NSOLO WA PFUNDZIRO 31
Perekani Takhuta Thangwi ya Mwai Wakucita Phembero
‘Phembero yanga mbikhale ninga insenso yakukhunganywa mwadidi pamaso panu.’—MASAL. 141:2.
NYIMBO 47 Phemberani Kuna Yahova Ntsiku Zonsene
PINAFUNA IFE KUPFUNDZAa
1. Tisaona tani mwai uli na ife wakucita phembero kuna Yahova?
NCITI wakudzulu na dziko yapantsi atipasa mwai wakufunika kakamwe wakucita phembero kuna iye. Nyerezerani basi: Ife tinakwanisa kulonga pyonsene piri muntima mwathu kuna Yahova mwakukhonda tsalakana ndzidzi peno cilongero. Kusiyapo pyenepi, tinakwanisa kucita phembero kuna iye khala tiri pakama mu nyumba ya ungumi peno khala tiri nkaidi, mbatinyindira kuti Babathu waufuni anabvesera phembero yathu. Ife tisapereka takhuta kakamwe thangwi ya mwai unoyu.
2. Mambo Dhavidhi apangiza tani kuti akhapereka takhuta thangwi ya mwai wakucita phembero?
2 Mambo Dhavidhi akhapereka takhuta thangwi ya mwai wakucita phembero. Iye alonga: ‘Phembero yanga mbikhale ninga insenso yakukhunganywa mwadidi pamaso panu.’ (Masal. 141:1, 2) Mu ntsiku za Dhavidhi, insenso ikhaphatisirwa mu ulambiri wandimomwene na anyantsembe, pontho ikhakhunganywa mwadidi. (Eks. 30:34, 35) Pidalonga Dhavidhi thangwi ya insenso pisapangiza kuti iye akhafuna kunyerezera mwadidi pinthu pikhafuna iye kulonga kuna Babace wakudzulu. Munjira ibodzi ene, ife tisafunambo kuti maphembero athu atsandzayise Yahova.
3. Mu ndzidzi unacita ife phembero kuna Yahova, tisafunika kulonga munjira ipi, pontho thangwi yanji?
3 Mu ndzidzi unacita ife phembero kuna Yahova, tisafunika kulonga mwacilemedzo kakamwe. Nyerezerani masomphenya adapangizwa Izaiya, Ezekyeli, Dhanyeli na Juwau. Masomphenya anewa ndi akusiyana, mbwenye akhali na cinthu cibodzi cakulandana. Onsene mwa iwo akhapangiza Yahova ninga Mambo wankulu kakamwe. Mwacitsandzo, Izaiya ‘aona Yahova mbali nawa pa mpando waumambo wa cidzo cikulu.’ (Iza. 6:1-3) Ezekyeli aona Yahova pa mpando wace waumambo kudzulu, pontho n’khundu-n’khundu ‘mukhali na ceza cakugaka, ninga ceza ca utawaleza.’ (Ezek. 1:26-28) Dhanyeli aona ‘Ule Wakuti Alipo Kutomera Kale Kakamwe’ mbadabvala nguwo zakucena, pontho pa mpando Wace waumambo pakhabuluka malirimi a moto. (Dan. 7:9, 10) Kusiyapo pyenepi, Juwau aona Yahova pa mpando wace waumambo, pontho mpando unoyu ukhadazungulirwa na utawaleza ukhaoneka ninga mwala unacemerwa ejimiradha. (Apok. 4:2-4) Tinganyerezera mwadidi ukulu wakukhonda landanisika wa Yahova, ife tisakumbuka kuti ndi mwai ukulu kakamwe kucita phembero kuna iye, pontho kuti ndi pyakufunika kucita pyenepi mwacilemedzo. Mphapo ninji pinafunika ife kulonga m’maphembero athu?
“MUSAFUNIKA KUPHEMBERA TENEPA”
4. Tisapfundzanji na mafala akutoma adalonga Yezu m’phembero inagumanika pa Mateu 6:9, 10?
4 Lerini Mateu 6:9, 10. Pa nkhani ya Paphiri, Yezu apfundzisa anyakupfundzace kuti anacita tani phembero munjira inakomeresa Mulungu. Pakumala kulonga kuti “musafunika kuphembera tenepa,” pakutoma Yezu alonga pinthu pyakufunika kakamwe mu ndzidzi udacita iye phembero. Iye aphembera thangwi yakuceneswa kwa dzina ya Yahova, kubwera kwa Umambo Wace wakuti unadzafudza anyamalwa onsene a Mulungu na nkhombo zinafuna iye kubweresa kuna anthu pa dziko yapantsi. Tingalonga pinthu pyenepi m’phembero, tisapangiza kuti cifuniro ca Mulungu ndi cakufunika kakamwe kuna ife.
5. Ndi pyakuipa kulonga pinthu pinafuna ife m’phembero?
5 Pa khundu yaciwiri ya phembero, Yezu apangiza kuti nee ndi pyakuipa kulonga pinthu pinafuna ife m’phembero. Ife tinakwanisa kuphemba Yahova toera atipase cakudya ca ntsiku na ntsiku, toera alekerere madawo athu, toera akhonde kutisiya mbatigwa m’mayesero, pontho toera atipulumuse m’manja mwa nyakuipa. (Mat. 6:11-13) Tingaphemba pinthu pyenepi kuna Yahova, tisapangiza kuti tisafuna ciphedzo cace, pontho tisafuna kunkomeresa.
Ndi pinthu pipi pyakuti m’bale anakwanisa kupilonga angacita phembero pabodzi na nkazace? (Onani ndima 6)b
6. Mu ndzidzi unacita ife phembero, tisafunika kulonga basi ene mafala a phembero idapfundzisa Yezu? Fokotozani.
6 Yezu nee akhafuna kuti anyakupfundzace alonge basi ene mafala a phembero idapfundzisa iye. M’maphembero anango adacita Yezu, iye alonga pinthu pyakusiyana-siyana pyakufunika kuna iye pa ndzidzi unoyu. (Mat. 26:39, 42; Juwau 17:1-26) Munjira ibodzi ene, mu ndzidzi unacita ife phembero, tinakwanisambo kulonga pinentso pyathu pyonsene. Mwacitsandzo, tingafuna kucita cisankhulo, ife tinakwanisa kuphemba udziwisi. (Masal. 119:33, 34) Mbatidzati toma kucita basa yakunentsa, ife tinakwanisa kuphemba ciphedzo toera tidziwe kuti tinacita tani basa ineyi. (Mis. 2:6) Anyakubala anakwanisa kuphemba Yahova toera aphedze anawo, ana anakwanisa kuphemba Yahova aphedze anyakubala awo, pontho ife tonsene tisafunika kuphemba Yahova toera aphedze anyakupfundza athu a Bhibhlya na ale anamwazira ife mphangwa. Mbwenye mu ndzidzi unacita ife phembero, nee tisafunika basi ene kuphemba ciphedzo.
Ndi pinthu pipi pyakuti tinakwanisa kupilonga m’maphembero athu toera kusimba na kupereka takhuta kuna Yahova? (Onani ndima 7-9)c
7. Thangwi yanji tisafunika kusimba Yahova m’phembero?
7 Ife tisafunika kusimba Yahova m’maphembero athu. Nkhabe munthu unango adathema kusimbwa kupiringana Mulungu wathu. Thangwi iye ndi ‘wadidi, pontho ali dzololo toera kulekerera.’ Kusiyapo pyenepi, iye ndi ‘wantsisi na wakukoma ntima, wakupirira, waufuni kakamwe na wakukhulupirika.’ (Masal. 86:5, 15) Mwandimomwene, tiri na mathangwi adidi kakamwe toera kusimba Yahova thangwi ya makhaliro ace na pinthu pinacita iye.
8. Ndi pinthu pipi pinango pinaticitisa kupereka takhuta kuna Yahova? (Masalmo 104:12-15, 24)
8 Kusiyapo kusimba Yahova m’maphembero athu, ife tisakulumizika toera kupereka takhuta kuna iye thangwi ya pinthu pyadidi pinatipasa iye. Mwacitsandzo, ife tinakwanisa kupereka takhuta kuna iye thangwi ya makore akubalika kakamwe a maluwa, pyakudya pyakusiyana-siyana na pyakukoma, pontho thangwi ya kutsandzaya kunakhala na ife tingakhala pabodzi na axamwali athu. Babathu waufuni asatipasa pinthu pyenepi na pinango pizinji toera tikhale akutsandzaya. (Lerini Masalmo 104:12-15, 24.) Kusiyapo pyenepi, ife tisapereka takhuta kuna Yahova thangwi ya cakudya cauzimu cinatipasa iye, pontho thangwi ya cidikhiro ciri na ife cakukhala na umaso wakukhonda mala ntsogolo.
9. Ninji pinafuna kutiphedza toera tikhonde kuduwala kupereka takhuta kuna Yahova? (1 Atesalonika 5:17, 18)
9 Ndi pyakukhonda nentsa kuduwala kupereka takhuta kuna Yahova thangwi ya pinthu pyonsene pinaticitira iye. Mphapo ninji pinafuna kutiphedza toera tikhonde kuduwala kupereka takhuta? Ife tinakwanisa kulemba pinthu pidaphemba ife Yahova, mukupita kwa ndzidzi mbationa kuti Yahova atawira tani maphembero athu. Buluka penepo tinakwanisa kucita phembero toera kupereka takhuta thangwi ya ciphedzo cace. (Lerini 1 Atesalonika 5:17, 18.) Nyerezerani basi: Ife tisatsandzaya, pontho tisapibva kuti ndife akufunika anango angapereka takhuta kuna ife. Munjira ibodzi ene, tingapereka takhuta kuna Yahova thangwi yakutawira maphembero athu, pyenepi pisantsandzayisa kakamwe. (Akol. 3:15) Mphapo ndi thangwi ipi inango yakufunika kakamwe inaticitisa kupereka takhuta kuna Mulungu wathu?
PEREKANI TAKHUTA KUNA YAHOVA THANGWI YA MWANACE WAKUFUNIKA
10. Mwakubverana na 1 Pedhru 2:21, thangwi yanji tisafunika kupereka takhuta kuna Yahova thangwi ya kutuma Yezu pa dziko yapantsi?
10 Lerini 1 Pedhru 2:21. Ife tisafunika kupereka takhuta kuna Yahova thangwi ya kutuma Mwanace wakufunika toera kutipfundzisa. Thangwi tingapfundza pya umaso wa Yezu, ife tinadziwa pizinji thangwi ya Yahova, pontho tinadziwa kuti tisafunika kucitanji toera kuntsandzayisa. Tingakhulupira ntsembe ya Kristu, tinakwanisa kukhala na uxamwali wakuwanga na Yahova Mulungu mbatikhala muntendere na Iye.—Aroma 5:1.
11. Thangwi yanji tisacita phembero mu dzina ya Yezu?
11 Ife tisapereka takhuta kuna Yahova thangwi tisakwanisa kucita phembero kubulukira mwa Mwanace. Yahova asaphatisira Yezu toera kutipasa pinthu pinam’phemba ife, pontho asabvesera mbatawira maphembero anacitwa mu dzina ya Yezu. Yezu alonga: “Cinthu consene cinafuna imwe kuphemba mu dzina yanga, ine ndinadzacicita, toera Baba apaswe mbiri kubulukira kuna Mwana.”—Juwau 14:13, 14.
12. Ndi thangwi ipi inango inaticitisa kupereka takhuta kuna Yahova thangwi ya Mwanace?
12 Yahova asatilekerera madawo athu mukuphatisira ntsembe yaciomboli ya Yezu. Bhibhlya isalonga kuti Yezu ndi ‘nyantsembe wankulu, pontho iye akhala pantsi kudzulu kukhundu yamadyo ya mpando waumambo wa Mulungu wankulu.’ (Aheb. 8:1) Natenepa, Yezu ndi ‘m’phedzi wathu wakuti ali pabodzi na Baba.’ (1 Juwau 2:1) Ife tisapereka takhuta kakamwe kuna Yahova thangwi yakutipasa Nyantsembe Wankulu wakuti asabvesesa kufewa kwathu, “pontho asadembetera thangwi ya ife.” (Aroma 8:34; Aheb. 4:15) Ife ndife akusowa ungwiro, natenepa mbidasoweka ntsembe ya Yezu, ife nee mbidakwanisa kulonga na Yahova m’phembero. Mwakukhonda penula, ife nee tinakwanisa kupereka takhuta kuna Yahova mwakukwana thangwi ya kutipasa Mwanace wakufunika kakamwe.
PHEMBERANI THANGWI YA ABALE NA ALONGO ANU
13. Mbadzati kufa, Yezu apangiza tani kuti akhafuna anyakupfundzace?
13 Mbadzati kufa, Yezu acita phembero namasiku thangwi ya anyakupfundzace, mbaphemba Babace toera ‘aonere anyakupfundza anewa thangwi ya nyakuipa.’ (Juwau 17:15) Pyenepi pisapangiza kuti Yezu akhafuna kakamwe anyakupfundzace. Maseze Yezu akhadziwa kuti mbadathimbana na nyatwa, iye apitiriza kudzudzumika thangwi ya anyakupfundzace.
Ndi pinthu pipi pyakuti tinakwanisa kupilonga m’maphembero athu thangwi ya abale na alongo athu? (Onani ndima 14-16)d
14. Tinapangiza tani kuti tisafuna abale na alongo athu?
14 Ife tisatowezera Yezu tingakhonda kunyerezera basi ene pinafuna ife, mbaticita phembero ndzidzi onsene thangwi ya abale na alongo athu. Tingacita pyenepi, tisabvera ntemo wa Yezu unalonga kuti tisafunika kufunana unango na ndzace, pontho tinapangiza kuna Yahova kuti tisafuna kakamwe abale na alongo athu. (Juwau 13:34) Kucita phembero thangwi ya abale na alongo athu nee ndi kubvunga ndzidzi. Thangwi Bhibhlya isalonga kuti “phembero yakudembetera inacitwa na munthu wakulungama isaphedza kakamwe.”—Tiya. 5:16.
15. Thangwi yanji tisafunika kucita phembero thangwi ya abale na alongo athu?
15 Ife tisafunika kucita phembero thangwi ya abale na alongo athu, thangwi iwo asathimbana na pinentso pizinji. Natenepa ife tinakwanisa kuphemba Yahova toera aaphedze kuti akwanise kupirira mautenda, pidengwa pyacibaliro, nkhondo, kutcingwa na pinentso pinango. Ife tinakwanisambo kucita phembero thangwi ya abale na alongo athu anaphata basa mwakuwanga toera kuphedza ale anafuna ciphedzo. Kusiyapo pyenepi, khala alipo anadziwa imwe kuti ali kuthimbana na pinentso, imwe munakwanisa kulonga madzina awo m’maphembero anu. Ife tinapangiza kuti mwandimomwene tisafuna abale na alongo athu tingaphemba Yahova toera aaphedze kupirira pinentso pyawo.
16. Thangwi yanji tisafunika kucita phembero thangwi ya abale anatitsogolera?
16 Abale anatsogolera mu mpingo asapereka takhuta kakamwe tingalonga madzina awo m’maphembero athu, pontho maphembero anewa asaaphedza. Mpostolo Paulu akhadziwa kuti ndi pyakufunika kuti anango acitembo maphembero thangwi ya iye. Natenepa iye alemba: “Citanimbo phembero thangwi ya ine toera ndipaswe mafala mu ndzidzi unafungula ine mulomo wanga, toera ndikwanise kulonga mwacipapo pakudziwisa cibisobiso cakucena ca mphangwa zadidi.” (Aef. 6:19) Munjira ibodzi ene lero, ife tiri na abale azinji akuti asaphata basa mwakuwanga toera kutitsogolera mu gulu yathu. Natenepa ife tinapangiza kuti tisaafuna tingaphemba Yahova toera apase nkhombo mabasa anacita iwo.
TINGAPHEMBWA TOERA KUCITA PHEMBERO
17-18. Ndi midzidzi ipi yakuti panango tinaphembwa toera kucita phembero, pontho tisafunika kukumbukanji?
17 Midzidzi inango, ife tisaphembwa na anango toera kucita phembero. Mwacitsandzo, mulongo wakuti ali kucitisa pfundziro ya Bhibhlya panango anaphemba mulongo anamperekera toera acite phembero. Nakuti mulongo anamperekera nee asadziwa mwadidi nyakupfundza, panango analonga kuti pinakhala mwadidi acite pyace phembero yakumalisa. Angacita pyenepi, anakwanisa kudziwa mwadidi pinthu pinafuna iye kulonga m’phembero thangwi ya nyakupfundza unoyu.
18 M’bale panango anaphembwa toera kucita phembero pa nsonkhano wa basa ya m’munda peno pa nsonkhano wa mpingo. Ale ali na mwai unoyu wakucita phembero asafunika kukumbuka cifuniro ca nsonkhano. Phembero nee isafunika kuphatisirwa toera kupereka uphungu kuna abale na alongo mu mpingo peno toera kucita pidziwiso. Kazinji kene pa misonkhano ya mpingo, mphindi zixanu zakhazikiswa toera kuimba nyimbo na kucita phembero, natenepa m’bale anafuna kucita phembero nee asafunika kulonga pinthu pizinji, makamaka khala akucita phembero yakutoma.—Mat. 6:7.
PHEMBERO NDI YAKUFUNIKA KAKAMWE MU UMASO WATHU
19. Ninji cinafuna kutiphedza toera tikhale akukhunganyika mbidzati kufika ntsiku yakutonga kwa Yahova?
19 Ife tisafunika kuona phembero ninga cinthu cakufunika kakamwe, makamaka mu ndzidzi unaona ife kuti ntsiku yakutonga kwa Yahova iri dhuzi. Na thangwi ineyi, Yezu alonga: “Pitirizani kuyang’anira, ndzidzi onsene citani maphembero akudembetera toera mukwanise kupulumuka mu pinthu pyenepi pyonsene pinafuna kucitika.” (Luka 21:36) Tingacita phembero ndzidzi onsene, cikhulupiro cathu cinakhala cakuwanga, pontho tinakhala akukhunganyika mu ndzidzi unafika ntsiku yakutonga kwa Mulungu.
20. Tisafunika kucitanji toera maphembero athu akhale ninga ntsembe yakununkhira mwadidi?
20 Tapfundzanji mu nsolo uno? Ife tisafunika kupereka takhuta kakamwe thangwi ya mwai uli na ife wakucita phembero. Cinthu cakufunika kakamwe mu ndzidzi unacita ife phembero ndi kulonga pya cifuniro ca Yahova. Ife tisafunikambo kupereka takhuta kuna Mulungu thangwi ya Mwanace, kutonga kwa Umambo wace, pontho tisafunika kucita phembero thangwi ya abale na alongo athu. Yahova asafunambo kuti ticite phembero thangwi ya pinthu pinafuna ife ntsiku na ntsiku, pontho kuti atiphedze toera tipitirize kukhala na cikhulupiro cakuwanga. Ife tinapangiza kuti tisapereka takhuta thangwi ya mwai wakucita phembero tinganyerezera mwadidi pinthu pinafuna kulonga ife m’maphembero athu. Tingacita pyenepi, mafala athu anakhala ninga ntsembe yakununkhira mwadidi kuna Yahova.—Mis. 15:8.
NYIMBO 45 Ndinanyerezera Mwacidikhodikho
a Ife tisapereka takhuta kakamwe kuna Yahova thangwi ya kutitawirisa kucita phembero kuna iye. Natenepa ife tisafuna kuti maphembero athu akhale ninga insenso yakununkhira mwadidi kuna iye. Mu nsolo uno, tinapfundza pinthu pyakuti tinakwanisa kupilonga m’maphembero athu. Pontho tinapfundza pinthu pyakuti tisafunika kupikumbuka tingaphembwa toera kucita phembero.
b FOTO TSAMBA: M’bale ali kucita phembero pabodzi na nkazace toera mwanawo akhale wakutsidzikizika kuxikola, toera nyakubalawo wakugwesera akhale na ungumi wadidi, pontho toera nyakupfundza wawo wa Bhibhlya athambaruke.
c FOTO TSAMBA: M’bale ali kupereka takhuta kuna Yahova thangwi ya ntsembe yaciomboli ya Yezu, thangwi ya dziko yapantsi yakubalika, pontho thangwi ya cakudya cadidi.
d FOTO TSAMBA: Mulongo akucita phembero toera Yahova aphedze Mathubo Akutonga, pontho toera aphedze ale anagwerwa na pidengwa na ale anatcingwa.