Amambo Waciwiri

13 Mu caka 23 ca Yeowasi+ mwana wa Akaziya+ mambo wa ku Yuda, Yeowazi mwana wa Jeu+ adzakhala mambo wa Izraeli ku Samariya, pontho iye atonga mu pyaka 17. 2 Iye akhacita pinthu pyakuipa pamaso pa Yahova, pontho apitiriza kucita madawo akuti Yerobhoamu mwana wa Nebhati acitisa Aizraeli kudawa nawo.+ Iye nee asiya kucita madawo anewa. 3 Na thangwi ineyi, Yahova aipirwa+ na Aizraeli+ mu ntsiku zenezi zonsene, mbaapereka m’manja mwa Mambo Azaeli+ wa ku Sirya na m’manja mwa Bheni-Adhadhi+ mwana wa Azaeli.

4 Mukupita kwa ndzidzi, Yeowazi adembetera Yahova toera ambvere ntsisi, pontho Yahova ambvesera thangwi iye akhadaona kupondererwa kwa Aizraeli na mambo wa ku Sirya.+ 5 Natenepa Yahova apereka mpulumusi+ kuna Aizraeli toera aaombole m’manja mwa anyankhondo a ku Sirya, munjira ineyi, Aizraeli mbadakhala pontho m’manyumba mwawo ninga mwakale.* 6 (Mbwenye iwo nee asiya madawo adacita banja ya Yerobhoamu mbacitisambo Aizraeli kudawa.+ Iwo apitiriza kucita madawo* anewa, pontho muti wakulambirwa*+ ukhapitiriza basi ku Samariya.) 7 Yeowazi akhadasala basi ene na anyankhondo akufamba na makavalo akukwana 50, ngolo 10 za nkhondo na anyankhondo 10.000 akufamba na miyendo, thangwi mambo wa ku Sirya akhadaapha,+ mbaaponda-ponda ninga pfumbi mu ndzidzi unabubudwa tirigu.+

8 Mphangwa zinango zinalonga pya umaso wa Yeowazi, pinthu pyonsene pyamphambvu pidacita iye na pinthu pinango pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Izraeli. 9 Buluka penepo, Yeowazi afa ninga pidacita ambuyace, mbaikhwa ku Samariya;+ pontho mwanace anacemerwa Yeowasi adzakhala mambo pa mbuto yace.

10 Mu caka 37 ca Mambo Yeowasi wa ku Yuda, Yeowasi+ mwana wa Yeowazi adzakhala mambo wa Izraeli ku Samariya, pontho iye atonga mu pyaka 16. 11 Iye akhacita pinthu pyakuipa pamaso pa Yahova, pontho apitiriza kucita madawo onsene akuti Yerobhoamu mwana wa Nebhati acitisa Aizraeli kudawa nawo.+ Iye nee asiya kucita madawo* anewa.

12 Mphangwa zinango zinalonga pya umaso wa Yeowasi, pinthu pyonsene pyamphambvu pidacita iye na pinthu pinango pyonsene pidacita iye, kuphatanizambo kumenyana kudacita iye na Mambo Amaziya wa ku Yuda,+ pyalembwa m’bukhu inalonga pinthu pidacitika mu ndzidzi wa amambo a ku Izraeli. 13 Buluka penepo, Yeowasi afa ninga pidacita ambuyace, Yerobhoamu*+ mbakhala pa mpando wace waumambo. Pontho Yeowasi aikhwa ku Samariya pabodzi na amambo a Izraeli.+

14 Elizeu+ pidaphatwa iye na utenda wakuti mukupita kwa ndzidzi mbadafa nawo, Yeowasi mambo wa Izraeli aenda kuna iye, an’khumbatira mbatoma kulonga mu ndzidzi ukhalira iye: “Babanga, babanga! Ngolo ya nkhondo ya Izraeli na anyamakavalo ace!”+ 15 Penepo Elizeu ampanga: “Kwatani uta na mapswimo.” Natenepa iye akwata uta na mapswimo. 16 Buluka penepo iye apanga mambo wa Izraeli: “Khunganyikani toera muponye pswimo.” Natenepa iye akhunganyika toera kuiponya, pontho Elizeu aikha manja ace padzulu pa manja a mambo. 17 Penepo iye alonga: “Fungulani janela kumabulukiro a dzuwa.” Natenepa iye aifungula. Elizeu alonga: “Ponyani pswimo!” Iye aiponya. Buluka penepo Elizeu alonga: “Pswimo yakuwina* ya Yahova, pswimo yakuwina anyankhondo a ku Sirya! Ku Afeki,+ imwe munadzapha anyankhondo a ku Sirya mpaka kuamalisa.”

18 Iye athimiza kulonga: “Kwatani mapswimo.” Iye aakwata. Buluka penepo apanga mambo wa Izraeli: “Menyani pantsi.” Natenepa iye amenya pantsi katatu mbasiya. 19 Penepo, ntumiki wa Mulungu wandimomwene aipirwa naye, mbalonga: “Imwe mukhafunika kumenya pantsi kaxanu peno katanthatu! Natenepa, mbamudakwanisa kupha anyankhondo a ku Sirya mpaka kuamalisa, mbwenye cincino munadzaakunda katatu basi.”+

20 Buluka penepo, Elizeu afa, mbaikhwa. Pakhali na misoka ya anyakutapata ya Amoabhe+ yakuti ikhabwera mu dziko ineyi pakutoma kwa caka.* 21 Ntsiku inango, amuna anango pikhaikha iwo munthu, aona nsoka wa anyakutapata, natenepa iwo aponya mwakucimbiza manungo a munthu unoyu munthumbi ya Elizeu, mbathawa. Manungo a munthu unoyu pidakhuya iwo magogodo a Elizeu, iye akhala pontho m’maso+ mbalimira.

22 Mambo Azaeli+ wa ku Sirya aponderera Aizraeli+ mu ntsiku zonsene za utongi wa Yeowazi. 23 Mbwenye, Yahova apangiza kukoma ntima na ntsisi kuna iwo,+ mbaatsalakana thangwi ya cibverano cidacita iye na Abhrahamu,+ Izaki+ na Yakobe.+ Iye nee akhafuna kuapha, pontho nee aathamangisa pamaso pace mpaka lero. 24 Mambo Azaeli wa ku Sirya pidafa iye, mwanace anacemerwa Bheni-Adhadhi adzakhala mambo pa mbuto yace. 25 Yeowasi mwana wa Yeowazi akwata kuna Bheni-Adhadhi mwana wa Azaeli mizinda idakwatirwa Yeowazi mu ndzidzi wa nkhondo. Yeowasi akunda Bheni-Adhadhi katatu+ mbakwata mizinda ya Izraeli.