Afarisi Abvundza Pontho Mamuna akhadabalwa Boliboli

Afarisi nee akhatawira kuti ndi Yezu akhadafungula maso a mamuna wakuti akhadabalwa boliboli, natenepa iwo acemeresa anyakubalace. Anyakubalace akhadziwa kuti ali pa ngozwi ‘yakuthamangiswa mu sinagoga.’ (Juwau 9:22) Munthu angathamangiswa mu sinagoga nee akhalibve na mwai wakucedza na kucita malonda na Ayuda andzawo. Pyenepi mbapidakhuya banjace yonsene.

Afarisi acita mibvundzo miwiri: ‘Kodi uyu ndi mwananu analonga imwe kuti abalwa boliboli? Mphapo asakwanisa tani kuona cincino?’ Anyakubalace atawira: ‘Ife tisadziwa kuti uyu ndi mwanathu, pontho kuti iye abalwa boliboli. Mbwenye ife nkhabe dziwa kuti iye asakwanisa tani kuona cincino; pontho ife nkhabe dziwa kuti mbani adafungula maso ace.’ Ngakhale mwanawo akhadalonga kuti akwanisa tani kuona, iwo akhacita mphole-mphole pakuatawira. Iwo alonga: ‘Mbvundzeni imwe. Iye ndi wathunga, anakwanisa kulonga ekhene.’—Juwau 9:19-21.

Natenepa, Afarisi acemera pontho mamuna, iwo anthusa toera alonge kuti Yezu nee ndi munthu wadidi. Iwo ampanga: ‘Simba Mulungu; ife tisadziwa kuti munthu unoyu ndi nyakudawa.’ Mamuna wakuti akhali boliboli aatawira: ‘Khala iye ndi nyakudawa, ine sinapidziwa tayu. Pinadziwa ine mphyakuti, kale ndikhali boliboli, mbwenye cincino ndiri kuona.’—Juwau 9:24, 25.

Afarisi nee akomerwa na ntawiro unoyu. Iwo abvundza: ‘Ninji pidacita iye kuna iwe? Afungula tani maso ako?’ Mamuna aatawira: ‘Ine ndakupangani kale, mbwenye imwe nee mwapibvesera. Musafuna kubvanji pontho? Musafunambo mukhale anyakupfundzace?’ Afarisi aipirwa kakamwe mbalonga: ‘Iwe ndiwe nyakupfundza wa munthu unoyu, mbwenye ife ndife anyakupfundza a Mose. Ife tisadziwa kuti Mulungu alonga na Mose, mbwenye munthu unoyu, ife nkhabe dziwa kudabuluka iye.’—Juwau 9:26-29.

Nyakuphemba-phemba adzuma na mafala a Afarisi mbalonga: ‘Pyenepi mphyakudzumisa kwa ine mungalonga kuti imwe nkhabe dziwa kudabuluka iye, mbwenye iye afungula maso anga.’ Iye afokotoza cinthu cakudziwika na anthu azinji kuti Mulungu asatawira maphembero a ani: ‘Ife tisadziwa kuti Mulungu nkhabe kubvesera anyakudawa, mbwenye khala munthu asagopa Mulungu mbacita pinafuna iye, Mulungu asabvesera munthu unoyu. Cipo pyabveka kale kuti alipo munthu unango adafungula maso a munthu adabalwa boliboli.’ Pakumalisa iye alonga: ‘Munthu unoyu mbadakhonda kutumwa na Mulungu, iye nee mbadakwanisa kucita cinthu.’—Juwau 9:30-33.

Afarisi nee akwanisa kupokanya nyakuphemba-phemba. Iwo antikana: ‘Iwe wabalwa m’madawo kakamwe, mphapo usafuna kupfundzisa ife?’ Buluka penepo, iwo an’thamangisa.—Juwau 9:34.

Mudabva Yezu pidacitika, asaka mamuna akhali boliboli mbambvundza: ‘Iwe usakhulupira Mwana wa munthu?’ Iye alonga: ‘Mbuya, mbani iye? Ndipangeni toera ine ndikwanise kun’khulupira.’ Yezu ampanga mwacinyindiro: ‘Iwe wamuona kale, mwandimomwene ndiye analonga na iwe.’—Juwau 9:35-37.

Mamuna atawira: ‘Mbuya, ine ndisan’khulupira.’ Toera kupangiza cikhulupiro na cilemedzo iye agodamira Yezu, na thangwi ineyi Yezu ampanga: ‘Ine ndabwera pa dziko yapantsi toera anthu atongwe, toera anthu anakhonda kuona aone, alembo anaona akhale maboliboli.’—Juwau 9:38, 39.

Afarisi akhadziwa kuti nee akhali maboliboli. Nakuti iwo akhali na basa yakupfundzisa anthu pikhafuna Mulungu, kodi iwo akhacita basa ineyi? Iwo acita mbvundzo toera kutsidzikizika: ‘Kodi iwe usanyerezera kuti ifembo ndife maboliboli?’ Yezu aapanga: ‘Imwe mbamudakhala maboliboli nee mbamudakhala na mulando wa madawo. Mbwenye nakuti imwe musalonga kuti, ife tisaona, natenepa, madawo anu munapitiriza nawo.’ (Juwau 9:40,41) Mbadakhonda khala apfundzisi mu Izraeli, mbadakhala na mathangwi toera kukhonda kuti Yezu ndi Mesiya. Mbwenye nakuti akhadziwa Mwambo, kukhonda kwawo kukhali madawo makulu.