KUCEDZA THANGWI YA BHIBHLYA

Kodi Mboni za Yahova Zisakhulupira Yezu?

Lerini makani anatowerera akuti m’bodzi wa Mboni za Yahova akucedza na mwanaciro nyumba. Nyerezerani kuti Antonyo ali panyumba ya mamuna anacemerwa Thomo.

KUKHULUPIRA YEZU MPHYAKUFUNIKA

Antonyo: Muli tani pai Thomo, ndakomerwa kugumanikana pontho na imwe.

Thomo: Kwa inembo mphyadidi kukuonani pontho.

Antonyo: Ndakubwereserani marevista mapswa a Ncenjezi na Despertai! Ndisadikhira kuti munakomerwa nawo kakamwe.

Thomo: Takhuta. Mwandimomwene ndakomerwa kakamwe na kubwera kwanu lero, thangwi ciripo cinafuna ine kukubvundzani.

Antonyo: Oo, ninji?

Thomo: Ntsiku inango ndikhacedza na ndzanga kubasa. Ndampanga pya tratado yadidi idandipasa imwe. Mbwenye iye alonga kuti nee ndisafunika kuileri, thangwi Mboni za Yahova nkhabe khulupira Yezu. Ndipyodi? Ine ndampanga kuti mbidabvundzisa pai Antonyo angabwera pontho.

Antonyo: Ndakomerwa na mbvundzo udandicita imwe. Mphyadidi kuti mwabvundza m’bodzi wa Mboni za Yahova. Mwandimomwene, njira yadidi yakudziwa pinakhulupira munthu, ndi kubvundza iye ene.

Thomo: Ndi pyenepi pidanyerezera ine.

Antonyo: Undimomwene ndi wakuti Mboni za Yahova zisakhulupira kakamwe Yezu. Ife tisatawira kuti kukhulupira Yezu ndi kwakufunika toera kupulumuka.

Thomo: Ine ndikhapidziwa, mbwenye mudandipanga ndzanga wakubasa kuti imwe nkhabe khulupira Yezu, ndadzudzumika pang’ono. Ndanyerezera kuti ife cipo tacedza kale pyenepi.

Antonyo: Ndikupangizeni mavesi mangasi a Bhibhlya anapangiza kufunika kwa kukhulupira Yezu? Ndi mavesi akuti Mboni za Yahova asaaphatisira kazinji kene mu utumiki wawo.

Thomo: Nkhabe pinthu.

Antonyo: Ntsonga yadidi yakutoma nayo ndi kudinga mafala a Yezu anagumanika pa Jwau 14:6. Mafala anewa asacita khundu ya makani a Yezu na m’bodzi wa apostolo ace. Tendeni tileri: “Yezu ampanga: ‘Ine ndine njira na undimomwene na moyo. Nkhabepo munthu m’bodzi anafika kuna Baba mbakhonda kupita pana ine.”’ Mwakubverana na vesi ineyi, ndi ipi njira ibodzi basi yakufendedzera Baba?

Thomo: Kubulukira mwa Yezu.

Antonyo: Ndimodi. Mboni za Yahova zisakhulupira kakamwe pyenepi. Dikhirani ndikuciteni mbvundzo uyu: Mwakubverana na pinadziwa imwe thangwi ya pinafuna Mulungu, kodi munthu angaphembera asafunika kuphatisira dzina ya ani?

Thomo: Dzina ya Yezu.

Antonyo: Ine ndisatawirambo. Na thangwi ineyi, phembero yonsene inacita ine, ndisaicita mu dzina ya Yezu. Pyenepi ndi pinacitwa na Mboni za Yahova zonsene.

Thomo: Mphyadidi kudziwa pyenepi.

Antonyo: Lemba inango inafuna ife kudinga ndi Jwau 3:16. Vesi ineyi ndi yakufunika kakamwe yakuti anango asailonga ninga cigwagwa ca Evanjelyu. Pyenepi pisabveka kuti, mbamudakwanisa kulonga mafala onsene adalembwa thangwi ya umaso wa Yezu pa dziko yapantsi na utumiki wace mu vesi ibodzi basi, mbidakhala vesi ineyi. Mphyadidi kuti muleri ndimwe lemba ineyi.

Thomo: Nkhabe pinthu. Isalonga tenepa: “Mulungu afuna pikulu pyene dziko yapantsi, mbapereka Mwanace m’bodzi ekha toera munthu onsene anankhulupira, akhonde kufudzwa, mbwenye aone umaso wakukhaliratu.”

Antonyo: Takhuta. Mukhaidziwa kale lemba ineyi?

Thomo: Inde ndaibva kazinji kene, pontho ndisaionambo kazinji kene m’makwadru na mbuto zinango zapakweca.

Antonyo: Ndi vesi yakudziwika kakamwe. Tingayang’ana mwadidi pa lemba ineyi, onani pidalonga Yezu: Iye alonga kuti ufuni wa Mulungu usaphedza anthu toera kukhala na umaso wakukhonda mala—mbwenye basi ene tingacitanji?

Thomo: Tingakhulupira.

Antonyo: Inde. Makamaka tingakhulupira Mwanace m’bodzi ekha, Yezu Kristu. Ntsonga ineyi, yakuti kukhulupira Yezu kusafungula njira toera kugumana umaso wakukhonda mala—isagumanika pa tsamba 2 ya revista iyi idakubwereserani ine. Mu kulonga pya cifuniro ca revista ya Ncenjezi, mwa pinthu pinango iyo isalonga kuti “isakulumiza cikhulupiro mwa Yezu Kristu, wakuti afa toera tikhale na umaso wakukhonda mala pontho wakuti cincino akutonga ninga Ntongi wa Umambo wa Mulungu.”

Thomo: Oo, mphyadidi kakamwe. Mu revista yanu ene musapangizwa kuti Mboni za Yahova zisakhulupira Yezu.

Antonyo: Mwaona mwekha.

Thomo: Mphapo, thangwi yanji anthu asalonga kuti imwe nkhabe kukhulupira Yezu?

Antonyo: Pana mathangwi mazinji anacitisa anthu kulonga pyenepi. Midzidzi inango iwo asalonga pyenepi thangwi abva anango mbakapilonga. Panango, iwo asapfundziswa maonero anewa akuphonyeka na atsogoleri awo.

Thomo: M’maonero anango, ndisanyerezera kuti anthu asanyerezera kuti imwe nkhabe kukhulupira Yezu thangwi musalonga kuti ndimwe Mboni za Yahova, mbuto mwa kukhala Mboni za Yezu.

Antonyo: Panango, ineyi ndi thangwi inango.

Thomo: Thangwi yanji musalonga kakamwe pya Yahova?

“INE NDAADZIWISA DZINA YANU”

Antonyo: Thangwi ibodzi ndi yakuti ife tisakhulupira kuti tisafunika kuphatisira dzina ya Mulungu, Yahova ninga pidacita mwanace, Yezu. Onani pidalonga Yezu pakuphembera kuna Babace. Pyalembwa pa Jwau 17:26. Munakwanisa kuleri vesi ineyi?

Thomo: Nkhabe pinthu. ‘Ine ndaadziwisa dzina yanu, mbandithimiza kuidziwisa, toera kundifuna kwanu kukhale mwa iwo, inembo ndikhalembo mwa iwo.’

Antonyo: Takhuta. Onani kuti Yezu alonga kuti adziwisa dzina ya Mulungu. Musadziwa thangwi yanji iye acita pyenepi?

Thomo: Huum, nkhabe kupidziwa mwadidi.

Antonyo: Panango mphyadidi tione lemba inango inabvekesa mwadidi nkhani ineyi. Ndikunyerezera lemba ya Machitiro 2:21. Tilerini pabodzi: ‘Pinadzacitika kuti anthu onsene anacemera dzina ya Yahova anadzapulumuswa.’ Cincino ndisatawira kuti mwabvesesa, khala kucemera dzina ya Yahova ndi kwakufunika toera kupulumuka, mwakukhonda penula, Yezu akhadziwambo pyenepi.

Thomo: Ndisatawira pyenepi.

Antonyo: Kupulumuswa kwa atowereri ace ndi thangwi ibodzi yakufunika yakuti Yezu akhafuna kuti iwo adziwe na kuphatisira dzina ya Mulungu. Pontho, ineyi ndi thangwi ibodzi yakufunika kakamwe inaticitisa kulonga kakamwe pya Yahova. Tisaona kuti mphyakufunika kudziwisa dzina ya Mulungu, na kuphedza anango toera acemerembo dzina ineyi.

Thomo: Mbwenye, maseze anthu nkhabe dziwa dzina ya Mulungu peno nkhabe kuiphatisira, iwo asadziwa kuti mbani analonga na iwo pakucita phembero.

Antonyo: Panango. Ngakhale tenepo, mu kutidziwisa dzina yace, Mulungu acitisa kuti kukhale kwakukhonda nentsa kufendedzera kwa iye.

Thomo: Musafuna kulonganji?

Antonyo: Nyerezerani tenepa: Khala nee tadziwa dzina ya Mose, basi ene mbatidandziwa ninga mamuna adagawa Bara Yakufuwira, peno mamuna adatambira Matongero Khumi. Ndi sawasawa na Nowa​—thangwi yanji tisafunika kudziwa dzina yace? Basi ene mbacemerwa ninga mamuna adamanga bote mbapulumusa banjace na pinyama. Munjira ibodzi ene, Yezu Kristu mbadadziwika ninga munthu adabuluka kudzulu mbafa thangwi ya madawo athu. Si tepo tayu?

Thomo: Ndisaona tepo.

Antonyo: Mbwenye Mulungu acita pyonsene toera tidziwe madzina a anthu anewa. Kudziwa madzina awo, kusacitisa anthu anewa kukhala akupambulika. Ngakhale kuti cipo taonana na Mose, Nowa, Yezu, kudziwa madzina awo kusacitisa anthu anewa kukhala andimomwene kwa ife.

Thomo: Cipo ndanyerezera pyenepi, mbwenye pisabveka kakamwe!

Antonyo: Ineyi ndi thangwi inango inacitisa Mboni za Yahova kuphatisira kakamwe dzina ya Mulungu. Tisafuna kuphedza anango toera kukulisa cikhulupiro kwa Yahova Mulungu ninga Munthu wandimomwene wakuti anakwanisa kunfendedzera cifupi. Mu ndzidzi ubodzi ene, tisafunika kugomezera kakamwe basa ya Yezu ninga mpulumusi wathu. Panango, mphyadidi tileri pontho lemba inango inabvekesa mwadidi ntsonga ineyi.

Thomo: Tendeni tione.

Antonyo: Pakutoma taleri lemba ya Jwau 14:6. Kumbukani, Yezu alonga kuti iye ndi ‘njira na undimomwene na moyo.’ Tendeni tibwerere nduli pang’ono tione mafala anagumanika pa Jwau 14:1. Munakwanisa kuleri pidalonga Yezu pa mafala akumalisa a vesi ineyi?

Thomo: Isalonga tenepa: ‘Khulupirani Mulungu; khulupiranimbo ine pano.

Antonyo: Takhuta. Mbamudalonga kuti cikhulupiro candimomwene ndi kukhulupira uyu peno ule? Pisabveka kuti munthu angafuna anakwanisa kusankhula kukhulupira Yezu, peno kukhulupira Yahova?

Thomo: Nkhabe. Yezu alonga kuti tisafunika kukhulupira awiri ene.

Antonyo: Ndimodi. Pontho ndisakhulupira kuti munatawira kuti si kulonga kwene kuti ndisakhulupira Mulungu na Yezu. Mbwenye tisafunika kupangiza mu umaso wathu kuti tisakhulupira Mulungu na Yezu.

Thomo: Ndimomwene.

Antonyo: Mphapo, munthu anapangiza tani kuti mwandimomwene asakhulupira Mulungu na Yezu? Panango mphyadidi tidinge mbvundzo unoyu paulendo unango.a

Thomo: Pinakhala pyadidi kakamwe kwa ine.

Pana cinthu cinafuna imwe kubvesesa mwadidi m’Bhibhlya? Ciripo cinafuna imwe kudziwa mwadidi thangwi ya pikhulupiro pya Mboni za Yahova? M’bodzi wa iwo anadzakomerwa kucedza na imwe thangwi ya nkhani zenezi.

[Cidzindikiro capantsi]

[Ntsonga ikulu pa tsamba 29]

Kukhulupira Yezu ndi kwakufunika toera kupulumuka