ine ndinaenda kan’nyengeza.’ Yahova ambvundza: ‘Unacita tani pyenepi?’ 21 Iye atawira: ‘Ndinaenda kacitisa aprofeta ace toera alonge uthambi.’ Natenepa Mulungu alonga: ‘Iwe unakwanisa kun’nyengeza, kusiyapo pyenepi, iwe unapembera. Ndoko ukacite pidalonga iwe.’ 22 Yahova atawirisa kuti anju acitise aprofeta awa kulonga uthambi kuna imwe.+ Mbwenye Yahova alonga kuti imwe munagwerwa na nyatwa.”

23 Zedhekiya+ mwana wa Kenana afendedzera Mikaya,+ am’menya mbama+ mbalonga: “Iwe usafuna kulonga kuti nzimu wa Yahova wandisiya toera ulonge na iwe?”+ 24 Mikaya atawira: “Unadziwa pyenepi pa ntsiku inafuna iwe kupita nkwartu yankati kakamwe toera kubisala.” 25 Buluka penepo mambo wa Izraeli alonga: “Kwatani Mikaya mbamuenda naye kuna Amoni nkulu wa nzinda na kuna Yowasi mwana wa mambo. 26 Apangeni kuti ‘mambo alonga tenepa: “Ikhani munthu uyu nkaidi,+ pontho mpaseni cakudya cakucepa na madzi akucepa mpaka ine ndingabwerera muntendere.”’” 27 Mbwenye Mikaya alonga: “Imwe mungabwerera muntendere, Yahova nee alonga na ine.”+ Buluka penepo iye athimiza: “Bveserani pyenepi imwe mbumba zonsene.”

28 Natenepa mambo wa Izraeli na Yosafate mambo wa ku Yuda aenda ku Ramoti-Jiliyadhi.+ 29 Mambo wa Izraeli apanga Yosafate: “Ine ndinacinja nguwo zanga toera ndikhonde kudzindikirwa, mbandienda kunkhondo, mbwenye imwe musafunika kubvala nguwo zanu zaumambo.” Natenepa mambo wa Izraeli acinja nguwo zace, mbaenda kamenya nkhondo. 30 Mambo wa ku Sirya akhadapereka ntemo uyu kuna atsogoleri ace a ngolo za nkhondo: “Lekani kumenyana na munthu unango, nyankhondo peno ntsogoleri, mbwenye basi ene menyanani na mambo wa Izraeli.” 31 Na thangwi ineyi, atsogoleri a ngolo za nkhondo pidaona iwo Yosafate, alonga: “Ule ndi mambo wa Izraeli.” Natenepa iwo aenda kuna iye toera amenyane naye; penepo Yosafate atoma kukhuwa mbaphemba ciphedzo,+ Yahova am’phedza, Mulungu aacitisa kuti iwo abuluke pana iye mwakucimbiza. 32 Atsogoleri a ngolo za nkhondo pidaona iwo kuti nee ndi mambo wa Izraeli, penepo pene iwo asiya kuntowera mbabwerera pyawo.

33 Mbwenye mamuna m’bodzi aponya pswimo yace, mwasusudeu yaenda kalasa mambo wa Izraeli mule mudaphatanizwa cakutsidzikiza diti ca utale. Natenepa mambo apanga nyakufambisa ngolo yace ya nkhondo: “Zungunuka toera undibuluse pa mbuto ino, thangwi ndaphekeswa kakamwe.”+ 34 Nkhondo ikhadatekera kakamwe pa ntsiku ineyi, pontho mambo wa Izraeli alimiriswa mu ngolo yace ya nkhondo kutsogolo kwa anyankhondo a ku Sirya mpaka cakumaulo; iye afa mu ndzidzi ukhabira dzuwa.+