Thangwi Yanji Tisafunika ‘Kusimba Yahova’?

1-3. (a) Ndi ndzidzi upi panango udalembwa Masalmo 147? (b) Tinapfundzanji tingaleri Masalmo 147?

KAZINJI kene tisasimba munthu thangwi yakudzumatirwa na pinthu pidalonga iye peno pidacita iye. Ndiye tani pya kusimba Yahova Mulungu? Ife tisansimba thangwi ya mphambvu zace zikulu, zakuti tisaziona kubulukira mu pinthu pidacita iye, pontho tisansimba thangwi ya ufuni wace kwa ife, wakuti tisauona mukupereka Mwanace ninga ntsembe ya ciomboli.

² Tingaleri Masalmo 147, tisaona pakweca kuti nyakulemba kapitulu ineyi akhafuna kakamwe kusimba Yahova. Iye akulumizambo anango toera kusimba Mulungu pabodzi na iye.—Lerini Masalmo 147:1, 7, 12.

³ Ife nkhabe kundziwa adalemba Masalmo 147. Mbwenye pisaoneka kuti adalemba akhali maso mu ndzidzi udabwerera Aisraeli ku Yerusalemu pakumala kusudzulwa mu ubitcu ku Bhabhilonya. (Masalmo 147:2) Ineyi ikhali thangwi ibodzi idacitisa nyamasalmo kusimba Yahova. Nyamasalmo akhali na mathangwi anango mazinji toera kusimba Yahova. Ndi api mathangwi anewa? Pontho, ndi api mathangwi anakucitisani kulonga kuti ‘Simbani Yahova’?—Masalmo 147:1.

 4. Kodi Aisraeli apibva tani pidasudzulwa iwo na Mambo Siro, pontho thangwi yanji?

⁴ Nyerezerani kuti Aisraeli apibva tani pikhali iwo mu ubitcu ku Bhabhilonya. Anthu a ku Bhabhilonya akhaaseka mbaapanga: “Tiimbireni nyimbo za ku Sioni.” Mbwenye Ayuda nee akhafuna kuimba. Thangwi nzinda wa Yerusalemu ukhadafudzwa. (Masalmo 137:1-3, 6) Iwo akhali akutsukwala kakamwe, pontho akhafuna cibalangazo. Mbwenye ninga pikhadalonga kale Mafala a Mulungu, Yahova aphedza atumiki ace. Munjira ipi? Mambo Siro wa ku Persya akunda Bhabhilonya mbalonga: ‘Iye andipasa basa yakum’mangira nyumba mu Yerusalemu. Cincino, imwe anthu onsene a ku Yuda, ndokoni kweneko. Yahova Mulungu wanu akhale na imwe.’ (2 Pya dziko ya Israele 36:23) Mafala anewa akhali acibalangazo kakamwe kwa Aisraeli m’Bhabhilonya.

 5. Mwakubverana na nyamasalmo, Yahova asatsalakana tani atumiki ace?

⁵ Yahova nee apereka basi ene cibalangazo kuna mbumba ya Aisraeli, mbwenye abalangazambo m’bodzi na m’bodzi wa iwo. Iye asacitambo pibodzi pyene kwa ife lero. Nyamasalmo alemba kuti Mulungu ‘asawangisa ntima wakusweka; mbamanga pironda pyawo.’ (Masalmo 147:3) Tingaduwala peno kutsukwala, tinakwanisa kukhala na cinyindiro cakuti Yahova anatitsalakana. Yahova asafuna kakamwe kutibalangaza na kuwangisa pironda pyathu. (Masalmo 34:18; Izaiya 57:15) Iye asatipasa udziwisi na mphambvu toera tikwanise kupirira nyatwa zonsene zinathimbana na ife.—Tyago 1:5.

 6. Tinaphindula tani na mafala a nyamasalmo anagumanika pa Masalmo 147:4? (Onani cithundzithundzi cakutoma.)

⁶ Buluka penepo, pisaoneka ninga nyamasalmo ayang’ana kudzulu mbalonga kuti Yahova ‘asadziwa nsoka wa nyenyezi zonsene, mbazicemera ibodzi na ibodzi na dzina yace.’ (Masalmo 147:4) Nyamasalmo akhakwanisa kuona nyenyezi, mbwenye iye nee akwanisa kudziwa kuti ziripo zingasi. Lero, asiyentista asadziwa kuti kudzulu kuli na pikwi na pikwi pya nyenyezi mu galaxia. Pontho panango kuli na mabhiliyau mazinji a magalaxia. Anthu nkhabe kwanisa kulengesa nyenyezi zonsene, mbwenye Nciti asakwanisa. Mwandimomwene, iye asadziwa nyenyezi ibodzi na ibodzi mbazipasa madzina. (1 Akorinto 15:41) Mulungu wakuti asadziwa nyenyezi ibodzi na ibodzi, asadziwambo imwe. Iye ndzidzi onsene asadziwa mbuto inagumanika imwe, mabvero anu na pinthu pinafuna imwe.

7, 8. (a) Kodi Yahova asadziwanji thangwi ya ife? (b) Perekani citsandzo cinapangiza ntsisi za Yahova.

⁷ Yahova asadziwa pyonsene pinathimbana na imwe, pontho ali na mphambvu toera kukuphedzani n’nyatwa zanu. (Lerini Masalmo 147:5.) Panango munapibva kuti nyatwa zanu ndi zikulu kakamwe, pontho nee munakwanisa kuzipirira. Mulungu asadziwa pinthu pinacimwana ife kucita, ‘asadziwa kuti ndife mataka basi.’ (Masalmo 103:14) Nakuti ndife akusowa ungwiro, tisacita madodo mabodzi ene mwakubwereza-bwereza, mbatitsukwala kakamwe. Midzidzi inango tisatsumbikika thangwi ya pinthu pidalonga ife, pifuno pyakuipa pikhali na ife peno bibvu ikhali na ife. Yahova cipo acita pinthu pyenepi, mbwenye iye asabvesesa mwadidi mabvero athu.—Izaiya 40:28.

⁸ Mwaona kale ciphedzo ca Yahova mu ndzidzi ukhathimbana imwe na nyatwa? (Izaiya 41:10, 13) Pyenepi pyacitika kuna mpainiya anacemerwa Kyoko. Pidacinjwa iye toera kucita basa ipswa, iye atsukwala kakamwe. Mphapo adzindikira tani kuti Yahova abvesesa nyatwa zace? Mpingo upswa ukhasonkhana iye, ukhali na anthu azinji akuti akhabvesesa mabvero ace. Iye apibva ninga Yahova akulonga: “Ndisakufuna, tayu thangwi ndiwe mpainiya, mbwenye thangwi ndiwe ntsikana adaperekeka kwa ine. Ndisafuna kuti utsandzaye ninga m’bodzi wa Mboni zanga!” Kodi mwapibva kale mu umaso wanu kuti Yahova ‘asabvesesa pinathimbana na imwe’?

9, 10. Yahova asatipasanji pakutoma angapereka ciphedzo? Perekani citsandzo.

⁹ Tonsene tisafuna pinthu ninga cakudya, cakubvala na nyumba. Panango munadzudzumika thangwi yakukhonda khala na cakudya cakukwana. Mbwenye Yahova asacitisa mataka kubuluka pyakudya toera kudyesa pinthu pyonsene, ngakhale ‘ana a khungubwe angalira.’ (Lerini Masalmo 147:8, 9.) Khala Yahova asadyesa makhungubwe, ife tinakwanisa kukhala na cinyindiro cakuti iye anadzatipasa pinthu pinafuna ife.—Masalmo 37:25.

¹⁰ Cakufunika kakamwe, Yahova asatipasa pinafuna ife toera tipitirize kuwangisa cikhulupiro cathu, pontho asatipasa ‘ntendere wa Mulungu wakupiringana ndzeru zonsene.’ (Afilipi 4:6, 7) M’bale unango anacemerwa Mutsuo pabodzi na nkazace aona ciphedzo ca Yahova. Mu ndzidzi udacitika tsunami ku Japau mu caka 2011, iwo apulumuka thangwi ya kukwira pantsoi ya nyumba yawo. Ntsiku ineyi, iwo aluza pinthu pyawo pyonsene. Iwo amala masiku amumphu n’cidima, mbakathabuka na mphepo. M’mangwana mwace namacibese, iwo asaka cinthu cakuti mbicidawangisa cikhulupiro cawo. Cinthu cibodzi cidagumana iwo ikhali bukhu ya Anuário das Testemunhas de Jeová de 2006. Pidafungula Mutsuo matsamba mangasi, aona nsolo wakuti “Os maiores tsunamis já registrados.” Nsolo unoyu ukhalonga pya citeketeke cidacitika ku Sumatra mu caka 2004 mbicicitisa tsunami yakugoswa kakamwe. Mutsuo na nkazace alira pikhaleri iwo pinthu pyenepi pidacitikira abale na alongo awo. Iwo apibva ninga Yahova akuapasa cibalangazo cikhafuna iwo. Yahova aatsalakanambo munjira inango. M’bale wawo anakhala khundu inango ya Japau aapasa cakudya na pyakubvala. Mbwenye pidaawangisa kakamwe ndi kucedzerwa kwawo na abale adatumwa na gulu ya Yahova. Mutsuo alonga: “Ndapibva kuti Yahova akhali cifupi na m’bodzi na m’bodzi wa ife mbatitsalakana. Iye atibalangaza kakamwe!” Pakutoma Mulungu asatipasa pinthu pinafuna ife toera kupitiriza kuwangisa cikhulupiro cathu, buluka penepo asatipasa pinthu pyakumanungo.

11. Tisafunika kucitanji toera kuphindula na ciphedzo ca Mulungu?

¹¹ Yahova ‘asapulumusa anthu akulungama.’ Iye asatifuna, pontho ndzidzi onsene ali dzololo toera kutiphedza. (Masalmo 147:6a) Tinaphindula tani na ciphedzo cace? Ife tisafunika kukhala na uxamwali wakuwanga na iye. Toera kukhala na uxamwali unoyu, tisafunika kukhala akulungama. (Sofoniya 2:3) Munthu wakulungama asanyindira Yahova toera kusasanyira cinthu consene cakuipa na nyatwa zace. Yahova asakomerwa na anthu anewa.

12, 13. (a) Tisafunika kucaliranji toera kutambira ciphedzo ca Mulungu? (b) Ndi anthu api asakomerwa na Yahova?

¹² Munjira inango, Mulungu ‘asagwisa pantsi anthu akuipa.’ (Masalmo 147:6b) Ife nee tisafuna kuti pyenepi picitike kwa ife! Ife tisafuna kuti Mulungu atipangize ufuni wace wakukhonda mala. Natenepa tisafunika kuida pinthu pinaida iye. (Masalmo 97:10) Mwacitsandzo, ife tisafunika kuida ulukwali. Pyenepi pisabveka kuti tisafunika kucalira cinthu consene cinatsogolera ku makhaliro anewa, kuphatanizambo kuona ucipezipezi. (Masalmo 119:37; Mateo 5:28) Panango pinakhala pyakunentsa kakamwe, mbwenye mphyakukwanisika thangwi tinadzatambira nkhombo za Yahova.

¹³ Ife nee tinakwanisa kuthimbana na pyenepi tekha. Tisafunika kunyindira kakamwe Yahova. Kodi iye anakomerwa tinganyindira pinthu pya anthu toera kutiphedza? Nkhabe, Yahova ‘nee asakomerwa na mphambvu za makavalo.’ Kodi tisafunika kunyindira mphambvu zathu peno za anthu anango? Yahova nee ‘asadzumatirwa na kuwanga kwa miyendo ya munthu.’ (Masalmo 147:10) Natenepa, ife tisafunika kupitiriza kuphemba na kudembetera ciphedzo ca Yahova. Yahova cipo ananeta kubvesera maphembero anewa. ‘Yahova asakomerwa na anthu anan’gopa, asakomerwambo na ale asadikhira ufuni wace wakukhonda mala.’ (Masalmo 147:11) Thangwi ya ufuni wace wakukhonda mala kwa ife, tisanyindira kuti iye anapitiriza kutiphedza toera kukunda pifuno pyathu pyakuipa.

14. Ninji pidacitisa nyamasalmo kutsandzaya?

¹⁴ Yahova asatipasa cinyindiro cakuti anadzatiphedza tingathimbana na nyatwa. Pikhabwerera Aisraeli ku Yerusalemu, nyamasalmo alonga kuti Yahova akhaaphedza tani. Nyamasalmo alonga: ‘Iye anawangisa mipiringanyo ya pitseko pyako, anapasa cidzo anthu anakhala n’kati mwako, akukhazikisa n’dziko yanu.’ (Masalmo 147:13, 14) Nyamasalmo asatsandzaya kakamwe thangwi yakudziwa kuti Yahova anawangisa misuwo ya nzinda toera kutsidzikiza mbumba yace. Pyenepi pyaphedzambo nyamasalmo kupibva wakutsidzikizika.

15-17. (a) Midzidzi inango tisapibva tani tingathimbana na nyatwa, mphapo Yahova asaphatisira tani Mafalace toera kutiphedza? (b) Perekani citsandzo cinapangiza kuti Mafala a Mulungu asatiphedza tani.

¹⁵ Imwe panango musadzudzumika thangwi ya nyatwa zanu, mbwenye Yahova anakwanisa kukupasani udziwisi toera kupirira. Nyamasalmo alonga kuti Mulungu ‘asatuma mafalace pa dziko yapantsi; mafalace asathamanga kakamwe.’ Buluka penepo nyamasalmo alonga kuti Mulungu asagwisa nkhungu na matalala, mbabvundza: ‘Mbani anapirira kuthondola kwace?’ Pontho iye alonga kuti Yahova ‘asatuma mafalace, mbanyungulusa gelo.’ (Masalmo 147:15-18) Mulungu wathu wakuti asadziwa pinthu pyonsene, anakwanisa kucita cinthu consene, anatsogolera matalala na nkhungu, anakwanisa kutiphedza toera kukunda nyatwa zathu.

¹⁶ Lero, Yahova asatitsogolera kubulukira m’Mafalace, Bhibhlya. Nyamasalmo alonga kuti mafala a Yahova ‘asathamanga kakamwe’ toera kutiphedza. Mulungu asatitsogolera munjira yadidi na mu ndzidzi wakuthema. Nyerezerani maphindu asakhala na ife kubulukira m’Bhibhlya, m’mabukhu a ‘m’bandazi wakukhulupirika na wandzeru,’ TV JW, akulu a mpingo, pontho abale na alongo mu mpingo. (Mateo 24:45) Kodi mwaona kale citsogolero ca Yahova mu umaso wanu?

¹⁷ Mulongo unango anacemerwa Simone asakumbuka njira idaphedzwa iye na Mafala a Mulungu. Iye akhapibva wakusowa basa na akhanyerezera kuti Yahova nee asakomerwa naye. Mbwenye mu ndzidzi ukhatsukwala iye, apitiriza kuphembera kwa Yahova, kudembetera ciphedzo cace. Iye apitirizambo kupfundza Bhibhlya. Simone alonga: “Maseze ndikhathimbana na nyatwa zenezi, ndzidzi onsene ndikhapibva kuti Yahova asandiwangisa na kunditsogolera.” Pyenepi pyamphedza toera kuthimizira maonero ace akulinganira.

18. Thangwi yanji musapibva kuti Yahova ali cifupi na imwe, pontho ndi mathangwi api ali na imwe toera ‘Kusimba Yahova!’?

¹⁸ Nyamasalmo akhadziwa kuti Yahova akhadasankhula basi ene mbumba ya Aisraeli toera ikhale atumiki ace pa dziko yonsene yapantsi. Ndiwo basi akhadatambira ‘mafala’ a Mulungu na ‘matongero ace.’ (Lerini Masalmo 147:19, 20.) Lero, tiri na mwai ukulu kakamwe wakucemerwa na dzina ya Mulungu. Tisapereka takhuta kakamwe thangwi yakudziwa Mulungu, Mafalace akuti asatitsogolera, mbitikwanisa kucita uxamwali na iye. Ninga nyakulemba wa Masalmo 147, tiri na mathangwi mazinji toera ‘Kusimba Yahova!’ na kuphedza anango toera kucitambo pibodzi pyene.