Munacitanji Mungabva Kulira Kwa Tuluka?

TONSENE tisatawira kuti mu ‘ntsiku zino zakumalisa,’ Yahova asatsogolera, pontho asaphedza mbumba yace toera kukhala na uxamwali wakuwanga na iye. (2 Tim. 3:1) Natenepa, ife tonsene tisafunika kubvera Yahova. Ife tinakwanisa kulandaniswa na Aizraeli pikhali iwo n’thando. Mu ndzidzi ukhabva iwo kulira kwa tuluka, iwo akhafunika kubvera.

Yahova apanga Mose toera acite matuluka mawiri a parata akumenywa na martelo. Matuluka anewa ‘mbadaphatisirwa toera kudziwisa mbumba igumanyikane, pontho toera ithukuse misasa.’ (Num. 10:2) Anyantsembe akhafunika kuliza matuluka munjira zakusiyana-siyana toera kuphedza mbumba idzindikire pinthu pikhafunika iwo kucita. (Num. 10:3-8) Lero, atumiki a Mulungu asatambira pitsogolero munjira zakusiyana-siyana. Njira zenezi zisatikumbusa kulira kwa matuluka mu ndzidzi wakale. Mu nsolo uno tinapfundza njira zitatu: Tingacemerwa toera kugumanika pa misonkhano mikulu, akulu a mpingo angacemerwa toera kupfundziswa, pontho pangaoneka macinjo thangwi ya pitsogolero pinatambira mpingo.

N’thando, madzindza Aizraeli akhamanga nsasa n’khundu mwa tabhernakulu, pontho ukhagawiwa m’makhundu manai. Midzidzi inango Yahova akhapanga “mbumba yonsene toera igumanyikane pa nsuwo wa nsasa wa nsonkhano.” (Num. 10:3) Toera kucemera madzindza onsene Aizraeli, anyantsembe akhafunika kuliza matuluka mawiri ene. Aizraeli onsene akhakwanisa kubva kulira kwa matuluka anewa na cifuniro cawo. Ale akuti akhali dhuzi na nsasa wa nsonkhano mbadakwanisa kufika mwakucimbiza. Kuna ale akhali kutali mbadakwata ndzidzi uzinji, pontho akhafunika kuwangisira toera kufika. Mwakukhonda tsalakana pyenepi Yahova akhafuna kuti onsene agumanyikane pontho abve pitsogolero pyace.

Lero, ife nee tisagumanyikana mu nsasa wa nsonkhano, mbwenye tisacemerwa toera tigumanyikane pabodzi na mbumba ya Mulungu. Tisacita pyenepi tingagumanika pa misonkhano ya gawo na misonkhano inango yakupambulika. Kweneko tisapfundziswa, pontho tisapaswa pitsogolero pyakufunika kakamwe. Pa dziko yonsene yapantsi mbumba ya Yahova isapfundziswa munjira ibodzi ene. Atumiki onsene a Yahova anatawira ncemerero unoyu wa kugumanyikana pabodzi asacita khundu ya nsoka ukulu na wakutsandzaya. Anango asakhala kutali na mbuto inacitirwa nsonkhano anango asakhala dhuzi. Mwakukhonda tsalakana pyonsene, kugumanika pa misonkhano mikulu ndi cinthu cakufunika kakamwe!

Mphapo ndiye tani kwa abale athu akuti asakhala kutali na mbuto zinacitirwa misonkhano mikulu? Thangwi ya kuthambaruka kwa tekinolojiya, azinji asakwanisa kuona misonkhano ineyi mbapibva ninga ali kweneko. Mwacitsandzo, pidatambira iwo muimiriri wa ofesi ya dziko yonsene, filiali ya Benin yapangiza programu yakuti yaoniwambo ku nzinda wa Arlit unagumanika pa thando ya Sahara ku Niger. Anthu akukwana 21 aona programu ineyi; mwa iwo akhagumanika abale, alongo na anthu adacemerwa. Ngakhale akhali kutali kakamwe, iwo akhapibva kuti ali pabodzi na anthu akukwana 44.131 adagumanika pa nsonkhano unoyu ukulu udacitwa ku Benin. M’bale m’bodzi alemba: “Ndikupereka takhuta na ntima onsene thangwi ya programu idapangizwa. Pyenepi pyapangiza kuti imwe musatifuna kakamwe.”

Anyantsembe angaliza tuluka ibodzi ‘basi ene atsogoleri a madzindza akuti ndi aimiriri a pikwi na pikwi’ akhafunika kugumanyikana pa nsasa wa nsonkhano. (Num. 10:4, Tradução do Novo Mundo da Bíblia Sagrada) Penepo iwo akhatambira pitsogolero na pipfundziso kubulukira kuna Mose. Pyenepi pikhaaphedza m’basa yawo yakutsogolera madzindza a Izraeli. Mbamudakhala m’bodzi mwa atsogoleri anewa, mbamudacita pyonsene toera kugumanika.

Lero, akulu a mpingo nee ndi ‘atsogoleri a madzindza’. Iwo nee asayesera kutonga mabira a Mulungu anatsogolera iwo. (1 Ped. 5:1-3) Mbwenye iwo asacita pyonsene toera kutsogolera mwadidi mabira a Mulungu. Na thangwi ineyi, iwo angacemerwa toera kuthimizira maluso awo, ninga ku Xikola ya Utumiki wa Umambo, akulu a mpingo asatawira mwakucimbiza. M’maxikola anewa, akulu a mpingo asapfundziswa toera kutsalakana mwadidi mabasa a mpingo. Pyenepi pisacitisa kuti mpingo ukhale na uxamwali wakuwanga na Yahova. Panango imwe nee mwakhala na mwai wakupfundza m’maxikola anewa, mbwenye onsene mu mpingo anakwanisa kuphedzwa na ale adapfundza m’maxikola anewa.

Midzidzi inango, anyantsembe a Izraeli akhaliza tuluka mwakucinja-cinja. Natenepa, mbumba ikhadziwa kuti Yahova asafuna kuti iwo abuluke mbuto ineyi. (Num. 10:5, 6) Aizraeli akhabuluka pa mbuto ineyi mwakubverana na pitsogolero pikhapaswa iwo. Pyenepi pikhaphemba kuwangisira kwa onsene. Panango kwa Aizraeli anango pikhali pyakunentsa kutawira macinjo anewa. Thangwi yanji?

Panango anango akhanyerezera kuti kulizwa kwa tuluka toera kubuluka pa mbuto ikhagumanika iwo kukhacitwa kazinji kene, pontho mwakukhonda kudikhira. ‘Midzidzi inango khole ikhalimira padzulu pa tabhernakulu namaulo mpaka mwangwana mwace namacibese.’ Midzidzi inango toera kubuluka pa mbuto ikhagumanika iyo, pakhapita ‘ntsiku ziwiri, mwezi ubodzi peno ntsiku zizinji.’ (Num. 9:21, 22) Mphapo mbumba yafuluka kangasi? Bukhu ya Numero kapitulu 33, isalonga mbuto zakukwana 40 zidakhala mbumba ya Izraeli.

Midzidzi inango Aizraeli anango akhafikira pa mbuto yakuti iri na nthundzi. Pyenepi pikhali pyadidi kakamwe ‘n’thando ineyi ikulu na yakugopswa.’ (Deut. 1:19) Pyenepi mbapidakhala mayesero kuna iwo. Aizraeli mbadakwanisa kunyerezera kuti kubuluka pa mbuto ineyi kuenda inango mbadathimbana na mayesero akunentsa kakamwe.

Mu ndzidzi ukhabuluka madzindza anango, anango akhanyerezera kuti ndzidzi wawo wakubuluka ukhadembuka kufika. Tuluka ingalizwa mwakucinja-cinja onsene akhabva, mbwenye nee akhafunika kubuluka mu ndzidzi ubodzi ene. Anyantsembe angaliza tuluka, madzindza akhafunika kubuluka ndi akumabulukiro a dzuwa, akuti ndi Yuda, Isakari na Zebhuloni. (Num. 2:3-7; 10:5, 6) Madzindza anewa matatu angamala kubuluka, anyantsembe akhaliza pontho tuluka mwakucinja-cinja. Ceneci cikhali cidzindikiro toera madzindza matatu a kumadokero a dzuwa abuluke. Anyantsembe akhapitiriza pyenepi mpaka madzindza onsene kubuluka.

Panango pyakhala pyakunentsa kuna imwe kutawira macinjo anango mu gulu ya Yahova. Panango imwe mwadzudzumika kakamwe pidaona imwe macinjo mazinji akuti nee mukhaadikhira. Panango imwe mukhadadzolowera pitsogolero pinango pontho nee mukhafuna kuti picinje. Mu ndzidzi unoyu panango mwaona kuti kupirira kwanu kwayeserwa. Pontho pakwata ndzidzi toera kudzolowera macinjo anewa. Ngakhale tenepo tingawangira toera kutowezera pitsogolero pipswa Mulungu anatipasa nkhombo.

Mu ntsiku za Mose Yahova atsogolera anthu azinji akuti akhali amuna, akazi na anapiana n’thando. Mulungu mbadakhonda kuatsogolera na kutsalakana Aizraeli nee mbadapulumuka. Mu ntsiku zino zakumalisa Yahova asatiphedza toera kukhala na uxamwali wakuwanga na iye. Pontho asatiphedza toera tikwanise kupirira nyatwa zinathimbana na ife. Natenepa, mungabva kulira kwa matuluka, citani ninga pidacita Aizraeli akukhulupirika, tawirani mwakucimbiza!