Mibvundzo Inacitwa Na Anyakuleri

Dumbiro “ndi kulonga peno kupikira kuti munthu anacita pidalonga iye. Kazinji kene munthu angadumbira asalonga kuti Mulungu ndi mboni.” Dumbiro panango inacita kulongwa peno kulembwa.

Panango, anthu anango ananyerezera kuti mphyakuipa kudumbira thangwi Yezu alonga kuti: “Lekani kudumbira, nee pang’ono pene . . . Mbwenye imwe mungalonga ‘Inde’ akhale inde, mungalonga ‘Nkhabe,’ akhale nkhabe, thangwi mafala anango onsene akusiyana na anewa asabuluka kuna Dyabo.” (Mat. 5:33-37) Yezu akhadziwa kuti Mwambo wa Mose ukhaphemba kuti midzidzi inango Aizraeli adumbire, pontho atumiki anango akukhulupirika a Mulungu adumbirambo. (Gen. 14:22, 23; Eks. 22:10, 11) Pontho iye akhadziwambo kuti Yahova adumbira. (Aheb. 6:13-17) Na thangwi ineyi, Yezu nee akhafuna kulonga kuti nee tisafunika kudumbira. Mbwenye iye akhacenjeza anthu toera akhonde kudumbira thangwi ya pinthu pyakusowa basa peno mwakusendzeka. Ndzidzi onsene tisafunika kucita pinthu pinapikira ife, thangwi Yahova asafuna kuti ticite pyenepi.

Mphapo munacitanji mungaphembwa toera kudumbira? Cakutoma, onesesani khala munakwanisa kucita pinthu pinadumbira imwe. Khala mukuona kuti nee munakwanisa kucita pinthu pinafuna imwe kudumbira, mphyadidi mukhonde pyanu kudumbira. Bhibhlya isalonga: ‘Mphyadidi kakamwe kukhonda kupikira, kupiringana kupikira mbukhonda kucita pidapikira iwe.’ (Koel. 5:5) Buluka penepo, onani pinthu pinalonga Bhibhlya thangwi ya kudumbira. Mungamala citani pinthu mwakubverana na cikumbuntima canu cakupfundziswa na Bhibhlya. Kodi pinthu pyenepi pinalonga Bhibhlya ndi pipi?

Kudumbira kunango kusabverana na pinafuna Mulungu. Mwacitsandzo, Mboni za Yahova zisacita pikiro pakumanga banja. Kupikira kweneko ndi dumbiro. Mankhadzi wa mamuna na mankhadzi wa nkazi asapikira pamaso pa Mulungu na pa anthu onsene kuti iwo anadzafunana, kutsalakana mbalemedzana unango na ndzace, pontho anacita pyenepi “mu ndzidzi unapitiriza iwo na umaso.” (Mabanja anango nee asalonga mafala anewa, mbwenye iwo asadumbira pamaso pa Mulungu.) Buluka penepo, anthu asadziwiswa kuti iwo amanga banja, pontho kuti iwo anapitiriza kukhala pabodzi mu umaso wawo onsene. (Gen. 2:24; 1 Akor. 7:39) Kudumbira kweneku pakumanga banja ndi kwadidi, kwakuthema, pontho kusabverana na pinafuna Mulungu.

Kudumbira kunango nee kusabverana na pinafuna Mulungu. Nkristu wandimomwene nee anapikira kuti anaphatisira pida pya nkhondo toera kutsidzikiza dziko yace peno kusiya kukhulupira Mulungu. Angacita pyenepi ali kupwaza mitemo ya Mulungu. Akristu nee asafunika kucita “khundu ya dziko,” natenepa ife nee tisafunika kucita nawo pabodzi uviyaviya peno kuenda ku nkhondo.—Juwau 15:19; Iza. 2:4; Tiya. 1:27.

Kudumbira kunango kusanyindira cikumbuntima ca munthu. Midzidzi inango, mbatidzati kudumbira tisafunika kunyerezera mwadidi uphungu udapereka Yezu. Iye alonga: “Perekani kuna Sezari pinthu pya Sezari, mbwenye pya Mulungu perekani kuna Mulungu.”—Luka 20:25.

Nyerezerani kuti Nkristu asafuna acinje dziko idabalwa iye toera akhale wa dziko inango peno asafuna apaswe passaporte, mbwenye iye apangwa kuti pakutoma asafunika kudumbira kuti anakhala wakukhulupirika. Khala mu dziko ineyi kudumbira kweneku kusabveka kuti iye nee asafunika kucita pinthu pyakuti nee pisabverana na mitemo ya Mulungu, cikumbuntima cace cakupfundziswa na Bhibhlya nee cinantawirisa kudumbira. Ngakhale tenepo, utongi panango unasasanyira mafala a dumbiro ineyi toera abverane na cikumbuntima cace.

Kuphatisira mafala adasasanyirwa toera kudumbira kuti anakhala wakukhulupirika, kusabverana na mafala anagumanika pa Aroma 13:1, akuti asalonga: “Anthu onsene asafunika kubvera mautongi.” Natenepa, Nkristu panango anaona kuti nee ndi pyakuipa kudumbira thangwi ya cinthu cinaphemba Mulungu toera kucicita.

Musafunikambo kubvera cikumbuntima canu, khala mwaphembwa toera muphatire cinthu peno mucite cidzindikiro mu ndzidzi unadumbira imwe. Kale, Aroma na Asita akhadumbirira masupada awo, ninga cipangizo cakuti akuphatirira cidzindikiro ca mulungu wa nkhondo toera kupangiza kunyindirika kwawo. Agerego, pakudumbira akhathukula manja awo ndzulu. Iwo akhanyerezera kuti pana mulungu wakuti asabva pinalonga anthu mbaona pinacita iwo, pontho anthu asafunika kutawirira kuna iye.

Natenepa, atumiki a Yahova nee asafunika kudumbira mukuphatisira pidzindikiro pya dziko yawo, pyakuti pisaphataniza ulambiri wauthambi. Mphapo munacitanji khala thando yakutongera miseru yakuphembani toera muikhe manja anu pa Bhibhlya mbamudumbira toera kupangiza kuti umboni wanu ndi wandimomwene? Pyenepi pingacitika, panango imwe munasankhula kudumbira, thangwi Bhibhlya isalonga kuti atumiki anango akukhulupirika acitambo pidzindikiro pakudumbira. (Gen. 24:2, 3, 9; 47:29-31) Mungadumbira munjira ineyi, musafunika kukumbuka kuti muli kudumbira pamaso pa Mulungu kuti munalonga undimomwene. Imwe musafunika kukhunganyika toera kulonga undimomwene pakutawira mibvundzo yonsene yakuti panango munaicitwa.

Nakuti uxamwali wathu na Yahova ndi wakufunika kakamwe kuna ife, tingaphembwa toera kudumbira, pakutoma tisafunika kucita phembero mbatinyerezera mwadidi toera tione kuti pinafuna ife kucita nee pisaphonyana na cikumbuntima cathu peno na pinalonga Bhibhlya. Mungadumbira, musafunika kucita pidadumbira imwe.—1 Ped. 2:12.