Abale Awiri Adakhazikiswa Ninga Mathubo Akutonga

N’CITATU, ntsiku 18 ya Janeiro ya 2023, mu jw.org mwaikhwa cidziwiso cakuti m’bale Gage Fleegle na m’bale Jeffrey Winder akhazikiswa ninga Mathubo Akutonga a Mboni za Yahova. Abale anewa awiri asatumikira Yahova mwakukhulupirika mu pyaka pizinji.

M’bale Fleegle akuzwa na anyakubalace akuti ndi Mboni za Yahova kumadokero a dzuwa a Pensilvânia, Estados Unidos. Pikhali iye m’phale, banja yawo yafuluka, mbienda kakhala mu nzinda ung’ono wakuti ukhafuna ciphedzo ca amwazi mphangwa. Pidapita ndzidzi ungasi, iye abatizwa pa ntsiku 20 ya Novembro ya 1988.

M’bale Fleegle ndzidzi onsene akhawangiswa na anyakubalace toera apite m’basa ya ndzidzi onsene. Kazinji kene, panyumba pawo akhatambira ayang’aniri a cisa na abale anatumikira ku Bheteli. M’bale Fleegle akhakwanisa kuona kuti abale na alongo anewa ndi akutsandzaya kakamwe. Pidapita ndzidzi ungasi, pakumala kubatizwa, iye atoma kutumikira ninga mpainiya wa ndzidzi onsene pa ntsiku 1 ya Setembro ya 1989. Pidapita pyaka piwiri, acitikirwa na pinthu pikhafuna iye kakamwe kutomera pikhali iye na pyaka 12, pyakuti ndi kutumikira ku Bheteli. Iye atoma kutumikira ku Bheteli ya ku Brooklyn mwezi wa Outubro wa 1991.

Pa Bheteli, m’bale Fleegle aphata basa yakucita mabukhu mu pyaka pisere; buluka penepo, acinjwa mbaenda kaphata mu Dhepartamentu ya Basa. Mu ndzidzi unoyu, iye atumikira mu mpingo wa cilongero ca ku Rusiya mu pyaka pingasi. Mu caka ca 2006, iye amanga banja na Nadia. Nkazace atawiriswambo kutumikira pa Bheteli. Uwiri wawo akhadatumikira kale mu cisa ca cilongero ca Cizungu, pontho mu pyaka pyakupiringana 10, iwo atumikira mu cisa ca cilongero ca Cixipanyola. Pakupita pyaka pizinji mbakatumikira mu Dhepartamentu ya Basa, m’bale Fleegle aphembwa toera aphate mu Ofesi ya Komiti Yakupfundzisa, buluka penepo acinjwa toera aende kaphate mu Ofesi ya Komiti ya Basa. Mwezi wa Março wa 2022, iye asankhulwa toera akhale nyakuphedza wa Komiti ya Basa ya Mathubo Akutonga.

M’bale Winder akuzwa ku Murrieta, Califórnia, ku Estados Unidos da América. Iye apfundziswa undimomwene na anyakubalace, mbabatizwa pa ntsiku 29 ya Março ya 1986. Pidapita mwezi ubodzi, iye atoma kutumikira ninga mpainiya wakuphedza. Iye akomerwa kakamwe na upainiya, mbafuna kupitiriza. Pakupita miyezi mizinji mbakatumikira ninga mpainiya wakuphedza, iye atoma kutumikira ninga mpainiya wa ndzidzi onsene pa ntsiku 1 ya Outubro ya 1986.

Pikhali iye m’phale, m’bale Winder aenda kaona abale ace awiri akhatumikira pa Bheteli. Pyenepi pyam’phedza toera kufuna kutumikira pa Bheteli. Mwezi wa Maio wa 1990, iye acemerwa toera katumikira ku Bheteli ya Wallkill.

Pa Bheteli, m’bale Winder aphata basa m’madhepartamentu akusiyana-siyana, kuphatanizambo Dhepartamentu Yakucenesa, Dhepartamentu Yakutsalakana Pyakulima na Pinyama na mu Ofesi ya Bheteli. Mu caka ca 1997, iye amanga banja na nkazace anacemerwa Angela, pontho uwiri wawo asatumikira pa Bheteli mpaka lero. Mu caka ca 2014, iye acinjwa mbaenda katumikira ku Warwick, kweneko m’bale Winder aphedzera kumangwa kwa Ofesi Ikulu ya Mboni za Yahova. Mu caka ca 2016, iwo acinjwa mbaenda katumikira ku Centro Educacional da Torre de Vigia ku Patterson, kweneko m’bale Winder aphata basa mu Dhepartamentu ya Audhyu Vidhyu. Pidapita pyaka pinai, iwo abwerera ku Warwick, kweneko m’bale Winder asankhulwa toera kutumikira mu Ofesi ya Komiti Yakung’anira Atumiki a pa Bheteli. Mwezi wa Março wa 2022, iye akhazikiswa ninga nyakuphedza wa Komiti Yakuyang’anira Atumiki a pa Bheteli ya Mathubo Akutonga.

Ife tisacita phembero toera Yahova apitirize kupasa nkhombo ‘amuna anewa akuti ndi miyoni’ toera apitirize kuphata basa mwakuwanga toera kuphedzera Umambo.—Aef. 4:8.