Kodi Muli Kuenda Kutsogolo Pabodzi Na Gulu Ya Yahova?

“Maso a [Yahova] anayang’ana anthu akulungama.”​—1 PED. 3:12.

MBAMUDATAWIRA TANI?

Kodi Yahova anadzatawira tani kupomokera kwa Sathani toera kufudza atumiki ace?

Ndi pinthu pipi pingasi pinaphemba Mulungu kwa ife ninga atumiki ace?

Thangwi yanji tisafunika kupitiriza kuenda kutsogolo na gulu ya Yahova?

 1. Ndi gulu ipi idapitira mbuto dzindza yakupanduka ya Israele ninga mbumba inadziwika na dzina ya Yahova? (Onani cithundzithundzi cakutoma.)

PISAONEKERATU kuti Yahova ndiye adakhazikisa mpingo Wacikristu mu pyaka dzana yakutoma, na kutoma papswa kwa ulambiri wakucena mu ndzidzi uno. Ninga pidaona ife mu nsolo udamala, gulu ya atowereri akutoma a Kristu yapitira mbuto dzindza yakupanduka ya Israele ninga mbumba inadziwika na dzina ya Yahova. Gulu ipswa, yakuti ndi yakutawirika kakamwe na Mulungu, yapulumuka pakufudzwa kwa Yerusalemu mu caka 70 N.W. (Luka 21:20, 21, 28) Pinthu pyenepi pidacitika mu pyaka dzana yakutoma pyapangiza pire pikhafuna kucitika kwa atumiki a Yahova mu ntsiku zino. Mwakukhonda dembuka, makhaliro a dziko ya Sathani anadzamala, mbwenye gulu ya Mulungu pa dziko yapantsi inadzapulumuka mu ntsiku zakumalisa. (2 Tim. 3:1) Tinakwanisa tani kukhala na cinyindiro ca pyenepi?

 2. Kodi Yezu alonganji thangwi ya ‘nyatwa ikulu,’ na inadzatoma tani?

² Mu kulonga pya kudza kwace kwakukhonda oneka na kumala kwa makhaliro ano a pinthu, Yezu alonga: ‘Penepale inadzaoneka nyatwa ikulu, yakupiringana nyatwa zonsene zidaona anthu kutomera kwa pantsi mpaka ntsiku ya lero, ande patsogolo pace nyatwa ninga ineyi inadzaonekabve pontho tayu.’ (Mat. 24:3, 21) Nyatwa ikulu ineyi yakukhonda landanisika, inadzatoma Yahova angafudza “Babilonya Wankulu,” wakuti ndi utongi wa dziko yonsene wa uphemberi waunthawatawa mu kuphatisira mphambvu za anyandale. (Apok. 17:3-5, 16, Mphangwa Zadidi) Ninji pinafuna kudzacitika patsogolo?

KUPOMOKERA KWA SATHANI KUNADZABWERESA HARMAGEDONI

 3. Pakumala kufudzwa kwa uphemberi wauthambi, ndi kupomokerwa kupi kunafuna kudzacitirwa atumiki a Yahova?

³ Pakumala kufudzwa kwa uphemberi wauthambi, Sathani na dziko yace anadzapomokera atumiki a Yahova. Mwacitsandzo, mu kulonga pya ‘Goge wa dziko ya Magoge,’ Bhibhlya yapikira: ‘Iwe unadzaendako na anyankhondo ako na alembo adalipa iwe, mbupakasa dziko yamumphu ninga condzi.’ Nakuti Mboni za Yahova nkhabe anyankhondo, pontho ndi anthu a ntendere pa dziko yapantsi, anadzaoneka ninga ndi akukhonda nentsa kufudzwa. Mbwenye kupomokera kweneku kunadzapangiza kuti ndi kunyengezeka kukulu kakamwe!​—Ezek. 38:1, 2, 9-12.

4, 5. Kodi Yahova anadzatawira tani kuwangisira kwa Sathani toera kufudza atumiki ace?

⁴ Kodi Mulungu anatawira tani kuwangisira kwa Sathani toera kufudza atumiki ace? Yahova anadzaaphedza, mu kupangiza udidi wace ninga Ntongi wa Kudzulu na Pantsi. Yahova anadzaona kupomokerwa kwa atumiki ace ninga ndiye ene akupomokerwa. (Lerini Zakariya 2:8.) Natenepa, Babathu wakudzulu anadzacita pinthu mwakucimbiza toera kutiphedza. Kupulumuswa kweneku kunadzamalisira na kufudzwa kwa dziko ya Sathani pa Harmagedoni, yakuti ndi ‘nkhondo ya ntsiku ikulu ya Mulungu wa Mphambvu Zonsene.’​—Apok. 16:14, 16.

⁵ Mukulonga pya Harmagedoni, profesiya ya Bhibhlya isalonga: ‘Yahova ana miseru na madziko onsene mbafuna kuakonesa, toera anyakuipa aphiwe. Awa ndiwo mafala a Yahova. Yahova wa mphambvu zonsene alonga kuti nyatwa zonsene ziri kubwera kubulukira kunkhomo kwa dziko yonsene. Thangwi ya ipyo, makole makulu atoma kugumanyikana ku madire a pantsi. Pa ntsiku ineyi, manungo a ale adaphiwa na Yahova anadzakhala phwataku-phwataku pantsi ponsene, nee m’bodzi anadzaalira nee kuaikhisa. Ndimomwene, iwo anadzasandzikirana ninga nyambvu.’ ((Yer. 25:31-33) Nkhondo ya Harmagedoni inadzamalisa makhaliro ano akuipa. Dziko ya Sathani nkhabe kudzaonekabve, mbwenye khundu yapantsi ya gulu ya Yahova inadzapulumuka.

THANGWI YANJI GULU YA YAHOVA ISAPITIRIZA KUKULA?

6, 7. (a) Kodi ale anacita khundu ya ‘mwinji ukulu’ asabuluka kupi? (b)  Ndi kuthimizirika kupi kudaoneka mu pyaka pidapita cincino?

⁶ Lero, gulu ya Mulungu isapitiriza kukula thangwi anthu a mu gulu ineyi ali na uxamwali na iye. Bhibhlya isatipasa cinyindiro: ‘Maso a [Yahova] anayang’ana anthu akulungama, makutu ace anabva maphembero awo.’ (1 Ped. 3:12) Anthu akulungama asaphataniza “mwinji ukulu” wakuti ‘unadzapulumuka pa nyatwa ikulu.’ (Apok. 7:9, 14) Anyakupulumuka anewa si mwinji basi tayu. Iwo ndi ‘mwinji ukulu’​—numero ikulu kakamwe ya anthu. Musakwanisa kuona ninga m’bodzi wawo wakuti anadzapulumuka pa ‘nyatwa ikulu’?

⁷ Kodi anthu anewa anaphataniza mwinji ukulu asabuluka kupi? Iwo ali kugumanyizwa kubulukira mu kukwanirisika kwa mafala a Yezu thangwi ya cidzindikiro ca kuonekera kwace. Iye alonga: ‘Mphangwa zadidi za Umambo wa kudzulu zinadzamwazwa pantsi ponsene, toera mukhale amboni anga pakati pa anthu a mitundu yonsene. Pingamala ipi, inadzabwera nthawi ya kumalisiratu pyonsene.’ (Mat. 24:14) Mu ntsiku zino zakumalisa, ineyi ndi basa ikulu kakamwe inacitwa na gulu ya Mulungu pa dziko yapantsi. Na ciphedzo ca basa yakumwaza mphangwa na kucita anyakupfundza inacitwa na Mboni za Yahova, pikwi na pikwi pya anthu asapfundza kulambira Mulungu ‘mwa nzimu na undimomwene.’ (Jwau 4:23, 24) Mwacitsandzo, mu pyaka khumi pidapita​—kutomera mu caka ca basa ca 2003 mpaka 2012, anthu akukwana 2.707.000 abatizwa ninga cipangizo ca kuperekeka kwawo kwa Mulungu. Lero, pa dziko yonsene, ziripo Mboni za Yahova zakukwana 7. 900.000, na anango akukwana pikwi na pikwi akuti asagumanyikana pabodzi na iwo, makamaka mu ndzidzi wa Cikumbuso cinacitwa pacaka. Ife nkhabe kudzikuza thangwi yakuthimizirika kweneku, thangwi ndi ‘Mulungu anacitisa kuti pinthu pikule.’ (1 Akor. 3:5-7) Ngakhale tenepo, pisaonekeratu pakweca kuti mwinji ukulu ukuthimizirika mbukhala wakunjipa kakamwe mu pyaka pyonsene.

 8. Thangwi yanji gulu ya Yahova ikuthimizirika kakamwe?

⁸ Atumiki a Mulungu akuthimizirika kakamwe thangwi Yahova asaphedzera Mboni zace. (Lerini Izaiya 43:10-12.) Kuthimizirika kweneku kwapikirwa m’mafala a profesiya iyi: “Ung’ono kakamwe unadzakhala cikwi, wakucepa unadzakhala dzindza yamphambvu. Ine Yahova ndinadzapicimbizisa pa ndzidzi wace.” (Iza. 60:22, Tradução do Novo Mungo) Anyakudzodzwa akusalikira akhali ninga nsoka ‘ung’ono,’ mbwenye numero ineyi yathimizirika mu ndzidzi wakuti Aisraele anango auzimu akhapita mu gulu ya Mulungu. (Agal. 6:16) Na nkhombo za Yahova, mu pyaka pizinji kuthimizirika kusaoneka kubulukira mu kugumanyizwa kwa mwinji ukulu.

KODI YAHOVA ASAPHEMBANJI KWA IFE?

 9. Tisafunika kucitanji toera kuphindula na tsogolo yadidi idapikira Mulungu m’Mafalace?

⁹ Mwakukhonda tsalakana khala ndife Akristu akudzodzwa peno ndife a mwinji ukulu, Mulungu apikira tsogolo yadidi kwa ife m’Mafalace. Mbwenye toera kuphindula na pikiro ineyi, tisafunika kubvera matongero ace. (Iza. 48:17, 18) Mwacitsandzo, nyerezerani Aisraele pantsi pa Mwambo wa Mose. Mwambo unoyu mbudaatsidzikiza na kuapfundzisa kuti anakhala tani akutsandzaya m’banja na axamwali, kuti mbadacita tani malonda mwakuona ntima, na kutsalakana anango munjira yadidi, na pinango. (Eks. 20:14; Lev. 19:18, 35-37; Deut. 6:6-9) Kubvera mitemo ya Mulungu kusatiphindulisambo munjira ibodzi ene, mwandimomwene ife nee tisaona kucita cifuno ca Mulungu ninga cinthu cakunentsa. (Lerini 1 Jwau 5:3.) Mbuto mwace, ninga Aisraele akhatsidzikizwa mu kubvera Mwambo, kubvera kwathu mitemo ya Yahova Mulungu na midida yace, nee kusatitsidzikiza basi, mbwenye kusatiphedzambo toera kukhala na ‘cikhulupiro cakuwanga.’​—Tito 1:13.

10. Thangwi yanji tisafunika kukhazikisa ndzidzi toera kupfundza Bhibhlya na kucita Kulambira kwa Banja namaulo?

¹⁰ Khundu ya pantsi ya gulu ya Yahova iri kuenda kutsogolo munjira zakusiyana-siyana. Mwacitsandzo, kubvesesa kwathu undimomwene wa Bhibhlya kusathimizirika ndzidzi onsene. Ife tisadikhira pyenepi, thangwi “njira ya anyakulungama ndi ninga ceza ca mphambvu cakuti cisathimizirika kucena na kucena mpaka kubuluka kwa dzuwa.” (Mis. 4:18, NM) Mbwenye tisafunika kubvundzika: ‘Kodi ndisapitiriza kuenda kutsogolo mwakubverana na kubvesesa kwathu kupswa kwa undimomwene wa Bhibhlya? Ndiri na nsambo wakuleri Bhibhlya ntsiku zonsene? Ndisakomerwa na kuleri mabukhu athu mwaphinga? Kodi ine na anyakufunika anga tisacita Kulambira kwa Banja namaulo?’ Azinji a ife asatawira kuti kucita pyenepi si pyakunentsa kakamwe tayu. Kazinji kene, pisaphemba kukhazikisa ndzidzi toera kucita pyenepi. Mwandimomwene, mphyakufunika kakamwe kusaka cidziwiso candimomwene ca Malemba, kuciphatisira, na kuthambaruka mwauzimu​—makamaka lero pa ndzidzi wakuti nyatwa ikulu ikufendedza cifupi kakamwe!

11. Ndi munjira zipi maphwando a kale pabodzi na misonkhano ya mpingo, ya cisa, yakupambulika, na ya gawo ya lero ndi yakuphindulisa?

¹¹ Gulu ya Yahova iri na cifuniro cadidi kwa ife munatikulumiza iyo toera kubvera uphungu wa mpostolo Paulu: ‘Tinyerezerane unango na ndzace toera tifunane, mbaticita pinthu pyadidi. Lekani kucalira nsonkhano wanu, ninga munacitira anango, mbwenye tiwangisane unango na ndzace, makamaka pakuona kuti ntsiku iri duzi.’ (Aheb. 10:24, 25) Maphwando a pacaka na misonkhano inango ikhawangisa Aisraele mwauzimu. Kusiyapo pyenepi, midzidzi yakupambulika ninga ya Maphwando a Misasa mu ntsiku za Nehemiya ikhali midzidzi yakutsandzayisa kakamwe. (Eks. 23:15, 16; Neh. 8:9-18) Tisaphindulambo munjira ibodzi ene m’misonkhano yathu ya mpingo, ya cisa, yakupambulika, na ya gawo. Tendeni tiphindule na masasanyiro anewa toera tikhale akuwanga mwauzimu na akutsandzaya.​—Tito 2:2.

12. Tisafunika kuona tani basa yakumwaza mphangwa za Umambo?

¹² Ninga ale akhasonkhana na gulu ya Mulungu, ife tisakomerwa na kucita khundu m’basa ‘yakucena ya mphangwa zadidi za Mulungu.’ (Arom. 15:16) Kucita khundu m’basa ineyi ‘yakucena’ kusaticitisa kukhala ‘anyakuphedza’ a Yahova, wakuti ndi ‘Wakucena.’ (1 Akor. 3:9; 1 Ped. 1:15) Kumwaza mphangwa zadidi kusaphedza toera kucenesa dzina yakucena ya Yahova. Mwandimomwene, ndi mwai ukulu kakamwe kunyindirwa basa yakumwaza ‘mphangwa zadidi za mbiri ya Mulungu wakutsandzaya.’​—1 Tim. 1:11.

13. Kodi kukhala na uzimu wakuwanga, na umaso wadidi kusanyindiranji?

¹³ Mulungu asafuna kuti tipitirize khala akuwanga mwauzimu mu kunyindira iye na kuphedzera gulu yace munjira zakusiyana-siyana. Mose apanga Aisraele: ‘Ndinaikha lero mboni kuna imwe kudzulu na pantsi, ndinayikha pamaso panu umaso na kufa, nkhombo na dzedze. Sankhula umaso natenepa munadzakhala maso iwe na mbumba yako. Funa Yahova, Mulungu wako, bvesera fala yace, mbukhala wakulungama. Pyenepi pina ndawa na kulapha kwa ntsiku zako mu dziko idadumbira Yahova kupasa makolo ako, Abrahamu, Isaaki na Yakobe.’ (Deut. 30:19, 20) Umaso wathu usanyindira kucita cifuno ca Yahova, kunfuna, kubvera fala yace, na kun’nyindira.

14. Kodi m’bale unango akhabva tani thangwi ya gulu ya Mulungu yakuoneka na maso?

¹⁴ M’bale Pryce Hughes, wakuti anyindira Mulungu mbapitiriza kuenda kutsogolo na gulu Yace, alemba: “Ndisapereka takhuta kakamwe thangwi ndisakhala maso mwakubverana na cidziwiso ca cifuniro ca Yahova kutomera mu ntsiku zakutoma mpaka mu caka 1914 . . . Cinthu cibodzi cakufunika kakamwe kwa ine, ndi kupitiriza kukhala cifupi na gulu ya Yahova yakuoneka na maso. Cakugumana naco canga cakutoma candipfundzisa kuti kunyindira manyerezero a anthu ndi kwakukhonda thema kakamwe. Mudatoma ine kubvesesa ntsonga ineyi, ndatonga kupitiriza kukhala mu gulu ineyi yakukhulupirika. Ndi ipi njira inango yakuti munthu anakwanisa kukhala na uxamwali na Yahova na kutambira nkhombo zace?”

PITIRIZANI KUENDA KUTSOGOLO PABODZI NA GULU YA MULUNGU

15. Perekani citsandzo ca m’Bhibhlya cinapangiza kuti tisafunika kuona tani kucinja kwa kubvesesa kwathu pipfundziso pya Bhibhlya.

¹⁵ Khala tisafuna kukhala na uxamwali na Yahova na kutambira nkhombo zace, m’bodzi na m’bodzi asafunika kuphedzera gulu yace na kutawira macinjo a kubvesesa kwathu Malemba. Nyerezerani ipi: Pakumala kufa kwa Yezu, pikwi na pikwi pya Akristu Aciyuda akhali aphinga mu kubvera Mwambo, pontho akhaona ninga ndi pyakunentsa kusiya kubvera Mwambo. (Mach. 21:17-20) Mbwenye na ciphedzo ca tsamba ya mpostolo Paulu idatumiza iye kwa Ahebere, iwo atawira kuti nee aceneswa kubulukira mu ntsembe zakuperekwa “ninga mudatongera Mwambo, mbwenye kubulukira mu ntsembe ya ‘kuperekeka kwa Yezu Kristu na manungo ace kabodzi kokha.’ (Aheb. 10:5-10) Mwakukhonda penula, azinji mwa Akristu anewa Aciyuda munjira yadidi, acinja manyerezero awo mbaenda kutsogolo mwauzimu. Ifembo tisafunika kupfundza mwaphinga na kuonesesa mwadidi pangaoneka macinjo a kubvesesa kwathu Mafala a Mulungu peno njira yakumwaza kwathu mphangwa.

16. (a) Ndi nkhombo zipi zinafuna kudzacitisa umaso kukhala wakutsandzayisa kakamwe mu dziko ipswa? (b) Ninji pinadikhira imwe mu dziko ipswa?

¹⁶ Onsene anapitiriza kukhala akukhulupirika kwa Yahova na gulu yace anadzapitiriza kutambira nkhombo zace. Anyakudzodzwa akukhulupirika anadzakhala na mwai ukulu ninga anyakutonga pabodzi na Kristu kudzulu. (Arom. 8:16, 17) Khala tiri na cidikhiro cakukhala maso pa dziko yapantsi, tinyerezereni kuti kunadzakhala kwakutsandzayisa tani kukhala maso mu Paradizu. Ninga khundu ya gulu ya Yahova, ndi kutsandzaya tani kuli na ife lero mu kupanga anango pya dziko ipswa idapikira Mulungu! (2 Ped. 3:13) Lemba ya Masalmo 37:10 isalonga: ‘Anyakupfulika anadzakhala pa dziko, mbakomerwa na ntendere ukulu kakamwe.’ Anthu anadzamanga ‘nyumba mbakhala mwenemo,’ pontho iwo anadzakomerwa na “mabasa awo.” (Iza. 65:21, 22) Nkhabe kudzaonekabve kupondererana, utcerengi, na njala. (Sal. 72:13-16) Babilonya Wankulu nkhabe kudzanyengeza pontho anthu, thangwi iye nkhabe kudzaonekabve. (Apok. 18:8, 21) Anyakufa anadzalamuswa mbapaswa mwai wakukhala maso kwenda na kwenda. (Iza. 25:8; Mach. 24:15) Ndi cidikhiro cakutsandzayisa tani ciripo kwa pikwi na pikwi pya anthu adaperekeka kwa Yahova! Toera kuona kukwanirisika kwa pikiro ineyi yauzimu, m’bodzi na m’bodzi wa ife asafunika kupitiriza kuthambaruka mwauzimu, kuenda kutsogolo na gulu ya Mulungu, mbatipitiriza kutowezera gulu ineyi.

17. Tisafunika kukhala na maonero api thangwi ya ulambiri wa Yahova na gulu yace?

¹⁷ Nakuti kumala kwa makhaliro ano a pinthu kuli cifupi kakamwe, tendeni tipitirize kukhala akuwanga mu cikhulupiro, na kupangiza kupereka kwathu takhuta ku masasanyiro a ulambiri wa Mulungu. Anewa akhali maonero a nyamasalmo Dhavidhi adaimba: ‘Cinthu cibodzi ndaciphemba kuna Yahova, ndico cinasirira ine basi kuti: ndikhale n’nyumba mwa Yahova ntsiku zonsene za umaso wanga, toera ndibve udidi wa Yahova, mbandiyang’ana na kukomerwa nyumba yace.’ (Sal. 27:4) Tendeni tonsene tipitirize kukhala cifupi na Mulungu, kukhala cifupi na atumiki ace, na kupitiriza kuenda kutsogolo na gulu ya Yahova.