Akulu A Mpingo Na Atumiki Akutumikira Towezerani Timoti

CAKA cidamala, abale azinji pa dziko yonsene yapantsi akhazikiswa ninga akulu a mpingo na atumiki akutumikira. Khala ndimwe m’bodzi wa iwo, mwakukhonda penula muli wakutsandzaya kutumikira Yahova na abale anu.

Mbwenye mphyacibaliro kukhala wakupswipa ntima. Jason, nkulu wa mpingo wam’phale, alonga: “Pidakhazikiswa ine, ndadzudzumika kakamwe.” Mose na Yeremiya pidapaswa iwo basa ipswa na Yahova akhapibva kuti nee athema. (Eksodo 4:10; Yeremiya 1:6) Khala musapibva munjira ibodzi ene, munacitanji toera mukhale na cinyindiro mbamupitiriza kuthambaruka? Munapfundza pizinji kubulukira mu citsandzo ca Timoti.—Machitiro 16:1-3.

Timoti panango akhali na pyaka 20 pyakubalwa pidatoma iye kufamba pabodzi na Paulu. Mudatambira iye kwene ncemerero unoyu, Timoti panango akhapibva kuti nee akhadathema kupfundzisa na kupasa anango uphungu thangwi iye akhali m’phale kakamwe. (1 Timoti 4:11, 12; 2 Timoti 1:1, 2, 7) Mbwenye iye apitiriza kuthambaruka, pontho pidapita pyaka khumi, Paulu alonga kuna Afilipi: ‘Ndisadikhira mwa Mbuya Yezu kuti ndinakutumizirani Timoti mwakukhonda dembuka.’ Thangwi yanji Paulu akhali na mabvero anewa? Iye afokotoza: ‘Ine nkhabebve munthu unango ali na manyerezero ninga ace, wakuti anadzakutsalakanani mwadidi.’—Afilipi 2:19, 20.

Thangwi yanji Timoti ndi citsandzo cadidi kakamwe kuna akulu a mpingo? Onani mathangwi matanthatu.

1. Iye akhatsalakana anango na ntima onsene. Paulu apanga abale a ku Filipi kuti Timoti ‘mbadaatsalakana mwadidi.’ (Afilipi 2:20) Timoti akhafuna kuti abale akhale na uxamwali wakuwanga na Yahova, pontho akhali dzololo kuphatisira ndzidzi na mphambvu zace toera kuaphedza.

William, anatumikira ninga nkulu wa mpingo mu pyaka 20, ndzidzi onsene asapanga abale anakhazikiswa kwene ninga akulu a mpingo: “Funani abale. Tsalakanani pinafuna iwo, tayu basi kunyerezera pitsogolero.” Calirani kukhala ninga nyakutekenya motokala wakuti basi ene asafuna kufika pa paraji pa ndzidzi wakuthema, m’mbuto mwakunyerezera kukwata anthu.

2. Iye akhaikha basa ya Yahova pa mbuto yakutoma. Paulu alonga kuti Timoti akhali wakusiyana na anango akuti ‘akhasaka pinafuna iwo basi, tayu pinafuna Yezu Kristu.’ (Afilipi 2:21) Paulu aona kuti abale azinji akhatsalakana kakamwe pya umaso wawo. Midzidzi inango iwo akhaikha pifuno pyawo pa mbuto yakutoma, tayu basa ya Yahova. Mbwenye Timoti nkhabe! Ndzidzi onsene ukhali iye na mwai m’basa ya Mulungu, iye akhatawira ninga Izaiya: ‘Ndiri pano! Nditumeni!’—Izaiya 6:8.

Ninji cinafuna kukuphedzani toera kukhala na maonero akulinganira mu ndzidzi unatsalakana imwe pyakufuna pyanu na pyakufuna pya mpingo? Cakutoma, bverani uphungu wa Paulu: ‘Dzindikirani kuti ndi pinthu pipi pyakufunika kakamwe.’ (Afilipi 1:10) Ikhani basa ya Yahova pa mbuto yakutoma. Caciwiri, calirani mabasa akuti anakubvungirani ndzidzi uzinji na mphambvu. Paulu apanga Timoti: ‘Thawa pifuno pya mu ndzidzi wa uphale, mbwenye pitiriza kusaka ulungami, cikhulupiro, ufuni na ntendere.’—2 Timoti 2:22.

3. Iye aphata basa mwaphinga m’basa ya Yahova. Paulu alonga thangwi ya Timoti: ‘Ninga mwana anaphata basa na babace, iye atumikira ninga bitcu pabodzi na ine toera kuendesa kutsogolo mphangwa zadidi.’ (Afilipi 2:22) Timoti nee akhali wakupolola. Iye aphata basa mwaphinga pabodzi na Paulu, pyenepi pyawangisa kakamwe uxamwali wawo.

Lero pana basa izinji toera kucita mu gulu ya Yahova. Basa ineyi ndi yakutsandzayisa kakamwe, pontho inakuphedzani toera kukhala akuphatana na abale na alongo. Natenepa ‘citani pizinji m’basa ya Mbuya.’—1 Akorinto 15:58.

4. Iye akhaphatisira pikhapfundza iye. Paulu alembera Timoti: ‘Iwe watoweza mwadidi pipfundziso pyanga, makhaliro a umaso wanga, pifuniro pyanga, cikhulupiro canga, kukhurudzika kwanga, ufuni wanga, kupirira kwanga.’ (2 Timoti 3:10) Timoti akhaphatisira pikhapfundza iye, natenepa atambira mabasa mazinji.—1 Akorinto 4:17.

Musaona tani kusaka nkulu wa mpingo m’bodzi wakuti munakwanisa kutowezera citsandzo cace? Tom, anatumikira ninga nkulu wa mpingo m’pyaka pizinji asakumbuka nkulu wa mpingo m’bodzi adam’phedza toera kukhala na maluso mazinji. Iye alonga: “Kazinji kene ndisaphemba uphungu kuna iye mbandiuphatisira. Pyenepi pisandiphedza toera kukhala na cinyindiro.”

5. Iye akhawangisira toera kukhala waluso. Paulu apanga Timoti: ‘Khala na cifuno cakucita pinthu pyakuti pinakuphedza toera kukhala wakuperekeka kuna Mulungu.’ (1 Timoti 4:7) Maseze nyakuthamanga ali na mpfundzisi, iye asafunika kuwangisira toera akhale na maluso. Paulu akulumiza Timoti: ‘Pitiriza kukhala waphinga pakuleri kwako pamaso pa anthu, pakucenjeza na pakupfundzisa. Nyerezera mwadidi pinthu pyenepi; ikha manyerezero ako onsene mu pinthu pyenepi, toera kuthambaruka kwako kuoneke pakweca kuna anthu onsene.’—1 Timoti 4:13-15.

Imwembo musafunika kupitiriza kuthimizira maluso anu. Khalani nyakupfundza Bhibhlya waphinga mbamudziwa ndzidzi onsene pitsogolero pipswa pinabuluka mu gulu. Lekani kudzinyindira. Pinakhala pyakudawika kunyerezera kuti ndimwe waluso kakamwe kwakuti munakwanisa kutsalakana pinthu mbamudzati kufufudza. Ninga Timoti, ‘citani mphole-mphole thangwi ya imwe, pontho thangwi ya njira inapfundzisa imwe.’—1 Timoti 4:16.

6. Iye akhanyindira nzimu wa Yahova. Thangwi ya utumiki wa Timoti, Paulu ankumbusa: ‘Na ciphedzo ca nzimu wakucena uli muna ife, koya mwadidi pinthu pyenepi pyakufunika kakamwe pidatambira iwe.’ (2 Timoti 1:14) Timoti akhafunika kunyindira nzimu wakucena wa Mulungu.

Donald, anatumikira ninga nkulu wa mpingo m’pyaka pizinji, alonga: ‘Amuna adakhazikiswa asafunika kulemedza uxamwali wawo na Mulungu. Ale anacita pyenepi anadzakhala akuwanga kakamwe.’ Angaphemba ciphedzo ca nzimu wakucena wa Mulungu mbakulisa misapo ya nzimu wakucena, iwo anadzakhala nkhombo ikulu kakamwe kuna abale awo.—Masalmo 84:7; 1 Pedro 4:11.

Mphyakuwangisa kakamwe kuona atumiki akutumikira na akulu a mpingo ninga imwe, anapitiriza kuthambaruka m’basa ya Yahova. Jason, adalongwa pakutoma, alonga: “Kutomera ndzidzi udakhazikiswa ine ninga nkulu wa mpingo, ndapfundza pizinji, pontho cinyindiro canga cathimizirika. Cincino ndisakomerwa kakamwe na basa yanga, pontho ndisaiona ninga mwai ukulu kakamwe!”

Kodi imwe munapitiriza kuthambaruka? Mungatowezera citsandzo ca Timoti, munakhalambo nkhombo kuna abale na alongo anu.