Tisapereka Takhuta Thangwi ya Udidi Wakukhonda Kutithema wa Mulungu

1, 2. (a) Fokotozani nsangani wa Yezu unalonga pya mwanaciro munda wa mauva. (b) Kodi nsangani unoyu usapangiza tani makhaliro akupasa mwakudzala manja na udidi wakukhonda kutithema?

NTSIKU inango namacibese mwanaciro munda wa mauva aenda ku nsika toera kusaka anyabasa. Iye abverana nawo ntengo wa kobiri ikhafuna iye kuapasa pakumala kuphata basa, anyabasa atawira. Nakuti mwanaciro munda akhafuna anyabasa azinji, iye aenda pontho ku nsika mwakubwereza-bwereza toera kusaka anyabasa anango. Iye aperekeka toera kupasa anyabasa onsene ntengo wakuthema wa kobiri. Pakumala kwa ntsiku, mwanaciro munda acemera anyabasa onsene toera kualipa. Mwakukhonda tsalakana khala nyabasa aphata basa ntsiku yonsene peno ndzidzi ubodzi basi, mwanaciro munda aapasa ntengo ubodzi ene wa kobiri. Mbwenye anyabasa adaphata ntsiku yonsene pidatoma iwo kudungunya, mwanaciro munda alonga: ‘Kodi nee mwatawira kutambira ntengo wa kobiri idalonga ine? Kodi nee ndiri na ufulu wakulipa anyabasa onsene ninga munafuna ine? Mwaipirwa thangwi yakukhala kwanga munthu wadidi?’​—Mateo 20:1-15.

² Nsangani wa Yezu usatipfundzisa ntsonga yakufunika kakamwe thangwi ya ‘udidi wakukhonda kutithema wa Yahova.’^[1] (Onani cidzindikiro kunkhomo kwa nsolo uno.) (Lerini 2 Akorinto 6:1.) Munjira ipi? Anango ananyerezera kuti anyabasa adaphata basa ntsiku yonsene athema kupaswa kobiri izinji kupiringana anango. Mbwenye mwanaciro munda apangiza udidi wakupambulika kuna amuna adaphata basa ndzidzi wakucepa pa ntsiku ineyi. Nyakudziwisa pya Bhibhlya unango alonga tenepa thangwi ya ‘udidi wakukhonda thema’ unalongwa m’Bhibhlya: ‘Mafala anewa asabveka muoni wakukhonda lipa na wa ntengo ukulu unapaswa munthu mwakukhonda kuuphatira basa.’

3, 4. Thangwi yanji Yahova apangiza kwa anthu onsene udidi wakukhonda kuathema, mphapo acita tani pyenepi?

³ Bhibhlya isatipanga kuti udidi wakukhonda kutithema wa Mulungu ndi ‘muoni wakukhonda lipa.’ (Aefesi 3:7) Nakuti nee tisakwanisa kubvera Yahova mwakukwana, nee tathema kutambira kukoma ntima kwa Mulungu. Mwandimomwene, ife tathema kufa. Mambo Salomoni alonga: ‘Pantsi pano nkhabepo munthu wakulungama anacita pyadidi ndzidzi onsene mbakhonda kudawa.’ (Koelete 7:20) Mpostolo Paulu alongambo: ‘Anthu onsene asadawa mbacimwana kuona mbiri ya Mulungu,’ pontho ‘madawo asabweresa kufa.’​—Aroma 3:23; 6:23a.

⁴ Nakuti Yahova asafuna kakamwe anthu, iye atuma ‘Mwanace m’bodzi ekha’ toera kutifera. Ceneci ndi cipangizo cikulu kakamwe ca udidi wakukhonda kutithema. (Jwau 3:16) Paulu alonga kuti Yezu ‘abvazikwa nthimba ya mbiri na ulemerero thangwi apirira mpaka kufa, toera na udidi wakukhonda kutithema wa Mulungu iye afere anthu onsene.’ (Ahebere 2:9) Inde, ‘muoni unapasa Mulungu ndi umaso wakukhonda mala kubulukira mwa Mbuyathu Yezu Kristu.’​—Aroma 6:23b.

5, 6. (a) Ninji pinacitika tingatongwa na madawo? (b) Ninji pinacitika tingatongwa na udidi wakukhonda kutithema wa Mulungu?

⁵ Thangwi yanji tisadawa mbatifa? Bhibhlya isalonga kuti ‘thangwi ya munthu m’bodzi basi, madawo asatonga ninga mambo.’ Nakuti ndife dzindza ya Adhamu, ndife anthu akusowa ungwiro, natenepa tisafa. (Aroma 5:12, 14, 17) Mbwenye tinakwanisa kusankhula kukhonda kutongwa na madawo. Munjira ipi? Tingakhulupira ntsembe ya ciomboli ca Kristu, tisaphindula na udidi wakukhonda kutithema wa Yahova. Bhibhlya isalonga: ‘Pidathimizirika madawo, udidi wakukhonda kutithema wa Mulungu wathimizirikambo kakamwe. Toera kucitanji? Nakuti madawo asatonga ninga mambo mbabweresa kufa, udidi wakukhonda kutithema wa Mulungu usatongambo ninga mambo mbubweresa umaso wakukhonda mala kubulukira mwa Mbuyathu Yezu Kristu.’​—Aroma 5:20, 21.

⁶ Maseze ndife anyakudawa mpaka lero, ife nkhabe funa kuti madawo apitirize kutitonga. Natenepa, tingacita cinthu cakuipa, tisaphemba Yahova toera atilekerere. Paulu aticenjeza: ‘Mwa imwe madawo akhonde kukutongani, thangwi nee muli pantsi pa mwambo, mbwenye muli pantsi pa udidi wakukhonda kutithema.’ (Aroma 6:14) Mphapo tinaphindula tani na udidi wakukhonda kutithema wa Mulungu? Paulu alonga: “Udidi wakukhonda kutithema wa Mulungu usatipfundzisa kukhonda uipi na pifuno pya dziko toera tikhale maso na ndzeru zaulungami na kuperekeka kuna Mulungu m’makhaliro ano a pinthu.”​—Tito 2:11, 12, NM.

7, 8. Ndi munjira zipi udidi wakukhonda kutithema wa Yahova ‘usapangizwa munjira zakusiyana-siyana’? (Onani cithundzithundzi cakutoma.)

⁷ Mpostolo Pedhru alemba: ‘M’bodzi na m’bodzi adatambira muoni, mbauphatisire toera kutumikira anango ninga ntumiki wa udidi wakukhonda kutithema wa Mulungu unapangizwa munjira zakusiyana-siyana.’ (1 Pedro 4:10) Kodi pyenepi pisabvekanji? Pisabveka kuti mwakukhonda tsalakana nyatwa zinathimbana na ife mu umaso, Yahova anadzatipasa pinafuna ife toera tipirire. (1 Pedro 1:6) Iye anadzatiphedza toera kukunda mayesero onsene anathimbana na ife.

⁸ Mpostolo Jwau alemba: ‘Ife tonsene tatambira mwakukwana udidi wakukhonda kutithema.’ (Jwau 1:16) Nakuti Yahova asapangiza udidi wace wakukhonda kutithema munjira zakusiyana-siyana, ife tisatambira nkhombo zizinji kakamwe. Tendeni tidinge nkhombo zingasi mwa izo.

 9. Tisaphindula tani na udidi wakukhonda kutithema wa Yahova? Tinapangiza tani kupereka kwathu takhuta?

⁹ Yahova asalekerera madawo athu. Thangwi ya udidi wakukhonda kutithema wa Yahova, iye asalekerera madawo athu. Mbwenye iye asacita pyenepi basi ene tingatcunyuka mbatipitiriza kucita pyonsene toera kucalira pifuno pyathu pyakuipa. (Lerini 1 Jwau 1:8, 9.) Paulu afokotoza kuna Akristu akudzodzwa a ndzidzi wace kuti Yahova asalekerera tani madawo. Iye alonga: ‘Mulungu atiombola mu mphambvu za n’cidima mbatiendesa ku umambo wa Mwanace wa pantima adatipasa cipulumuso mwa ciomboli cace, mbatilekerera madawo athu.’ (Akolose 1:13, 14) Tisapereka takhuta kakamwe thangwi ya ntsisi za Mulungu. Nakuti Yahova asalekerera madawo athu, tinakwanisambo kutambira nkhombo zinango zizinji zakutsandzayisa.

10. Kodi udidi wakukhonda kutithema wa Yahova unatiphedza toera kukhala nanji?

¹⁰ Tinakwanisa kukhala mu ntendere na Mulungu. Nakuti ndife anthu akudawa, ndife anyamalwa a Mulungu kubulukira mu ndzidzi unabalwa ife. Ngakhale tenepo, Paulu alonga: ‘Pikhali ife anyamalwa a Mulungu, takhaliswa pontho mu uxamwali na Mulungu thangwi ya kufa kwa Mwanace.’ (Aroma 5:10) Thangwi ya ciomboli, ife tinakwanisa kukhala axamwali a Mulungu, pyenepi pisabveka kukhala mu ntendere na iye. Paulu afokotoza kuti pyenepi pisabverana tani na udidi wakukhonda kutithema wa Yahova, pidalonga iye mafala awa kwa Akristu akudzodzwa: ‘Cincino tisacemerwa akulungama thangwi ya cikhulupiro, tendeni tikhale mu ntendere na Mulungu kubulukira mwa Mbuyathu Yezu Kristu, adatiphedza toera tikhale na cikhulupiro thangwi ya udidi wakukhonda kutithema uli na ife.’ (Aroma 5:1, 2) Ineyi ndi nkhombo ikulu kakamwe!

11. Ndi munjira ipi anyakudzodzwa asaphedza “mabira anango” toera kukhala akulungama?

¹¹ Tisaoniwa kukhala anthu akulungama. Mprofeta Dhanyeli alemba kuti mu ntsiku zakumalisa, ‘anthu audziwisi,’ akuti ndi anyakudzodzwa, mbadaphedza “azinji toera kukhala akulungama.” (Lerini Danyele 12:3, NM.) Kodi anyakudzodzwa asacita tani pyenepi? Iwo asamwaza mphangwa zadidi mbapfundzisa mitemo ya Yahova kuna pikwi na pikwi pya “mabira anango.” (Jwau 10:16) Iwo asaaphedza toera kukhala akulungama pamaso pa Mulungu, pyenepi pisakwanisika thangwi ya udidi wakukhonda kutithema wa Yahova. Paulu afokotoza: ‘Na muoni wakukhonda lipa, musacemerwa akulungama kubulukira mu udidi wakukhonda kutithema wa Mulungu thangwi ya cipulumuso ca ciomboli ca Yezu Kristu.’​—Aroma 3:23, 24.

12. Thangwi yanji tiri na ufulu wakufendedzera ku mpando wa Mulungu mu phembero?

¹² Tinakwanisa kufendedzera cifupi Yahova kubulukira mu phembero. Thangwi ya udidi wakukhonda kutithema wa Yahova, tinakwanisa kucita phembero kuna iye. Paulu alonga kuti mpando wa umambo wa Yahova ndi ‘mpando wace wa udidi wakukhonda kutithema,’ natenepa iye asatiphemba toera tifendedzere ku mpando wace ‘na ufulu wakulonga.’ (Ahebere 4:16a) Kubulukira mwa Yezu tinakwanisa kucita phembero kuna Yahova ndzidzi onsene. Unoyu ndi mwai ukulu kakamwe! Paulu afokotoza: ‘Ife tiri na ufulu wakulonga na ufulu wa kunfendedzera na cinyindiro kubulukira mu cikhulupiro cathu kwa iye.’​—Aefesi 3:12.

13. Kodi udidi wakukhonda kutithema wa Mulungu ‘unatiphedza tani pa ndzidzi wakuthema’?

¹³ Tinakwanisa kutambira ciphedzo pa ndzidzi wakuthema. Paulu atiwangisa toera kucita phembero kuna Yahova ndzidzi onsene tingafuna ciphedzo, ‘toera tibverwe ntsisi, mbatigumana udidi wakukhonda kutithema toera kutiphedza pa ndzidzi wakuthema.’ (Ahebere 4:16b) Ndzidzi onsene unathimbana ife na mayesero peno nyatwa, tinakwanisa kuphemba ciphedzo ca Yahova. Maseze nee tathema, Yahova asatawira maphembero athu. Kazinji kene iye asaphatisira abale na alongo athu toera kutiphedza. Yahova asatawira maphembero athu ‘toera tikhale na cipapo mbatilonga: ‘Yahova ndi mphedzi wanga, sinadzagopa pinthu tayu. Anthu anandicitanji?’’​—Ahebere 13:6.

14. Ndi nkhombo ipi iri na ife thangwi ya udidi wakukhonda kutithema wa Yahova?

¹⁴ Tinakwanisa kutambira cibalangazo m’mitima yathu. Thangwi ya udidi wace wakukhonda kutithema, Yahova asabalangaza anthu a ntima wakutsukwala. Ineyi ndi nkhombo ikulu kakamwe. (Masalmo 51:17) Pikhatcingwa Akristu a ku Tesalonika, Paulu alemba: ‘Mbuyathu Yezu Kristu na Mulungu Babathu adatifuna mbatibalangaza kwenda na kwenda na cidikhiro cadidi na udidi wace wakukhonda kutithema, abalangaze mitima yanu mbakupasani mphambvu.’ (2 Atesalonika 2:16, 17) Mphyakuwangisa kakamwe kudziwa kuti thangwi ya udidi wace wakukhonda kutithema, Yahova asatifuna mbatitsalakana!

15. Ndi cidikhiro cipi ciri ife thangwi ya udidi wakukhonda kutithema wa Yahova?

¹⁵ Tiri na cidikhiro ca umaso wakukhonda mala. Nakuti ndife anyakudawa, ife nkhabe cidikhiro. (Lerini Masalmo 49:7, 8.) Mbwenye na ciphedzo ca Yahova, ife tiri na cidikhiro cakutsandzayisa kakamwe. Yezu alonga: ‘Babanga asafuna kuti munthu anadzindikira Mwana mbankhulupira akhale na umaso wakukhonda mala.’ (Jwau 6:40) Natenepa, ife tiri na cidikhiro cakukhala maso kwenda na kwenda thangwi ya udidi wakukhonda kutithema wa Yahova. Paulu alonga: ‘Udidi wakukhonda kutithema wa Mulungu wapangizwa, mbubweresa cipulumuso kwa anthu a mitundu yonsene.’​—Tito 2:11.

16. Kodi Akristu anango akutoma aphatisira tani mwakuipa udidi wakukhonda kutithema wa Mulungu?

¹⁶ Tisatambira nkhombo zizinji thangwi ya udidi wakukhonda kutithema wa Yahova. Mbwenye nee tisafunika kuphatisira mwakuipa udidi wace, mbatinyerezera kuti iye asakomerwa na macitiro onsene. Mwa Akristu akutoma, akhalipo anango akhayesera ‘kuphatisira mwakuipa udidi wakukhonda kutithema wa Mulungu toera kusaka mathangwi akucita pyakuipa.’ (Yuda 4) Akristu anewa akukhonda kukhulupirika akhanyerezera kuti anakwanisa kucita madawo mbalekererwa na Yahova ndzidzi onsene. Iwo ayesera kutundusa abale awo toera kucitambo madawo ninga iwo. Lerombo, munthu onsene anacita pyenepi asapwaza ‘nzimu wa nkhombo ya udidi wakukhonda kutithema.’​—Ahebere 10:29.

17. Ndi uphungu upi wamphambvu udapereka Pedhru?

¹⁷ Lero, Sathani asaphatisira ntsisi za Yahova toera kunyengeza Akristu anango. Munjira ipi? Iye asaacitisa kunyerezera kuti anakwanisa kucita madawo ninga munafunira iwo thangwi Yahova anaalekerera ndzidzi onsene. Ndimomwene kuti Yahova ali dzololo toera kulekerera anyakudawa akutcunyuka; mbwenye iye asafuna kuti timalise pifuno pyathu pyakuipa. Yahova apumira Pedhru toera kulemba: ‘Natenepa, imwe akufunika, nakuti musapidziwa kale, khalani akucenjera toera mukhonde kupeuswa na anthu akudawa toera mukhonde kugwa m’makhaliro anu akuwanga. Mbwenye pitirizani kukula mu udidi wakukhonda kutithema wa Mulungu mbamukhala na cidziwiso ca Mbuyathu na Mpulumusi wathu Yezu Kristu.’​—2 Pedro 3:17, 18.

18. Nakuti Yahova asapangiza udidi wakukhonda kutithema, tisafunikambo kucitanji?

¹⁸ Tisapereka takhuta kakamwe thangwi ya udidi wakukhonda kutithema wa Yahova. Natenepa, tisafunika kuphatisira muoni wathu toera kulemedza Yahova na kuphedza anango. Tinacita tani pyenepi? Paulu alonga: ‘Nakuti tiri na miyoni yakusiyana-siyana idapaswa ife thangwi ya udidi wakukhonda kutithema, khala tapaswa muoni wakutumikira, titumikire; adapaswa muoni wakupfundzisa, apfundzise; ali na muoni wakuwangisa, awangise; ule anabvera ntsisi, acite pyenepi mwakukomerwa.’ (Aroma 12:6-8) Natenepa, thangwi ya udidi wakukhonda kutithema wa Yahova, tisafunika kuphata basa mwakuwanga mu utumiki, kupfundzisa anthu Bhibhlya, kuwangisa abale na alongo athu na kulekerera munthu onsene anatidawira.

19. Ninji pinafuna ife kudinga mu nsolo unatowera?

¹⁹ Nakuti tapaswa nkhombo ya udidi wakukhonda kutithema wa Yahova, tisafunika kucita pyonsene pinakwanisa ife toera ‘kupereka umboni wakukwana wa mphangwa zadidi za udidi wakukhonda kutithema wa Mulungu.’ (Machitiro 20:24) Mu nsolo unatowera tinadzadinga kuti tinacita tani pyenepi.