Pfunziro 12

Kodi Ninji Pinacitika Pa Kufa?

Pana kufa nkhabepo umaso. Kufa ndi sawasawa ninga citulo cakuzika. (Jwau 11:11-14) Akufa nkhabe kwanisa kubva, kuona, kulonga peno kunyerezera. (Koelete 9:5, 10) Relijiau yauthambi isapfunzisa kuti akufa asayenda ku dziko yauzimu towera akakhale maso na makholo awo. Pyenepi sipyo pinapfunzisa Bibilya tayu.

Anthu akufa nkhabe kwanisa kutiphedza, pontho nkhabe kwanisa kutiphekesa. Ndi cidzolowero ca anthu kucita maphembero na kupereka ntsembe mbanyerezera kuti pyenepi pinakomeresa akufa. Pyenepi pisamuipira Mulungu thangwi pyagona pa ubodzi wa unthawatawa wa Satana. Napang’ono pene nkhabe kwanisika kukomeresa akufa, thangwi iwo nkhabe umaso. Ife nkhabe funika tayu kugopa peno kulambira akufa. Tisafunika kulambira Mulungu ekhene basi.—Mateo 4:10.

Akufa anadzakhala pontho maso. Yahova anadzalamusa akufa towera akhale maso m’dziko yapantsi ya paradizu. Nzidzi unoyu uciri n’tsogolo. (Jwau 5:28, 29; Machitiro 24:15) Mulungu asakwanisa kulamusa anthu akufa ningambo imwe musakwanisa kulamusa munthu m’ncitulo.—Marko 5:22, 23, 41, 42.

Nyerezero yakuti ife nkhabe kufa ndi unthawatawa wa kubalaliswa na Satana, Diyabu. Satana na madimoni ace asacitisa anthu kunyerezera kuti mizimu ya akufa iri maso nakuti isabweresa matenda na nyatwa zinango. Satana asanyengerera anthu, midzidzi inango kubulukira mwa maloto na masomphenya. Yahova asaaida ale analesera kulonga na anthu akufa.—Deuteronomyo 18:10-12.