Atongi

4 Mbwenye pidafa Eudhi, Aizraeli atoma pontho kucita pinthu pyakuipa pamaso pa Yahova.+ 2 Natenepa, Yahova aapereka mʼmanja mwa Yabhini mambo wa ku Kanani,+ wakuti akhatonga ku Azori. Nkulu wa anyankhondo ace akhali Sizera, wakuti akakhala ku Aroseti+ wa madzindza.* 3 Aizraeli alira kuna Yahova+ toera aaphedze, thangwi Yabhini* akhali na ngolo za nkhondo zakukwana 900 zakuti zikhali na masikeya a utale,*+ pontho iye aponderera kakamwe Aizraeli+ mu pyaka 20.

4 Pa ndzidzi unoyu, Dhebhora mprofeta wankazi+ wakuti akhali nkazi wa Lapidhoti, akhali nyakutonga miseru wa Aizraeli. 5 Kazinji kene iye akakhala pantsi pamuti wace wa ncindu, wakuti ukhali pakati, uku Rama+ uku Bheteli+ kucisa ca mapiri ca Efraimu; Aizraeli akhaenda kuna iye toera kupangwa pidatonga Mulungu. 6 Iye acemeresa Bharaki+ mwana wa Abhinoamu wa ku Kedhesi-Nafitali,+ mbampanga kuti: “Yahova Mulungu wa Aizraeli alonga kuti: ‘Kwata amuna akukwana 10.000 a dzindza ya Nafitali na a dzindza ya Zebhuloni, mbamuenda Paphiri ya Tabhori. 7 Ine ndinadzakubweresera Sizera, nkulu wa anyankhondo a Yabhini ku nkulo* wa Kisoni,+ pabodzi na ngolo zace za nkhondo na anyankhondo ace, pontho ine ndinadzampereka mʼmanja+ mwako.’”

8 Natenepa Bharaki antawira: “Khala munaenda pabodzi na ine, ine ndinaenda; mbwenye khala nee munaenda pabodzi na ine, inembo nee ndinaenda.” 9 Iye alonga: “Ine ndinaenda pabodzi na iwe. Mbwenye nkhondo inaenda iwe kamenya nee inabweresa mbiri kuna iwe, thangwi Yahova anapereka Sizera+ mʼmanja mwa nkazi.” Buluka penepo, Dhebhora alamuka mbaenda pabodzi na Bharaki ku Kedhesi.+ 10 Bharaki acemeresa dzindza ya Zebhuloni na dzindza ya Nafitali+ ku Kedhesi, pontho amuna akukwana 10.000 antowera. Dhebhora aendambo pabodzi na iye.

11 Pyacitika kuti Ebheri wakuti ndi Nkeneu+ akhadapambulika pakati pa Akeneu, ana a Obhabhu tebzwalace+ Mose, mbamanga nsasa wace dhuzi na muti ukulu wa ku Zaananimu, ku Kedhesi.

12 Sizera apangwa kuti Bharaki mwana wa Abhinoamu, aenda Kuphiri ya Tabhori.+ 13 Penepo pene Sizera agumanyiza ngolo zace zonsene za nkhondo zakukwana 900 zakuti zikhali na masikeya a utale.* Agumanyizambo anyankhondo onsene akhali na iye toera abuluke ku Aroseti wa madzindza mbaenda mpaka ku nkulo* wa Kisoni.+ 14 Dhebhora apanga Bharaki: “Ndoko, thangwi lero ndi ntsiku yakuti Yahova anapereka Sizera mʼmanja mwako. Yahova ali kuenda patsogolo pako.” Pontho Bharaki atcita Paphiri ya Tabhori pabodzi na amuna akukwana 10.000. 15 Buluka penepo, Yahova abalalisa ndzeru+ Sizera pamaso pa Bharaki, mbafudza ngolo zace za nkhondo na anyankhondo ace onsene. Pakumalisa Sizera atcita pa ngolo yace mbathawa na miyendo. 16 Bharaki athamangira ngolo za nkhondo na anyankhondo mpaka ku Aroseti wa madzindza. Natenepa, anyankhondo onsene a Sizera aphiwa na supada; nkhabepo adapulumuka.+

17 Mbwenye Sizera athawa na miyendo mbapita mu nsasa wa Jaeli,+ nkazi wa Ebheri+ wakuti ndi Nkeneu, thangwi pakhali ntendere pakati pa Yabhini+ mambo wa Azori na banja ya Ebheri wakuti ndi Nkeneu. 18 Buluka penepo, Jaeli aenda kaonana na Sizera, mbampanga: “Bwerani mbuyanga, pitani muno. Lekani gopa.” Natenepa, Sizera apita mu nsasa wa Jaeli, mbanfinikiza na nguwo. 19 Buluka penepo, Sizera apanga Jaeli: “Ndaphata miyendo, ndipasembo madzi pangʼono toera ndimwe, thangwi ndiri na nyota.” Penepo, Jaeli afungula budu ya nthembe yakuti ikhali na nkaka mbampasa toera amwe;+ pidamala iye anfinikiza pontho. 20 Iye ampanga: “Limira pansuwo wa nsasa; munthu angabwera mbakubvundza: ‘Pana mamuna pano?’ mpange kuti: ‘Nkhabe!’”

21 Jaeli nkazi wa Ebheri akwata mʼmanja mwace ntciri ya pa nsasa, na cakukhomera naco. Nakuti Sizera akhadaneta, iye agona kakamwe, penepo Jaeli anfendedzera mwapangʼono pangʼono, amulasa na ntciri, mbanʼkhomera munsolo mwace dhuzi na khutu. Natenepa Sizera afa.+

22 Bharaki afika kweneko mbakasaka Sizera, natenepa Jaeli aenda kaonana naye, mbalonga: “Bwerani, ine ndinakupangizani mamuna anasaka imwe.” Iye apita na Jaeli, mbagumana Sizera ali thasa afa, uku ntciri iri munsolo mwace.

23 Pa ntsiku ineyi, Mulungu akunda Yabhini mambo wa Kanani pamaso pa Aizraeli.+ 24 Aizraeli apitiriza kukhala amphambvu kakamwe pakumenyana na Yabhini mambo wa ku Kanani+ mpaka kupha mambo unoyu wa ku Kanani.+