Mibvundzo Inacitwa na Anyakuleri
Kodi Aizraeli Akhali na Cakudya Cinango n’Thando Kusiyapo Mana na Mbalame Zinacemerwa Makwerekwece?
Aizraeli kazinji kene akhadya mana mu pyaka 40 n’thando. (Eks. 16:35) Kusiyapo pyenepi, Yahova aapasambo makwerekwece kawiri. (Eks. 16:12, 13; Num. 11:31) Mbwenye Aizraeli akhalimbo na ntundu unango wa pyakudya.
Mwacitsandzo, midzidzi inango Yahova akhaendesa atumiki ace pa mbuto yakuti ikhali na madzi na cakudya “toera apume.” (Num. 10:33) Ibodzi mwa mbuto zenezi ikhacemerwa Elimu, “kweneko kukhali micera 12 ya madzi na miti 70 ya micindu.” (Eks. 15:27) Bukhu yakuti Miti Inalongwa m’Bhibhlya yalonga kuti ntundu unoyu wa miti ya micindu yakuti “isagumanika m’mbuto zizinji kakamwe, . . . misapo yace isadyiwa na anthu azinji n’thando. Pontho isaphatisirwa toera kucita mafuta na kumanga nyumba kuna anthu azinji.”
Aizraeli panango alimirambo pa thando ikulu yakuti lero isacemerwa Feiran, inacita khundu ya gowa ya Feiran.a Bukhu yakuti Kudzindikira Pinthu Pidacitika mu Ndzidzi Wakale yalonga kuti: “Ndi ya makilometru 130 aulaphi, ndi yakulapha, yakubalika, pontho ndi yakudziwika kakamwe ku Sinai.” Bukhu ineyi yalongambo kuti “kutomera padaphatana gowa ineyi na bara, munthu anafunika kucita ulendo wa makilometru 45 toera kufika kuthando ya Feiran. Thando ineyi iri n’dzulu mametru akukwana 610 bulukira m’bara. Thando ineyi yadzala na miti ya micindu, ndi yakubalika kakamwe, pontho isalandaniswa na Munda wa Edheni. Kutomera kale kakamwe anthu asaenda ku thando ineyi, thangwi iyo iri na micindu mizinji kakamwe.”
Miti ya micindu n’thando ya Feiran
Pidabuluka Aizraeli ku Ejitu, iwo akwata ufa wakumunywa, mabasiya akumunyira ufa, pyakudya pya ntundu unango na mafuta. Mbwenye pinthu pyenepi nee mbadapidya mu ndzidzi uzinji. Iwo abulukambo na “mikumbi mikulu ya mabira, mbuzi na ng’ombe.” (Eks. 12:34-39) Thangwi yakunentsa kwa umaso n’thando, panango pinyama pizinji pyafa. Kusiyapo pyenepi, panango pinyama pinango Aizraeli akhapidya, pontho pinango panango pikhaperekwa ninga ntsembe, ngakhale kuna alungu authambi.b (Mabasa 7:39-43) Ngakhale tenepo, Aizraeli akhali na mikumbi inango ya mbuzi, ng’ombe na mabira. Ife tisadziwa pyenepi thangwi ya pidalonga Yahova kuna Aizraeli pidakhonda iwo kum’bvera. Iye alonga: “Ananu anadzakhala akumbizi n’thando mu pyaka 40.” (Num. 14:33) Panango mikumbi ya pifuyo pyawo pikhaaphedza toera kukhala na nkaka, pontho midzidzi inango kukhala na nyama; mbwenye nee pikhali pyakukwana toera kudyesa anthu cifupi na mamiliyau matatu mu pyaka 40.c
Pinyama pyenepi pikhagumana kupi cakudya na madzi akumwa?d Mu ndzidzi unoyu madzi akhabvumba kakamwe, pontho n’thando mukhali na thongwe izinji kakamwe. Bukhu Estudo Perspicaz das Escrituras, Volume 1, yalonga kuti mu pyaka 3.500 nduli, “ku Arabhya kukhali na madzi mazinji kakamwe kupiringana cincino. Ife tisadziwa pyenepi thangwi kweneko kuli na magowa mazinji akuzika akuti nee ali na madzi, magowa anewa aoneka thangwi kweneko kukhali na madzi mazinji kakamwe.” Ngakhale tenepo, thando ineyi ikhali mbuto yakuuma na yakugopesa. (Dheu. 8:14-16) Mbadasowa madzi adaapasa Yahova mwacirengo, Aizraeli na pinyama pyawo pyene mbadafa.—Eks. 15:22-25; 17:1-6; Num. 20:2, 11.
Mose apanga Aizraeli kuti Yahova akhadaapasa mana toera adziwe kuti “munthu nee asakhala na umaso thangwi ya cakudya basi, mbwenye na mafala onsene anabuluka pamulomo wa Yahova.”—Dheu. 8:3.
a Onani A Sentinela ya 1 de Maio de 1992, tsa. 24-25.
b Bhibhlya isalonga maulendo mawiri adaperekwa pinyama ninga ntsembe kuna Yahova n’thando. Ulendo wakutoma ukhali ndzidzi udakhazikiswa basa ya unyantsembe; ulendo waciwiri ukhali mu ndzidzi wa Paskwa. Pyenepi pyacitika mu caka 1512 Kristu Mbadzati Kubalwa, pakupita caka cibodzi pidabuluka Aizraeli ku Ejitu—Lev. 8:14–9:24; Num. 9:1-5.
c Kunkhomo kwa pyaka 40 n’thando, Aizraeli akwata pinyama pizinji kakamwe pidawina iwo nkhondo. (Num. 31:32-34) Ngakhale tenepo, iwo apitiriza kudya mana mpaka kupita mu Dziko Yakupikirwa.—Yos. 5:10-12.
d Nkhabepo cinthu cinapangiza kuti pinyama pikhadyambo mana, nakuti mana akhaperekwa mwakubverana na pikhafuna kudya m’bodzi na m’bodzi.—Eks. 16:15, 16.