‘Koya Mwadidi Pinthu Pidapaswa Iwe’

1-2. Mwakubverana na 1 Timoti 6:20, ndi basa ipi ikhadapaswa Timoti?

KAZINJI KENE ife tisapasa anthu anango pinthu pyathu pyakufunika toera apikoye. Mwacitsandzo, panango ife tisakoyesa kobiri yathu ku bhanku. Tingacita pyenepi tisanyindira kuti kobiri yathu inakoyiwa mwadidi, pontho nee inatayika peno kubiwa. Natenepa, ife takwanisa kubvesesa kuti pisabvekanji kukoyesa cinthu cathu cakufunika kakamwe kuna munthu unango.

² Lerini 1 Timoti 6:20. Mpostolo Paulu akumbusa Timoti kuti iye atambira pinthu pyakufunika kakamwe pyakuti ndi udziwisi wandimomwene wa pinthu pinafuna kucita Mulungu kuna anthu. Timoti akhadapaswambo basa ‘yakumwaza mafala’ peno ‘kumwaza mphangwa zadidi.’ (2 Tim. 4:2, 5) Paulu apanga Timoti toera akoye pinthu pidapaswa iye. Ninga Timoti, Yahova atipasa pinthu pyakufunika kakamwe toera tipikoye. Ndi pinthu pipi? Thangwi yanji tisafunika kukoya pinthu pyenepi pyakufunika pidatipasa Yahova?

3-4. Ndi mathangwi api anango anacitisa kuti undimomwene unagumanika m’Bhibhlya ukhale wakufunika kakamwe?

³ Mwakukoma ntima, Yahova atipasa undimomwene unagumanika m’Mafalace, Bhibhlya. Undimomwene unoyu ndi wakufunika kakamwe thangwi usatiphedza toera kukhala na uxamwali wakuwanga na Yahova, pontho usapangiza kuti tinakhala tani akutsandzaya. Tingatawira kuphatisira undimomwene unoyu, iwo unatiphedza toera kucalira pipfundziso pya uthambi, na pinthu pya ulukwali.—1 Akor. 6:9-11.

⁴ Thangwi inango inacitisa kuti undimomwene unagumanika m’Bhibhlya ukhale wakufunika kakamwe, ndi yakuti Yahova asaupangiza basi ene kuna anthu akucepeseka akuti ‘mitima yawo isafuna kutawira undimomwene.’ (Mabasa 13:48) Anthu anewa akucepeseka asatawira kuti Yahova asaphatisira m’bandazi wakukhulupirika na wandzeru toera kutipfundzisa undimomwene unoyu. (Mat. 11:25; 24:45) Mbwenye toera kupfundza undimomwene unoyu, tisafunika ciphedzo, pontho ndi pyakufunika kakamwe kubvesesa undimomwene unoyu.—Mis. 3:13, 15.

 5. Ndi basa ipi inango idatipasa Yahova?

⁵ Yahova atipasambo basa toera tipfundzise anango thangwi ya iye na pinthu pinafuna iye. (Mat. 24:14) Mphangwa za Yahova zinamwaza ife ndi zakufunika kakamwe thangwi zisaphedza anthu toera akhale atumiki a Yahova mbakhala na cidikhiro ca kutambira umaso wakukhonda mala. (1 Tim. 4:16) Mwakukhonda tsalakana khala tisamwaza mphangwa kakamwe peno nkhabe, ife tonsene tisaphedzera basa ineyi yakufunika kakamwe inacitwa lero. (1 Tim. 2:3, 4) Mwakukhonda penula, ndi mwai ukulu kakamwe kuphata basa pabodzi na Mulungu.—1 Akor. 3:9.

 6. Thangwi yanji Akristu anango asiya kutumikira Yahova?

⁶ Mu ntsiku za Timoti, Akristu anango asiya kutumikira Mulungu. Mwacitsandzo, Dhema akhafuna kakamwe pinthu pya dziko, na thangwi ineyi asiya kuphata basa pabodzi na Paulu. (2 Tim. 4:10) Fijelo na Ermojene asiya basa yawo yakumwaza mphangwa thangwi akhagopa kutcingwa ninga pikhacitwa Paulu. (2 Tim. 1:15) Imeneu, Alexandre na Fileto asiya kutumikira Yahova mbatoma kupfundzisa pinthu pya uthambi. (1 Tim. 1:19, 20; 2 Tim. 2:16-18) Pakutoma anthu anewa akhali akuwanga mwauzimu, mbwenye mukupita kwa ndzidzi iwo atoma kupwaza mwai unoyu wakutumikira Yahova.

 7. Ndi pinthu pipi pisaphatisira Sathani toera kuticitisa kusiya kutumikira Yahova?

⁷ Sathani asafuna kuti ife tisiye kutumikira Yahova. Kodi iye asacita tani pyenepi? Iye asaphatisira televizau, mafilme, interneti, majornali, na mabukhu. Toera kufewesa uxamwali wathu na Yahova peno toera tikhonde kubvera mitemo yace. Iye asaphatisira andzathu a kuxikola peno a kubasa toera atitcinge kuti tisiye kumwaza mphangwa. Kusiyapo pyenepi, Sathani asaphatisira manyerezero apezi akuti mwauthambi anthu asaacemera cidziwiso toera aticitise kusiya undimomwene.—1 Tim. 6:20, 21.

 8. Mwapfundzanji na pinthu pidacitika kuna m’bale Dhanyeli?

⁸ Tingakhonda kucita mphole-mphole, mwapang’ono-pang’ono tinasiya undimomwene. Mwacitsandzo, onani pidacitikira Dhanyelib wakuti akhakomerwa kakamwe na mavidhyu gemi. Iye alonga: “Ine ndatoma kusendzeka na mavidhyu gemi pikhali ine na pyaka 10. Pakutoma, ine ndikhasendzeka na mavidhyu gemi akuti nee akhali akuipa. Mbwenye mwapang’ono-pang’ono ine ndatoma kusendzeka na mavidhyu gemi anapangiza pya uphanga na pya mizimu.” Pontho iye akhasendzeka na mavidhyu gemi anewa cifupi na maora 15 pa ntsiku. Dhanyeli athimiza: “Ine ndikhapidziwa mu ntima mwanga kuti maora akhabvunga ine na ntundu wa mavidhyu akhaona ine mbapidafewesa uxamwali wanga na Yahova. Mbwenye ndatoma kunyerezera kuti nee ndisafunikabve kubvera pinalonga Bhibhlya.” Natenepa, tingakhonda kucita mphole-mphole na mavidhyu gemi, mafilme, televizau na tnterneti, mwapang’ono-pang’ono tinafewa mwauzimu mbatisiya undimomwene.

 9. Mwakubverana na 1 Timoti 1:18, 19, kodi Paulu alandanisa Timoti na ani?

⁹ Lerini 1 Timoti 1:18, 19. Paulu alandanisa Timoti na nyankhondo, pontho ankulumiza toera apitirize “kumenya nkhondo yadidi.” Paulu nee akhalonga pya nkhondo zinacita anthu, mbwenye akhalonga pya nkhondo yauzimu. Ndi munjira ipi Akristu ali ninga anyankhondo? Ninga anyankhondo a Kristu ndi makhaliro api asafunika ife kukulisa? Tendeni tione pinthu pixanu pinafuna ife kupfundza kubulukira mu citsandzo ca Paulu. Pontho pinthu pyenepi pinatiphedza toera kukoya undimomwene.

10. Kodi kuperekeka kuna Mulungu ninji, pontho thangwi yanji tisafunika kucita pyenepi?

¹⁰ Khalani akuperekeka kuna Mulungu. Nyankhondo wadidi ndi wakukhulupirika. Iye asamenya nkhondo mwakuwanga toera kutsidzikiza munthu anafuna iye peno pinthu pyakufunika kuna iye. Paulu akulumiza Timoti toera akhale wakuperekeka kuna Mulungu peno toera akhale na uxamwali wakuwanga na iye. (1 Tim. 4:7) Tingafuna kakamwe Mulungu pinatiphedza toera tikhonde kusiya undimomwene.—1 Tim. 4:8-10; 6:6.

11. Thangwi yanji tisafunika kukhala akudzitonga?

¹¹ Khalani akudzitonga. Nyankhondo asafunika kuwangisira kakamwe toera ndzidzi onsene akhale wakukhunganyika toera kumenya nkhondo. Timoti apitiriza kukhala wakuwanga mwauzimu thangwi akhabvera uphungu wa Paulu. Kusiyapo pyenepi, iye akhawangisira kakamwe toera kukhala na makhaliro adidi, kucedza na Akristu andzace, pontho akhacalira pinthu pyakuipa. (2 Tim. 2:22) Toera munthu akwanise kucita pyenepi asafunika kukhala wakudzitonga. Ife tisafunika kukhala akudzitonga toera ticalire pifuno pyakuipa. (Aroma 7:21-25) Pontho tisafunika kukhala akudzitonga toera tikwanise kudula uunthu wakale mbatibvala uunthu upswa. (Aef. 4:22, 24) Tisafunikambo kukhala akudzitonga toera tikhonde kudjomba misonkhano thangwi ya kuneta na mabasa anacita ife.—Aheb. 10:24, 25.

12. Tinakwanisa tani kuphatisira mwadidi Bhibhlya?

¹² Nyankhondo asafunika kupfundza kuphatisira mwadidi pida pyace pya nkhondo. Khala iye asafuna kuphatisira mwadidi pida pyace pya nkhondo, ndzidzi onsene iye asafunika kupfundza. Munjira ibodzi ene, ife tisafunikambo kupfundza toera kuphatisira mwadidi Mafala a Mulungu. (2 Tim. 2:15) Njira zinango zakuphatisira mwadidi Mafala a Mulungu tisazipfundza pa misonkhano. Mbwenye khala tisafuna kuphedza anango toera akhulupire undimomwene unagumanika m’Bhibhlya, ife tisafunika kupfundza Bhibhlya ndzidzi onsene. Tisafunikambo kuphatisira Mafala a Mulungu toera tiwangise cikhulupiro cathu. Pyenepi pisaphataniza kucita pinthu pizinji, tayu basi kuleri Bhibhlya. Ife tisafunika kunyerezera mwadidi pinaleri ife, pontho tisafunika kufufudza m’mabukhu athu toera tikwanise kubvesesa mwadidi Malemba na kuaphatisira. (1 Tim. 4:13-15) Tingacita pyenepi, tinakhala akukhunganyika toera kupfundzisa anango Mafala a Mulungu. Pontho kupfundzisa anango kusaphataniza pizinji kupiringana basi ene kuleri vesi ya Bhibhlya. Ife tisafunika kuphedza anthu toera abvesese vesi idaleri ife na kuona kuti anaiphatisira tani. Natenepa, tingapfundza Bhibhlya ndzidzi onsene, tinakwanisa kukhala apfundzisi adidi a Mafala a Mulungu.—2 Tim. 3:16, 17.

13. Mwakubverana na Ahebheri 5:14, thangwi yanji tisafunika kukhala na luso yakudzindikira?

¹³ Khalani na luso yakudzindikira. Nyankhondo asafunika kukhala na luso yakudzindikira pinthu pyakuipa mbapicalira. Ife tisafunikambo kukhala na luso yakudzindikira pinthu pyakuipa pinafuna kuticitikira mbatipicalira. (Mis. 22:3; lerini Ahebheri 5:14.) Mwacitsandzo, ife tisafunika kusankhula mwadidi marekreyasau anacita ife, mafilme na maprogramu a televizau. Thangwi kazinji kene maprogramu a televizau na mafilme asapangiza pinthu pya ulukwali. Yahova asaida pinthu pyenepi, pontho mwapang’ono-pang’ono pinakwanisa kufudza uxamwali wathu na iye. Natenepa, tisafunika kucalira kuona mafilme na maprogramu a televizau anapangiza pinthu pyakuti mwapang’ono-pang’ono pinafudza uxamwali wathu na Mulungu.—Aef. 5:5, 6.

14. Kodi luso yakudzindikira yaphedza tani Dhanyeli?

¹⁴ Dhanyeli adalongwa pakutoma, adzindikira kuti kusendzeka na mavidhyu gemi anapangiza pya uphanga, na pya mizimu ndi pyakuipa. Natenepa, iye afufudza mu Watchtower Library mphangwa zakuti mbizidamphedza toera kusiya nsambo wace. Ndi nkhombo zipi zidakhala na iye? Iye asiya kusendzeka na mavidhyu gemi anapangiza pinthu pyakuipa. Iye afudza mavidhyu gemi, pontho asiya kucita uxamwali na ale akhasendzeka na iye m’mavidhyu gemi. Dhanyeli alonga: “Mbuto mwakusendzeka na mavidhyu gemi, ine ndatoma kucita mabasa anango pabodzi na abale a mu mpingo.” Cincino Dhanyeli asatumikira ninga mpainiya, pontho ndi nkulu wa mpingo.

15. Thangwi yanji mphangwa zauthambi ndi zakugopswa?

¹⁵ Ninga Timoti, ife tisafunikambo kudzindikira mphangwa zauthambi zinamwazwa na Akristu akupanduka. (1 Tim. 4:1, 7; 2 Tim. 2:16) Mwacitsandzo, panango iwo anamwaza mphangwa zauthambi thangwi ya abale athu, peno anaticitisa kupenula gulu ya Yahova. Mphangwa zenezi zauthambi zinakwanisa kufewesa cikhulupiro cathu. Ife tisafunika kucita mphole-mphole toera tikhonde kunyengezwa na mphangwa zenezi zauthambi. Thangwi yanji? Thangwi mphangwa zenezi zisamwazwa na “anthu a manyerezero akuipa akuti nkhabe kubvesesa undimomwene.” Pontho cifuno cawo ndi kutomesa “mphoka na kuketesana.” (1 Tim. 6:4, 5) Kusiyapo pyenepi, iwo asafuna kuti tikhulupire uthambi wawo mbatisiya kukhulupira abale athu.

16. Ndi pinthu pipi pyakuti pinakwanisa kutidzudzumisa?

¹⁶ Calirani kudzudzumiswa. Ninga “nyankhondo wadidi wa Kristu Yezu,” Timoti akhaikha manyerezero ace m’basa yakumwaza mphangwa, m’mbuto mwa kudzudzumiswa na pinthu pya mpfuma peno pinthu pinango. (2 Tim. 2:3, 4) Ninga Timoti, ife nee tisafunika kudzudzumiswa na pinthu pya mpfuma. ‘Mphambvu yakunyengeza ya mpfuma’ inakwanisa kufewesa ufuni wathu kuna Yahova, pontho inaticimwanisa kulemedza Mafala a Mulungu na kumwaza mphangwa zadidi kuna anango. (Mat. 13:22) Natenepa, ife tisafunika kukhala na umaso wakukhonda funa pinthu pizinji, pontho tisafunika kuphatisira ndzidzi wathu na mphambvu zathu toera ‘kuikha Umambo wa Mulungu pa mbuto yakutoma.’—Mat. 6:22-25, 33.

17-18. Tisafunika kucitanji toera titsidzikize uxamwali wathu na Yahova?

¹⁷ Khalani akukhunganyika toera kucita pinthu mwakucimbiza. Nyankhondo asafunika kucita masasanyiro mwanyapantsi toera atsidzikizike. Khala ife tisafuna kutsidzikiza pinthu pidatipasa Yahova, tisafunika kucita pinthu mwakucimbiza tingaona pinthu pyakuipa. Ninji pinafuna kutiphedza toera kucita pinthu mwakucimbiza? Tisafunika kukhala akukhunganyika.

¹⁸ Mwacitsandzo, m’misonkhano inango anthu asadziwiswa mwanyapantsi mbuto zinafuna kubuluka na iwo misonkhano mbidzati kutoma. Thangwi yanji? Toera iwo akwanise kubuluka mwakucimbiza pangaoneka cidengwa. Munjira ibodzi ene, ife tinakwanisa kukhunganyika mwanyapantsi toera kucita pinthu mwakucimbiza tingaona pinthu pyakuipa ninga pyaulukwali, uphanga, mphangwa zauthambi zinamwaza Akristu akupanduka mu ndzidzi unaphatisira ife interneti peno mu ndzidzi unaona ife mafilme na maprogramu a televizau. Tingakhunganyika mwanyapantsi, tinakwanisa kucalira pinthu pyakuipa mwakucimbiza mbatitsidzikiza uxamwali wathu na Yahova.—Masal. 101:3; 1 Tim. 4:12.

19. Ndi nkhombo zipi zinafuna kukhala na ife tingakoya pinthu pidatipasa Yahova?

¹⁹ Ife tisafunika kukoya pinthu pidatipasa Yahova pyakuti ndi undimomwene unagumanika m’Bhibhlya na basa yakumwaza mphangwa. Tingacita pyenepi, tinakhala na cikumbuntima cakucena, pontho tinakhala akutsandzaya thangwi ya kuphedza anango kudziwa Yahova. Mwakukhonda penula, na ciphedzo ca Yahova ife tinakwanisa kukoya pinthu pidatipasa iye.—1 Tim. 6:12, 19.