Mudabuluswa Matawiro a Umaso Wathu Wacikristu na Utumiki ya Outubro — BHIBHLIYOTEKA MU INTERNETI ya Torre de Vigia

Mudabuluswa Matawiro a Umaso Wathu Wacikristu na Utumiki

SUMANA 7-13 YA OUTUBRO

MPFUMA ZA MAFALA A MULUNGU | TIYAGO 3-5

“Pangizani Udziwisi wa Mulungu”

(Tiyago 3:17) Mbwenye udziwisi wakudzulu, pakutoma ndi wakucena, buluka penepo, wantendere, wakulinganira, usakhala dzololo toera kubvera, ndi wakudzala na ntsisi pabodzi na misapo yadidi, wakusowa tsankhulo, na wakusowa umpfakafaka.

Achegue-se tsa. 221-222 ndima 9-10

Kodi “Udziwisi Wakudzulu” Ukuphata Basa mu Umaso Wanu?

⁹ “Pakutoma ndi wakucena.” Kukhala wakucena nee pisabveka basi ene kunja mbwenye pisaphatanizambo nkati. Bhibhlya isalonga kuti udziwisi ndi wakuphatana na ntima, mbwenye udziwisi wakudzulu nkhabe pita muntima wakudzala na manyerezero akuipa, pifuno pyakuipa, pontho wakucita pinthu na mathangwi akuipa. (Misangani 2:10; Mateu 15:19, 20) Natenepa, ntima wathu ungakhala wakucena mpaka panakwanisa ife, tinakwanisa ‘kucalira pyakuipa mbaticita pyadidi.’ (Masalmo 37:27; Misangani 3:7) Kodi nee mphyakuthema kulonga kuti kucena ndi n’khaliro wakutoma wa udziwisi? Kusiyapo pyenepi, khala ife nee tiri na makhaliro akucena, pontho nee ndife akucena mwauzimu, tinakwanisa tani kupangiza makhaliro anango a udziwisi wakudzulu?

¹⁰ “Wantendere.” Udziwisi wakudzulu usatikulumiza toera kusaka ntendere, wakuti ndi nsapo wa nzimu wa Mulungu. (Agalata 5:22) Ife tisawangisira toera tikhonde kufudza “kuphatana muntendere” kwakuti kusacitisa mbumba ya Yahova kukhala yakuphatana. (Aefesi 4:3) Pontho tisawangisira toera kukhazikisa ntendere tingadawisirana na anango. Thangwi yanji pyenepi mphyakufunika? Bhibhlya isalonga: “Pitirizani . . . kukhala anthu antendere; natenepa Mulungu waufuni na wantendere anadzakhala na imwe.” (2 Akorinto 13:11) Tingapitiriza kukhala muntendere, Mulungu wantendere anadzakhalambo na ife. Njira inatsalakanira ife alambiri andzathu isakhuya kakamwe uxamwali wathu na Yahova. Tinapangiza tani kuti ndife anthu akukhazikisa ntendere? Onani citsandzo cinatowera.

Achegue-se tsa. 223-224 ndima 12

Kodi “Udziwisi Wakudzulu” Ukuphata Basa mu Umaso Wanu?

¹² “Wakulinganira.” Pisabvekanji kukhala wakulinganira? Mwakubverana na anyakufufudza pya Bhibhlya, fala Yacigerego idathumburuzwa kuti “kulinganira” inagumanika pa Tiyago 3:17 ndi yakunentsa kuthumburuza. Athumburuzi anango aphatisira mafala akuti “wadidi,” “wakupirira,” na “wacitsalakano.” Cidzindikiro capantsi mu Tradução do Novo Mundo cisapangiza kuti ingathumburuzwa fala na fala isabveka “kungonjera.” Tinapangiza tani kuti n’khaliro unoyu wa udziwisi wakudzulu usaphata basa muna ife?

Achegue-se tsa. 224-225 ndima 14-⁠15

Kodi “Udziwisi Wakudzulu” Ukuphata Basa mu Umaso Wanu?

¹⁴ “Dzololo Toera Kubvera.” Fala Yacigerego idathumburuzwa kuti “dzololo toera kubvera” nee isagumanikabve m’mbuto zinango m’Malemba Acigerego Acikristu. Mwakubverana na nyakufufudza pya Bhibhlya m’bodzi, fala ineyi “kazinji kene isaphatisirwa kwa anyankhondo.” Iyo isabveka “kukhala dzololo toera kubvera” na “kungonjera.” Munthu anatsogolerwa na udziwisi wakudzulu, asakhala dzololo toera kubvera pinalonga Bhibhlya. Iye nkhabe dziwika ninga munthu wa manyerezero akudzikuza anakhonda undimomwene wakuti usasiyana na maonero ace. M’mbuto mwace, iye asacinja mwakucimbiza angapangizwa Malemba anapangiza undimomwene wakuti maonero ace ndi akuphonyeka peno akhadanyerezera mwakuphonyeka. Kodi anango asakudziwani tenepo?

“Wakudzala na Ntsisi Pabodzi na Misapo Yadidi”

¹⁵ “Wakudzala na ntsisi pabodzi na misapo yadidi.” Ntsisi ndi khundu yakufunika kakamwe ya udziwisi wakudzulu thangwi udziwisi unoyu usalongwa kuti ndi “wakudzala na ntsisi.” Onani kuti “ntsisi” na “misapo yadidi” isalongwa pabodzi pene. Pyenepi ndi pyakuthema, thangwi m’Bhibhlya fala yakuti ntsisi kazinji kene isabveka kudzudzumika toera kuphedza anango, peno kuabvera ntsisi kwakuti kusabala misapo mizinji thangwi yakupangiza kukoma ntima. Bukhu inango yalonga kuti ntsisi ndi “kutsukwala thangwi ya nyatwa zinathimbana na anango na kuyesera kuaphedza.” Munthu waudziwisi wakudzulu nee asakhala wakuuma ntima. Mbwenye ndi wauxamwali, wakugalamuka na wakukoma ntima. Tinapangiza tani kuti ndife akudzala na ntsisi?

Achegue-se tsa. 226-227 ndima 18-19

Kodi “Udziwisi Wakudzulu” Ukuphata Basa mu Umaso Wanu?

¹⁸ “Wakusowa tsankhulo.” Udziwisi wa Mulungu usaphedza toera kucalira kusankhulana kwa madzindza na kudzikuza. Tingatsogolerwa na udziwisi unoyu, tinawangisira toera kubulusa muntima mwathu cipendamiro consene ca kusankhulana. (Tiyago 2:9) Ife nee tisatsalakana anango mwakupambulika thangwi apfundza kakamwe, thangwi ndi akupfuma peno thangwi ya pidzo piri na iwo mu mpingo, pontho nee tinapwaza alambiri andzathu, mwakukhonda tsalakana kucepeseka kwawo. Khala Yahova apangiza ufuni wace kuna iwo, mwakukhonda penula ife tisafunikambo kuatsalakana mwaufuni.

¹⁹ “Wakusowa umpfakafaka.” Fala Yacigerego yakuti “umpfakafaka” isabveka “munthu anasangizira anango.” Mu ndzidzi wakale, Agerego na Aroma pakucita masendzekero akhaphimbira nkhope zawo na nguwo peno pinthu pinango toera akhonde kudzindikirwa. Natenepa, fala Yacigerego yakuti “umpfakafaka” yatoma kuphatisirwa kuna munthu anacita pinthu mwaciphamaso, peno mwauthambi. Udziwisi wa Mulungu ndi wakusowa umpfakafaka, natenepa tisafunika kuupangiza tayu basi munjira inatsalakana ife abale athu, mbwenye tisafunika kuupangiza kubulukira m’mabvero athu thangwi ya iwo.

Kusaka Mpfuma Zauzimu

(Tiyago 4:5) Kodi musanyerezera kuti ndi akusowa basa mafala analongwa m’Malemba kuti: “Cipendamiro ca bibvu ciri muna ife cisapitiriza kusirira pinthu pizinji”?

Sentinela 15/11/08 tsa. 20 ndima 6

Ntsonga Zikulu za Tsamba ya Tiyago na Matsamba a Pedhru

Tiya. 4:5—Ndi lemba ipi idaphatisira Tiyago pa vesi ineyi? Tiyago nee aphatisira mafala a vesi inango. Pisaoneka kuti panango iye aphatisira mafala akupumirwa na Mulungu anagumanika pa Genesi 6:5; 8:21; Misangani 21:10; na Agalata 5:17.

(Tiyago 4:11, 12) Abale, lekani kulongana mwakuipa unango na ndzace. Munthu analonga mwakuipa m’bale wace, peno anatonga m’bale wace, asalonga mwakuipa mwambo, mbatonga mwambo. Mphapo khala iwe usatonga mwambo, nee usacita pinalonga mwambo, mbwenye ndiwe ntongi. ¹² Alipo m’bodzi basi wakuti ndi Nyakupereka miyambo na Ntongi, ule wakuti asakwanisa kupulumusa na kufudza. Mphapo iwembo ndiwe ani toera kutonga ndzako?

Sentinela 15/11/97 tsa. 20-21 ndima 8

Cikhulupiro Cisatiphedza Toera Kupirira na Kucita Phembero

⁸ Ndi madawo makulu kulonga mwakuipa m’bale peno mulongo. (Tiyago 4:11, 12) Ngakhale tenepo, anango asasumula Akristu andzawo, thangwi asafuna kudzikuza mbapwaza andzawo. (Masalmo 50:20; Misangani 3:29) Fala Yacigerego idathumburuzwa ‘kulonga mwakuipa’ isabveka udani peno kupambizira munthu unango. Pyenepi pisabveka kutonga m’bale mwaukali. Ndi munjira ipi kucita pyenepi ndi ‘kulonga peno kutonga mwambo wa Mulungu’? Apfundzisi a mwambo na Afarisi akhapokanya ‘mwakucenjera mwambo wa Mulungu’ mbaphatisira midida yawo. (Marko 7:1-13) Munjira ibodzi ene, ife tingatonga m’bale wakuti Yahova nee antonga, kodi nee tiri ‘kutonga mwambo wa Mulungu’ mbatipangiza kuti iwo nee ndi wadidi? Tingasumula m’bale wathu mwakusowa ulungami, nee tikukwanirisa mwambo waufuni.—Aroma 13:8-10.

SUMANA 14-20 YA OUTUBRO

MPFUMA ZA MAFALA A MULUNGU | 1 PEDHRU 1-2

“Khalani Akucena”

(1 Pedhru 1:14, 15) Ninga ana akubvera, lekani kutsogolerwa pontho na pinthu pikhasirira imwe kale mu ndzidzi ukhacita imwe pinthu mwakukhonda dziwa, ¹⁵ mbwenye ninga Ule adakucemerani ndi Wakucena, khalani akucena m’makhaliro anu onsene,

Ncenjezi 02/17 tsa. 10 ndima 5

Ciomboli Ndi Muoni Ukulu wa Mulungu

⁵ Tinapangiza tani kuti tisafuna dzina ya Yahova? Kubulukira m’makhaliro athu. Yahova asafuna kuti tikhale akucena. (Lerini 1 Pedhru 1:15, 16.) Pyenepi pisabveka kuti tisafunika kulambira basi ene iye na kumbvera na ntima wathu onsene. Maseze titcingwe, tisawangisira toera kukhala mwakubverana na pinatipfundzisa Yahova. Tingakhala mwakubverana na midida ya Yahova, tisapasa mbiri dzina yace. (Mateu 5:14-16) Pontho tisapangiza kuti mitemo yace ndi yadidi na Sathani ndi wauthambi. Nakuti nee ndife aungwiro, midzidzi inango tinadawa. Mbwenye tingadawa, tisafunika kutcunyuka mbatiwangisira kucita pinthu pinapangiza kuti tisalemedza dzina ya Yahova.—Masalmo 79:9.

(1 Pedhru 1:16) thangwi pyalembwa kuti: “Khalani akucena, thangwi ine ndine wakucena.”

Kufuna Mulungu tsa. 77 ndima 6

Tinasankhula Tani Ubalangazi Wadidi

⁶ Yahova alonga: “Khalani akucena, thangwi ine ndine wakucena.” (1 Pedhru 1:14-16; 2 Pedhru 3:11) Yahova anatawira ulambiri wathu, basi ene ungakhala wakucena. (Deuteronomyo 15:21) Ulambiri wathu nee unakhala wakucena tingacita pinthu pinaida Yahova, ninga ulukwali, uphanga, peno kukhulupira mizimu. (Aroma 6:12-14; 8:13) Pontho tingakomerwa na pinthu pyenepi tinatsukwalisa Yahova. Pyenepi pinacitisa kuti ulambiri wathu ukhale wakukhonda cena na wakukhonda tawirika kuna Yahova, pontho pinaphekesa uxamwali wathu na iye.

Kusaka Mpfuma Zauzimu

(1 Pedhru 1:10-12) Aprofeta adalonga pya kukoma ntima kukulu kwa Mulungu kwakuti mbakudapangizwa kuna imwe, asaka mwaphinga, na mwacidikhodikho toera kudziwa pya cipulumuso ceneci. ¹¹ Nzimu wakucena wadziwisa mwanyapantsi kuti Kristu mbadaona nyatwa, buluka penepo mbadapaswa mbiri. Aprofeta apitiriza kusaka mwacidikhodikho pipangizo pidapereka nzimu wakucena thangwi ya midzidzi ineyi, pontho kuti mbapidacitika lini. ¹² Mulungu adziwisa aprofeta kuti pinthu pyenepi nee pikhali pyawo, mbwenye akhatumikira imwe. Cincino imwe mwapangizwa pinthu pyenepi na ale adakumwazirani mphangwa zadidi na ciphedzo ca nzimu wakucena udatumwa buluka kudzulu. Pinthu pyenepi, aanju asafuna kakamwe kupibvesesa.

Sentinela 15/11/08 tsa. 21 ndima 9

Ntsonga Zikulu za Tsamba ya Tiyago na Matsamba a Pedhru

1 Ped. 1:10-12. Aanju akhafuna kakamwe kuona na kubvesesa mwadidi undimomwene wauzimu udalemba aprofeta akale a Mulungu thangwi ya mpingo wa Akristu akudzodzwa. Undimomwene unoyu watoma kubveseswa mwadidi mu ndzidzi udatoma Yahova kutsogolera mpingo. (Aef. 3:10) Ninga aanju anewa, ife tisafunikambo kufufudza mwaphinga “udziwisi wakubisika wa Mulungu.”—1 Akor. 2:10.

(1 Pedhru 2:25) Thangwi imwe mukhali ninga mabira akuti ali kutayika, mbwenye cincino mwabwerera kuna nkumbizi wanu na muyang’aniri wa umaso wanu.

Perspicaz vol. 3 tsa. 658 ndima 3

Muyang’aniri

Muyang’aniri Wankulu Kakamwe. Pisaoneka kuti 1 Pedhru 2:25 isalonga mafala anagumanika pa Izaiya 53:6 thangwi ya ale ali ‘ninga mabira akutayika,’ natenepa Pedhru alonga: “Mbwenye cincino mwabwerera kuna nkumbizi wanu na muyang’aniri wa umaso wanu.” Mafala anewa akhalonga pya Yahova Mulungu, thangwi ale akhalonga Pedhru nee akhadasiya Kristu Yezu, mbwenye kubulukira mwa iye, akhadabwerera pontho kuna Yahova Mulungu, wakuti ndi Nkumbizi Wankulu wa mbumba yace. (Masal. 23:1; 80:1; Yer. 23:3; Ezek. 34:12) Pontho Yahova ndi muyang’aniri, wakuti asakwanisa kuona anthu onsene. (Masal. 17:3) Kuona kweneku (Gr., e·pi·sko·peʹ) kunakwanisa kukhala sawasawa na mafalace akutonga, ninga pidalonga iye thangwi ya Yerusalemu mu pyaka dzana yakutoma, Yezu mbadamala kale kubalwa, akuti nee adzindikira ndzidzi ‘wakutongwa kwawo [Gr., e·pi·sko·pesʹ].’ (Luka 19:44) Pyenepi mbapidabweresa maphindu kuna ale anapasa mbiri Mulungu pa ntsiku ‘yakutonga kwace [Gr., e·pi·sko·pesʹ].’—1 Ped. 2:12.

SUMANA 21-27 YA OUTUBRO

MPFUMA ZA MAFALA A MULUNGU | 1 PEDHRU 3-5

“Kumala Kwa Pinthu Pyonsene Kuli Cifupi”

(1 Pedhru 4:7) Mbwenye kumala kwa pinthu pyonsene kuli cifupi. Natenepa, khalani na ndzeru zadidi, pontho ndzidzi onsene khalani dzololo toera mucite maphembero.

Ncenjezi 1/11/13 tsa. 7 ndima 1

‘Khalani Maso Mbamukhonda Kupwaza Kuphembera’

MAMUNA m’bodzi wakuti akhaphata basa na masiku alonga: “Ndzidzi wakunentsa kakamwe na masiku toera kukhala maso ndi ndzidzi wa m’bambakuca.” Anango akuti nee asafunika kugona na masiku mbadatawira. Akristu alero asathimbana na mipingizo ibodzi ene thangwi ya ntsiku ya makhaliro a pinthu pya dziko ino yakuipa ya Sathani, cincino ntsiku ineyi iri n’cidima kakamwe m’mbiri yace. (Aroma 13:12) Ndi pyakugopswa kakamwe kwa ife kugona mu ndzidzi uno wakumalisa. Mphyakufunika kwa ife ‘kukhala andzeru’ na kubvesera cenjezo ya Bhibhlya, yakuti ‘khalani maso mbamukhonda kupwaza kuphembera.’—1 Ped. 4:7.

(1 Pedhru 4:8) Kupiringana pyonsene, funanani kakamwe unango na ndzace, thangwi ufuni usaphimbira madawo mazinji kakamwe.

Sentinela 15/04/99 tsa. 22 ndima 3

Tinadzindikira Tani Mbatikunda Kufewa Mwauzimu

Pakumalisira, kumbukani cenjezo yaufuni ya mpostolo Pedhru yakuti: “Kumala kwa pinthu pyonsene kuli cifupi. Natenepa, khalani na ndzeru zadidi, pontho ndzidzi onsene khalani dzololo toera mucite maphembero. Kupiringana pyonsene, funanani kakamwe unango na ndzace, thangwi ufuni usaphimbira madawo mazinji kakamwe.” (1 Pedhru 4:7, 8) Mphyakukhonda nentsa kutawirisa madodo athu na madodo a anango akhuye mitima yathu na manyerezero athu mbakhala miyala yakugwegwedusa. Sathani asadziwa mwadidi kufewa kwathu. Nsampha ubodzi unaphatisira iye ndi kugawa anthu mbaakunda. Ndi thangwi yace, tisafunika kufunana kakamwe unango na ndzace toera kuphimbira madawo anewa, mbatikhonda “kupasa mbuto Dyabo.”—Aefesi 4:25-27.

(1 Pedhru 4:9) Tambiranani unango na ndzace, mbamukhonda kudungunya.

Ncenjezi 03/18 tsa. 15-16 ndima 2-3

Kutambira Alendo Ndi Kwakufunika Kakamwe!

² Cinthu cibodzi cidalonga Pedhru kuna abale ace toera kucicita cikhali ‘kutambira alendo.’ (1 Pedhru 4:9) Mu Cigerego fala yakuti ‘kutambira alendo’ isabveka “kukomerwa, peno kucitira udidi munthu wakuti nee tisandziwa.” Mbwenye Pedhru apanga abale na alongo toera kukhala ‘akutambira alendo,’ maseze akhadziwana kale unango na ndzace na kucita pinthu pabodzi. Kukhala akutambira alendo kwaaphedza tani?

³ Pyenepi mbipidaacitisa kukhala akuphatana. Ndiye tani kwa imwe? Musakumbuka ndzidzi wakutsandzayisa udacemerwa imwe na munthu kunyumba kwace? Pontho mu ndzidzi udacemera imwe munthu kunyumba kwanu, pyenepi pyakucitisani kukhala akuphatana. Njira yadidi toera kudziwa abale na alongo athu ndi kuacemera kunyumba kwathu. Akristu a mu ntsiku za Pedhru akhafunika kukhala akuphatana mu ndzidzi wa nyatwa. Mu ‘ntsiku zino zakumalisa,’ ife tisafunikambo kucita pibodzi pyene.—2 Timoti 3:1.

Kusaka Mpfuma Zauzimu

(1 Pedhru 3:19, 20) Na manungo anewa auzimu, iye aenda kamwaza mphangwa zakutonga kuna aanju adafungirwa nkaidi, ²⁰ akuti akhali akukhonda bvera mu ndzidzi ukhadikhira Mulungu mwakupirira mu ntsiku za Nowa, mu ndzidzi ukhamangwa bote, yakuti ndi anthu angasi basi, pisabveka anthu asere basi adapulumukira mwenemu pa madzi.

Sentinela 15/06/13 tsa. 23

Mibvundzo Inacitwa na Anyakuleri

Bhibhlya isalonga kuti Yezu ‘amwazira mphangwa mizimu n’kaidi.’ (1 Ped. 3:19) Mafala anewa asabvekanji?

▪ Mwakubverana na mpostolo Pedhru, mizimu ineyi ikhali ire idakhonda ‘kubvera mu ndzidzi ukhadikhira Mulungu mwakupirira mu ntsiku za Nowa.’ (1 Ped. 3:20) Pisaoneka pakweca kuti Pedhru akhalonga pya aanju adasankhula kukhonda bvera Mulungu mbacita khundu ya Sathani. Yuda alonga pya “aanju adasiya mbuto zawo,” kuti Mulungu “aamanga na maunyolo akukhonda fudzika mbaafungira ncidima cikulu mpaka kutongwa kwawo pa ntsiku ikulu.”—Yuda 6.

Ndi munjira ipi aanju nee abvera mu ntsiku za Nowa? Mbacidzati kucitika Cigumula, aanju anewa akuipa abwera pa dziko yapantsi ninga anthu, mbacita pinthu pyakuti nee pikhabverana na cifuniro ca Mulungu. (Gen. 6:2, 4) Kusiyapo pyenepi, aanju anewa akhapita m’mabonde na akazi, akhacita pinthu pyakuipa kakamwe. Thangwi Mulungu nee acita aanju toera apite m’mabonde. (Gen. 5:2) Aanju anewa akuipa na akukhonda bvera, anadzafudzwa na Mulungu pa ndzidzi wakuthema. Mbwenye cincino, mwakubverana na pidalonga Yuda, iwo ali “ncidima cikulu” cakuti ndi kaidi yauzimu.

Ndi mu ndzidzi upi, pontho Yezu amwazira tani mphangwa mizimu ineyi nkaidi? Pedhru alemba kuti pyenepi pyacitika pidamala Yezu ‘kulamuswa na manungo auzimu.’ (1 Ped. 3:18, 19) Onani kuti Pedhru alongambo kuti Yezu “amwaza mphangwa.” Pedhru aphatisira fala yakuti “amwaza mphangwa” thangwi mu ndzidzi udalemba iye tsamba yace yakutoma, pyenepi pikhadacitika kale. Pisaoneka kuti ndzidzi ungasi pidamala Yezu kulamuswa muli akufa, alonga kuna mizimu yakuipa thangwi ya kutcunyuswa kunafuna kucitwa iwo. Mphangwa zenezi nee zikhali zakupasa cidikhiro, mbwenye zikhali zakutonga. (Yona 1:1, 2) Pakumala kupangiza kukhulupirika kwace mpaka kufa mbalamuswa muli akufa, apangiza kuti Dyabo nee ali na mphambvu kuna iye, natenepa Yezu akhali na mathangwi adidi toera kulonga mafala anewa akutonga.—Juwau 14:30; 16:8-11.

Ntsogolo, Yezu anadzamanga Sathani pabodzi na aanju anewa mbaaponya “ndjenje yakuzika kakamwe.” (Luka 8:30, 31; Apok. 20:1-3) Pakumalisira, iwo anadzafudzwa.—Apok. 20:7-10.

(1 Pedhru 4:6) Mwandimomwene, ineyi ndi thangwi idacitisa kuti mphangwa zadidi zimwazwembo kuna anyakufa, toera maseze atongwe mu unyama mwakubverana na maonero a anthu, m’maonero a Mulungu iwo akwanise kukhala maso mukutsogolerwa na nzimu wakucena.

Sentinela 15/11/08 tsa. 21 ndima 7

Ntsonga Zikulu za Tsamba ya Tiyago na Matsamba a Pedhru

1 Ped. 4:6—Mbani “anyakufa” adamwazirwa “mphangwa zadidi”? Ndi ale akhadafa mwauzimu thangwi ya ‘madodo na madawo awo,’ mbadzati kubva mphangwa zadidi. (Aef. 2:1) Mbwenye pidakhulupira iwo mphangwa zadidi, adzakhala pontho “maso” mwauzimu.

SUMANA 28 YA OUTUBRO–3 YA NOVEMBRO

MPFUMA ZA MAFALA A MULUNGU | 2 PEDHRU 1-3

Kumbukani “Kubwera Kwa Ntsiku ya Yahova”

(2 Pedhru 3:9, 10) Yahova nee akudembuka toera kucita pidapikira iye, ninga munanyerezera anthu anango kuti iye akudembuka; mbwenye iye asapangiza kupirira kuna imwe, thangwi iye nee asafuna kuti munthu afudzwe, mbwenye asafuna kuti anthu onsene atcunyuke. ¹⁰ Mbwenye ntsiku ya Yahova inadzafika ninga mbava, pa ntsiku ineyi kudzulu kunadzapita na kudhima kukulu kakamwe, mbwenye thangwi yakupisa kakamwe kwa pinthu pyakudzulu na pya pa dziko yapantsi, ipyo pinadzanyunguluka, pontho dziko yapantsi na mabasa anacitwa mwenemu, pinadzaoneka pakweca.

Sentinela 15/12/06 tsa. 27 ndima 11

Yahova Anadzacitisa Kuti ‘Anthu Ace Acitirwe Ulungami’

¹¹ Tinakwanisa tani kubvesesa mafala adalonga Yezu akuti Yahova anadzacitisa kuti anthu ace acitirwe ulungami “mwakucimbiza kakamwe”? Mafala a Mulungu asapangiza kuti maseze Yahova ndi wakupirira, iye anadzacitisa kuti ulungami wace ucitike mwakucimbiza pa ndzidzi wakuthema. (Luka 18:7, 8; 2 Pedhru 3:9, 10) Mu ndzidzi wa Nowa, pidafika Cigumula, anthu akuipa onsene afudzwa mwakucimbiza. Munjira ibodzi ene, mu ntsiku za Loti, pidabuluka moto kudzulu, wafudza anthu onsene akuipa. Yezu alonga: “Pinadzacitikambo sawasawa pa ntsiku yakuonekera kwa Mwana wa munthu.” (Luka 17:27-30) Pontho, anthu akuipa anadzafudzwa “mwakututumusa.” (1 Atesalonika 5:2, 3) Mwandimomwene, tinakwanisa kukhala na cinyindiro cakuti Yahova nee anadzatawirisa kuti dziko ino ya Sathani ipitirize, thangwi pyenepi nee pinapangiza ulungami.

(2 Pedhru 3:11, 12) Nakuti pinthu pyenepi pyonsene pinadzafudzwa munjira ineyi, nyerezerani kuti musafunika kukhala anthu a ntundu wanji. Musafunika kukhala anthu a makhaliro akucena, mbamucita pinthu pinapangiza kuti ndimwe anthu adaperekeka kuna Mulungu, ¹² mu ndzidzi unadikhira imwe mbamukumbuka kubwera kwa ntsiku ya Yahova. Pa ntsiku ineyi, kudzulu kunadzafudzwa na malirimi a moto, pontho pinthu pya kudzulu na pya pa dziko yapantsi pinadzanyunguluka thangwi ya kupisa kakamwe!

Sentinela 15/12/06 tsa. 19 ndima 18

‘Ntsiku Ikulu ya Yahova Iri Dhuzi’

¹⁸ Ndi thangwi yace mpostolo Pedhru asatikulumiza toera ntsiku zonsene tikumbuke pya “kubwera kwa ntsiku ya Yahova.” Tinacita tani pyenepi? Njira ibodzi ndi ‘kukhala anthu a makhaliro akucena, mbaticita pinthu pinapangiza kuti ndife anthu adaperekeka kuna Mulungu.’ (2 Pedhru 3:11, 12) Kucita pinthu pyenepi, kunatiphedza toera kudikhira na ntima onsene ‘ntsiku ikulu ya Yahova.’ Fala Yacigerego idathumburuzwa kuti ‘kukumbuka’ isabveka “kucimbizisa.” Mwandimomwene ife nee tinakwanisa kucimbizisa kubwera kwa ntsiku ya Yahova. Mbwenye mu ndzidzi unadikhira ife ntsiku ineyi, ndzidzi unapita mwakucimbiza kakamwe tingakhala akuphatika m’basa ya Mulungu.—1 Akorinto 15:58.

Kusaka Mpfuma Zauzimu

(2 Pedhru 1:19) Natenepa, mafala a profesiya ndi akunyindirika kakamwe kwa ife, pontho imwe musacita mwadidi kuabvesera, ninga nyale inagaka pa mbuto ya cidima (mpaka kuca kunja, mbibuluka nyenyezi yakumacibese) m’mitima yanu.

Sentinela 15/11/08 tsa. 22 ndima 2

Ntsonga Zikulu za Tsamba ya Tiyago na Matsamba a Pedhru

2 Ped. 1:19—Kodi “nyenyezi yakumacibese” mbani, iyo yabuluka lini? Pontho ife tisadziwa tani pyenepi? “Nyenyezi yakumacibese” ndi Yezu Kristu ninga Mambo wa Umambo wa Mulungu. (Apok. 22:16) Mu caka 1914, Yezu alamuka ninga Mambo Waumesiya pakati pa pinthu pyonsene pidacita Mulungu, mbadziwisa kuca kwa ntsiku inango. Kucinjika kwace kwapangiza mwanyapantsi mbiri yace na Umambo wace, pontho pyenepi pyapangiza kunyindirika kwa profesiya ya Mulungu. Kunyerezera mwadidi mafala anewa kusatiphedza toera kubvesesa pinthu, mbatidziwa kuti Nyenyezi yakumacibese yabuluka kale.

(2 Pedhru 2:4) Mwandimomwene, Mulungu nee asiya kutcunyusa aanju adadawa, mbwenye aaponya mu Tartaro, mbaamangira ncidima cikulu kakamwe, mbaakoya toera atongwe.

Sentinela 15/11/08 tsa. 22 ndima 3

Ntsonga Zikulu za Tsamba ya Tiyago na Matsamba a Pedhru

2 Ped. 2:4—“Tartaro,” ninji, pontho aanju akukhonda bvera aponywa lini mwenemo?

Tartaro ndi mbuto yakulandana na kaidi yakuti isaponywa aanju akuipa, tayu anthu. Aanju anewa nkhabe dziwa cifuniro ca Mulungu, pontho nkhabe cidikhiro thangwi kwa ife iwo ali ncidima cikulu. Mulungu aponya aanju anewa akukhonda bvera mu Tartaro mu ntsiku za Nowa, pontho iwo ali mwenemo mpaka ntsiku inafuna iwo kufudzwa.