Kugumanika Kwathu pa Misonkhano Kusapangizanji Thangwi ya Ife

1-2. (a) Kodi Yahova asapibva tani angaona pikwi na pikwi pya anthu pa dziko yonsene yapantsi mbagumanyikana pa Cikumbuso? (Onani cithundzithundzi ciri pa tsamba yakutoma.) (b) Ndi mbvundzo upi unafuna kutawirwa mu nsolo uno?

NYEREZERANI kuti Yahova asapibva tani angaona pikwi na pikwi pya anthu pa dziko yonsene yapantsi mbagumanyikana toera kucita Cikumbuso ca kufa kwa mwanace. Mu ndzidzi unoyu, iye asaona pizinji kupiringana mwinji wa anthu; iye asaona m’bodzi na m’bodzi ali penepo. Mwacitsandzo, iye asaona ale anagumanika pyaka pyonsene mwakukhulupirika. Pakati pa anthu anewa, pana ale akuti asawangisira kakamwe toera kubwera maseze athimbane na mitcingo. Anango ndi ale akuti nee asabwera kumisonkhano masumana onsene, mbwenye asaona Cikumbuso ninga cakufunika kakamwe. Yahova asaonambo ale akuti akutoma kwene kugumanika pa Cikumbuso.

² Undimomwene ndi wakuti Yahova asakomerwa kakamwe angaona anthu azinji mbagumanika pa Cikumbuso. (Luka 22:19) Mbwenye iye nee asakomerwa basi na kuinjipa kwa anthu anabwera pa Cikumbuso, m’mbuto mwace, cakufunika kakamwe kuna Yahova ndi pinaacitisa kubwera. Mu nsolo uno, tinatawira mbvundzo wakufunika kakamwe: Thangwi yanji pyaka pyonsene tisagumanika pa Cikumbuso, pontho thangwi yanji masumana onsene tisagumanika pa misonkhano inakhunganya Yahova toera kuphedza ale ananfuna?

3-4. (a) Thangwi yanji tisagumanika pa misonkhano? (b) Kugumanika kwathu pa misonkhano kusapangizanji thangwi ya ife? (c) Mwakubverana na 1 Akorinto 11:23-26, thangwi yanji nee tisafunika kudjomba pa Cikumbuso?

³ Ife tisagumanika pa misonkhano ya mpingo makamaka thangwi iyo isacita khundu ya ulambiri wathu. Pontho pa misonkhano ineyi tisapfundziswa na Yahova. Anthu akudzikuza nkhabe funa kupfundziswa pinthu. (3 Juw. 9) Mwakusiyana na iwo, ife tisafuna kakamwe kupfundziswa na Yahova na gulu inaphatisira iye.—Iza. 30:20; Juw. 6:45.

⁴ Kugumanika kwathu pa misonkhano kusapangiza kuti ndife anthu akucepeseka, pontho tisafuna kupfundziswa. Ife nee tisagumanika pa Cikumbuso ca kufa kwa Yezu thangwi yakukakamizwa, mbwenye tisagumanika toera kubvera ntemo uyu wa Yezu: “Pitirizani kucita pyenepi toera mundikumbukire.” (Lerini 1 Akorinto 11:23-26.) Cikumbuso ceneci cisawangisa cidikhiro cathu ca ntsogolo, pontho cisatikumbusa kuti Yahova asatifuna kakamwe. Kusiyapo pyenepi, Yahova asadziwa kuti ife tisafunika kuwangiswa kazinji kene, tayu basi kabodzi pa caka. Natenepa iye acita masasanyiro a misonkhano masumana onsene, pontho asatiphemba toera tigumanike pa misonkhano ineyi. Kukhala akucepeseka kusatikulumiza toera kubvera. Masumana onsene ife tisaphatisira midzidzi mizinji toera kukhunganyika na kugumanika pa misonkhano ineyi.

 5. Thangwi yanji anthu akucepeseka asatawira ncemerero wa Yahova?

⁵ Pyaka pyonsene, anthu azinji akucepeseka asatawira ncemerero wa Yahova toera kupfundziswa na iye. (Iza. 50:4) Iwo asakomerwa kugumanika pa Cikumbuso, pontho asatoma kugumanika pa misonkhano inango. (Zak. 8:20-23) Anthu apswa pabodzi na ife, tisakomerwa kupfundziswa na kutsogolerwa na Yahova, ‘m’phedzi wathu na muomboli wathu.’ (Masal. 40:17) Nyerezerani basi: Ndi upi ncemerero wakufunika peno wakutsandzayisa kakamwe kupiringana kutawira ncemerero toera kupfundziswa na Yahova na Yezu, Mwana wakuti asafuniwa kakamwe na Yahova?—Mat. 17:5; 18:20; 28:20.

 6. Kodi kucepeseka kwaphedza tani mamuna unango toera kugumanika pa Cikumbuso?

⁶ Pyaka pyonsene, ife tisawangisira toera kucemera anthu azinji kakamwe toera agumanike pa Cikumbuso ca kufa kwa Yezu. Anthu azinji akucepeseka asapfundza undimomwene thangwi yakutawira ncemerero wathu. Onani citsandzo cibodzi. Mu pyaka pingasi nduli, mamuna unango atambira ncemerero wa Cikumbuso, natenepa apanga m’bale adampasa kuti iye nee anaenda. Mbwenye pa ntsiku ya Cikumbuso, m’bale adzumatirwa pidaona iye mamuna unoyu n’Nyumba ya Umambo. Mamuna akomerwa kakamwe na njira idatambirwa iye mbatoma kugumanika pa misonkhano yathu masumana onsene. Inde, mu caka cidatowera, iye aluza misonkhano mitatu basi. Ninji cidancitisa kufuna kugumanika pa misonkhano yonsene? Iye akhali wakucepeseka kakamwe toera kucinja manyerezero ace. Mukupita kwa ndzidzi, m’bale adancemera alonga: “Iye ndi mamuna wakucepeseka kakamwe.” Mwakukhonda penula, ndi Yahova adacitisa mamuna unoyu toera Amulambire, pontho cincino iye ndi wakubatizwa.—2 Sam. 22:28; Juw. 6:44.

 7. Kodi pinapfundza ife pa misonkhano na pinaleri ife m’Bhibhlya pisatiphedza tani toera kukhala akucepeseka?

⁷ Pinapfundza ife pa misonkhano na pinaleri ife m’Bhibhlya pinatiphedza toera tikhale akucepeseka. Masumana mangasi Cikumbuso mbicidzati kucitwa, kazinji kene misonkhano yathu isagomezera citsandzo ca Yezu na kucepeseka kudapangiza iye mukupereka umaso wace ninga Ciomboli. Pontho ntsiku zingasi Cikumbuso mbicidzati kucitwa, ife tisaphembwa toera tileri Bhibhlya kuti tidziwe pidacitika mu ndzidzi udafa Yezu na udalamuswa iye. Pinapfundza ife pa misonkhano ineyi na pinaleri ife m’Bhibhlya pisaticitisa kuthimizira kupereka kwathu takhuta ku ntsembe yaciomboli idapereka Yezu kwa ife. Tisakulumizika kutowezera kucepeseka kwace na kucita cifuno ca Yahova, maseze m’midzidzi inathimbana ife na pinentso.—Luka 22:41, 42.

 8. Yezu apangiza tani cipapo?

⁸ Ife tisawangisirambo kutowezera Yezu mukupangiza cipapo. Nyerezerani cipapo cidapangiza iye ntsiku zingasi mbadzati kufa. Iye akhadziwa mwadidi kuti mwakukhonda dembuka anyamalwa ace mbadampasa manyadzo, kum’menya na kumupha. (Mat. 20:17-19) Ngakhale tenepo, mwakufuna iye atawira kuphiwa. Pidafika ndzidzi, iye alonga kuna apostolo ace akukhulupirika akhali na iye ku Getsemani: “Lamukani, tendeni. Ule anafuna kundisandukira ali cifupi.” (Mat. 26:36, 46) Pontho mu ndzidzi udafika nsoka wa anthu na pida toera kum’phata, iye aenda kutsogolo, mbalonga kuti akhali ani, pontho apanga anyankhondo toera asiye apostolo ace aende. (Juw. 18:3-8) Yezu apangiza cipapo kakamwe. Lero, Akristu akudzodzwa na mabira anango asawangisira kutowezera cipapo ca Yezu. Munjira ipi?

 9. (a) Thangwi yanji tisafunika kukhala acipapo toera kugumanika pa misonkhano masumana onsene? (b) Citsandzo cathu cisaphedza tani abale ali nkaidi thangwi yacikhulupiro cawo?

⁹ Tingathimbana na makhaliro akunentsa, tisafunika kukhala acipapo toera kugumanika pa misonkhano masumana onsene. Abale na alongo anango asagumanika pa misonkhano mwakukhonda tsalakana kutsukwala thangwi yakuferwa, kufewa manungo, peno nyatwa za ungumi. Mwacipapo anango asagumanika pa misonkhano maseze atcingwe na acibale awo peno mautongi. Pontho nyerezerani kuti citsandzo cathu cisaphedza tani abale athu ali nkaidi thangwi yacikhulupiro cawo. (Aheb. 13:3) Iwo angabva kuti tikupitiriza kutumikira Yahova mwakukhonda tsalakana mayesero anathimbana na ife, iwo asakhala na cikhulupiro cakuwanga, acipapo na akukhulupirika. Pyenepi pyacitikirambo mpostolo Paulu. Pikhali iye nkaidi ku Roma, iye akomerwa pidabva iye kuti abale ace akupitiriza kutumikira Mulungu mwakukhulupirika. (Afil. 1:3-5, 12-14) Ndzidzi ungasi mbadzati kubuluswa nkaidi, peno pidamala iye kwene kubuluswa, Paulu alemba tsamba yace kuna Ahebheri. Mu tsamba ineyi, iye aphemba Akristu akukhulupirika kuti apitirize “kupangiza ufuni kuna abale” mbakhonda kudjomba misonkhano.—Aheb. 10:24, 25; 13:1.

10-11. (a) Mbani anafunika ife kucemera toera agumanike pa Cikumbuso? (b) Mwakubverana na Aefesi 1:7, thangwi yanji tisafunika kucita pyenepi?

¹⁰ Ife tisapangiza cipapo tingacemera acibale athu, andzathu akubasa na anyakuendekana athu toera agumanike pa Cikumbuso. Thangwi yanji tisacemera anthu anewa? Ife tisaacemera toera agumanikembo pa Cikumbuso thangwi tisapereka takhuta na pidaticitira Yahova na Yezu. Tisafuna kuti iwo apfundze kuti anaphedzekambo tani na “kukoma ntima kukulu” kwa Yahova kubulukira ku ntsembe ya ciomboli.—Lerini Aefesi 1:7; Apok. 22:17.

¹¹ Tingapangiza cipapo cakugumanyikana pabodzi, tisapangizambo n’khaliro unango wakuti Mulungu na Mwanace aupangiza munjira zakusiyana-siyana.

12. (a) Kodi misonkhano yathu isathimizira tani kufuna kwathu Yahova na Yezu? (b) Kodi 2 Akorinto 5:14, 15 isatikulumiza toera kucitanji mukutowezera Yezu?

¹² Kufuna kwathu Yahova na Yezu kusatikulumiza toera kugumanika pa misonkhano, thangwi pinapfundza ife pa misonkhano pisathimizira ufuni wathu kuna Yahova na Mwanace. Kazinji kene ife tisakumbuswa pidaticitira iwo. (Aroma 5:8) Makamaka Cikumbuso cisatikumbusa kuti iwo asatifuna kakamwe, pontho asafuna ale akuti adzati kutoma kupereka takhuta ku masasanyiro a ciomboli. Thangwi yakupereka kwathu takhuta, ife tisawangisira toera kutowezera Yezu ntsiku zonsene. (Lerini 2 Akorinto 5:14, 15.) Kusiyapo pyenepi, mitima yathu isatikulumiza kusimba Yahova thangwi yakutipasa ciomboli. Njira ibodzi ya kunsimba ndi kupereka mitawiro yakubuluka muntima pa misonkhano.

13. Tinapangiza tani kuti tisafuna kakamwe Yahova na Mwanace? Fokotozani.

¹³ Ife tinapangiza kuti tisafuna kakamwe Yahova na Mwanace tingakhala dzololo toera kuphedza anango. Kazinji kene, ife tisasiya mabasa mazinji toera tigumanike pa misonkhano yathu. Mipingo mizinji isacita nsonkhano ubodzi pakati pa sumana namasiku mu ndzidzi wakuti anthu amala neta na mabasa. Pontho nsonkhano unango usacitwa pakumala kwa sumana ndzidzi wakuti anthu anango akupuma. Kodi Yahova asaona kuwangisira kunacita ife toera kugumanika pa misonkhano maseze taneta? Inde, iye asaona. Undimomwene ndi wakuti Yahova asakomerwa kakamwe angaona kuti tikuwangisira toera kupangiza ufuni wathu kuna iye.—Marko 12:41-44.

14. Yezu akhazikisa tani citsandzo cadidi cakuphedza anango?

¹⁴ Yezu akhazikisa citsandzo cadidi cakuphedza anango. Iye akhali dzololo toera kufa thangwi ya anyakupfundzace, pontho ntsiku zonsene akhaikha pyakufuna pya anango pa mbuto yakutoma. Mwacitsandzo, mu ndzidzi unango iye akhala pabodzi na anyakupfundzace maseze akhadaneta peno akhali na pizinji toera kunyerezera. (Luka 22:39-46) Pontho iye akhasaka miyai toera kuphedza anango, tayu toera kuphedzwa. (Mat. 20:28) Ife tingafuna kakamwe Yahova na abale na alongo athu, tinacita pyonsene pinakwanisa ife toera kugumanika pa Cikumbuso na pa misonkhano yathu yonsene ya mpingo.

15. Ndi anthu api anafunika ife makamaka kuaphedza?

¹⁵ Ife basi ene tisacita khundu ya ubale wandimomwene Wacikristu, pontho tisafuna kuphatisira ndzidzi wathu uzinji toera kucemera anango kuti alambirembo Mulungu pabodzi na ife. Mbwenye, ife tisafunika kuphedza makamaka “anyakukhulupira andzathu” akuti asiya kumwaza mphangwa na kugumanika pa misonkhano. (Agal. 6:10) Ife tinapangiza kuti tisaafuna tingaacemera kuti agumanike pa misonkhano, makamaka pa Cikumbuso. Ninga Yahova na Yezu, ife tisakomerwa kakamwe tingaona kuti munthu wakuti akhadasiya kusonkhana peno kumwaza mphangwa, abwerera pontho kuna Yahova, Babathu na Nkumbizi wathu waufuni.—Mat. 18:14.

16. (a) Kodi tinawangisana tani unango na ndzace, pontho misonkhano yathu isatiphedza tani? (b) Thangwi yanji ndzidzi uno wa caka ndi wadidi toera kukumbuka mafala a Yezu anagumanika pa Juwau 3:16?

¹⁶ Cikumbuso mbacidzati kufika, citani pyonsene pinakwanisa imwe toera kucemera anthu azinji kakamwe kuti agumanike pa Cikumbuso cinafuna kucitwa Ncixanu namaulo, ntsiku 19 ya Abril ya 2019. (Onani bokosi yakuti “Mbani Anafunika Imwe Kucemera?”) Nkati mwa caka cino, tendeni tiwangisire toera tigumanike pa misonkhano yonsene inatikhunganyira Yahova toera tipitirize kuwangisana unango na ndzace. Mu ndzidzi wakuti makhaliro ano ali dhuzi na kumala, ife tinaphedzwa na misonkhano yathu toera tipitirize kukhala akucepeseka, acipapo na aufuni. (1 Ates. 5:8-11) Natenepa, tendeni tipangize na ntimathu onsene kuti Yahova na Mwanace asatifuna kakamwe.—Lerini Juwau 3:16.