Yahova Anakuphedzani Mungathimbana na Nyatwa Zakukhonda Dikhira

 1. Ndi cinyindiro cipi ciri na ife?

NINGA atumiki a Yahova, tisadziwa kuti iye asatifuna, pontho asafuna kuti tikhale na umaso wadidi kakamwe. (Aroma 8:35-39) Kusiyapo pyenepi, ife tiri na cinyindiro cakuti kuphatisira midida ya Bhibhlya kusatiphedza ndzidzi onsene. (Iza. 48:17, 18) Mphapo tinacitanji tingathimbana na pinentso pyakuti nee tikhapidikhira?

 2. Ndi pinentso pipi pyakuti panango tinathimbana napyo, pontho pyenepi pinaticitisa kubvundzikanji?

² Atumiki a Yahova onsene asathimbana na pinentso. Mwacitsandzo, anthu a pabanja pathu panango anaticitira pinthu pyakutsukwalisa. Panango tinakhala na utenda wakugopswa wakuti unatipingiza toera kucita pizinji m’basa ya Yahova. Kusiyapo pyenepi, panango tinagwerwa na cidengwa cacibaliro peno panango tinatcingwa thangwi yacikhulupiro cathu. Mu ndzidzi unathimbana ife na pinentso pyenepi panango tinabvundzika: ‘Thangwi yanji pinthu pyenepi pisacitika kuna ine?’ Ciripo cidadawisa ine? Kodi pyenepi pisapangiza kuti Yahova nee asandipasa nkhombo?’ Kodi imwe mwakhala kale na manyerezero anewa? Khala ndi tenepo, lekani kufewa manungo. Atumiki a Yahova azinji akhalambo na manyerezero mabodzi ene.—Mas. 22:1, 2; Abha. 1:2, 3.

 3. Tisapfundzanji na lemba ya Masalmo 34:19?

³ Lerini Masalmo 34:19. Onani pinthu piwiri pyakufunika kakamwe pinalonga lemba ineyi: (1) Anthu akulungama asathimbana na nyatwa. (2) Yahova asatipulumusa mu nyatwa zathu. Mphapo Yahova asatipulumusa tani? Njira ibodzi ndi kutiphedza toera kukhala na maonero adidi mu dziko ino yakuipa. Pidalonga Yahova kuti tingantumikira tinakhala akutsandzaya, iye nee alonga kuti tinakhala na umaso wakusowa pinentso cincino. (Iza. 66:14) Iye asafuna kuti tiikhe manyerezero athu ntsogolo mu ndzidzi unafuna kukhala ife na umaso wakutsandzaya kwenda na kwenda. (2 Akor. 4:16-18) Mbwenye cincino iye asatiphedza toera tipitirize kuntumikira.—Ciliro 3:22-24.

 4. Tinapfundzanji mu nsolo uno?

⁴ Mu nsolo uno tinaona kuti tinapfundzanji na pitsandzo pya atumiki a Yahova akukhulupirika akale na a mu ntsiku zino. Ninga pinafuna ife kuona, panango tinathimbana na pinentso pyakukhonda dikhira. Mbwenye tinganyindira Yahova, ndzidzi onsene iye anatiphedza. (Mas. 55:22) Mu ndzidzi unaona ife pitsandzo pyenepi, bvundzikani: ‘Mbandidacitanji khala ndine anathimbana na cinentso cibodzi cene? Pitsandzo pyenepi pisawangisa tani cinyindiro canga kuna Yahova? Ndi pinthu pipi pyakuti ndinakwanisa kupiphatisira mu umaso wanga?’

 5. Ndi pinentso pipi pidathimbana na Yakobe thangwi ya Labhau? (Onani foto iri patsamba yakutoma.)

⁵ Atumiki a Yahova a mu ndzidzi wakale athimbana na pinentso pyakukhonda dikhira. Mwacitsandzo, onani pidacitikira Yakobe. Iye apangwa na pai wace toera asembe m’bodzi mwa ana a Labhau, wakuti akhali wacibale wawo, pontho akhalambira Yahova Mulungu. Izaki ampasa cinyindiro cakuti Yahova mbadampasa nkhombo. (Gen. 28:1-4) Natenepa Yakobe abvera pai wace mbaenda ku Kanani, kunyumba kwa Labhau, wakuti akhali na ana akazi awiri: Leya na Rakeli. Yakobe afuna kakamwe Rakeli, pontho atawira kuphatira basa Labhau pyaka pinomwe mbadzati kunsemba. (Gen. 29:18) Mbwenye pinthu nee pyacitika ninga mukhadikhira Yakobe. Thangwi Labhau an’nyengeza mbampasa Leya. Pidamala sumana ibodzi Labhau atawirisa Yakobe toera asembe Rakeli, mbwenye akhafunika kuphata pontho basa pyaka pinomwe. (Gen. 29:25-27) Kusiyapo pyenepi, Labhau nee akhali wakukhulupirika pikhaphatirwa iye basa na Yakobe. Iye atsalakana mwakuipa Yakobe mu pyaka 20!—Gen. 31:41, 42.

 6. Ndi pinentso pipi pinango pidathimbana na Yakobe?

⁶ Yakobe athimbanambo na pinentso pinango. Iye akhali na ana azinji, mbwenye anace nee akhabverana. Iwo agulisa m’bale wawo, Zuze toera akhale bitcu. Ana a Yakobe awiri, Simeoni na Levi abweresa nyatwa panyumba pawo, pontho apswipisa dzina ya Yahova. Kusiyapo pyenepi, Rakeli, nkazi wa Yakobe akhafuna iye kakamwe, afa mu ndzidzi ukhabala iye mwanace waciwiri. Pontho thangwi ya njala, Yakobe afuluka mbaenda kakhala ku Ejitu mu ndzidzi ukhali iye nkhalamba.—Gen. 34:30; 35:16-19; 37:28; 45:9-11, 28.

 7. Yahova apangiza tani kuti Yakobe akhali wakutawirika kuna Iye?

⁷ Mu nyatwa zonsene zidathimbana na Yakobe, iye cipo asiya kukhulupira Yahova na mapikiro Ace. Pontho Yahova apangiza kuti Yakobe akhali wakutawirika kuna Iye. Mwacitsandzo, mwakukhonda tsalakana kukhonda kukhulupirika kwa Labhau, Yahova apasa nkhombo Yakobe. Pontho Yakobe apereka takhuta kakamwe kuna Yahova pidaonana iye pontho na Zuze, thangwi akhanyerezera kuti afa. Thangwi yakukhala na uxamwali wakuwanga na Yahova, Yakobe akwanisa kupirira nyatwa zenezi zonsene. (Gen. 30:43; 32:9, 10; 46:28-30) Tingakhala na uxamwali wakuwanga na Yahova, tinakwanisambo kupirira nyatwa zakukhonda dikhira.

 8. Ndi cinthu cipi cikhafuna kucita Mambo Dhavidhi?

⁸ Mambo Dhavidhi nee akwanisa kucita pyonsene pikhafuna iye m’basa ya Yahova. Mwacitsandzo, iye akhafuna kakamwe kumanga templo ya Mulungu. Pidalonga iye pinthu pyenepi kuna mprofeta Natani, Natani ampanga: “Citani pyonsene piri muntima mwanu, thangwi Mulungu wandimomwene ali na imwe.” (1 Kro. 17:1, 2) Mwakukhonda penula, mafala anewa awangisa kakamwe Dhavidhi. Panango pa ndzidzi unoyu iye atoma kucita masasanyiro toera amange templo ineyi.

 9. Dhavidhi acitanji pidapangwa iye mphangwa zakutsukwalisa?

⁹ Mwakukhonda dembuka, mprofeta Natani apanga Dhavidhi mphangwa zakutsukwalisa. “Namasiku anewa,” Yahova apanga Natani kuti Dhavidhi nee ndiye anafuna kumanga templo, mbwenye ndi m’bodzi wa anace. (1 Kro. 17:3, 4, 11, 12) Dhavidhi acitanji pidabva iye mphangwa zenezi? Iye acinja cifuno cace. Iye atoma kugumanya kobiri na pinthu toera Salomoni apiphatisire m’basa yakumanga templo.—1 Kro. 29:1-5.

10. Yahova apasa tani nkhombo Dhavidhi?

¹⁰ Pidamala iye kupanga Dhavidhi kuti nee ndiye akhafuna kumanga templo, Yahova acita cibverano na iye. Yahova apanga Dhavidhi kuti m’bodzi wa dzindza yace mbadatonga kwenda na kwenda. (2 Sam. 7:16) Mu dziko ipswa, mu Utongi wa Pyaka Cikwi, Dhavidhi anakhala wakutsandzaya kakamwe angadziwa kuti ali kutongwa na Yezu, m’bodzi wa dzindza yace. Pyenepi pisatipfundzisa kuti maseze tikhonde kukwanisa kucita pinthu pikhafuna ife kuna Yahova, iye panango anatipasa mabasa anango akuti nee tikhaadikhira.

11. Akristu a mu ndzidzi wa apostolo apaswa tani nkhombo maseze Umambo wa Mulungu nee wabwera mu ndzidzi ukhadikhira iwo? (Mabasa 6:7)

¹¹ Akristu a mu ndzidzi wa apostolo athimbana na pinentso pyakukhonda dikhira. Mwacitsandzo, iwo akhafuna kakamwe kuti Umambo wa Mulungu ubwere, mbwenye nee akhadziwa kuti unabwera lini. (Mabasa 1:6, 7) Mphapo iwo acitanji? Iwo apitiriza kumwaza mphangwa mwaphinga. Mu ndzidzi ukhamwaza iwo mphangwa m’mbuto zizinji, iwo akwanisa kuona kuti Yahova akhapasa nkhombo kuwangisira kwawo.—Lerini Mabasa 6:7.

12. Akristu a mu ndzidzi wa apostolo acitanji mu ndzidzi udaoneka njala ikulu?

¹² Ndzidzi unango paoneka njala ikulu kakamwe “pa dziko yonsene yapantsi.” (Mabasa 11:28) Akristu a mu ndzidzi wa apostolo athabuka kakamwe na njala ineyi. Mwakukhonda penula, misolo ya mabanja ikhadzudzumika kuti inagumana tani cakudya toera kudyesa mabanjawo. Aphale na atsikana akuti akhali na cifuno cakuthimizira utumiki wawo, panango akhadzudzumika kuti anacita tani pyenepi. Panango iwo anyerezera kuti akhafunika kucita pyenepi njala ingamala. Mwakukhonda tsalakana pinentso pyenepi, Akristu anewa apitiriza kumwaza mphangwa mwakubverana na makhaliro awo, pontho akhatsandzaya kupasa abale na alongo awo a ku Yudeya pinthu pikhali na iwo.—Mabasa 11:29, 30.

13. Ndi nkhombo zipi zidakhala na Akristu a mu ndzidzi wa apostolo pikhathimbana iwo na njala ikulu?

¹³ Ndi nkhombo zipi zidakhala na Akristu a mu ndzidzi wa apostolo pikhathimbana na iwo na njala ikulu? Ale adatambira ciphedzo akwanisa kuona kuti Yahova akhaatsalakana. (Mat. 6:31-33) Ufuni wawo kuna abale na alongo adaaphedza wathimizirika. Pontho ale adacita pyakupereka na ale adaphedzera basa yakupereka cakudya akhala akutsandzaya kakamwe thangwi yakucita pyenepi. (Mabasa 20:35) Yahova apasa nkhombo abale na alongo anewa onsene thangwi yakucita pinthu mwakubverana na makhaliro awo.

14. Ninji pidacitika kuna Bharnabhe na mpostolo Paulu, pontho ndi nkhombo zipi zidakhala na iwo? (Mabasa 14:21, 22)

¹⁴ Akristu a mu ndzidzi wa apostolo kazinji kene akhatcingwa, pontho midzidzi inango iwo akhatcingwa mwakukhonda dikhira. Onani pinthu pidacitikira Bharnabhe na mpostolo Paulu mu ndzidzi ukhamwaza iwo mphangwa ku Listra. Pakutoma, iwo atambirwa mwadidi na anthu akhamwazira iwo mphangwa. Mbwenye mukupita kwa ndzidzi, anyakutcinga “anyengerera mwinji wa anthu,” pontho anango mwa anthu anewa amenya Paulu na miyala mbansiya dhuzi na kufa. (Mabasa 14:19) Mbwenye Bharnabhe na Paulu apitiriza kumwaza mphangwa m’mbuto zinango. Ndi nkhombo zipi zidakhala na iwo? Iwo aphedza anthu azinji “toera kukhala anyakupfundza,” pontho pinthu pidalonga iwo na citsandzo cawo pyawangisa Akristu andzawo. (Lerini Mabasa 14:21, 22.) Anthu azinji aphedzeka na mabasa adacita Paulu na Bharnabhe mwakukhonda tsalakana kutcingwa kwawo. Munjira ibodzi ene, Yahova anadzatipasa nkhombo tingapitiriza kucita basa idatipasa iye.

15. Mwapfundzanji na citsandzo ca M’bale A. H. Macmillan?

¹⁵ Mbacidzati kufika caka ca 1914, atumiki a Yahova akhadikhira pinthu pingasi toera kucitika. Onani citsandzo ca M’bale A. H. Macmillan. Ninga atumiki anango a mu ndzidzi unoyu, M’bale Macmillan akhanyerezera kuti mwakukhonda dembuka mbadaenda kudzulu. Na thangwi ineyi, mu nkhani idacita iye mu mwezi wa Setembro wa 1914, iye alonga: “Panango ino ndi nkhani yakumalisa kuna ine.” Mbwenye ineyi nee yadzakhala nkhani yace yakumalisa. Mukupita kwa ndzidzi, M’bale Macmillan alemba: “Panango anango a ife tikhanyerezera kuti mbatidaenda kudzulu mwakukhonda dembuka.” Iye athimiza: “Ife tisafunika kukhala na pizinji toera kucita m’basa ya Mbuya.” M’bale Macmillan apitiriza kucita pizinji m’basa ya Yahova. Iye akhali waphinga mu utumiki. Iye akhala na mwai wakuwangisa abale na alongo azinji akhali nkaidi thangwi yakukhonda kucita basa ya unyankhondo. Pontho apitiriza kusonkhana maseze akhadakalamba kakamwe. Ndi nkhombo zipi zidakhala na M’bale Macmillan thangwi yakuphatisira mwadidi ndzidzi wace pikhadikhira iye kuenda kudzulu? Mbadzati kufa mu caka ca 1966, iye alemba: “Cikhulupiro canga ndi cakuwanga kakamwe cincino kupiringana kale.” Mwakukhonda penula, M’bale Macmillan ndi citsandzo cadidi kakamwe kuna ife tonsene, makamaka khala tiri kupirira nyatwa zakukhonda dikhira mu ndzidzi uzinji.—Aheb. 13:7.

16. Ndi cinentso cipi cidathimbana na M’bale Jennings na nkazace mwakukhonda dikhira? (Tiyago 4:14)

¹⁶ Atumiki a Yahova azinji asathimbana na nyatwa za ungumi mwakukhonda dikhira. Mwacitsandzo, M’bale Herbert Jenningsb, mu mbiri yace ya umaso alonga kuti akhatsandzaya kakamwe kutumikira ninga misionaryo pabodzi na nkazace ku Gana. Mbwenye mukupita kwa ndzidzi, iye adzindikirwa kuti ali na utenda unacemerwa distúrbio de humor. M’bale Jennings aphatisira mafala anagumanika pa Tiyago 4:14, mbalonga kuti “pinthu pyenepi pikhali ninga pinthu pya ‘mangwana’ pyakuti nee tikhapidikhira.” (Lerini.) Iye alemba: “Ife tikhafunika kudzolowera makhaliro anewa. Natenepa tabuluka ku Gana, pontho tasiya axamwali azinji kweneko mbatibwerera ku Kanadha [toera kukondzwa.]” Yahova aphedza M’bale Jennings na nkazace toera apitirize kuntumikira mwakukhulupirika mwakukhonda tsalakana pinentso pikhathimbana na iwo.

17. Citsandzo ca M’bale Jennings caphedza tani Akristu anango?

¹⁷ Mafala adalonga M’bale Jennings mu mbiri yace ya umaso aphedza kakamwe anango. Mulongo m’bodzi alemba: “Nsolo unoyu wandikhuya kakamwe pidauleri ine. . . . Pidaleri ine kuti M’bale Jennings asiya basa ikhacita iye toera kutsalakana ungumi wace pyandiphedza toera kukhala na maonero adidi thangwi ya pinthu pikhandicitikira.” M’bale unango alembambo: “Ine ndatumikira ninga nkulu wa mpingo mu pyaka 10, mbwenye buluka penepo ndasiya kutumikira ninga nkulu wa mpingo thangwi ya utenda wa m’manyerezero. Pyenepi pyanditsukwalisa kakamwe, pontho nee ndikhakomerwabve na kuleri mbiri za umaso. . . . Mbwenye citsandzo ca M’bale Jennings candiphedza kakamwe.” Pyenepi pisatikumbusa kuti tingapirira nyatwa zakukhonda dikhira, tisawangisambo anango. Maseze pinthu pikhonde kucitika munjira ikhadikhira ife, tinakwanisa kukhala citsandzo cadidi cakupangiza cikhulupiro na kupirira.—1 Ped. 5:9.

18. Ninga pinapangizwa pa foto, mwapfundzanji na citsandzo ca mulongo wa nzice wa ku Nigeria?

¹⁸ Pidengwa ninga utenda wa COVID-19 pyakhuya atumiki azinji a Yahova. Mwacitsandzo, mulongo unango wa nzice anakhala ku Nigeria nee akhali na cakudya cizinji, pontho nee akhali na kobiri. Ntsiku inango namacibese, mwanace wankazi ambvundza kuti anacitanji angamala kuphika kopo ya mpunga yakumalisa ikhali na iwo. Mulongo unoyu apanga mwanace kuti iwo nee akhali na kobiri na cakudya, mbwenye iwo asafunika kutowezera citsandzo ca nzice wa ku Sarefati. Natenepa iwo aphika cakudya ceneci mbanyindira Yahova. (1 Ama. 17:8-16) Mbadzati kunyerezera kuti mbadadyanji ntsiku ineyi namasikati, iwo abwereserwa cakudya na abale cakuti mbacidakwana masumana akupiringana mawiri. Mulongo unoyu alonga kuti nee akhadziwa kuti Yahova akhabvesera pinthu pikhapanga iye mwanace. Mwandimomwene, tinganyindira Yahova, nyatwa zinathimbana na ife mwakukhonda dikhira zinaticitisa kukhala na uxamwali wakuwanga kakamwe na iye.—1 Ped. 5:6, 7.

19. Ndi pinthu pipi pidacitikira M’bale Aleksey Yershov?

¹⁹ Ntsiku zino, abale na alongo athu azinji asapirira kutcingwa kwakuti panango nee akhakudikhira. Onani citsandzo ca M’bale Aleksey Yershov, anakhala ku Rusiya. Atumiki a Yahova a mu dziko ineyi akhali na ufulu wakulambira Yahova mu ndzidzi udabatizwa M’bale Yershov mu caka ca 1994. Mbwenye mukupita kwa pyaka, pinthu pyadzacinja mu dziko ya Rusiya. Mu caka ca 2020, apolixa apita n’nyumba ya M’bale Yershov mbakwata pinthu pyace pizinji. Pidapita miyezi mingasi, utongi wampambizira kuti iye akhali na nseru. Toera kuthimizira nseru wace, iwo aphatisira vidhyu idagravarwi na munthu wakuti akhapangiza ninga akhafuna kupfundza Bhibhlya m’miyezi yakupiringana 12. Pinthu pidacita munthu unoyu ndi pyakuipa kakamwe.

20. M’bale Yershov awangisa tani uxamwali wace na Yahova?

²⁰ Kodi kutcingwa kwa M’bale Yershov kwam’phedza? Inde. Uxamwali wace na Yahova wakhala wakuwanga kakamwe. Iye alonga: “Ine na nkazanga tisacita phembero pabodzi kazinji kene, pontho ndisaona kuti mbidasowa ciphedzo ca Yahova nee mbidakwanisa kupirira cinentso ceneci.” Iye athimiza: “Kucita pfundziro ya munthu paekha kwandiphedzambo toera ndikhonde kukhala wakutsukwala. Ine ndisanyerezera pitsandzo pya atumiki akukhulupirika a mu ndzidzi wakale. M’Bhibhlya muna mphangwa zizinji zinapangiza kuti ndi pyakufunika kupitiriza kukhala akukhurudzika na kunyindira Yahova.”

21. Tapfundzanji mu nsolo uno?

²¹ Tapfundzanji mu nsolo uno? Midzidzi inango, ife tinagwerwa na nyatwa zakukhonda dikhira mu dziko ino. Ngakhale tenepo, ndzidzi onsene Yahova asaphedza atumiki ace angan’nyindira. Ninga pinalonga lemba idabuluswa nsolo uno, “nyatwa za munthu wakulungama ndi zizinji, mbwenye Yahova asampulumusa mu nyatwa zenezi zonsene.” (Mas. 34:19) Natenepa tendeni tipitirize kunyindira ciphedzo ca Yahova, tayu kunyerezera nyatwa zinathimbana na ife. Tingacita pyenepi, ife tinakwanisa kulonga ninga mpostolo Paulu kuti: “Mu pinthu pyonsene, ine ndisakwanisa kukhala na mphambvu thangwi ya ule anandipasa mphambvu.”—Afil. 4:13.