Pfunziro 2

Mulungu Ndi Xamwali Wadidi Kakamwe Wakuti Munakwanisa Kukhala Naye

Kukhala xamwali wa Mulungu ndi cinthu cadidi kakamwe cakukwanisika kukucitikirani. Mulungu anadzakupfunzisani kukhala wakutsanzaya na wakukoyeka, mbakusudzulani ku mapfunzisiro mazinji akudodomesa na macitacita akuipa. Iye anadzabvesera maphembero anu nakukuphedzani kuti mukhale na ntendere na kunyindira kwa muntima. (Masalmo 71:5; 73:28) Mulungu anadzakuphedzani m’midzidzi ya nyatwa. (Masalmo 18:18) Iye anakupasani ntukwa wa umaso wakukhaliratu.—Aroma 6:23.

Mugafendedzera kuna Mulungu, munadzafendedzerambo kuna axamwali a Mulungu. Iwo anadzakhalambo axamwali anu. Ndimomwene kuti, anadzakhala ninga abale anu na alongo anu. Anadzakomerwa kukupfunzisani pinthu pya Mulungu, pina anadzakuphedzani na kukupasani cipapo.

Ife sife sawasawa na Mulungu tayu. Pa kusaka kwanu uxamwali na Mulungu, musafunika kudziwa cinthu cibodzi cakufunika: uxamwali na Mulungu si uxamwali wa pakati pa anthu akulandana tayu. Iye ali na piaka pyakuinjipa kakamwe pina ali na nzeru na mphambvu zikulu kakamwe kupiringana ife. Iye ndi Ntongi wathu wandimomwene. Natenepa, tingafuna khala axamwali ace, tisafunika kumbvera na kucita pinatituma iye. Pyenepi pinadzatibweresera udidi m’midzidzi yonsene.—Izaiya 48:18.