Mibvundzo Inacitwa Na Anyakuleri

Thangwi yanji pisakhondeswa kuikha mabukhu a Mboni za Yahova mu saiti ya munthu paekha peno m’masaiti anango?

Nakuti Mboni za Yahova zisagawira mabukhu mwakukhonda lipa, anthu anango asanyerezera kuti ndi pyakutawirika kuakopyari mbaaikha m’masaiti anango. Mbwenye pyenepi pinakwanisa kubweresa nkandzo, pontho nee pisabverana na njira toera kuphatisira.a (onani cidzindikiro capantsi) Mitemo ineyi isalonga pakweca kuti nee m’bodzi asatawiriswa kukopyari mu saiti yathu “mafoto, mabukhu, pidzindikiro, nyimbo na pinthu pinango toera kuikha mu saiti ya munthu paekha peno m’masaiti anango.” Thangwi yanji tisakhondesa pyenepi?

Pana mitemo inakhondesa kukopyari pinagumanika mu saiti yathu toera kuikha mu saiti inango. Anyakupanduka na anthu anango asaphatisira mabukhu anthu toera kutundusa Mboni za Yahova na anthu anango. Mbwenye cifuniro cawo cikulu ndi toera kucitisa anthu kupenula mphangwa zathu. (Masalmo 26:4; Misangani 22:5) Anthu anango asaphatisira pinthu pinaikha ife mu saiti yathu toera kucita malonda. Mitemo inakhondesa kukopyari pinthu pinaikha ife mu saiti yathu toera kupiikha mu saiti inango, isaphedza toera pyenepi pikhonde kucitwa. (Misangani 27:12) Mbwenye mathando akutongera miseru nee anatiphedza tingatawirisa anthu anango, ngakhale abale athu, kuikha mabukhu athu m’masaiti anango peno kuphatisira pinthu pinaikha ife mu jw.org toera kucita malonda.

Tingakopyari mabukhu athu mu saiti inango, m’mbuto mwakuphatisira jw.org, ndi ngozwi ikulu kakamwe. Yahova asaphatisira basi ene ‘m’bandazi wakukhulupirika na wandzeru’ toera kutipasa cakudya cauzimu. (Mateo 24:45) ‘M’bandazi’ unoyu asaphatisira basi ene saiti yathu toera kupereka cakudya cauzimu—www.jw.org, tv.jw.org, na wol.jw.org. Pontho ife tisaphatisira basi ene maferamentu matatu m’mitokodzi peno thabuleti yathu—JW Language^®, JW Library^®, na JW Library Sign Language^®. M’masaiti anewa na m’maferamentu anewa, nee tinagumana pinthu pya malonda peno pinthu pinango pinabuluswa na dziko ya Sathani. Natenepa tingakopyari mabukhu athu m’masaiti anango peno m’maferamentu anango, ndi ngozwi, thangwi panango mabukhu anewa nee ali mwadidi.—Masalmo 18:26; 19:8.

Kusiyapo pyenepi, tingaikha mabukhu athu m’masaiti akuti anthu anakwanisa kuikha maonero awo, pyenepi pinaphedza anyakupanduka na anthu anango toera kulonga mwakuipa gulu ya Yahova. Pyenepi panango pinacitisa kuti abale anango aketesane na anthu anewa mu interneti mbititikanisa Yahova. Natenepa mbuto ninga zenezi nee ndi zakuthema toera kuphedza munthu kudziwa undimomwene. (1 Timoti 6:3-5; 2 Timoti 2:23-25) Pontho, anthu anango asacita m’masaiti mu interneti anapangiza ninga ndi a gulu yathu peno a Mathubo Akutonga. Mbwenye pyenepi ndi uthambi. Nee m’bale m’bodzi wa Mathubo Akutonga ali na saiti yace.

Tingaphedza anthu kupita mu jw.org, tisaphedzera basa yakumwaza ‘mphangwa zadidi.’ (Mateo 24:14) Saiti yathu na maferamentu athu asapitiriza kuthambaruka. Tisafuna kuti anthu onsene aphindule nayo. Natenepa tisatawiriswa kutumiza mabukhu athu kuna anango mukuphatisira e-mail peno kuatumizira link ya saiti yathu. Munjira ineyi tinaphedza anthu toera kuphatisira njira ibodzi basi inaphatisira Yahova toera kupereka cakudya cauzimu, ‘m’bandazi wakukhulupirika na wandzeru.’