KHUNDU WACINAI
Kupasika Mulando—‘Ndiceneseni M’madawo Anga’
“Basa yanga ipswa yathimizira ntundu wa umaso wa banja yathu, mbwenye yanditsogolera ku ntundu onsene wa mabasa akukhonda thema. Ndatoma kukumbuka mafiriyadu, kugumanika m’misonkhano ya ndale, ngakhale kuenda ku gereja. Ndikhadasiya kutumikira Yahova mu pyaka 40. Mukhapita pyaka pizinji, ndikhabvambo ninga Yahova nee mbadakwanisa kundilekerera. Ndikhanyerezera kuti nee mbindakwanisa kulekerereka ndekhene. Kusiyapo pyenepi, ine ndikhadadziwa undimomwene mbandidzati kugwa munjira yakuipa.”—Martha.
KUPASIKA mulando kwalandana na ntolo wakulemera. Mambo Dhavidhi alemba: “Pyakuipa pyanga pyakula kupiringana nsolo wanga, mbapindibzwanda ninga mitolo yakulemera maningi.” (Masalmo 38:4) Akristu anango asalemerwa kakamwe na kutsukwala, mbanyerezera kuti Yahova cipo anaalekerera. (2 Akorinto 2:7) Kodi maonero anewa ndi akuthema? Ngakhale kuti mwacita madawo makulu, kodi pisabveka kuti Yahova akutayani kutali, peno kuti nkhabebve kukulekererani? Mwandimomwene nkhabe!
‘Bwerani Tigwande Milando’
Yahova nkhabe kusiya anyakudawa akutcinyuka. Mwandimomwene, iye asafuna kuaphedza. Mu nsangani wa mwana wakutsumbikika, Yezu alandanisa Yahova na baba waufuni wakuti mwanace abuluka panyumba mbatowerera umaso wakuipa. Mukupita kwa ndzidzi, mwana unoyu atonga kubwerera kunyumba kwawo. ‘Mwana mbaciri kutali, babace amuona, anthamangira, ankhumbatira mbampswompswona.’ (Luka 15:11-20) Kodi musafuna kufendedzera Yahova, mbwenye musabva ninga ‘muciri kutali’ na iye? Ninga baba wa mu nsangani wa Yezu, Yahova asakubverani ntsisi. Iye asafuna kakamwe kukutambirani mungabwerera.
Mbwenye ndiye tani khala musanyerezera kuti madawo anu ndi makulu kakamwe peno ndi mazinji akuti Yahova nkhabe kualekerera? Taphata miyendo, dingani ncemerero wa Yahova udalembwa pa Izaiya 1:18: ‘Bwerani tigwande milando, alonga Yahova. Maseze madawo anu ndi akufuwira ninga eskarlate, mbwenye ine ndinakutsukani mbandikucenesani ninga mwezi.’ Inde, ngakhale kuti madawo asaoneka ninga nthombvu yakukhonda fudzika pa nguwo yakucena, Yahova anakwanisa kukulekererani.
Yahova nee asafuna kuti mupitirize kuthabuka na cikumbuntima cakupasika mulando. Mphapo munakwanisa tani kukhala na ntendere unaoneka thangwi ya kulekererwa na Mulungu pabodzi na cikumbuntima cakucena? Dingani pinthu piwiri pidacita Mambo Dhavidhi. Pakutoma iye alonga: ‘Ndinabweka madawo anga kuna Yahova.’ (Masalmo 32:5) Kumbukani, Yahova asakuphembani toera mufendedzere kuna iye kubulukira mu phembero na “kugwanda milando” na iye. Tawirani ncemerero unoyu. Longani madawo anu kuna Yahova. Mpangeni mabvero anu. Mwakubverana na pidatamba iye, Dhavidhi akwanisa kuphembera na cinyindiro: ‘Ndiceneseni m’madawo anga. . . . Ntima wakutcinyuka na wakucepeseka munaupwaza tayu.’—Masalmo 51:2, 17.
Caciwiri, Dhavidhi atambira ciphedzo ca muimiriri wa Mulungu, mprofeta Natane. (2 Samwele 12:13) Lero, Yahova asakhazikisa akulu a mpingo akuti asapfundziswa toera kuphedza anyakudawa akutcinyuka kuti akhale pontho na uxamwali na Yahova. Mungafendedzera akulu a mpingo, iwo anaphatisira Malemba na kucita phembero yakubulukira muntima toera kukhurudza ntima wanu, kupungula peno kumalisa mabvero akuphonyeka, na kukuphedzani toera kuwanga mwauzimu.—Tyago 5:14-16.
Yahova asafuna kuti mululupirwe kubulukira mu kukhala na cikumbuntima cakucena
‘Nyakutsandzaya Ndi Ule Adalekererwa Madawo Ace’
Mbwenye panango munaona kuti kulonga madawo anu kuna Yahova Mulungu na kufendedzera akulu a mpingo, ndi cibodzi mwa pinthu pyakunentsa kakamwe kwa imwe. Panango Dhavidhi akhalimbo na maonero mabodzi ene. Iye ‘apitiriza kukhala cete’ mu ndzidzi ungasi nee kulonga madawo ace. (Masalmo 32:3) Mbwenye mukupita kwa ndzidzi iye apereka takhuta thangwi ya maphindu akulonga madawo ace na kusasanyira makhaliro ace.
Phindu ikulu kakamwe ndi yakuti Dhavidhi awina pontho kutsandzaya kwace. Iye alemba: ‘Nyakutsandzaya ndi ule adalekererwa madawo ace.’ (Masalmo 32:1) Iye aphemberambo: ‘Yahova, fungulani mulomo wanga toera ndibvekese mbiri yanu.’ (Masalmo 51:15) Pidamala iye kulekererwa na Mulungu mbakhonda kupasika pontho mulando, Dhavidhi akulumizika toera kulonga na anango pya Yahova.
Yahova asafuna kuti mululupirwe kubulukira mu kukhala na cikumbuntima cakucena. Iye asafuna kuti mudziwise anango pya iye na cifuniro cace. Iye nee asafuna kuti mucite pyenepi na mabvero akupasika mulando, mbwenye na ntima wadidi pontho mwakukomerwa. (Masalmo 65:1-4) Kumbukani ncemerero wace: ‘Toera kulekerera madawo anu, toerambo Yahova akupaseni ntsiku zakubalangazwa.’—Machitiro 3:19, 20.
Ndi pyenepi pidacitika kuna Martha. Iye alonga: “Mwananga apitiriza kunditumizira marevista a Ncenjezi na Despertai!. Mwapang’ono pang’ono ndatoma kudziwana pontho na Yahova. Khundu yakunentsa kakamwe yakubwerera kwanga ikhali kuphemba kulekererwa madawo onsene adacita ine. Mbwenye pakumalisa, ndafendedzera Mulungu mu phembero mbandimphemba toera andilekerere. Mphyakunentsa kutawira kuti ndamala pyaka 40 mbandizati kubwerera kuna Yahova. Cakugumana naco canga cisapangiza kuti maseze munthu amale pyaka pizinji, iye anakwanisa kukhala na mwai unango toera kutumikira Mulungu, mbafuniwa pontho na iye.”