Perekani Takhuta Thangwi Yakulambira Yahova mu Templo Yace Yauzimu

 1. Ninji pinalonga anju, pontho pyenepi pisabvekanji kuna ife?

KHALA anju asafuna kulonga na imwe, kodi mbamudabvesera pinafuna iye kulonga? Lero anju ali kulonga kuna “anthu a madziko onsene, a madzindza onsene, a pilongero pyonsene na mbumba zonsene.” Iye ali kulonganji? ‘Gopani Mulungu, mbamumpasa mbiri, lambirani Ule adacita kudzulu na dziko yapantsi.’ (Apok. 14:6, 7) Basi ene Yahova ndi Mulungu wandimomwene wakuti anthu onsene asafunika kumulambira. Ife tisapereka takhuta kakamwe thangwi iye asatitawirisa kumulambira mu templo yace ikulu yauzimu!

 2. Templo yauzimu ya Yahova ninji? (Onanimbo bokosi ya nsolo wakuti “Templo Yauzimu Nee Ndi.”)

² Mphapo templo yauzimu ninji, pontho tinagumana kupi mphangwa zinalonga pya templo ineyi? Templo yauzimu nee ndi nyumba. Ndi masasanyiro a Yahova toera kumulambira munjira yakutawirika thangwi ya ntsembe ya ciomboli ya Yezu. Mpostolo Paulu afokotoza masasanyiro anewa mu tsamba idalembera iye Akristu Acihebheri akakhala ku Yudeya.b

3-4. “Ndi pinthu pipi pikhadzudzumika na Paulu thangwi ya Akristu Acihebheri ku Yudeya, pontho iye aaphedza tani?

³ Thangwi yanji Paulu alembera tsamba Akristu Acihebheri akakhala ku Yudeya? Iye acita pyenepi thangwi ya pinthu piwiri: Cakutoma, toera kuapasa mphambvu. Thangwi azinji a iwo mbadzati kukhala Akristu akakhala mu uphemberi Waciyuda. Panango atsogoleri awo akale akhaasingirira thangwi ya kukhala Akristu. Akristu nee akhali na templo yakubalika kakamwe toera kulambira Mulungu, nee akhali na guwa toera kupereka ntsembe kuna Mulungu, pontho nee akhali na anyantsembe toera kuatumikira. Panango pyenepi mbapidatsukwalisa anyakupfundza a Kristu mbakhala na cikhulupiro cakufewa. (Aheb. 2:1; 3:12, 14) Panango anango a iwo anyerezera pya kubwerera mu uphemberi Waciyuda.

⁴ Caciwiri, Paulu apanga Akristu Acihebheri kuti iwo nee akhawangisira toera kubvesesa undimomwene unaoneka ninga wakunentsa kubvesesa, wakuti ndi “cakudya cakuuma” cinagumanika m’Mafala a Mulungu. (Aheb. 5:11-14) Panango anango a iwo akhapitiriza kubvera Mwambo wa Mose. Mbwenye Paulu afokotoza kuti ntsembe zikhaperekwa mwakubverana na Mwambo nee mbazidafudza madawo. Na thangwi ineyi, Mwambo “wabuluswa.” Natenepa Paulu aapfundzisa undimomwene unaoneka ninga ndi wakunentsa kubvesesa. Iye akumbusa abale na alongo pya “cidikhiro cadidi kakamwe” ca ntsembe ya ciomboli ya Yezu yakuti mbidaaphedza “kufendedzera Mulungu.”—Aheb. 7:18, 19.

 5. Ndi pinthu pipi pinafunika ife kubvesesa m’bukhu ya Ahebheri, pontho thangwi yanji?

⁵ Paulu afokotozera abale na alongo Acihebheri kuti njira ikhalambira iwo Mulungu ikhali yadidi kakamwe mu ndzidzi unoyu kupiringana nduli. Njira ikhalambira Ayuda mwakubverana na Mwambo basi ene ikhali “cipangizo ca pinthu pikhafuna kudza, mbwenye undimomwene uli muna Kristu.” (Akol. 2:17) Cipangizo basi ene ndi cidzindikiro ca pinthu pinafuna kudza. Natenepa, njira ikhalambira Ayuda mu ndzidzi wakale basi ene ikhali cipangizo ca pinthu pikhafuna kucitika mukupita kwa ndzidzi. Ife tisafunika kubvesesa masasanyiro adacita Yahova toera alekerere madawo athu mbatimulambira munjira yakutawirika. Ife tinalandanisa “cipangizo” (njira ikhalambira Ayuda mu ndzidzi wakale) na “undimomwene” (njira inalambira Akristu lero) mwakubverana na tsamba idalemba Paulu kuna Ahebheri. Tingacita pyenepi, tinakwanisa kubvesesa mwadidi templo yauzimu na pinthu pinafunika ife kucita.

 6. Tabhernakulo ikhaphatisirwa tani?

⁶ Njira ikhalambira Ayuda. Mphangwa zidalonga Paulu zisabverana na tabhernakulo idacita Mose mu caka 1512 Kristu Mbadzati Kubalwa. (Onani bokosi ya nsolo wakuti “Njira Ikhalambira Ayuda na Njira Inalambira Akristu.”) Tabhernakulo ikhali ninga nsasa wakuti Aizraeli akhauthukula mu ndzidzi ukhacita iwo ulendo. Iwo aphatisira tabhernakulo mu pyaka 500 mpaka mu ndzidzi udamangwa templo mu Yerusalemu. (Eks. 25:8, 9; Num. 9:22) “Nsasa wa nsonkhano” unoyu ukhali mbuto ikhaphatisira Aizraeli toera kulambira Mulungu na kupereka ntsembe zawo. (Eks 29:43-46) Mbwenye tabhernakulo ikhalimbo cipangizo ca cinthu cikulu kakamwe cakuti mbacidaoneka na Akristu ntsogolo.

 7. Templo yauzimu yatoma lini?

⁷ Njira inalambira Akristu lero. Tabhernakulo ya mu ndzidzi wakale ikhali “cipangizo na n’thundzi wa pinthu pyakudzulu,” pontho ikhapangiza templo ikulu yauzimu ya Yahova. Paulu alonga kuti “Tabhernakulo ineyi ndi cipangizo ca mu ndzidzi uno.” (Aheb. 8:5; 9:9) Natenepa mu ndzidzi udalemba Paulu tsamba kuna Akristu Acihebheri, templo yauzimu ikhalipo kale. Iyo yatoma mu caka 29 Pakumala Kubalwa Kwa Kristu. Mu caka ceneci, Yezu abatizwa, adzodzwa na nzimu wakucena mbatoma kutumikira ninga “nyantsembe wankulu kakamwe” wa Yahova mu templo yauzimu.c—Aheb. 4:14; Mabasa 10:37, 38.

8-9. Mwakubverana na Ahebheri 7:23-27, anyantsembe akulu a Izraeli na Nyantsembe Wankulu kakamwe Yezu Kristu asiyana tani?

⁸ Njira ikhalambira Ayuda. Nyantsembe wankulu akhali na basa yakuimirira anthu pamaso pa Mulungu. Aroni, wakuti akhali nyantsembe wankulu wakutoma wa Izraeli, asankhulwa na Yahova pidamala kuzimulwa tabhernakulo. Mbwenye Paulu afokotoza kuti pakhafunika anthu azinji toera apite pa mbuto ya nyantsembe, thangwi kufa kukhaapingiza toera apitirize kutumikira ninga anyantsembe.”d (Lerini Ahebheri 7:23-27.) Ninga anthu akusowa ungwiro, anyantsembe anewa akhafunikambo kupereka ntsembe toera kulekererwa madawo awo. Pyenepi pisapangiza kuti anyantsembe anewa ndi akusiyana na Nyantsembe Wankulu kakamwe, Yezu Kristu.

⁹ Njira inalambira Akristu lero. Ninga Nyantsembe wathu Wankulu, Yezu Kristu ndi “ntumiki wa . . . pa tabhernakulo yandimomwene idamangwa na Yahova, tayu na munthu.” (Aheb. 8:1, 2) Paulu alonga pyenepi thangwi “iye asapitiriza kukhala m’maso kwenda na kwenda, nkhabe munthu anafuna kupita pa mbuto yace ninga nyantsembe.” Kusiyapo pyenepi, Paulu alonga kuti Yezu ndi “wakusowa midonthi, wakusiyana na anyakudawa,” pontho mwakusiyana na anyantsembe a mu Izraeli, “iye nee asafunika kupereka ntsembe ntsiku zonsene” thangwi ya madawo ace. Cincino onani kusiyana kwa guwa ya ntsembe ikhaphatisirwa na Ayuda mu ndzidzi wakale na ire inaphatisira Akristu lero.

10. Ntsembe zikhaperekwa pa guwa ya nkuwa zikhaimiriranji?

¹⁰ Njira ikhalambira Ayuda. Kunja kwa tabhernakulo kukhali na guwa ya nkuwa ikhaphatisirwa toera kupereka pinyama ninga ntsembe kuna Yahova. (Eks. 27:1, 2; 40:29) Mbwenye ntsembe zenezi nee zikhacitisa kuti anthu alekererwe madawo onsene. (Aheb. 10:1-4) Kuperekwa kwa ntsembe za pinyama mwakubwereza-bwereza pa tabhernakulo kukhaimirira ntsembe yakuti mbidacitisa anthu kulekererwa madawo onsene.

11. Yezu aphatisira guwa ipi toera kupereka umaso wace ninga ntsembe? (Ahebheri 10:5-7, 10)

¹¹ Njira inalambira Akristu lero. Yezu akhadziwa kuti Yahova antuma pa dziko yapantsi toera apereke umaso wace ninga ntsembe ya ciomboli kuna anthu. (Mat. 20:28) Natenepa, pa ubatizo wace, Yezu apangiza kuti akhali dzololo toera kucita pikhafuna Yahova. (Juw. 6:38; Agal. 1:4) Guwa idapereka Yezu umaso wace nee ikhali yakucitwa na anthu, mbwenye ikhaimirira “pinafuna Mulungu.” Pontho Yahova akhafuna kuti Mwanace apereke umaso wace waungwiro ninga ntsembe. Yezu apereka umaso wace “kabodzi” toera kulekerera kwenda na kwenda madawo a anthu onsene anakhulupira Kristu. (Lerini Ahebheri 10:5-7, 10.) Cincino tendeni tione kuti pinthu pyankati mwa tabhernakulo pisaimiriranji.

12. Mbani akhatawiriswa kupita m’mbuto ziwiri zene za tabhernakulo?

¹² Njira ikhalambira Ayuda. Tabhernakulo na matemplo akhamangwa mu Yerusalemu akhali na pinthu pyakulandana nkati. Nkati mukhali na mbuto ziwiri. Ibodzi ikhacemerwa “Mbuto Yakucena,” inango ikhacemerwa “Mbuto Yakucena Kakamwe,” pontho mbuto zenezi zikhagawiwa na nguwo ikulu. (Aheb. 9:2-5; Eks. 26:31-33) Nkati mwa Mbuto Yakucena mukhali na cakuikhira nyale ca ouro, guwa yakupisira insenso na meza ya mikate ya ntsembe. Mbwenye basi ene “anyantsembe adadzodzwa” ndiwo akhafuna kupita mu Mbuto Yakucena toera kucita basa yawo. (Num. 3:3, 7, 10) Mu Mbuto Yakucena Kakamwe mukhali na bokosi ya cibverano yakucitwa na ouro yakuti ikhapangiza kuti Yahova ali penepo. (Eks. 25:21, 22) Basi ene nyantsembe wankulu ndi akhatawiriswa kupita mu Mbuto Yakucena Kakamwe kabodzi pa caka, pa Ntsiku Yakucenesa Madawo. (Lev. 16:2, 17) Pyaka pyonsene iye akhapita mwenemo na ciropa ca cinyama toera kulekererwa madawo ace na madawo a mbumba yonsene. Yahova aphatisira nzimu wace wakucena toera kupangiza mabvekero a pinthu pya mu tabhernakulo.—Aheb. 9:6-8.e

13. Mbuto Yakucena na Mbuto Yakucena Kakamwe isaimiriranji mu ulambiri Wacikristu lero?

¹³ Njira inalambira Akristu lero. Anyakupfundza anango a Kristu adzodzwa na nzimu wakucena toera akhale na uxamwali wakupambulika na Yahova. Akristu anewa akukwana 144.000 anatumikira ninga anyantsembe kudzulu pabodzi na Yezu. (Apok. 1:6; 14:1) Mbuto Yakucena ya tabhernakulo isapangiza kuti iwo asankhulwa toera akhale ana auzimu a Mulungu maseze aciri pa dziko yapantsi. (Aroma 8:15-17) Mbuto Yakucena Kakamwe isaimirira kudzulu kunakhala Yahova. “Nguwo ikulu” ikhagawa Mbuto Yakucena na Mbuto Yakucena Kakamwe isaimirira manungo aunyama a Yezu akuti akhampingiza kuenda kudzulu toera katumikira ninga Nyantsembe Wankulu wa templo yauzimu. Mukupereka umaso wace ninga ntsembe kuna anthu, Yezu afungula njira toera anyakudzodzwa onsene akwanise kuenda kudzulu. Anyakudzodzwa asafunikambo kusiya manungo awo aunyama toera atambire muoni wawo wakudzulu. (Aheb. 10:19, 20; 1 Akor. 15:50) Pidalamuswa Yezu muli akufa, iye apita mu Mbuto Yakucena Kakamwe ya templo yauzimu yakuti mukupita kwa ndzidzi Akristu onsene akudzodzwa anapitamo.

14. Mwakubverana na Ahebheri 9:12, 24-26, thangwi yanji templo yauzimu ya Yahova ndi yadidi kakamwe kupiringana njira ikhalambira Aizraeli mwakubverana na Mwambo?

¹⁴ Ife tisakwanisa kuona pakweca kuti masasanyiro a Yahova aulambiri wandimomwene thangwi ya ntsembe ya ciomboli na unyantsembe wa Yezu Kristu ndi adidi kakamwe. Nyantsembe wankulu mu Izraeli akhapita mu Mbuto Yakucena Kakamwe yakucitwa na anthu na ciropa ca ntsembe za pinyama, mbwenye Yezu “apita kudzulu” yakuti ndi mbuto yakucena kakamwe kupiringana zonsene toera aonekere pamaso pa Yahova. Kudzulu iye aonekera mbapangiza kufunika kwa umaso wace waungwiro ninga munthu “toera afudze madawo thangwi yakuperekeka kwace ninga ntsembe.” (Lerini Ahebheri 9:12, 24-26.) Ntsembe ya Yezu Kristu isalekerera madawo athu kwenda na kwenda. Ife tinaona kuti mwakukhonda tsalakana khala cidikhiro cathu ndi cakwenda kudzulu peno kukhala pa dziko yapantsi, tonsene tinakwanisa kulambira Yahova mu templo yace yauzimu.

15. Mbani akhatumikira pa thando ya tabhernakulo?

¹⁵ Njira ikhalambira Ayuda. Tabhernakulo ikhali na thando yakuzungulirwa na mpanda, pontho anyantsembe akhaphata mabasa awo mwenemo. Guwa ikulu ya nkuwa ikhaphatisirwa toera kupereka ntsembe ikhali pa thando pabodzi na basiya ya nkuwa yakuti ikhaikhirwa madzi yakuti anyantsembe akhaiphatisira toera kuceneseka mbadzati kupereka ntsembe. (Eks. 30:17-20; 40:6-8) Mbwenye matemplo adamangwa akhalimbo na thando, pontho anthu akuti nee akhali anyantsembe mbadalambira Mulungu pa thando ineyi.

16. Mbani anatumikira pa mbuto ibodzi na ibodzi ya templo yauzimu?

¹⁶ Njira inalambira Akristu lero. Mbadzati kuenda kudzulu katumikira ninga anyantsembe, Akristu akudzodzwa adasalikira asatumikira mwakukhulupirika pa thando yankati ya templo yauzimu pa dziko yapantsi. Basiya ikulu ya madzi isaakumbusa kuti iwo kuphatanizambo Akristu onsene asafunika kupitiriza kukhala na makhaliro adidi na akucena mwauzimu. Mphapo “mwinji ukulu” unaphedzera mwakukhulupirika abale akudzodzwa a Kristu unatumikira kupi Yahova? M’masomphenya, mpostolo Juwau aaona dzololo ‘patsogolo pa mpando waumambo mbakatumikira Mulungu masiku na masikati.’ Mwinji ukulu usacita pyenepi pa thando yakunja ya templo yauzimu pano pa dziko yapantsi. (Apok. 7:9, 13-15) Ife tisapereka takhuta kakamwe kuna Yahova thangwi yakutipasa mwai wa kumulambira mu templo ikulu yauzimu.

17. Ndi ntsembe zipi zakuti tinakwanisa kuzipereka kuna Yahova?

¹⁷ Akristu onsene ali na mwai wakupereka ntsembe kuna Yahova mukuphatisira ndzidzi wawo, mphambvu zawo na pinthu piri na iwo toera kuphedzera Umambo wa Mulungu. Mpostolo Paulu apanga Akristu Acihebheri kuti ‘ndzidzi onsene tinakwanisa kusimba Mulungu. Pyenepi ndi ninga ntsembe inapereka ife kuna Mulungu yakuti ndi misapo ya milomo yathu, inadziwisa pakweca dzina yace.’ (Aheb. 13:15) Ife tinapangiza kuti tisakomerwa na kulambira Yahova tingacita pyonsene pinakwanisa ife m’basa yace.

18. Mwakubverana na Ahebheri 10:22-25, ndi pinthu pipi pyakuti tisafunika kupicita ndzidzi onsene, pontho ndi pinthu pipi pyakuti nee tisafunika kupiduwala?

¹⁸ Lerini Ahebheri 10:22-25. Khundu yakumalisa ya tsamba idalembera iye Ahebheri, Paulu alonga pinthu pyakuti tisafunika kupicita ndzidzi onsene pakulambira Mulungu. Pinthu pyenepi ndi kucita phembero kuna Yahova, kumwaza mphangwa, kugumanyikana pa misonkhano ya mpingo na kuwangisana unango na ndzace ‘mu ndzidzi unaona ife kuti ntsiku ya Mulungu iri kufika.’ Anju wa Yahova alonga mafala awa kawiri toera kuagomezera: “Lambira Mulungu!” (Apok. 19:10; 22:9) Natenepa, nee tisafunika kuduwala undimomwene unoyu wakufunika kakamwe thangwi ya templo ikulu yauzimu ya Yahova na kupereka takhuta thangwi ya nkhombo iri na ife yakulambira Mulungu wathu wankulu!