Kuphatisira Dzina Ya Mulungu Na Kudziwa Mabvekero Ace

KODI lemba ya Masalmo 83:18 yathumburuzwa tani m’Bhibhlya yanu? Bhibhlya ya Tradução do Novo Mundo das Escrituras Sagradas isalonga: “Toera anthu akudziweni kuti imwe, dzina yanu ndi Yahova, imwe mwekha ndimwe Wankulu Kakamwe kupiringana pyonsene pa dziko yapantsi.” Mabhibhlya anango asalonga pibodzi pyene. Mbwenye Mabhibhlya mazinji dzina yakuti Yahova yabuluswa, mbicinjwa na pidzo ninga “Mbuya” peno “Wakukhaliratu.” Ndi ninji cikhafunika kuphatisirwa mu vesi iyi? Cidzo peno dzina yakuti Yahova?

Vesi iyi isalonga pya dzina. Mu cilongero cakutoma ca Cihebheri cidaphatisirwa toera kulemba Mabhibhlya mazinji, dzina ineyi yakupambulika isagumanika mu vesi ineyi. Mu Cihebheri isalembwa tenepa יהוה (YHWH). Ncisena, kazinji kene dzina ineyi isacemerwa “Yahova.” Kodi dzina ineyi isagumanika mu vesi ibodzi basi m’Bhibhlya? Nkhabe. M’malemba akutoma acilongero ca Cihebheri isagumanika maulendo cifupi 7.000!

Ndi yakufunika tani dzina ya Mulungu? Onani phembero yacipangizo idapfundzisa Yezu Kristu. Phembero ineyi isatoma tenepa: “Baba wathu muli kudzulu, dzina yanu ikhale na mbiri.” (Mateo 6:9) Mukupita kwa ndzidzi, Yezu aphembera kwa Mulungu: “Baba, bvekesani mbiri dzina yanu.” Mulungu atawira kubulukira kudzulu mbalonga: ‘Ine ndaibvekesa, na ndinadzaibvekesa pontho.’ (Jwau 12:28) Mwapakweca, dzina ya Mulungu ndi yakufunika kupiringana madzina anango. Thangwi yanji mphapo anyakuthumburuza anango abulusa dzina ineyi m’Mabhibhlya awo mbaikha pidzo?

Pana mathangwi mawiri makulu. Yakutoma, anthu azinji asalonga kuti dzina ineyi nkhabe funika kuphatisirwa thangwi malongero ace akutoma nkhabe dziwika lero. Cilongero cakale ca Cihebheri cikhalembwa mwakusowa mavogali. Natenepa, nee munthu m’bodzi lero anakwanisa kulonga mwacinyindiro kuti anthu a midzidzi ya Bhibhlya akhalonga tani YHWH. Kodi pyenepi pisafunika kutikhondesa kuphatisira dzina ya Mulungu? M’midzidzi ya Bhibhlya, dzina ya Yezu panango ikhalongwa Yoswa peno Yohoswa, nkhabepo munthu anapidziwa mwadidi. Mbwenye anthu mu dziko yonsene asaphatisira dzina yakuti Yezu munjira zakusiyana-siyana, mbailonga munjira yakudzoloereka mu cilongero cawo. Iwo nkhabe siya kuiphatisira thangwi yakukhonda dziwa kuti ikhalongwa tani mu pyaka dzana yakutoma. Munjira ibodzi ene, mungaenda ku dziko inango, munadzaona kuti dzina yanu ene isalongwa mwakusiyana pang’ono mu cilongero cinango. Natenepa, kukhonda dziwa malongero akale a dzina ya Mulungu nee kusafunika kukhala thangwi yakutikhondesa kuiphatisira.

Thangwi yaciwiri yakubulusa dzina ya Mulungu m’Bhibhlya isaphataniza nsambo wakale wa Ayuda. Azinji a iwo akhakhulupira kuti dzina ya Mulungu nkhabe funika kulongwa. Mwapakweca, iwo akhakhulupira pyenepi thangwi akhaphatisira mwakuipa mwambo wa Bhibhlya unalonga: ‘Leka kulonga dzina yanga papezi, thangwi ine, Yahova Mulungu wako, ndinaonesa nyatwa ale onsene anailonga papezi.’​—Eksodo 20:7.

Mwambo unoyu usakhondesa kuphatisira mwakuipa dzina ya Mulungu. Kodi iwo usakhondesa kuphatisira mwacilemedzo dzina ineyi? Nkhabe. Alembi onsene a Bhibhlya ya Cihebheri (“Unthaka Wakale”) akhali amuna akukhulupirika akuti akhatowera Mwambo udapasa Mulungu Aisraele akale. Ngakhale tenepa, kazinji kene iwo aphatisira dzina ya Mulungu. Mwacitsandzo, iwo aiikha mu nyimbo zikhaimbwa mwakugaluza na mwinji wa alambiri. Yahova Mulungu apfundzisa alambiri ace kucemera dzinace, na anthu akukhulupirika akhabvera. (Machitiro 2:21; Aroma 10:13) Na thangwi ineyi, Akristu lero nee asacalira kuphatisira mwacilemedzo dzina ya Mulungu, ninga pidacita Yezu.​—Jwau 17:26.

Mukucinja dzina ya Mulungu na pidzo, anyakuthumburuza Bhibhlya asadodoma kakamwe. Iwo asacitisa Mulungu kuoneka ninga ali kutali kakamwe na anthu, pontho kuti nee asafuna kufendedzerwa na anthu. Mbwenye Bhibhlya isakulumiza anthu toera kukhala na ‘uxamwali na Yahova.’ (Masalmo 25:14) Nyerezerani xamwali wanu wapantima. Kodi mbamudakhala tani cifupi kakamwe na iye khala imwe nkhabe dziwa dzinace? Munjira ibodzi ene, munakhonda anthu kudziwa dzina ya Mulungu, Yahova, kodi anakwanisa tani kukhaladi cifupi na Mulungu? Kusiyapo pyenepi, munakhonda anthu kuphatisira dzina ya Mulungu, iwo asasowambo cidziwiso ca mabvekero adidi a dzina ineyi. Kodi dzina ya Mulungu isabvekanji?

Mulungu afokotoza ekhene mabvekero a dzinace kwa ntumiki wace wakukhulupirika Mose. Mudabvundza Mose thangwi ya dzina ya Mulungu, Yahova atawira: ‘Ndinadzapangiza Kukhala Cinafuna Ine Kudzapangiza Kukhala.’ (Eksodo 3:14, NM) Natenepa Yahova anakwanisa kukhala pyonsene pinafunika toera kukwanirisa cifuniro cace.

Nyerezerani kuti mbamudakwanisa kukhala pyonsene pinafuna imwe. Kodi mbamudacitiranji axamwali anu? Khala m’bodzi wa iwo aduwala, mbamudakhala dotoro wadidi kakamwe toera kumuwangisa. Khala unango ndi ntcerengi, mbamudakhala munthu wakupfuma toera kum’phedza. Mbwenye imwe nkhabe mphambvu yakukhala pinafuna imwe. Ife tonsene nkhabe mphambvu zenezi. Munapfundza imwe Bhibhlya, munadzadzuma na kuona kuti Yahova asakhala tani pyonsene pinafunika toera kukwanirisa mapikiro ace. Iye asakomerwa na kuphatisira mphambvu zace toera kuphedza ale ananfuna. (2 Pya dziko ya Israele 16:9) Makhaliro anewa adidi a Yahova nkhabe dziwiwa na anthu akuti nkhabe dziwa dzinace.

Mwapakweca, dzina yakuti Yahova isafunika kulembwa m’Bhibhlya. Kudziwa mabvekero a dzina ineyi na kuiphatisira mwakusudzuka mu ulambiri wathu, kusaphedza kakamwe toera kufendedzera cifupi Babathu wakudzulu, Yahova.a