Pitirizani Kufunana na Ntima Onsene

 1. Ninji pinapangiza kuti mabanja mazinji nee asafunana kakamwe lero?

BHIBHLYA yalonga mwanyapantsi kuti mu ntsiku zakumalisa, anthu mbadakhala “akusowa ufuni.” (2 Tim. 3:1, 3) Ife tisaona kukwanirisika kwa profesiya ineyi lero. Mwacitsandzo, mabanja mazinji asakhondana thangwi nee asabverana, pontho anawo asapibva kuti nee asafuniwa na anyakubala awo. Kusiyapo pyenepi, mabanja anango nee asacedza pabodzi. Mwacitsandzo, baba unango alonga: “Anyakubala na anawo nkhabe ndzidzi toera kucedza pabodzi, thangwi ndzidzi onsene asaphatisira mitcini ya ndzeru, thabhuleti, sumatifoni na mavidhyu gemi. Maseze iwo asakhala pa nyumba ibodzi ene, mbwenye nee asadziwana mwadidi unango na ndzace.”

2-3. (a) Mwakubverana na Aroma 12:10, mbani asafunika ife kufuna na ntima onsene? (b) Tinapfundzanji mu nsolo uno?

² Ife nee tisafunika kukhala ninga anthu akuti nee asatumikira Yahova, pontho akuti nee asapangiza ufuni wandimomwene. (Aroma 12:2) Mbwenye tisafunika kufuna na ntima onsene anthu a pabanja pathu kuphatanizambo abale na alongo mu mpingo. (Lerini Aroma 12:10.) Kodi pisabvekanji kufunana na ntima onsene? Pisabveka kufunana kakamwe ninga kunacita anthu a pabanja ibodzi ene. Natenepa ndi ntundu unoyu waufuni usafunika ife kupangiza kuna abale na alongo athu mu mpingo. Tingacita pyenepi tinakwanisa kuphedzana unango na ndzace toera kutumikira Yahova mwakutsandzaya.—Mik. 2:12.

³ Mu nsolo uno tinapfundza pitsandzo pya m’Bhibhlya pyakuti pinatiphedza toera kufunana na ntima onsene.

 4. Kodi lemba ya Tiyago 5:11 isapangiza tani kuti Yahova asatifuna kakamwe?

⁴ Bhibhlya isapangiza makhaliro adidi kakamwe a Yahova. Mwacitsandzo, iyo isalonga kuti “Mulungu ndi ufuni.” (1 Juwau 4:8) N’khaliro unoyu usatikulumiza toera tikhale pauxamwali na iye. Kusiyapo pyenepi, Bhibhlya isalongambo kuti “Yahova ndi wakukoma ntima kakamwe.” (Lerini Tiyago 5:11.) Makhaliro anewa a Yahova asapangiza kuti iye asatifuna kakamwe.

 5. Kodi Yahova asatibvera tani ntsisi, pontho ife tinantowezera tani?

⁵ Onani kuti lemba ya Tiyago 5:11 isalonga kuti Yahova ndi wakukoma ntima kakamwe, pontho mu ndzidzi ubodzi ene isalongambo kuti iye ndi wantsisi. (Eks. 34:6) Njira ibodzi inapangiza kuti Yahova asatibvera ntsisi ndi kutilekerera madawo athu. (Masal. 51:1) Mbwenye Bhibhlya isalonga kuti kubvera ntsisi kusaphataniza pinthu pizinji kupiringana kulekerera munthu adacita pinthu pyakuipa. Munthu wantsisi angaona munthu unango mbathabuka asacita pyonsene pinakwanisa iye toera kumphedza. Yahova apanga mprofeta Izaiya kuti iye asafuna kakamwe kutiphedza kupiringana pinacita mama kuna mwanace wa pabere. (Iza. 49:15) Na thangwi ineyi, tingathimbana na nyatwa, Yahova asatibvera ntsisi mbatiphedza. (Masal. 37:39; 1 Akor. 10:13) Munjira ibodzi ene, ife tisafunikambo kubvera ntsisi abale na alongo athu mukualekerera madawo awo na kucalira kukoya pinthu muntima. (Aef. 4:32) Mbwenye njira inango yakufunika kakamwe yakubvera ntsisi abale na alongo athu ndi kuaphedza mu ndzidzi unathimbana iwo na nyatwa. Tingacita pyenepi, tikutowezera Yahova wakuti ndi wakukoma ntima kakamwe.—Aef. 5:1.

 6. Ninji pinapangiza kuti Yonatani na Dhavidhi akhafunana kakamwe?

⁶ M’Bhibhlya musagumanika pitsandzo pya anthu akusowa ungwiro akuti akhafunana kakamwe unango na ndzace. Mwacitsandzo, Bhibhlya isalonga kuti: ‘Yonatani na Dhavidhi adzakhala axamwali a ponda ndipondembo, pontho Yonatani atoma kunfuna kakamwe ninga mukhafunira iye manungo ace.’ (1 Sam. 18:1) Dhavidhi akhadasankhulwa na Yahova toera kupitira mbuto Sauli ninga mambo. Na thangwi ineyi, Sauli atoma kucitira bibvu Dhavidhi mbafuna kumupha. Mbwenye Yonatani nee akhaphedzera maonero anewa a pai wace. Yonatani na Dhavidhi adumbira kuti mbadakhala axamwali, pontho mbadaphedzana unango na ndzace.—1 Sam. 20:42.

 7. Ndi pinthu pipi pyakuti mbapidacitisa Yonatani na Dhavidhi kukhonda khala axamwali?

⁷ Pakhali na pinthu pizinji pyakuti mbapidacitisa Yonatani na Dhavidhi kukhonda khala axamwali a ponda ndipondembo. Mwacitsandzo, Yonatani na Dhavidhi nee akhali a thunga ibodzi ene, iwo akhadasiyana pyaka cifupi na 30 pyakubalwa. Yonatani nee anyerezera kuti Dhavidhi ndi mwana kakamwe toera kucita naye uxamwali. M’mbuto mwace, iye akhamulemedza kakamwe.

 8. Thangwi yanji Yonatani akhali xamwali wadidi wa Dhavidhi?

⁸ Yonatani mbadakwanisa kucitira bibvu Dhavidhi. Thangwi iye akhali mwana wa Mambo Sauli, pontho akhali na ufulu toera kupitira mbuto pai wace ninga mambo. (1 Sam. 20:31) Mbwenye Yonatani akhali wakucepeseka, pontho akhali wakukhulupirika kuna Yahova. Natenepa iye nee aipirwa pidasankhula Yahova Dhavidhi toera apitire mbuto mambo Sauli. Kusiyapo pyenepi, Yonatani akhalimbo wakukhulupirika kuna Dhavidhi, ngakhale mu ndzidzi wakuti Sauli akhafuna kupha Dhavidhi.—1 Sam. 20:32-34.

 9. Tisadziwa tani kuti Yonatani nee akhacitira bibvu Dhavidhi?

⁹ Yonatani akhafuna kakamwe Dhavidhi, na thangwi ineyi iye nee akhancitira bibvu. Yonatani akhali nyankhondo wacipapo, pontho akhali na maluso kakamwe akumenya nkhondo. Iye na pai wace akhadziwika ninga anthu akuti ‘akhathamanga kakamwe kupiringana capungu,’ pontho ‘akhali amphambvu kakamwe kupiringana nkhalamu.’ (2 Sam. 1:22, 23) Natenepa, Yonatani mbadadzikuza thangwi ya mbiri ineyi, mbwenye iye akhali wakucepeseka, pontho nee acitira bibvu Dhavidhi thangwi ya pinthu pyadidi pidacita iye. Kusiyapo pyenepi, Yonatani adzumatirwa kakamwe na cipapo ca Dhavidhi na kunyindira kwace Yahova. Mwacitsandzo, pidamala Dhavidhi kupha Goliati, Yonatani atoma kufuna kakamwe Dhavidhi. Kodi ife tinapangiza tani ufuni ninga unoyu kuna abale na alongo athu?

10. Thangwi yanji tisafunika kufunana kakamwe unango na ndzace?

¹⁰ Bhibhlya isalonga kuti “funanani kakamwe unango na ndzace, na ntima onsene.” (1 Ped. 1:22) Yahova asatifuna kakamwe, pontho ife tingapitiriza kukhala akukhulupirika kuna iye, iye cipo anasiya kutifuna. (Aroma 8:38, 39) Fala Yacigerego yakuti “kakamwe” isapangiza kuwangisira kunacita munthu toera kupangiza ufuni. Na thangwi ineyi, midzidzi inango tisafunika kuwangisira toera kufuna kakamwe abale na alongo athu. Natenepa anango angatitsukwalisa, tisafunika kupitiriza ‘kupirirana unango na ndzace mwaufuni mbatiwangisira na ntima onsene toera kukoya kuphatana kwathu kubulukira mu nzimu wakucena, mbatikhala akuphatana muntendere.’ (Aef. 4:1-3) Tingawangisira toera kukhala pa ntendere na abale na alongo athu, pinatiphedza toera tikhonde kuyang’ana basi ene madodo awo. Pontho tinaaona ninga munaaonera Yahova.—1 Sam. 16:7; Masal. 130:3.

11. Thangwi yanji midzidzi inango pisakhala pyakunentsa toera kufunana na ntima onsene?

¹¹ Midzidzi inango, pisakhala pyakunentsa kufuna na ntima onsene abale na alongo athu, makamaka khala tisadziwa madodo awo. Pisaoneka kuti pyenepi pyacitikambo kuna Akristu anango a mu ndzidzi wa apostolo. Mwacitsandzo, Evodhiya na Sintike akhabverana kakamwe mu ndzidzi ukhaphata iwo basa yakumwaza mphangwa zadidi pabodzi na mpostolo Paulu. Mbwenye mukupita kwa ndzidzi, Evodhiya na Sintike atsukwalisana. Na thangwi ineyi, Paulu aakulumiza “toera akhale na manyerezero mabodzi ene mwa Mbuya.”—Afil. 4:2, 3.

12. Ninji pinafuna kutiphedza toera kufuna na ntima onsene abale na alongo athu?

¹² Ninji pinafuna kutiphedza toera kufuna na ntima onsene abale na alongo athu lero? Ndi kuadziwa mwadidi. Thangwi tingacita pyenepi pinakhala pyakukhonda nentsa toera kubvesesa mabvero awo na kuafuna na ntima onsene. Pontho pyenepi pinatiphedza toera kucita uxamwali na iwo mwakukhonda tsalakana thunga yawo na makhaliro awo. Kumbukani kuti Yonatani na Dhavidhi akhadasiya pyaka cifupi na 30 pyakubalwa, mbwenye iwo akhali axamwali a ponda ndipondembo. Kodi imwe munakwanisa kucita uxamwali na m’bale peno mulongo wakuti ndi wathunga yakusiya na imwe? Mungacita pyenepi, imwe munakwanisa ‘kufuna nsoka onsene wa abale.’—1 Ped. 2:17.

13. Kodi ndi pyakukwanisika kucita uxamwali wa ponda ndipondembo na onsene mu mpingo? Fokotozani.

¹³ Kodi kufuna na ntima onsene abale na alongo pisabveka kuti tinakwanisa kucita uxamwali wa ponda ndipondembo na onsene mu mpingo? Nkhabe. Natenepa nee ndi pyakudawika m’bale peno mulongo angacita uxamwali na abale na alongo anango mu mpingo, tayu onsene. Mwacitsandzo, Yezu akhali xamwali kuna anyakupfundzace onsene, mbwenye iye akhali xamwali wa ponda ndipondembo wa Juwau. (Juwau 13:23; 15:15; 20:2) Mbwenye pyenepi nee pisabveka kuti Yezu akhaona Juwau ninga wakufunika kakamwe kupiringana anango. Mwacitsandzo, mu ndzidzi udaphemba Juwau na Tiyago mbuto yakupambulika mu Umambo wa Mulungu, Yezu aapanga: “Pyakukhala kunkono wanga wamadyo na wabzwere sine tayu anatonga pyenepi.” (Marko 10:35-40) Munjira ibodzi ene, ife nee tisafunika kuona axamwali athu kukhala akufunika kakamwe kupiringana anango. (Tiya. 2:3, 4) Thangwi tingacita pyenepi mpingo unakhala wakugawana.—Yuda 17-19.

14. Mwakubverana na Afilipi 2:3, ninji pinafuna kutiphedza toera kuona abale na alongo athu kukhala akufunika kakamwe?

¹⁴ Ife tingafunana kakamwe unango na ndzace, pinatiphedza toera kucalira manyerezero akuti ndife akufunika kakamwe kupiringana anango. Kumbukani kuti Yonatani nee acitira bibvu Dhavidhi pidasankhulwa iye toera kukhala mambo. Munjira ibodzi ene, ife tinakwanisambo kutowezera citsandzo ca Yonatani. Ife nee tisafunika kucitira bibvu abale na alongo athu thangwi ya maluso awo, ‘mbwenye tisafunika kucita pinthu mwakucepeseka, mbationa andzathu kukhala akulu kupiringana ife.’ (Lerini Afilipi 2:3.) Pontho tisafunika kukumbuka kuti ife tonsene tinakwanisa kucita pinthu toera kuphedza mpingo. Tingakhala akucepeseka, tinakwanisa kuona makhaliro adidi a abale na alongo athu, pontho tinapfundza kubulukira mu citsandzo cawo.—1 Akor. 12:21-25.

15. Mwapfundzanji na pinthu pidacitikira Tanya na anace?

¹⁵ Tingathimbana na nyatwa, Yahova asatibalangaza na kutiphedza mukuphatisira abale na alongo athu. Mwacitsandzo, pidamala programu ya Nsabudu ya Nsonkhano wa Gawo Unacemerwa Abale na Alongo a m’Madziko Anango wa 2019 wa nsolo wakuti ‘Ufuni Nkhabe Kumala’ udacitika ku Estados Unidos, mulongo Tanya alonga: “Mu ndzidzi ukhabwerera ife ku oteli, karu inango yabuluka kunkono wayo mbibwera dzadhima karu yathu. Nee m’bodzi wa ife adaphekeka, mbwenye tonsene tabuluka n’karu mbatilimira kunja. Mwakukhonda dembuka, taona munthu unango mbaticemera toera kuenda kakwira karu yace, iye akhali m’bale wakuti akhabulukambo ku nsonkhano unoyu wa gawo. Kusiyapo m’bale unoyu, abale na alongo anango axanu a ku Suesya akhadalimirambo. Alongo akhali penepo akhumbatira ine na mwanga wankazi, pontho pyenepi pyatibalangaza kakamwe. Ine ndapanga abale na alongo anewa kuti ife tiri mwadidi toera akwanise kuenda ulendo wawo, mbwenye iwo nee atisiya. Iwo apitiriza kukhala na ife mpaka pidamala ife kuoniwa na maenfermeiro, pontho iwo atiphedza munjira zonsene. Mu ndzidzi unoyu wa nyatwa, ife takwanisa kuona kuti Yahova asatifuna. Kusiyapo pyenepi, pinthu pyenepi pyaticitisa kufuna kakamwe abale na alongo athu, pontho pyaticitisambo kufuna kakamwe Yahova na kupereka takhuta kuna iye.” Kodi imwe musakumbuka ndzidzi udaphedzwa imwe na m’bale peno mulongo?

16. Thangwi yanji tisafunika kufunana unango na ndzace na ntima onsene?

¹⁶ Tingafunana unango na ndzace na ntima onsene, tinabalangazana m’midzidzi ya nyatwa, pontho tinakhala akuphatana ninga atumiki a Mulungu. Kusiyapo pyenepi, ife tinapangiza pakweca kuti ndife anyakupfundza a Yezu, pontho pyenepi pinacitisa anango toera kufuna kutumikira Yahova. Kusiyapo pyonsene, ife tinapasa mbiri ‘Baba wa ntsisi zikulu na Mulungu wacibalangazo consene,’ Yahova. (2 Akor. 1:3) Natenepa tendeni tonsene tikhale akutonga toera kupitiriza kufunana na ntima onsene.