‘Ale Anasaka Yahova Nkhabe Kusowa Nee Cinthu Cibodzi Cadidi.’

 1. Ndi nyatwa zipi zidathimbana na Dhavidhi?

DHAVIDHI akhathawa toera kupulumusa umaso wace. Thangwi mambo wamphambvu wa mu Izraeli, Sauli, akhafuna kumupha. Mu ndzidzi ukhathawa iye, alimira mu nzinda wa Nobhe, pontho aphemba nyantsembe Aimeleki toera ampase mikate mixanu. (1 Sam. 21:1, 3) Buluka penepo, Dhavidhi na amuna akhali na iye athawira mu mphako. (1 Sam. 22:1) Thangwi yanji pyenepi pikhacitika na Dhavidhi?

 2. Ndi pinthu pipi pyakuipa pidacita Sauli? (1 Samwele 23:16, 17)

² Sauli akhali na bibvu na Dhavidhi thangwi anthu azinji akhakomerwa na Dhavidhi, pontho akhansimba, nakuti iye akhadawina nkhondo zizinji. Kusiyapo pyenepi, akhapidziwa kuti iye akhadakhondiwa na Yahova thangwi nee akhadambvera, pontho Yahova akhadasankhula Dhavidhi toera kukhala mambo. (Lerini 1 Samwele 23:16, 17.) Mbwenye pa ndzidzi unoyu Sauli akhapitiriza kukhala mambo mu Izraeli, akhali na anyankhondo azinji, pontho akhaphedzerwa na anthu azinji, natenepa Dhavidhi akhafunika kuthawa toera apulumuse umaso wace. Kodi Sauli akhanyerezera kuti mbadakwanisa kupingiza Mulungu toera kukhazikisa Dhavidhi ninga mambo? (Iza. 55:11) Bhibhlya nee isatawira mbvundzo unoyu, mbwenye tiri na cinyindiro cakuti Sauli akhaikha umaso wace pangozwi. Thangwi ndzidzi onsene ale anamenya nkhondo na Mulungu asaluza!

 3. Kodi Dhavidhi akhapibva tani mwakukhonda tsalakana pinthu pyonsene pidancitikira?

³ Dhavidhi akhali wakucepeseka. Iye nee asankhulika ekhene toera kukhala mambo wa Izraeli, mbwenye ndi Yahova adansankhula. (1 Sam. 16:1, 12, 13) Sauli akhaida kakamwe Dhavidhi. Mbwenye Dhavidhi nee apasa mulando Yahova thangwi ya pinthu pikhancitikira. Pontho iye nee akhadungunya thangwi yakukhala na cakudya cakucepa peno thangwi yakukhala m’mphako. Panango ndi mu ndzidzi unoyu, udalemba iye mafala a lemba yathu ya caka, inalonga kuti: ‘Ale anasaka Yahova nkhabe kusowa nee cinthu cibodzi cadidi.’—Masal. 34:10.

 4. Ndi mibvundzo ipi inafuna ife kutawira mu nsolo uno, pontho thangwi yanji ndi yakufunika kakamwe?

⁴ Midzidzi inango, atumiki azinji a Yahova nee asakhala na cakudya cakukwana peno pinthu pinango pyakufunika.b Pontho pyenepi pyatekera kakamwe makamaka mu ndzidzi wa utenda wa koronaviru. Kusiyapo pyenepi, pinthu pinadzatekera kakamwe mu ndzidzi unafendedzera ife cifupi “nyatwa ikulu.” (Mat. 24:21) Natenepa, mu nsolo uno tinaona mitawiro ya mibvundzo minai: Ndi munjira ipi Dhavidhi nee ‘akhasowa cinthu cadidi’? Thangwi yanji tisafunika kukomerwa na pinthu piri na ife? Thangwi yanji tinakwanisa kunyindira kuti Yahova anatitsalakana? Tinakwanisa tani kukhunganyika cincino thangwi ya pinthu pinafuna kuticitikira ntsogolo?

5-6. Lemba ya Masalmo 23:1-6 isatiphedza tani toera kubvesesa pikhafuna kulonga Dhavidhi na mafala akuti ‘nee ndinasowa cinthu’?

⁵ Kodi Dhavidhi akhafuna longanji na mafala akuti atumiki a Yahova ‘nee anasowa cinthu’? Dhavidhi aphatisira mafala akulandana na anewa pidalemba iye Masalmo kapitulu 23. Natenepa mafala anewa anakwanisa kutiphedza toera kubvesesa pikhafuna kulonga iye. (Lerini Masalmo 23:1-6.) Pa kapitulu ineyi Dhavidhi atoma na mafala akuti: ‘Yahova ndi Nkumbizi wanga. Nee ndinasowa cinthu.’ Pakumala kulemba mafala anewa, Dhavidhi alonga thangwi ya pinthu pyakuti ndi pyakufunika kakamwe mu umaso, ninga nkhombo zikhali na iye thangwi yakutawira Yahova ninga nkumbizi wace. Yahova akhatsogolera Dhavidhi ‘munjira zaulungami,’ pontho akhamphedza m’midzidzi yadidi na m’midzidzi ya nyatwa. Kuna Dhavidhi, kutumikira Yahova kukhali ninga kukhala ‘m’mbuto yakuti iri na thongwe.’ Pontho iye akhadziwa kuti umaso wace nee mbudakhala wakusowa nyatwa, kusiyapo pyenepi iye akhapidziwa kuti mbadakhala na anyamalwa. M’midzidzi inango iye akhali wakutsukwala kakamwe, pontho akhapibva ninga ali kufamba ‘n’gowa ya cidima cikulu.’ Dhavidhi akhadziwa kuti nee akhafunika ‘kugopa cinthu’ thangwi Yahova akhali Nkumbizi wace.

⁶ Ndi munjira ipi Dhavidhi ‘nee akhasowa cinthu cadidi’? Dhavidhi akhali na pyonsene pikhafuna iye toera apitirize kukhala na uxamwali wakuwanga na Yahova. Iye nee akhafunika kukhala na pinthu pizinji pyakumanungo toera akhale wakutsandzaya. Iye akhakomerwa na pinthu pikhampasa Yahova. Cinthu cakufunika kakamwe kuna Dhavidhi cikhali kutambira nkhombo na citsidzikizo ca Yahova.

 7. Mwakubverana na Luka 21:20-24, ndi pinentso pipi pidathimbana na Akristu a mu ndzidzi wa apostolo?

⁷ Mafala adalonga Dhavidhi anakwanisa kutiphedza toera kuona kuti ndi pyakufunika kakamwe kukhala na maonero akulinganira thangwi ya pinthu pyakumanungo. Nee ndi pyakuipa kukhala na pinthu pyakumanungo. Mbwenye nee tisafunika kusiya kuti pinthu pyenepi pikhale pyakufunika kakamwe mu umaso wathu. Pyenepi ndi pinthu pyakufunika kakamwe pyakuti Akristu a mu ndzidzi wa apostolo akuti akakhala mu Yudeya akhafunika kupibvesesa. (Lerini Luka 21:20-24.) Yezu akhadaapanga kuti nzinda wa Yerusalemu ‘mbudazungulirwa na anyankhondo.’ Pontho aapangambo kuti pyenepi pingacitika iwo akhafunika “kuthawira ku mapiri.” Ngakhale kucita pyenepi mbakudaacitisa kuluza pinthu pizinji, iwo mbadapulumusa umaso wawo. Pyaka pingasi nduli, revista ibodzi ya Sentinela yalonga tenepa thangwi ya Ayuda: “Iwo asiya minda yawo, nyumba zawo, ngakhale pinthu pinango pikhali na iwo. Iwo akhanyindira kuti Yahova mbadaatsidzikiza na kuaphedza, pontho iwo aikha ulambiri wa Yahova pa mbuto yakutoma, mwakukhonda tsalakana pinthu pinango pyakuti pikhaoneka ninga pyakufunika.”

 8. Tinapfundzanji na pinthu pidacitikira Akristu a mu ndzidzi wa apostolo akuti akhali mu Yudeya?

⁸ Tinapfundzanji na pinthu pidacitikira Akristu a mu ndzidzi wa apostolo akuti akhali mu Yudeya? Revista ya Sentinela idalongwa pa ndima 7 yathimiza: “Ntsogolo panango tinathimbana na mayesero thangwi ya njira inaona ife pinthu pyakumanungo. Kodi pinthu pyenepi ndi pyakufunika kakamwe kuna ife peno pyakufunika kwa ife ndi kupulumuswa thangwi yakukhala akukhulupirika kuna Mulungu? Mu ndzidzi wakuti kumala kwa makhaliro akuipa kuli cifupi, ife tisafunika kupirira pinthu pizinji, pontho tisafunika kuwangisira kakamwe. Natenepa tisafunika kukhala dzololo toera kucita pinthu pyonsene pinafunika, ninga pidacita Akristu a mu ndzidzi wa apostolo akuti athawa ku Yudeya.”c

 9. Kodi uphungu udapereka Paulu kuna Ahebheri unakubalangazani tani?

⁹ Pikhali pyakunentsa kakamwe kuna Ayuda a mu ndzidzi wa apostolo toera kusiya pinthu pyonsene pikhali na iwo mbatoma umaso upswa mbuto inango. Iwo akhafunika kunyindira kuti Yahova mbadaapasa pinthu pyonsene pikhafunika kuna iwo. Cinthu cinango cidaphedza Akristu anewa, ndi uphungu udaapasa mpostolo Paulu pyaka pixanu nduli Aroma mbadzati kuzungulira nzinda wa Yerusalemu. Iye alonga: “Mu umaso wanu, khalani anthu akukhonda kufuna kakamwe kobiri, mbwenye mukomerwe na pinthu piri na imwe. Thangwi iye alonga: ‘Ine cipo ndinadzakusiya, pontho cipo ndinadzakuthawa.’ Toera tikhale na cipapo kakamwe, mbatilonga kuti: ‘Yahova ndiye anandiphedza; nee ndinadzagopa. Kodi munthu anandicitanji?’” (Aheb. 13:5, 6) Pikhali pyakukhonda nentsa kuna Ayuda adabvera uphungu wa Paulu toera kutsandzaya na pinthu pyakucepa pikhali na iwo ku mbuto idathawira iwo. Iwo akhali na cinyindiro cakuti Yahova mbadaapasa pinthu pikhafunika kuna iwo. Mafala a Paulu asatiphedzambo toera tikhale na cinyindiro cibodzi cene.

10. Ndi cinthu cipi cidalonga Paulu “cakuti anthu azinji nkhabe kucidziwa”?

¹⁰ Mpostolo Paulu aperekambo uphungu unango kuna Timoti, pontho uphungu unoyu usaphatambo basa kuna ife. Iye alonga: “Natenepa, khala tiri na cakudya na cakubvala, tinakomerwa na pinthu pyenepi.” (1 Tim. 6:8) Kodi pyenepi pisabveka kuti ife nee tisafunika kukhala na kobiri toera kugula cakudya cadidi, kukhala na nyumba yadidi peno kugula nguwo zipswa? Paulu nee alonga pyenepi. Mbwenye iye akhafuna kulonga kuti ife tisafunika kukomerwa na pinthu piri na ife, mwakukhonda tsalakana khala ndi pyakucepa peno ndi pizinji. (Afil. 4:12) Ceneci cikhali “cinthu cakuti anthu azinji nkhabe kucidziwa” cakuti caphedza Paulu toera akhale wakutsandzaya. Cinthu cakufunika kakamwe kuna ife ndi uxamwali wathu na Mulungu, tayu pinthu pyakumanungo piri na ife.—Hab. 3:17, 18.

11. Mafala adalonga Mose kuna Aizraeli asatipfundzisanji thangwi ya kukomerwa na pinthu piri na ife?

¹¹ Pinthu pinanyerezera ife kuti ndi pyakufunika, panango nee ndi pyenepi pinanyerezera Yahova. Onani pidalonga Mose kuna Aizraeli pidamala iwo pyaka 40 n’thando: ‘Yahova Mulungu wanu asakupasani nkhombo mu pinthu pyonsene pinacita imwe. Iye asadziwa mwadidi ulendo unacita imwe n’thando ino ikulu. Yahova Mulungu wanu akhali na imwe mu pyaka 40, pontho nkhabe cinthu cidasowa imwe.’ (Deut. 2:7) Mu pyaka pyenepi pyakukwana 40, Yahova apasa Aizraeli cakudya cikhacemerwa mana. Nguwo zawo zidabuluka na iwo ku Ejitu nee zasakala. (Deut. 8:3, 4) Ngakhale Aizraeli anango akhanyerezera kuti pyenepi pikhali pyakucepa, Mose aapanga kuti akhali na pyonsene pikhafuna iwo. Yahova anakomerwa kakamwe tingaona pinthu piri na ife kukhala pyakukwana. Iye asafuna kuti tipereke takhuta ngakhale thangwi ya pinthu pyakucepa pinatipasa iye, pontho tisafunika kubvesesa kuti pinthu pyenepi ndi muoni unabuluka kuna iye.

12. Ninji pinapangiza kuti Dhavidhi akhanyindira Yahova, tayu maluso ace?

¹² Dhavidhi akhadziwa kuti Yahova ndi wakukhulupirika, pontho asatsalakana mwadidi kakamwe ale ananfuna. Dhavidhi pidalemba iye Masalmo 34, akhali na cinyindiro cakuti ‘anju wa Yahova akhantsidzikiza.’ (Masal. 34:7) Panango akhalandanisa anju wa Yahova na nyankhondo wakuti ndzidzi onsene asakhala dzololo toera kuona nyamalwa. Dhavidhi akhali nyankhondo wacipapo, pontho Yahova akhadapikira kuti iye mbadakhala mambo, mbwenye iye nee akhanyindira maluso ace akuponya miyala peno akuphatisira supada toera kukunda nyamalwa. (1 Sam. 16:13; 24:12) Dhavidhi anyindira Yahova, pontho akhadziwa kuti anju wa Yahova ‘asapulumusa anthu onsene anagopa Yahova.’ Mwandimomwene ife nee tisadikhira kuti Yahova anatitsidzikiza mwacirengo. Mbwenye ife tisadziwa kuti ale ananyindira Yahova anadzatambira umaso wakukhonda mala, ngakhale afe cincino.

13. Goge wa Magoge angapomokera atumiki a Mulungu, thangwi yanji tinaoneka ninga anthu akusowa citsidzikizo, pontho thangwi yanji nee tisafunika kugopa? (Onani foto iri patsamba yakutoma.)

¹³ Mwakukhonda dembuka, kunyindira kwathu Yahova kunadzayeserwa. Nsoka wa madzindza, Goge wa Magoge ungapomokera atumiki a Mulungu, panango tinanyerezera kuti iwo anatipha. Ife tisafunika kunyindira kuti Yahova anakwanisa kutipulumusa, mwandimomwene anatipulumusa. Kuna anthu, ife tinaoneka ninga mabira akuti nee ali na munthu toera kuatsidzikiza. (Ezek. 38:10-12) Ife nee tinakhala na pida pya nkhondo, pontho nee tinapfundziswa kumenya nkhondo. Iwo ananyerezera kuti pinakhala pyakukhonda nentsa kutikunda. Iwo nee asadziwa kuti aanju a Yahova ali dzololo toera kutitsidzikiza. Mbwenye ife tisadziwa pyenepi thangwi tiri na cikhulupiro. Mwandimomwene, iwo nee anabvesesa pinthu pinafuna kudzacitika. Thangwi iwo nee ali na cikhulupiro. Iwo anadzakhala akudzumatirwa kakamwe angaona aanju mbakamenya nkhondo toera kutitsidzikiza.—Apok. 19:11, 14, 15.

14. Tinacitanji cincino toera tikhunganyike thangwi ya pinthu pinafuna kucitika ntsogolo?

¹⁴ Tinacitanji cincino toera tikhunganyike thangwi ya pinthu pinafuna kucitika ntsogolo? Pakutoma, nee tisafunika kunyerezera kuti pinthu pyakumanungo ndi pyakufunika kakamwe, thangwi na ntsiku yace tinapisiya. Ife tisafunika kukomerwa thangwi ya pinthu piri na ife, pontho tisafunika kukhala akutsandzaya kakamwe thangwi tiri na uxamwali na Yahova. Tingadziwa mwadidi Mulungu wathu, tinakhala na cinyindiro cakuti iye anakwanisa kutitsidzikiza tingapomokerwa na Goge wa Magoge.

15. Ndi pinthu pipi pidacitikira Dhavidhi pikhali iye m’phale, pyakuti pyampangiza kuti Yahova ndzidzi onsene mbadamphedza?

¹⁵ Onani pinthu pinango pidaphedza Dhavidhi pyakuti pinatiphedzambo toera tikhunganyike kuti tithimbane na pinentso. Dhavidhi alonga: ‘Yeserani, pontho onani kuti Yahova ndi wadidi; nyakutsandzaya ndi munthu anathawira kuna iye.’ (Masal. 34:8) Mafala anewa asapangiza thangwi yanji Dhavidhi akhanyindira kuti Yahova mbadamphedza. Dhavidhi ndzidzi onsene akhanyindira Yahova, pontho Yahova ndzidzi onsene akhamphedza. Pikhali iye m’phale, Dhavidhi amenyana na Nfilisti wakulapha kakamwe, Goliati, pontho iye apanga nyankhondo unoyu wamphambvu kakamwe kuti: ‘Lero, Yahova anakupereka m’manja mwanga.’ (1 Sam. 17:46) Mukupita kwa ndzidzi, Dhavidhi pikhatumikira iye Sauli, kazinji kene Sauli ayesera kumupha. Mbwenye ‘Yahova akhali na’ Dhavidhi. (1 Sam. 18:12) Nakuti Yahova akhadaphedza kale Dhavidhi, iye akhadziwa kuti Yahova mbadapitiriza kumphedza.

16. Tinakwanisa tani ‘kuona’ kuti Yahova ndi wadidi?

¹⁶ Tinganyindira kakamwe pitsogolero pya Yahova lero, tinakwanisa kukhala na cinyindiro cakuti iye anakwanisa kutipulumusa ntsogolo. Ife tisafunika kukhulupira na kunyindira Yahova toera tiphembe patrau wathu kuti atitawirise kugumanika pa nsonkhano wa cisa peno wa gawo, kuphemba toera kugumanika pa misonkhano ya mpingo na kumala ndzidzi uzinji mu utumiki. Nyerezerani kuti taphemba patrau wathu, mbwenye iye akhonda mbatibulusa basa. Kodi ife tisakhulupira kuti Yahova cipo anatisiya tekhene? (Aheb. 13:5) Azinji akuti ali m’basa ya ndzidzi onsene akwanisa kuona kuti Yahova aaphedza mu ndzidzi ukhafuna iwo kakamwe ciphedzo cace. Mwandimomwene Yahova ndi wakunyindirika.

17. Ndi ipi lemba ya caka ca 2022, pontho thangwi yanji ndi yakuthema kakamwe?

¹⁷ Nakuti Yahova ali na ife, nee tiri na mathangwi toera kugopa pinthu pinafuna kucitika ntsogolo. Mulungu wathu cipo anatiduwala tingaikha Umambo wace pa mbuto yakutoma mu umaso wathu. Toera kutikumbusa kufunika kwa kukhunganyika cincino thangwi ya nyatwa zinafuna kuthimbana na ife ntsogolo, na kunyindira kuti Yahova cipo anatiduwala, Mathubo Akutonga asankhula Masalmo 34:10 toera kukhala lemba ya caka ca 2022. Lemba ineyi isalonga: ‘Ale anasaka Yahova nkhabe kusowa nee cinthu cibodzi cadidi.’