NSOLO WA REVISTA | MUSAFUNIKA KUCITA PHEMBERO?

Thangwi Yanji Anthu Asacita Phembero?

Kodi musacita phembero mwakukhonda phonya? Anthu azinji asacita phembero, kuphatanizambo ale anakhonda tawira kuti Mulungu alipo. Mphapo, thangwi yanji anthu asacita phembero? Mwakubverana na anthu azinji adacitwa mibvundzo ku Fransa, azinji a iwo asacita phembero peno asanyerezera mwacidikhodikho midzidzi inango, “basi ene toera kukhala na mabvero adidi.” Ninga anthu azinji ku Europa, iwo nee asacita phembero toera kulambira Mulungu. Mbuto mwace, iwo asasaka “cibalangazo ca phembero.” Mu njira inango, anango asasaka Mulungu basi ene mu ndzidzi unafuna iwo ciphedzo, mbadikhira kuti phembero yawo itawirwe mwakucimbiza.​—Izaiya 26:16, Tradução do Novo Mundo.

Ndiye tanimbo imwe? Musanyerezera kuti phembero ndi toera kukuphedzani kukhala na manyerezero adidi? Khala musakhulupira Mulungu, musaona kuti phembero isakuphedzani? Peno musaona ninga kuti maphembero anu nee asatawirwa? Bhibhlya inakuphedzani toera kuona phembero ninga njira yakufendedzera cifupi Mulungu, tayu ninga ntombwe toera kukhala na mabvero adidi.