Pfunziro 15

Kuphedza Anango Towera Acite Cifuno Ca Mulungu

Thangwi yanji musafunika kupanga anango pinthu pinapfunza imwe? (1)

Kodi mbani anafunika imwe kugawana naye mphangwa zadidi? (2)

Kodi nkhaliro wanu ungakwanise kucitisanji kwa anthu anango? (2)

Kodi munakhala lini wakuthema towera kumwaza mphangwa pabodzi na mpingo? (3)

1. Cincino imwe mwapfunza pinthu pizinji pyadidi m’Biblya. Cidziwiso ceneci cisafunika kukucitisani kukulisa umunthu Wacikristu. (Aefesi 4:22-24) Cidziwiso ceneci ndi cakufunika kakamwe towera mugumane umaso okhonda mala. (Jwau 17:3) Natenepa, anango asafunikambo kubva mphangwa zadidi towera akwanise kupulumuswambo. Akristu onsene andimomwene asafunika kupereka umboni kwa anango. Unoyu ndi ntemo wa Mulungu.—Aroma 10:10; 1 Akorinto 9:16; 1 Timoti 4:16.

2. Imwe mungakwanise kutoma kugawana pinthu pyadidi pinapfunza imwe na anthu ale ali cifupi na imwe. Gawanani mphangwa zadidi na acibale anu, axamwali anu, anzanu a kuxikola na anzanu a kubasa. Citani pyenepi mu njira yadidi na yakupirira. (2 Timoti 2:24, 25) Kumbukani kuti kazinji kene anthu asalang’ana kakamwe makhaliro a munthu kupiringana pinalonga iye. Natenepa nkhaliro wanu wadidi ungakwanise kutundusa anango towera kubvesera mphangwa zinaapanga imwe.—Mateo 5:16; 1 Pedro 3:1, 2, 16.

3. Mukupita kwa nzidzi mungakwanise kukhala wakuthema towera kutoma kumwaza mphangwa pabodzi na mpingo wa Mboni za Yahova wapacisa canu. Ineyi ndi thanyo yakufunika mu kuthambaruka kwanu. (Mateo 24:14) Ndi kutsanzaya kukulu tani kunafuna khala na imwe mungakwanisa kuphedza munthu unango kukhala nzakazi wa Yahova na kugumana umaso okhonda mala!—1 Atesalonika 2:19, 20.