Mibvundzo Inacitwa Na Anyakuleri

Akristu asatowezera midida ya Bhibhlya pakucita pisankhulo pyakuti anatsidzikizika tani. Midida ineyi isapangiza kuti ndi pyakuipa kwa Akristu kuphatisira pida ninga mpfuti, pistola, peno pida pinango toera kutsidzikizika kuna anthu anango. Nyerezerani ntsonga zinatowera:

Umaso wa munthu ndi wakufunika kakamwe kuna Yahova. Nyamasalmo Dhavidhi alemba thangwi ya Yahova: ‘Imwe ndimwe ntcitci wa umaso.’ (Masalmo 36:9) Natenepa, khala Nkristu asankhula kutsidzikizika ekha peno kutsidzikiza pinthu pyace, iye asafunika kucita pyonsene toera kucalira mulando wa ciropa, wakuti usaoneka thangwi yakupha munthu unango.—Deuteronomyo 22:8; Masalmo 51:14.

Ndimomwene kuti cinthu consene cinaphatisira munthu toera kutsidzikizika, cinakwanisa kuncitisa kukhala na mulando wa ciropa. Mbwenye mpfuti, isacitisa kukhala pyakukhonda nentsa kupha munthu unango, mwasusudeu peno mwakufuna.a (Onani cidzindikiro capantsi.) Pontho, nyamalwa panango anaipirwa kakamwe angaona mpfuti, mbapicitisa kukhala pyakukhonda nentsa kufuna kupha munthu.

Pidapanga Yezu atowereri ace toera akwate masupada camasiku mbadzati kuphiwa, nee pisabveka kuti iwo akhafuna kutsidzikizika. (Luka 22:36, 38) M’mbuto mwace, Yezu akhafuna kuapfundzisa kuti nee asafunika kucita uphanga, maseze agumanikane na mwinji wa anthu wakuti uli na pida. (Luka 22:52) Pidamala Pedhru kuphatisira mwakuipa supada yace mukutema nyamalwa, Yezu ampanga: ‘Ikha supada yako pa mbuto pace.’ Buluka penepo Yezu akhazikisa n’dida wakuti usaphata basa kuna Akristu mpaka lero: “Anthu onsene anakwata supada, anadzafa na supada.”—Mateo 26:51, 52.

Ninga pidalongwa kale pa Mikeya 4:3, atumiki a Mulungu ‘anadzafula masupada awo mbakhala mapaza na madipa awo mbakhala masikeya.’ Akristu andimomwene asadziwika ninga anthu antendere. Iwo asabvera mitemo ya Mulungu idalonga mpostolo Paulu kuti ‘lekani kubwezera pyakuipa,’ pontho “khalani na ntendere na anthu onsene.” (Aroma 12:17, 18) Maseze Paulu athimbana na pinthu pyakunentsa kakamwe mu umaso wace, kuphatanizambo ‘mambava,’ cipo apwaza midida ya Bhibhlya toera kutsidzikizika. (2 Akorinto 11:26) Mbwenye akhanyindira Mulungu, pontho akhadziwa kuti uphungu wandzeru wa m’Bhibhlya ndi ‘wakufunika kupiringana pida pya nkhondo.’—Koelete 9:18.

Umaso ndi wakufunika kakamwe kwa Akristu kupiringana pinthu pyakumanungo. Ife tisadziwa kuti umaso wa munthu ‘nee usabulukira mu pinthu piri na iye.’ (Luka 12:15) Natenepa, tingalonga munjira yadidi na phanga wakuti ali na mpfuti nee pinancitisa kusiya kuba. Mbwenye ife tisatowezera uphungu wa Yezu: ‘Lekani kuthimbana na munthu wakuipa.’ Pyenepi panango pisabveka kuti tisafunika kunsiya mbacita pyonsene pinafuna iye. (Mateo 5:39, 40; Luka 6:29)b (Onani cidzindikiro capantsi.) Mwandimomwene, ndi pyakufunika kakamwe kucalira kuthimbana na mapanga. Panango iwo nee anaticita pyakuipa tingatowezera uphungu wa m’Bhibhlya na kucalira ‘kugaya thangwi ya pinthu piri na ife.’ (1 Jwau 2:16) Tinadzakhalambo akutsidzikizika tingadziwika na anyakuendekana athu ninga Mboni za Yahova zakukhazikisa ntendere.—Misangani 18:10.

Akristu asalemedza cikumbuntima ca anango. (Aroma 14:21) Abale na alongo anango anaipirwa, peno anagwegweduka, angabva kuti m’bale wawo Wacikristu asakhala na mpfuti toera kutsidzikizika nawo kuna anthu anango. Panango ife tiri na ufulu wakukhala na mpfuti, mbwenye nakuti tisafuna abale na alongo athu, cipo tinacita cinthu cinadziwa ife kuti cinaagwegwedusa.—1 Akorinto 10:32, 33; 13:4, 5.

Akristu asafunika kukhala a citsandzo cadidi kuna anango. (2 Akorinto 4:2; 1 Pedro 5:2, 3) Khala Nkristu ali na mpfuti toera kutsidzikizika kuna anthu anango, akulu a mpingo anampasa uphungu wa Bhibhlya. Iye angasankhula kupitiriza kukhala na mpfuti, nee anakhala citsandzo cadidi. Natenepa, iye nee anakhala na miyai yakutumikira peno miyai yakupambulika mu mpingo. Midida ibodzi ene isaphatisirwambo kuna Nkristu wakuti asapitiriza kuphatisira mpfuti ku basa yakudziko. Pinakhala pyadidi kakamwe kuna iye kusaka basa inango.c—Onani cidzindikiro capantsi.

Nkristu asafunika kucita cisankhulo cace thangwi ya kutsidzikizika, kutsidzikiza banjace na pinthu pyace, kuphatanizambo pa mbuto inaphata iye basa. Mbwenye pakucita pisankhulo pyenepi, iye asafunika kuphatisira midida ya Bhibhlya. Mulungu wathu waudziwisi atipasa midida ineyi thangwi iye asatifuna. Ndi thangwi yace Akristu akuti ali na uxamwali wakuwanga na Yahova asasankhula kukhonda kukhala na mpfuti toera kutsidzikizika kuna anthu anango. Iwo asadziwa kuti anganyindira Mulungu na kutowezera midida ya Bhibhlya mu umaso wawo, anadzakhala na citsidzikizo candimomwene kwenda na kwenda.—Masalmo 97:10; Misangani 1:33; 2:6, 7.