Amambo Waciwiri

23 Natenepa mambo acemeresa akulu onsene a ku Yuda na a ku Yerusalemu.+ 2 Buluka penepo, mambo aenda kunyumba ya Yahova pabodzi na amuna onsene a ku Yuda, anthu onsene anakhala mu Yerusalemu, anyantsembe, aprofeta na mbumba yonsene, akulu na ana ene. Iye aleri kuna iwo mafala onsene a m’bukhu+ ya cibverano+ idagumanwa n’nyumba ya Yahova.+ 3 Mambo alimira dhuzi na nzati mbacita cibverano* pamaso pa Yahova+ cakuti iye anatowezera Yahova mbakoya matongero ace, macenjezo ace na mitemo yace. Mbalongambo kuti anadzabvera na ntima wace onsene, pontho na umaso wace onsene mafala a cibverano adalembwa m’bukhu ineyi. Natenepa mbumba yonsene yatawira cibverano ceneci.+

4 Buluka penepo, mambo apanga nyantsembe wankulu Hilkiya,+ anyantsembe anango na anyakuonera misuwo toera abuluse mu templo ya Yahova pyombo pyonsene pidacitirwa Bhaale, nzati wakulambirwa*+ na pidacitirwa anyankhondo akudzulu. Pidamala iye aenda napyo kunja kwa Yerusalemu mbapipisa ku Gowa ya Sidhroni, pontho akwata dotha ya pinthu pidapisa iye mbaenda nayo ku Bheteli.+ 5 Natenepa iye athamangisa anyantsembe a alungu a madzindza anango, akuti akhadakhazikiswa na amambo a Yuda toera apereke ntsembe* pa mbuto za padzulu m’mizinda ya Yuda na m’mbuto za cifupi na Yerusalemu. Iye athamangisambo ale akhapereka ntsembe kuna Bhaale, dzuwa, mwezi, nyenyezi na kuna anyankhondo onsene akudzulu.+ 6 Iye abulusa muti wakulambirwa*+ n’nyumba ya Yahova mbaenda nawo kunja kwa Yerusalemu, ku Gowa ya Sidhroni. Iye aupisa+ n’Gowa ya Sidhroni mbudza dotha, pontho iye akwata dotha ineyi mbaiwaza pa nthumbi za anthu ene pyawo.+ 7 Iye agomolambo nyumba za amuna akuti akhali maputa a pa templo,+ zakuti zikhali panyumba ya Yahova, mule mukhasonera akazi matenti a muti wakulambirwa.*

8 Buluka penepo iye abulusa anyantsembe onsene m’mizinda ya Yuda, pontho iye apswipisa mbuto za padzulu zikhaphatisira anyantsembe toera kupereka ntsembe, kutomera ku Jebha+ mpaka ku Bhersebha.+ Iye agomolambo mbuto za padzulu zakuti zikhali pansuwo ukulu wa Yoswa, nkadamu wa mu nzinda, zakuti zikhali kukhundu yabzwere munthu angapita na pansuwo ukulu wa nzinda. 9 Anyantsembe a m’mbuto za padzulu nee akhatumikira pa guwa ya ntsembe ya Yahova mu Yerusalemu,+ mbwenye iwo akhadya na abale awo mikate yakusowa pyakutupisa. 10 Iye apswipisambo mbuto yakulambira Tofeti,+ yakuti ikhali n’Gowa ya Ana a Inoni*+ toera akhonde kuoneka munthu anafuna kupisa pa moto mwanace wamamuna peno wankazi, mbampereka kuna Moloke.+ 11 Makavalo adapereka amambo a ku Yuda toera aphatisirwe pakulambira dzuwa, iye aakhondesa kupita n’nyumba ya Yahova na pa sala yakudyera ya Natani-Meleki, nkulu wa utongi, yakuti ikhali dhuzi na khonde; pontho iye apisa na moto ngolo zidaperekwa toera kuziphatisira pakulambira dzuwa.+ 12 Mambo agomolambo maguwa a ntsembe adamanga amambo a ku Yuda padzulu+ pa kwartu yandzulu ya Ahazi, kuphatanizambo maguwa adamanga Manase m’makintalo mawiri ene a nyumba ya Yahova.+ Iye aanyedza mbawaza pfumbi ya maguwa anewa n’Gowa ya Sidhroni. 13 Mambo apswipisa mbuto za padzulu za kutsogolo kwa Yerusalemu zakuti zikhali kunterero* kwa Phiri Yakufudza,* zakuti Salomoni mambo wa Izraeli azimangira Astoreti mulungu wankazi wakunyanyasa wa Asidhoni; ­Kemosi mulungu wakunyanyasa wa Moabhe na Milikomu+ mulungu wakunyanyasa wa Aamoni.+ 14 Iye agomola mizati yakulambirwa yakucitwa na miyala, agwanda miti yakulambirwa,*+ mbadzadza mbuto zenezi na magogodo a anthu. 15 Iye agomolambo guwa ya ntsembe ku Bheteli, mbuto yapadzulu idacita Yerobhoamu mwana wa Nebhati mbacitisa nayo Aizraeli kudawa.+ Pidamala iye kugomola guwa ya ntsembe na mbuto yapadzulu, apisa mbuto yapadzulu, mbanyedza pyonsene kudza pfumbi, pontho iye apisa muti wakulambirwa.*+

16 Yosiya pidazungunuka iye mbaona nthumbi paphiri, apanga anthu toera abuluse magogodo munthumbi zenezi, mbaapisa pa guwa ya ntsembe. Iye acitisa guwa ineyi kukhala yakukhonda thema toera kuphatisirwa pakulambira, mwakubverana na mafala adalonga Yahova kubulukira kuna ntumiki wa Mulungu wandimomwene adalongeratu kuti pyenepi mbapidacitika.+ 17 Buluka penepo iye abvundza: “Nthumbi inaona ine pale ndi ya ani?” Penepo amuna a mu nzinda atawira: “Ndi ya ntumiki wa Mulungu wandimomwene wa ku Yuda,+ ule adalongeratu pinthu pidacitira imwe guwa ya ntsembe ya ku Bheteli.” 18 Natenepa iye alonga: “Nee m’bodzi asafunika kukhuya magogodo ace, asiyeni tenepo.” Natenepa iwo asiya tenepo magogodo ace, kuphatanizambo magogodo a mprofeta adabuluka ku Samariya.+

19 Yosiya abulusambo nyumba zonsene zaulambiri m’mbuto za padzulu za m’mizinda ya ku Samariya,+ zakuti amambo a ku Izraeli akhadazimanga toera kutsukwalisa Mulungu, pontho iye acita kuna nyumba zenezi pibodzi pyene na pidacitira iye mbuto ya padzulu ya ku Bheteli.+ 20 Natenepa iye apha pa maguwa a ntsembe, anyantsembe onsene a m’mbuto za padzulu akuti akhali kweneko, pontho iye apisa magogodo a anthu+ pa maguwa anewa a ntsembe. Pidamala iye abwerera ku Yerusalemu.

21 Mambo apanga mbumba yonsene: “Citirani Paskwa+ Yahova Mulungu wanu ninga mudalemberwa ipyo m’bukhu ya cibverano.”+ 22 Cipo ikhadacitwa kale Paskwa ninga na ineyi kutomera mu ndzidzi wakuti anyakutonga miseru akhatonga Aizraeli, nee mu ndzidzi wa amambo a ku Izraeli na a ku Yuda.+ 23 Mbwenye mu caka 18 ca Mambo Yosiya, Yahova acitirwa Paskwa ineyi ku Yerusalemu.

24 Yosiya amalisambo anthu analonga na mizimu, anyakulotera,+ madzimunthu a panyumba,*+ madzimunthu akunyanyasa* na pinthu pyonsene pyakunyanyasa pikhali mu dziko ya Yuda na mu Yerusalemu. Iye acita pyenepi toera kukwanirisa mafala a Mwambo+ adalembwa m’bukhu idagumana nyantsembe Hilkiya n’nyumba ya Yahova.+ 25 Iye mbadzati kutonga, nee paoneka mambo unango ninga iye wakuti abwerera kuna Yahova na ntima wace onsene, umaso wace onsene+ na mphambvu zace zonsene, mwakubverana na Mwambo onsene wa Mose; kutsogolo kwace nee kwaonekabve mambo unango ninga iye.

26 Ngakhale tenepo, Yahova apitiriza kuipirwa kakamwe na Yuda thangwi ya pinthu pyonsene pyakuipa pidacita Manase toera kuntsukwalisa.+ 27 Yahova alonga: “Ine ndinadzabulusambo Yuda pamaso panga,+ ninga mudabulusira ine Izraeli;+ pontho ndinadzakhonda nzinda uyu wa Yerusalemu udasankhula ine, na nyumba idalonga ine kuti: ‘Dzina yanga inadzapitiriza mwenemu.’”+

28 Mphangwa zinango zinalonga pya umaso wa Yosiya na pinthu pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Yuda. 29 Mu ntsiku zace, Farau Neko mambo wa ku Ejitu aenda kaonana na mambo wa Asirya dhuzi na Nkulo wa Eufrate. Mambo Yosiya abuluka toera kuenda kamenyana naye, mbwenye Neko pidaona iye Yosiya, amupha ku Mejidho.+ 30 Natenepa atumiki ace akwata manungo ace, aaikha mu ngolo ya nkhondo ku Mejidho, aenda nawo ku Yerusalemu mbaaikha munthumbi yace. Buluka penepo, anthu a dziko ineyi akwata Yeowazi mwana wa Yosiya, andzodza mban’khazikisa ninga mambo pa mbuto ya babace.+

31 Yeowazi+ akhali na pyaka 23 pyakubalwa pidatoma iye kutonga ninga mambo, pontho iye atonga miyezi mitatu mu Yerusalemu. Mai wace akhacemerwa Amutali+ mwana wa Yeremiya wa ku Libhina. 32 Iye atoma kucita pinthu pyakuipa pamaso pa Yahova, mwakubverana na pyonsene pidacita ambuyace.+ 33 Farau Neko+ amuikha nkaidi ku Ribhila+ mu dziko ya Amati, toera iye akhonde kutonga mu Yerusalemu, pontho iye apanga dziko ineyi toera ipereke nsonkho wa matalento* 100 a parata na talento ibodzi ya ouro.+ 34 Kusiyapo pyenepi, Farau Neko akhazikisa Eliyakimu mwana wa Yosiya ninga mambo pa mbuto ya babace wakuti ndi Yosiya. Iye acinja dzina yace mbancemera Yeowakimu; mbwenye akwata Yeowazi mbaenda naye ku Ejitu,+ kule kudafera iye.+ 35 Yeowakimu apereka kuna Farau parata na ouro, mbwenye toera kupereka kobiri idaphemba Farau, apanga mbumba toera kupereka nsonkho. Iye apanga m’bodzi na m’bodzi wa mbumba ya dziko ineyi toera ampase parata na ouro idaphembwa iye toera angamala akapase Farau Neko.

36 Yeowakimu+ akhali na pyaka 25 pyakubalwa pidatoma iye kutonga ninga mambo, pontho iye atonga pyaka 11 mu Yerusalemu.+ Mai wace akhacemerwa Zebhidha mwana wa Pedhaya wa ku Ruma. 37 Iye apitiriza kucita pinthu pyakuipa pamaso pa Yahova,+ mwakubverana na pyonsene pidacita ambuyace.+