‘Mafala a Mulungu Wathu Anadzakhala Kwenda na Kwenda’

1, 2. (a) Kodi umaso mbudakhala tani khala nee muli na Bhibhlya? (b) Ninji cinafuna kutiphedza toera kuphindula na Mafala a Mulungu?

KODI umaso wanu mbudakhala tani khala nee muli na Bhibhlya? Panango nee mbamudagumana uphungu wandzeru toera kukutsogolerani ntsiku zonsene. Nee mbamudadziwa undimomwene unalonga pya Mulungu, umaso na tsogolo. Pontho nee mbamudadziwa pidacita Yahova na atumiki ace mu ndzidzi wakale.

² Pyakutsandzayisa ndi pyakuti nee tiri m’makhaliro anewa. Yahova atipasa Mafalace, Bhibhlya. Iye apikira kuti mafala anewa anadzakhala kwenda na kwenda. Mpostolo Pedhro alonga mafala anagumanika pa Izaiya 40:8. Maseze vesi ineyi nee isalonga pya Bhibhlya, mbwenye isalonga mphangwa za Bhibhlya. (Lerini 1 Pedro 1:24, 25.) Ife tinakwanisa kuphindula kakamwe na Bhibhlya tingaileri mu cilongero cathu. Ale anakomerwa na Mafala a Mulungu ndzidzi onsene, asadziwa pyenepi. Mu pyaka pizinji, anthu asaphata basa mwakuwanga toera kuthumburuza Bhibhlya na kuigawira, mwakukhonda tsalakana pinentso peno kutcingwa. Yahova asafuna kuti anthu azinji ‘apulumuke na kudziwa undimomwene.’—1 Timoti 2:3, 4.

 3. Tinadzadinganji mu nsolo uno? (Onani cithundzithundzi cakutoma.)

³ Mu nsolo uno, tinadzadinga kuti Mafala a Mulungu asapitiriza tani mwakukhonda tsalakana (1) kucinja kwa pilongero, (2) pinacita anthu andale za dziko pyakuti pisacinja cilongero ca dziko yonsene na (3) kupingizwa toera kuthumburuza Bhibhlya. Kudinga pyenepi kunatiphedza tani? Kupereka kwathu takhuta kuna Yahova thangwi ya Bhibhlya kunadzathimizirika kakamwe.—Mikeya 4:2; Aroma 15:4.

 4. (a) Pilongero pisacinja tani mukupita kwa ndzidzi? (b) Tisadziwa tani kuti Mulungu nee asakomerwa na cilongero cibodzi basi? Musapibva tani thangwi yakudziwa kuti Mulungu nkhabe tsankhulo?

⁴ Mukupita kwa ndzidzi, pilongero pisacinja. Mabvekero a mafala panango asasiyana kakamwe na munjira ikhalongwa iwo. Panango munakwanisa kunyerezera cilongero canu. Pyenepi pyacitikambo na pilongero pyakale. Cihebheri na Cigerego cinalonga anthu lero casiyana kakamwe na cidaphatisirwa toera kulemba Bhibhlya. Anthu azinji nee akhabvesesa Bhibhlya mu pilongero pyenepi, natenepa akhafunika kukhala na Bhibhlya yakuthumburuzwa. Anango asanyerezera kuti angapfundza Cihebere na Cigerego cakale, anakwanisa kubvesesa mwadidi Bhibhlya. Mbwenye panango pyenepi nee pinaaphedza ninga pinanyerezera iwo.a (Onani cidzindikiro capantsi.) Tisapereka takhuta kakamwe thangwi Bhibhlya peno khundu ibodzi ya Bhibhlya yathumburuzwa mu pilongero cifupi na 3.000. Ndi pyenepi pinafuna Yahova kwa anthu a ‘madzindza onsene, mitundu na pilongero pyonsene’ toera aphindule na Mafalace. (Lerini Apokalipse 14:6.) Pyenepi pisaticitisa kupibva kuti tiri cifupi na Mulungu wathu waufuni na wakusowa tsankhulo.—Machitiro 10:34.

 5. Ninji pinacitisa Bhibhlya ya King James Version kukhala yakufunika?

⁵ Mukupita kwa ndzidzi, pilongero pidathumburuzwa Bhibhlya pyacinja. Natenepa, Bhibhlya yakuti kale ikhabveka mwadidi inakwanisa kukhala yakunentsa mukupita kwa ndzidzi. Citsandzo cibodzi ndi ca Bhibhlya ya King James Version idabuluswa mu caka 1611. Bhibhlya ineyi ya Cingerezi yadzakhala yakudziwika kakamwe. Mafala adaphatisirwa m’Bhibhlya ineyi akhuyambo cilongero ca Cingerezi.b (Onani cidzindikiro capantsi.) Mbwenye, m’Bhibhlya ineyi dzina ya Yahova basi ene isagumanika maulendo akucepa. M’mbuto zizinji, zikhagumanika dzina ya Mulungu pakutoma M’malemba Acihebheri, zaikhwa dzina yakuti “MBUYA” na maletra makulu. Mukupita kwa ndzidzi, Mabhibhlya anango aphatisirambo fala yakuti “MBUYA” na maletra makulu M’malemba Acigerego Acikristu. Munjira ineyi, Bhibhlya ya King James Version yapangiza kuti dzina ya Mulungu ikhagumanikambo M’malemba akutoma Acigerego.

 6. Thangwi yanji tisapereka takhuta kakamwe thangwi yakukhala na Bhibhlya ya Tradução do Novo Mundo?

⁶ Mu ndzidzi udabuluswa Bhibhlya ya King James Version, mafala a Cingerezi adaphatisirwa akhadziwika mwadidi. Mbwenye mukupita kwa ndzidzi, mafala anango akhaoneka ninga akale, pontho lero asanentsa toera kuabvesesa. Pyenepi pyacitikambo na Mabhibhlya anango. Natenepa, tisapereka takhuta kakamwe thangwi yakukhala na Tradução do Novo Mundo da Bíblia Sagrada, yakuti isaphatisira mafala anadziwika mwadidi lero. Bhibhlya ineyi isagumanika yonsene peno khundu ibodzi mu pilongero pyakupiringana 150. Pyenepi pisapangiza kuti anthu azinji lero pa dziko yonsene anakwanisa kuleri Bhibhlya mu cilongero cawo. Mafala akubveka mwadidi adaphatisirwa m’Bhibhlya ineyi asacitisa kuti mphangwa za Mulungu zikhuye mitima yathu. (Masalmo 119:97) Bhibhlya ya Tradução do Novo Mundo ndi yakupambulika kakamwe thangwi yaikhwa pontho dzina ya Mulungu m’mbuto zikhagumanika iyo pakutoma.

7, 8. (a) Thangwi yanji Ayuda azinji nee akhabvesesa mwadidi Malemba Acihebheri mu pyaka madzana matatu Yezu mbadzati kubalwa? (b) Kodi Septuaginta Yacigerego ndi Bhibhlya yanji?

⁷ Mu pyaka pizinji, pinacita anthu a ndale za dziko pisakhuyambo pilongero pa dziko yonsene. Mbwenye Yahova acita pyonsene toera Bhibhlya igumanike kwa anthu onsene mu cilongero cinakwanisa iwo kubvesesa. Mwacitsandzo, mabukhu 39 akutoma a Bhibhlya alembwa na Ayuda peno Aisraeli. Bhibhlya isalonga kuti pakutoma ‘Mulungu asiya mafalace m’manja mwa Ayuda.’ (Aroma 3:1, 2) Iwo alemba mabukhu anewa mu Cihebheri peno mu Ciaramaki. Mbwenye mu pyaka madzana matatu Yezu mbadzati kubalwa, Ayuda azinji nee akhabvesesa Cihebheri. Thangwi yanji? Alexandre Wankulu akunda khundu ikulu ya dziko mu utongi wa Gresya. Natenepa, Cigerego cadzakhala cilongero ca anthu azinji mu utongi wa Gresya, pontho anthu anewa atoma kulonga Cigerego m’mbuto mwa pilongero pyawo. (Danyele 8:5-7, 20, 21) Pyenepi pisaphataniza Ayuda azinji, natenepa pyadzakhala pyakunentsa kwa iwo kubvesesa Bhibhlya mu Cihebheri. Mphapo nkandzo unoyu mbudamala tani?

⁸ Cifupi na pyaka 250 Yezu mbadzati kubalwa, mabukhu maxanu akutoma a Bhibhlya akhadathumburuzwa mu Cigerego. Mukupita kwa ndzidzi, Malemba Acihebheri athumburuzwambo. Bhibhlya ineyi yadzadziwika ninga Septuaginta Yacigerego, pontho ndiyo idatoma kuthumburuzwa M’malemba Acihebheri.

 9. (a) Kodi Septuaginta na Mabhibhlya anango aphedza tani anthu? (b) Ndi khundu ipi inafuna imwe kakamwe ya Malemba Acihebheri?

⁹ Septuaginta yacitisa kuti Ayuda akhalonga Cigerego akwanise kuleri Malemba Acihebere mu Cigerego. Munakwanisa kunyerezera kutsandzaya kudakhala na iwo thangwi yakubva peno kuleri Mafala a Mulungu mu cilongero cawo? Mukupita kwa ndzidzi, makhundu a Bhibhlya athumburuzwa mu pilongero pyakudziwika na anthu azinji, ninga Siriaka, Gótico na Latim. Natenepa, anthu azinji akhakwanisa kuleri na kubvesesa Mafala a Mulungu. Pontho iwo akhali na mavesi akhafuna iwo kakamwe, ninga pinacita ife lero. (Lerini Masalmo 119:162-165.) Mwakukhonda penula, Mafala a Mulungu asapitiriza mwakukhonda tsalakana kucinja kwa ndale za dziko na kucinja kwa cilongero.

10. Mu ndzidzi wa John Wycliffe, thangwi yanji anthu azinji nee akwanisa kuleri Bhibhlya?

¹⁰ Mu pyaka pizinji, atsogoleri a mauphemberi na andale ayesera kupingiza kuthumburuzwa kwa Bhibhlya. Mbwenye Atumiki a Mulungu nee asiya kuthumburuza Bhibhlya toera igumanike kwa anthu onsene. M’bodzi wa iwo akhali John Wycliffe, wakuti akhala ku Inglatera mu pyaka 1300. Iye akhali na cinyindiro cakuti anthu onsene mbadakwanisa kuleri Bhibhlya. Mu ndzidzi ukhali iye maso, anthu azinji ku Inglatera cipo abva mphangwa za Bhibhlya mu cilongero cawo. Bhibhlya ikhadhula kakamwe, pontho makopya anango akhalembwa na manja. Natenepa, anthu akhali na Bhibhlya akhali akucepa kakamwe. Pontho, anthu azinji nee akhakwanisa kuileri. Ale akhaenda ku gereja panango akhabva kulerwi kwa Bhibhlya mu Cilatim, mbwenye cikhali cilongero cakale cakuti nee cikhabviwa na anthu azinji. Kodi Yahova acitanji toera anthu akwanise kukhala na Bhibhlya mu cilongero cawo?—Misangani 2:1-5.

11. Kodi Bhibhlya ya Wycliffe yakhuya tani anthu?

¹¹ Mu caka 1382, John Wycliffe na anango athumburuza Bhibhlya mu Cingerezi. Bhibhlya ya Wycliffe yadzakhala yakudziwika kakamwe na nsoka ukhadziwika na dzina yakuti Lolardos. Anthu anewa akhafuna kakamwe Bhibhlya. Iwo akhacita ulendo na miyendo nzinda na nzinda ku Inglatera. Nsoka wa Lolardos ukhaleri Bhibhlya kuna anthu mbaapasa makopya akulembwa na manja. Basa yawo yacitisa Bhibhlya kukhala pontho yakudziwika kakamwe.

12. Atsogoleri a mauphemberi akhapibva tani thangwi ya Wycliffe na basa yace?

¹² Atsogoleri a mauphemberi akhatcinga kakamwe Wycliffe, Bhibhlya yace na andzace. Iwo atcingambo nsoka wa Lolardos na kufudza Mabhibhlya onsene adagumana iwo a Wycliffe. Maseze Wycliffe akhadafa, atsogoleri a mauphemberi akhalonga kuti iye ndi nyamalwa wa Gereja. Iwo akumba magogodo ace, aapisa, mbataya dotha yace n’nyandza. Mbwenye anthu azinji akhafuna kuleri na kubvesesa Mafala a Mulungu, pontho Gereja nee mbidakhondesa pyenepi. Mu pyaka pizinji patsogolo pace, anthu a ku Europa na makhundu anango a dziko atoma kuthumburuza na kudhinda Bhibhlya mu pilongero pyakuti mbipidabviwa na anthu azinji.

13. Tisapfundzanji thangwi yakuthumburuzwa kwa Bhibhlya, pontho pyenepi pisatipasa cinyindiro cipi?

¹³ Bhibhlya yapumirwa na Mulungu. Mbwenye pyenepi nee pisabveka kuti basa yakuthumburuza Septuaginta, Bhibhlya ya Wycliffe, King James Version na Mabhibhlya anango apumirwa na Mulungu. Natenepa, tingadinga Mabhibhlya anewa, pisapangiza pakweca ninga mudapikira Yahova, Mafalace anakhala kwenda na kwenda. Pyenepi pisawangisa cikhulupiro cathu mukudziwa kuti pinthu pyonsene pidapikira Yahova pinadzakwanirisika.—Yoswa 23:14.

14. Pinapfundza ife thangwi ya Bhibhlya pisathimizira tani ufuni wathu kwa Mulungu?

¹⁴ Munapfundza ife kuti Yahova asatsidzikiza tani Mafalace, cikhulupiro cathu cisakhala cakuwanga, pontho ufuni wathu kwa iye usathimizirika.c (Onani cidzindikiro capantsi.) Thangwi yanji Yahova pakutoma atipasa Bhibhlya buluka penepo mbapikira kuti anaitsidzikiza? Thangwi iye asatifuna, pontho asafuna kutipfundzisa toera kuphindula. (Lerini Izaiya 48:17, 18.) Pyenepi pisatikulumiza toera kufuna Yahova na kumbvera.—1 Jwau 4:19; 5:3.

15. Tinadzadinganji mu nsolo unatowera?

¹⁵ Ife tisafuna kakamwe Mafala a Mulungu, mphapo tinacitanji toera kuphindula kakamwe na kuleri kwathu Bhibhlya? Tinaphedza tani ale anamwazira ife mphangwa toera kulemedza Bhibhlya? Tinaphatisira tani mwadidi Bhibhlya pakucita nkhani mu mpingo? Tinadzadinga mibvundzo ineyi mu nsolo unatowera.