“Lekani Kupenula Mu Mitima Yanu”!

“Abale anga, . . . lekani kupenula mu mitima yanu.”​—2 ATES. 2:1, 2.

NTSONGA TOERA KUDINGA

Ndi macenjezo api a ndzidzi wakuthema adapereka Paulu m’matsamba ace kwa Atesalonika?

Kodi ninji cinafuna kutiphedza toera kukhonda kunyengererwa?

Kodi kumwaza mphangwa za Umambo mwaphinga kusatitsidzikiza tani?

1, 2. Thangwi yanji unyengereri usapitiriza lero, na usacitwa mu njira ipi? (Onani cithundzithundzi cakutoma.)

MPHANGWA za uthambi na unyengereri ndi wakudziwika kakamwe m’makhaliro ano a pinthu. Pyenepi nee pisafunika kutidzudzumisa. Bhibhlya isafokotoza pyenepi kuti Sathani Dyabo ndi nyakunyengeta wankulu, pontho ndi ntongi wa makhaliro ano a pinthu. (1 Tim. 2:14; 1 Jwau 5:19) Nakuti makhaliro ano akuipa ali cifupi na kumala, ukali wa Sathani ukuthimizirika thangwi iye ali na ‘ndzidzi ung’ono basi’ udasala. (Apok. 12:12) Natenepa, tinakwanisa kudikhira kuthimizirika kwa uthambi na unyengereri kwa ale anakhuyiwa na macitiro a Dyabo, makamaka ale anacita ulambiri wandimomwene.

² Midzidzi inango mafala authambi na kupambizirwa kwa atumiki a Yahova na pikhulupiro pyawo kusalongwa mu pyakupereka mphangwa. Matsamba a mphangwa, televizau na Interneti, pyenepi pisaphatisirwa toera kumwaza mphangwa zakukhonda kukhala za undimomwene. Mamalisiro ace, anthu anango asadzudzumika, mwakukhonda nentsa asakhulupira uthambi unoyu.

 3. Ninji cinafuna kutiphedza toera kuthimbana na unyengereri?

³ Toera kuthimbana na macitiro anewa akupenulisa a nyamalwa wathu, ife tisapereka takhuta kakamwe thangwi tiri na Mafala a Mulungu akuti ndi akuphindulisa toera kusasanyira pinthu. (2 Tim. 3:16) Mphyakuphindulisa kuti tisapfundza kubulukira kwa pinthu pidalemba mpostolo Paulu kuti Akristu anango a pyaka dzana yakutoma a ku Tesalonika apeuswa mbatawira pinthu pyakuti nee pikhali pya undimomwene. Iye aacenjeza, “lekani kupenula mu mitima yanu.” (2 Ates. 2:1, 2) Tinapfundzanji kubulukira ku cenjezo yaufuni idapereka Paulu, na tinaphatisira tani pyenepi m’makhaliro athu?

MACENJEZO PA NDZIDZI WAKUTHEMA

 4. Kodi Akristu a ku Tesalonika akhali tani maso thangwi ya kubwera kwa ‘ntsiku ya Mulungu,’ na ifembo tisakhala tani maso?

⁴ Mu tsamba yace yakutoma idatumiza iye ku mpingo wa ku Tesalonika, Paulu alonga pya kubwera kwa ‘ntsiku ya Yahova.’ Iye nee akhafuna kuti abale ace akhale n’cidima na akukhonda kukhunganyika. Mbuto mwace, iye aadembetera ninga “ana a cheza” toera akhonde kugona mwauzimu. (Lerini 1 Atesalonika 5:1-6.) Lero, tisadikhira kufudzwa kwa Babilonya Wankulu, utongi wa dziko yonsene wa uphemberi waunthawatawa. Pyenepi pinadzatomesa ntsiku ikulu ya Yahova. Tisapereka takhuta kakamwe thangwi ya kuthimizirika kwa kubvesesa kwathu kukwanirisika kwa cifuniro ca Yahova. Pontho, kubulukira m’mpingo, tisatambira pikumbuso ndzidzi onsene pyakuti pisatiphedza toera kukoya manyerezero athu. Kudinga macenjezo anewa anaperekwa mwakubwereza-bwereza kunawangisa kutonga kwathu toera kutumikira Mulungu mu kuphatisira manyerezero athu.​—Arom. 12:1.

5, 6. (a) Kodi Paulu alembanji pa tsamba yace yaciwiri kwa Tesalonika? (b) Mwakukhonda dembuka, Mulungu anadzacitanji kubulukira mwa Yezu, pontho tisafunika kubvundzikanji?

⁵ Mu ndzidzi wakucepa, pakumala kutumiza tsamba yace yakutoma kwa Akristu a ku Tesalonika, Paulu aatumizira tsamba yaciwiri. Mu tsamba ineyi, iye alonga thangwi ya nyatwa inafuna kudza mu ndzidzi wakuti Mbuya Yezu anadzakwanirisa kutonga kwa Mulungu kwa “ale anakhonda kudziwa Mulungu mbakhondambo kubvera mphangwa zadidi.” (2 Ates. 1:6-8) Pinagumanika mu kapitulu 2 ya tsamba yace pisapangiza kuti anango m’mpingo unoyu ‘akhagopa’ ntsiku ya Yahova thangwi akakhulupira kuti ntsiku ineyi ikhali cifupi kakamwe. (Lerini 2 Atesalonika 2:1, 2.) Akristu anewa akutoma akhali na cidziwiso cakucepa ca kukwanirisika kwa cifuniro ca Mulungu, ngakhale kuti tsamba ya Paulu ikhadziwisa thangwi ya profesiya ineyi: ‘Pinadziwa ife mphing’ono basi, pya aprofeta, pinalonga ife mphing’ono basi. Pa ndzidzi wa ntsogolo pinadzabwera pinthu pyadidi pya ungwiro, mbapidzamala pinthu ping’ono pyonsene.’ (1 Akor. 13:9, 10) Mbwenye macenjezo akupumirwa adalembwa na Paulu, mpostolo Pedhro na abale anango akukhulupirika akudzodzwa a ndzidzi unoyu mbadaaphedza toera kupitiriza kukhala akukhulupirika.

⁶ Toera kubvekesa pyenepi, mwakupumirwa Paulu afokotoza kuti mbidzati kufika ntsiku ya Yahova kunadzaoneka anyakupanduka na ‘anthu akuipa’ akukhonda kubvera mwambo.a Natenepa, mu ndzidzi wace, Mbuya Yezu ‘anadzafudza’ ale onsene ananyengererwa. Mpostolo Paulu alonga thangwi ya kutongwa kwawo kweneku; ‘iwo adafuna tayu kutawira undimomwene.’ (2 Ates. 2:3, 8-10) Mphyadidi kubvundzika tekhene: ‘Kodi ndisafuna kakamwe undimomwene? Kodi tisaleri mphangwa zipswa ninga zinagumanika mu revista ino na mabukhu anango akubuluswa m’Bhibhlya anaperekwa kwa mbumba ya Yahova ku mipingo pa dziko yonsene yapantsi?

SANKHULANI MWANDZERU AXAMWALI ANU

7, 8. (a) Akristu akutoma akhafunika kuthimbana na ngozwi zipi? (b) Makamamaka ndi ngozwi ipi iripo kwa Akristu lero?

⁷ Mwandimomwene, Akristu mbadathimbana na ngozwi zinango kusiyapo anyakupanduka na pipfundziso pyawo. Paulu alembera Timoti kuti ‘kufuna upfumi ndi ninga ntcici wa pyakuipa pyonsene.’ Mpostolo Paulu alonga kuti ‘onsene adakhala nako kufuna upfumi, atayika, mbaleka kutawira, mbagwa m’madzedze akukhonda lengeseka.’ (1 Tim. 6:10) “Pinachita manungo” ikhali ngozwi inango yakuti ikhalipo.​—Agal. 5:19-21.

⁸ Imwe munakwanisa kuona thangwi yanji Paulu acenjeza mwamphambvu kwa Atesalonika thangwi ya kuthuswa kwawo kakamwe na amuna awa adacemera iye m’mbuto zonsene ninga ‘aprofeta apezi’ peno aunthawatawa. Pakati pawo pakhali amuna akhalonga “pyakukhonda kulungama, towera anyengerere anyakupfundza.” (2 Akor. 11:4, 13; Mach. 20:30) Mu kupita kwa ndzidzi, Yezu asimba mpingo wa ku Efeso thangwi iwo nee mbadatawira “anthu akuipa.” Anthu anewa a ku Efeso ‘apenda’ ale akhathulika apostolo akuti akhali aunthawatawa na authambi. (Apok. 2:2) Mwakutsandzayisa, mu tsamba yace yaciwiri kwa Atesalonika, Paulu apereka cenjezo iyi: “Abale tinakutongani na dzina ya Mbuya wathu Yezu Kristu: pambulikani pa abale anafamba na machitiro akukhonda kulungama.” Buluka penepo, Paulu alonga Akristu akuti nee akhafuna “kuphata mabasa.” (2 Ates. 3:6, 10) Mbwenye, khala iwo akhafamba mwakukhonda kulungama, pyenepi mbipidakhala pyandimomwene kakamwe kwa anthu akuti akhatowerera anyakupanduka! Mwandimomwene, kucita uxamwali na anthu anewa kukhali ngozwi kakamwe na kukhafunika kucalirwa, ngozwi ineyi iripombo lero.​—Mis. 13:20.

 9. Thangwi yanji tisafunika kukhala akucenjera munthu angatoma kulonga maonero ace peno mafala akupokanya?

⁹ Tiri cifupi na ntsiku yakutoma kwa nyatwa ikulu na kumala kwa makhaliro ano akuipa, natenepa, macenjezo anewa akupumirwa adaperekwa mu pyaka dzana yakutoma ali na mabvekero makulu kakamwe. Mwandimomwene, nee tisafuna kuphonya cifuniro ca udidi wakukhonda kutithema wa Mulungu mbatiluza cidikhiro cakukhala na umaso wa kwenda na kwenda, kudzulu kwa Akristu akudzodzwa na pa dziko yapantsi kwa mwinji ukulu. (2 Akor. 6:1) Khala munthu agumanika pa misonkhano yathu mbayesera kutinyengerera mu kulonga maonero ace peno mafala akupokanya, mwandimomwene tisafunika kukhala akucenjera kakamwe.​—2 Ates. 3:13-15.

‘KHALANI NA PHINGA MBAMUKOYA MAPFUNDZISIRO’

10. Kodi Akristu a ku Tesalonika akhakulumizwa toera kuphatisira mapfundzisiro api?

¹⁰ Paulu acenjeza abale ace a ku Tesalonika toera ‘akhale aphinga’ peno akuwanga mbaphatirira pidapfundza iwo. (Lerini 2 Atesalonika 2:15.) Kodi ndi ‘mapfundzisiro’ api peno miyambo ipi ikhapfundziswa iwo? Mwandimomwene, nee pikhali pipfundziso pikhamwazwa na uphemberi waunthawatawa pyakuti pikhaoneka ninga pikhabulukira m’Bhibhlya. Mbuto mwace, Paulu akhalonga pipfundziso pyakuti iye na anango apitambira kubulukira kwa Yezu pyakuti Mulungu akulumiza apostolo toera kupimwaza, pontho pyadzakhala khundu ya Malemba akupumirwa. Paulu asimba abale ace a mpingo wa ku Korinto mudalemba iye kuti, ‘mu pinthu pyonsene imwe mwatawira mafala a mwambo adakupangani ine.’ (1 Akor. 11:2) Pipfundziso pyenepi pisabuluka pa pfuli yakunyindirika, pontho pinakwaniswa kunyindirwa.

11. Ndi mu njira zipi anthu anango anakwanisa kunyengerwa?

¹¹ Mudalembera iye Aheberi, Paulu alonga njira ziwiri zakuti Nkristu anakwanisa kuluza cikhulupiro mbacimwana kukhala dzololo. (Lerini Ahebere 2:1; 3:12.) Iye alonga ‘kutayika’ na kuthaukira. Pakutoma, panango bote inakwanisa kutayika mu gombe mwakukhonda kudziwa. Mwapang’ono pang’ono inakwanisa kutayikiratu. Mu njira inango, munthu anasukhuma bote yace kutali na gombe pisapangizika na macitiro ace. Pitsandzo pyenepi piwiri pisapangiza mwadidi makhaliro a anthu anango ananyengererwa mbatawirisa kufeweswa kunyindira kwawo undimomwene.

12. Ndi pinthu pipi piripo lero pyakuti pinakwanisa kufewesa uzimu wathu?

¹² Anewa akhali makhaliro a anthu anango a ku Tesalonika. Kodi ndiye tani lero? Pinthu pyakubvunga ndzidzi ndi pizinji kakamwe. Nyerezerani kuti ndi midzidzi mingasi isabvungwa mu kuphatisira Interneti, kuleri na kutawira mphangwa pa ntcini wandzeru na pa ntokodzi, kucita pinthu pinafuna ife pa ndzidzi unafuna ife, peno kazinji kene kuona masendzekero. Pinthu pyenepi pyonsene pinakwanisa kudzudzumisa Nkristu na kupungula phinga yace. Kodi ndi api mamalisiro ace? Panango iye anacimwana kucita phembero yakubulukira muntima, kupfundza Mafala a Mulungu, kugumanika pa misonkhano na kumwaza mphangwa zadidi. Kodi tinacitanji toera kucalira kupenula mu ntima?

CITSIDZIKIZO TOERA TIKHONDE KUPENULA

13. Ninga pyalongweratu, kodi ndi api makhaliro a anthu azinji, pontho ninji cinafuna kutsidzikiza cikhulupiro cathu toera cikhonde kufewa?

¹³ Cinthu cibodzi cinafunika ife kucita ndi kudziwa ndzidzi unakhala ife na ngozwi ya kucita uxamwali na ale anakhonda kudzindikira kuti zino ndi ‘ntsiku zakumalisa.’ Mpostolo Pedhro alonga thangwi ya ndzidzi uno: ‘Anadzaoneka anthu akunyengeta na akudodomesa, akutoweza pifuno pyawo pyakuipa, mbadzalonga, kuti: pidapikirirwa pya kubwerera kwace Kristu piri kupi? Kutomera kulowa kwa makholo athu, pyonsene pinakhala sawasawa ninga mudakhalira ipyo pa kutoma, pa kucitwa kwa ipyo.’ (2 Ped. 3:3, 4) Kuleri kwathu na kupfundza kwathu ndzidzi onsene Mafala a Mulungu kunadzatiphedza toera kuikha manyerezero pa ndzidzi unakhala ife mbatidzindikira kuti tikukhala mu ‘ntsiku zakumalisa.’ Anyakupanduka adalongweratu aoneka kutomera kale kakamwe, pontho asapitiriza mu ntsiku zino. ‘Anthu akuipa’ anakhonda kubvera mwambo asapitiriza kuoneka lero, pontho asapingiza atumiki a Mulungu. Natenepa, tisafunika kukhala akucenjera thangwi ntsiku ya Yahova iri cifupi kakamwe.​—Sof. 1:7.

14. Kodi kuphata basa ya Mulungu kusatitsidzikiza tani?

¹⁴ Pyakucitika pisapangiza kuti njira yakutoma toera kukhala wakucenjera na kucalira kupenula mu ntima ndi kucita nkhundu mwakukhonda phonya mu kumwaza mphangwa zadidi za Umambo. Natenepa, pa ndzidzi wakuti Yezu Kristu, Nsolo wa mpingo, atuma atowereri ace toera kucita nyakupfundza a anthu a madzindza onsene mbaapfundzisa kutawira pinthu pidaapfundzisa iye, Yezu akhapereka uphungu wakuti mbudatsidzikiza atowereri ace. (Mat. 28:18, 19) Kucita pinthu mwakubverana na citsogolero cace kunaticitisa kukhala aphinga m’basa yakumwaza mphangwa. Kodi munakwanisa kunyerezera kuti abale anu a ku Tesalonika mbadakhala akutsandzaya toera kumwaza mphangwa na kupfundzisa mwakukhonda kubulukira mu ntima, ninga kuti ndi basa yakucitwa mwakufewa? Kumbukani mafala a Paulu: ‘Lekani kutsukwalisa Nzimu. Lekani kupwaza miyoni peno mafala a aprofeta.’ (1 Ates. 5:19, 20) Ndi maprofesiya akutsandzayisa kakamwe anapfundza ife na anamwazira ife anango!

15. Ndi pinthu pipi pyakuphedza pyakuti tinakwanisa kudinga pa kulambira kwa banja?

¹⁵ Mwandimomwene, tisafuna kuphedza mabanja athu toera kukulisa maluso awo m’basa ya m’munda. Abale na alongo azinji asaona kuti njira ibodzi toera kukwanirisa pyenepi ndi kudinga mabasa a utumiki pa kulambira kwawo kwa banja. Panango munakwanisa kuona kuti mphyakuphedza kakamwe kudinga na piwalo pya banja kuti anakwanisa tani kuthimizira cifuno ca munthu adalonga na iwo. Kodi iwo anadzalonganji pa ulendo wakubwereza? Kodi ndi misolo ipi inadzakhuya kakamwe ale anafuna kucedzera imwe? Ndi ndzidzi upi wakuthema toera kucedza na anthu? Azinji asaphatisirambo khundu ya ndzidzi wakulambira kwa banja toera kukhunganyika misonkhano ya mpingo toera kudziwa pinafuna kudzadingwa pa misonkhano. Kodi imwe munakwanisa kukhunganyika mwadidi toera kutawira pa misonkhano? Kucita kwanu khundu kunadzawangisa cikhulupiro canu na kunadzakuphedzani toera kucalira kupenula mu ntima. (Sal. 35:18) Mwandimomwene, kucita khundu mu kulambira kwa banja kunadzakutsidzikizani ku mafala authambi na kupenula mu ntima.

16. Kodi Akristu akudzodzwa asawangiswa tani toera kupitiriza kukoya manyerezero awo?

¹⁶ Tinganyerezera nkhombo zinapereka Yahova kuna mbumba yace mu pyaka pizinji na kuthimizirika kubvesesa profesiya ya Bhibhlya, tinakwanisa kupereka takhuta thangwi ya nkhombo zadidi kakamwe ziri ntsogolo. Akristu akudzodzwa ali na cidikhiro ca kuenda kakhala pabodzi na Kristu kudzulu. Ceneci ndi ciwangiso kwa iwo toera kupitiriza kukoya manyerezero awo! Mwandimomwene tinakwanisa kuphatisira kwa iwo mafala adalemba Paulu kwa Atesalonika: “Abale akufuniwa na Mulungu, pisafunika mphapo kuti tichite takhuta Mulungu ntsiku zonsene thangwi ya imwe adasankhula Mulungu pa kutoma, towera iye akupulumuseni na nkhombo za Nzimu na kutawira kwanu pya udidi [undimomwene].”​—2 Ates. 2:13.

17. Ndi ciwangiso cipi cinagumana imwe m’mafala anagumanika pa 2 Atesalonika 3:1-5?

¹⁷ Pontho ale anadikhira toera kukhala na umaso wa kwenda na kwenda pa dziko yapantsi asafunikambo kuwangisira toera kucalira kupenula mu ntima. Khala imwe muli na cidikhiro cakukhala pa dziko yapantsi, phatisirani ciwangiso caufuni cidalemba Paulu kwa Akristu akudzodzwa a ku Tesalonika. (Lerini 2 Atesalonika 3:1-5.) Tonsene tisafunika kupasa ntengo mafala anewa aufuni. Mwandimomwene, matsamba a Paulu kwa Atesalonika asapereka macenjezo akufunika thangwi ya mafala authambi peno maonero akupenulisa. Nakuti tisakhala mu ntsiku zakumalisa, anewa ndi macenjezo akuti Akristu lero asaapasa ntengo kakamwe.

[Cidzindikiro capantsi]

[Foto pa tsamba 8]

[Foto pa tsamba 9]

Paulu alemba matsamba akuti apereka kwa Akristu macenjezo a ndzidzi wakuthema (Onani ndima 4, 5)

[Foto pa tsamba 12]

Kukhunganyika mwadidi na kucita khundu mu utumiki kunatiphedza toera kucalira kupenula mu ntima (Onani ndima 14, 15)