Samweli Waciwiri

6 Dhavidhi agumanya pontho anyankhondo adidi kakamwe mu Izraeli, akukwana 30.000. 2 Buluka penepo Dhavidhi na amuna onsene akhali na iye aenda ku Bhaale-Yuda toera akakwate Bokosi ya Mulungu wandimomwene.+ Pa Bokosi ineyi anthu asacemera dzina ya Yahova wa anyankhondo,+ ule wakuti ali pa mpando wace waumambo padzulu* pa akerubhi.+ 3 Iwo akwiza Bokosi ya Mulungu wandimomwene mu ngolo ipswa+ toera aende nayo kunyumba kwa Abhinadhabhi+ yakuti ikhali paphiri; Uza na Aiyo, ana amuna a Abhinadhabhi ndiwo akhafambisa ngolo ineyi ipswa.

4 Natenepa iwo akwata Bokosi ya Mulungu wandimomwene panyumba ya Abhinadhabhi yakuti ikhali paphiri, pontho Aiyo akhaenda patsogolo pa Bokosi. 5 Dhavidhi na Aizraeli onsene akhatsandzaya pamaso pa Yahova na pyakuimba napyo pya ntundu onsene pyakucitwa na matabwa,* maarpa, pyakuimba napyo pinango pya nkhambala,+ mapandero,+ pyakuimba napyo pya utale na pyakuimba napyo pinango.+ 6 Mbwenye pidafika iwo pa mbuwa ya Nakoni, Uza afuthula djanja yace mbaphata+ Bokosi ya Mulungu wandimomwene, thangwi ng’ombe zikhali dhuzi toera kuigwisa. 7 Natenepa Yahova aipirwa kakamwe na Uza, pontho Mulungu wandimomwene amupha+ penepo pene thangwi ya pinthu pyakusowa cilemedzo pidacita iye,+ iye afa penepo dhuzi na Bokosi ya Mulungu wandimomwene. 8 Mbwenye Dhavidhi aipirwa* thangwi ya ukali udapangiza Yahova kuna Uza; pontho mbuto ineyi isacemerwa Peresi-Uza* mpaka lero. 9 Pa ntsiku ineyi Dhavidhi agopa kakamwe Yahova+ mbalonga: “Ndinakwanisa tani kuendesa Bokosi ya Yahova mu nzinda wanga?”+ 10 Dhavidhi nee akhafunabve kukwata Bokosi ya Yahova toera aende nayo kukakhala iye mu Nzinda wa Dhavidhi.+ Mbwenye Dhavidhi apanga anthu toera aende nayo kunyumba ya Obhedhi-Edhomi+ wa ku Gati.*

11 Bokosi ya Yahova yakhala miyezi mitatu panyumba ya Obhedhi-Edhomi wa ku Gati, pontho Yahova apitiriza kupasa nkhombo Obhedhi-Edhomi na anthu onsene a panyumba pace.+ 12 Mambo Dhavidhi apangwa: “Yahova akupasa nkhombo nyumba ya Obhedhi-Edhomi na pinthu pyace pyonsene thangwi ya Bokosi ya Mulungu wandimomwene.” Natenepa, Dhavidhi aenda mwakutsandzaya+ kunyumba kwa Obhedhi-Edhomi toera akakwate Bokosi ya Mulungu wandimomwene kuti aende nayo ku Nzinda wa Dhavidhi. 13 Anyakuthukula+ Bokosi ya Yahova pidafamba iwo mathanyo matanthatu, Dhavidhi apereka ntsembe ya ng’ombe imuna na cinyama cinango cakununa.

14 Dhavidhi akhabvina n’khundu mwa Bokosi ya Yahova* na mphambvu zace zonsene; iye akhadabvala* efodhi wa linyu.+ 15 Dhavidhi na Aizraeli onsene akhabweresa Bokosi+ ya Yahova mbakakhuwa mwakutsandzaya,+ uku mbakaliza nyanga.+ 16 Mbwenye Bokosi ya Yahova pidafika iyo mu Nzinda wa Dhavidhi, Mikale+ mwana wankazi wa Sauli ayang’ana na pajanela mbaona Mambo Dhavidhi akunumpha mbakabvina n’khundu mwa Bokosi ya Yahova;* penepo iye atoma kumpwaza muntima mwace.+ 17 Natenepa iwo abweresa Bokosi ya Yahova mbaiikha pa mbuto payo mu nsasa ukhadamanga Dhavidhi toera kuikha Bokosi ineyi.+ Buluka penepo Dhavidhi apereka kuna Yahova+ ntsembe zakupiswa+ na ntsembe zakupereka takhuta.+ 18 Dhavidhi pidamala iye kupereka ntsembe zakupiswa na ntsembe zakupereka takhuta, apasa nkhombo mbumba mu dzina ya Yahova wa anyankhondo. 19 Kusiyapo pyenepi, iye agawiza anthu onsene, mbumba yonsene ya Izraeli, amuna na akazi ene, m’bodzi na m’bodzi apaswa nkate wakucitwa ninga mphete, misapo ya micindu yakuumiswa mbiumbwa pabodzi na mauva akuumiswa mbaumbwa pabodzi. Buluka penepo anthu onsene aenda m’manyumba mwawo.

20 Dhavidhi pidabwerera iye toera kupasa nkhombo anthu a panyumba pace, Mikale+ mwana wankazi wa Sauli aenda kaonana naye mbampanga: “Mambo wa Izraeli apwazika kakamwe lero pidadula iye nguwo zace pamaso pa anyabasa akazi a atumiki ace, ninga pinacita munthu wakusowa ndzeru!”+ 21 Penepo Dhavidhi apanga Mikale: “Ine ndikhasekera pamaso pa Yahova, ule adandisankhula m’mbuto mwakusankhula babako na anthu onsene a panyumba pace, pontho ule adandisankhula toera kutsogolera Izraeli+ mbumba ya Yahova. Natenepa ine ndinasekera pamaso pa Yahova, 22 pontho ine ndinapwazika kakamwe kupiringana penepa, mbandioneka ndekhene ninga wakusowa basa. Mbwenye ine ndinapaswa mbiri na anyabasa akazi adalonga iwe.” 23 Natenepa Mikale+ mwana wankazi wa Sauli nee abala mwana mpaka kufa kwace.