Nyerezeranimbo mabvero adakhala na imwe mu ndzidzi udabva imwe paulendo wakutoma undimomwene wa Mafala a Mulungu. Imwe mwapfundza kuti Babanu wakudzulu asakufunani kakamwe, pontho asafuna kuti mukhale m’bodzi wa alambiri ace. Imwe mwapfundzambo kuti iye apikira kumalisa nyatwa zonsene, pontho kuti imwe munaona pontho anthu anafuna imwe angalamuswa muli akufa mu dziko ipswa. Pyenepi basi ene ndi pingasi mwa pinthu pidapfundza imwe. (Marko 10:29, 30; Juw. 5:28, 29; Aroma 8:38, 39; Apok. 21:3, 4) Imwe mwatsandzaya kakamwe pidapfundza imwe undimomwene unoyu. (Luka 24:32) Imwe mwakomerwa na pinthu pyenepi pyonsene pidapfundza imwe, pontho mwafuna kakamwe kupangambo anthu anango undimomwene unoyu. (Onani Yeremiya 20:9.) Tingakomerwa na undimomwene wa Bhibhlya, nee tisakwanisa kukhala nawo mbatikhonda kupangambo anango pidapfundza ife. (Luka 6:45) Ife tisakhala na mabvero mabodzi ene adakhala na anyakupfundza a Yezu adalonga: “Ife nee tinasiya kulonga pinthu pidaona ife na pidabva ife.” (Mabasa 4:20) Ife tisakomerwa kakamwe na undimomwene wa Bhibhlya, pontho tisafunambo kupanga anthu azinji undimomwene unoyu. w24.05 tsa. 15 ndima 5; tsa. 16 ndima 7

Ufuni wathu kuna Yahova ndiyo unaticitisa kumwaza mphangwa kuna anthu na kuaphedza toera andziwe. Mbwenye anango asanentseka kakamwe toera kucita basa yakumwaza mphangwa. Thangwi yanji? Anango ndi amanyadzo kakamwe, pontho asanyerezera kuti nee anakwanisa kumwaza mphangwa. Anango nee asakhala akusudzuka toera kuenda panyumba pa munthu mwakukhonda kucemerwa, peno asanyerezera kuti anthu anaipirwa na iwo, pontho nee asafuna kuadzudzumisa. Pisakhala pyakunentsa kuna abale na alongo kufendezera anthu akuti nee asaadziwa toera kuapanga mphangwa zadidi. Kodi midzidzi inango imwe musanentsekambo toera kutsandzaya m’basa yakumwaza mphangwa? Pyenepi pingacitika, lekani kutsukwala. Panango pyenepi pisapangiza kuti ndimwe wakucepeseka, nee musafuna kupasika mbiri, pontho nee musafuna kulongezana na munthu. Ndimomwene kuti nkhabepo munthu anakomerwa kutsalakanwa mwakuipa, makamaka khala ali kuyesera kucita pinthu pyadidi kuna anango. Mbwenye munakwanisa kukhala na cinyindiro cakuti Babanu wakudzulu asadziwa kuti kumwaza mphangwa ndi kwakunentsa, pontho asafuna kukuphedzani.—Iza. 41:13. w24.04 tsa. 14 ndima 1-2

Ninga pidaleri imwe m’Bhibhlya, m’mbuto mwakuyesera kucita macinjo mazinji mu ndzidzi ubodzi ene, wangisirani toera kucinja mwapang’ono-pang’ono. Yeserani kucita ipi: Lembani makhaliro anafunika imwe kucinja, buluka penepo sankhulani n’khaliro ubodzi peno makhaliro mawiri anafuna imwe kutoma kuasasanyira, mukupita kwa ndzidzi munadzacinjambo makhaliro anango. Mphapo ninji pinafunika imwe kutoma kucinja? Panango munakwanisa kutoma kucinja pinthu pyakukhonda nentsa. Peno munakwanisa kutoma kucinja pinthu pinaona imwe kuti musafunika kupicinja mwakucimbiza kakamwe. Mungamala kusankhula pinthu pinafuna imwe kucinja, fufudzani m’mabukhu athu. Pontho phembani Yahova kuti akupaseni “cifuno na mphambvu toera mucite pinafuna iye.” (Afil. 2:13) Buluka penepo wangisirani toera kuphatisira pidapfundza imwe. Mungaona kuti mwakwanisa kusasanyira pikhafuna imwe, pyenepi pinakuphedzani toera mupitirize kucita macinjo anango. Pontho mungaona kuti mwakwanisa kucita macinjo mu umaso wanu peno mwakwanisa kukulisa n’khaliro Wacikristu, pinakhala pyakukhonda nentsa toera kucita macinjo anango. w24.09 tsa. 6 ndima 13-14