Wangisani Cikhulupiro Canu ku Mapikiro a Mulungu

1, 2. (a) Kodi pinthu pinadikhira ife pyasiyana tani na pinthu pinadikhira anthu azinji? (b) Tinadzadinganji mu nsolo uno?

YAHOVA asatipasa cidikhiro cakutsandzayisa kakamwe. Iye asapikira kuti anacenesa dzina yace na kucitisa kuti cifuno cace cicitike kudzulu na pa dziko yapantsi. (Mateo 6:9, 10) Pyenepi ndi pinthu pyakufunika kakamwe pinadikhira ife ntsogolo. Yahova asapikirambo umaso wakukhonda mala kwa ale anafuna kuenda kudzulu na ale anafuna kukhala pa dziko yapantsi. Pyenepi pinadzakhala pyakutsandzayisa kakamwe! (Jwau 10:16; 2 Pedro 3:13) Tisadikhira kuona kuti Yahova anadzapitiriza tani kutsogolera na kuphedza atumiki ace mu ntsiku zino zakumalisa.

² Bhibhlya isalonga kuti cikhulupiro ndi “cidikhiro candimomwene” ca pinthu pinadikhira ife. Pyenepi pisabveka kuti ale ali na cikhulupiro asanyindira mwakukwana kuti pinthu pidapikira Yahova pinadzakwanirisika. (Ahebere 11:1, NM) Munjira inango, anthu azinji lero asadikhira, pontho asafuna pinthu, mbwenye iwo asapenula khala pyenepi pinacitikadi. Mwacitsandzo, munthu panango asadikhira kuwina mapika anacemerwa loteria, mbwenye iye nee ali na cinyindiro consene cakuti anadzawina. Mu nsolo uno, tinadzadinga kuti tinacitanji toera kuwangisa cikhulupiro cathu ku mapikiro a Mulungu. Tinadzadingambo kuti kuwangisa cikhulupiro kunatiphedza tani lero.

 3. Thangwi yanji tisakhulupira kuti mapikiro a Mulungu anadzakwanirisika?

³ Nkhabepo munthu anabalwa na cikhulupiro. Toera kukhala na cikhulupiro, tisafunika kutawirisa kuti nzimu wakucena utsogolere mitima yathu. (Agalata 5:22) Nzimu wakucena unatiphedza toera kudziwa Yahova. Tingadzindikira kuti iye ndi wamphambvu zonsene na waudziwisi, tinadzanyindira kuti iye ali na luso yakucita pyonsene pidapikira iye. Yahova asalonga pya mapikiro ace ninga amala kale kukwanirisika, asalonga: ‘Pyonsene pyamala kucitika!’ (Lerini Apokalipse 21:3-6.) Tisadziwa kuti Yahova ndzidzi onsene asakwanirisa mapikiro ace. Iye ndi ‘Mulungu wakukhulupirika.’ Ineyi ndi thangwi inaticitisa kunyindira pyonsene pinatipanga iye thangwi ya ntsogolo.—Deuteronomyo 7:9.

 4. Ninji pikhadikhira atumiki a Mulungu a ndzidzi wakale?

⁴ Ahebere kapitulu 11 isapangiza madzina a amuna na akazi akukwana 16 akuti akhali na cikhulupiro cakuwanga ku mapikiro a Yahova. Iyo isalongambo pya anthu anango azinji adasimba Yahova ‘thangwi ya cikhulupiro cawo.’ (Ahebere 11:39) Onsene akhadikhira ‘dzindza’ ikhadapikira Yahova. Iwo akhadziwa kuti ‘dzindza’ ineyi mbidafudza anyamalwa onsene a Mulungu na kucitisa dziko yapantsi kukhala pontho paradhizu. (Genesi 3:15) Atumiki anewa a Mulungu akhali na cikhulupiro cakuwanga cakuti Yahova anadzaalamusa muli akufa. Mwandimomwene, iwo nee asadikhira kulamuswa toera kuenda kakhala kudzulu, thangwi Yezu nee akhadacita masasanyiro pa ndzidzi unoyu. (Agalata 3:16) M’mbuto mwace, iwo akhadikhira kukhala mu paradhizu yakubalika kakamwe pa dziko yapantsi.—Masalmo 37:11; Izaiya 26:19; Ozeya 13:14.

5, 6. Kodi Abhrahamu na banja yace akhali na cidikhiro cipi? Ninji cidaaphedza toera kupitiriza kukhala na cikhulupiro cakuwanga? (Onani cithundzithundzi cakutoma.)

⁵ Lemba ya Ahebere 11:13 isalonga thangwi ya atumiki anewa akukhulupirika a Yahova: ‘Onsene afa mbaciri na cikhulupiro, maseze nee aona kukwanirisika kwa pinthu pidapikirwa iwo; mbwenye iwo apiona na kutali mbapikhulupira.’ Iwo akhadikhira dziko ipswa mbanyerezera kukhala mwenemu. M’bodzi wa iwo akhali Abhrahamu. Yezu alonga kuti Abhrahamu ‘akomerwa kakamwe na kuona’ ndzidzi unoyu. (Jwau 8:56) Sara, Izaki, Yakobe na anango azinji asadikhirambo Umambo, wakuti ‘mesiri wace ndi Mulungu,’ unadzatonga dziko yonsene yapantsi.—Ahebere 11:8-11.

⁶ Kodi Abhrahamu na banja yace apitiriza tani kukhala na cikhulupiro cakuwanga? Iwo apitiriza kupfundza pya Yahova. Midzidzi inango, Mulungu akhalonga na iwo mu kuphatisira aanju, masomphenya na ndoto. Panango iwo apfundzambo kubulukira kwa anthu akukhulupirika peno malemba akale. Abhrahamu na banja yace cipo aduwala mapikiro a Mulungu, pontho akhakomerwa kakamwe na kuanyerezera mwacidikhodikho. Ninga maphindu, iwo akhali na cinyindiro cakuti Yahova mbadakwanirisa mapikiro ace. Natenepa, iwo akhala akukhulupirika m’midzidzi yakunentsa peno pa kutcingwa.

 7. Ninji pinatipasa Yahova toera kuwangisa cikhulupiro cathu? Tisafunika kucitanji?

⁷ Ninji cinafuna kutiphedza toera kupitiriza kukhala na cikhulupiro cakuwanga? Yahova asatipasa Bhibhlya toera kutipfundzisa pya mapikiro ace a ntsogolo. Kubulukira m’Bhibhlya iye asatipangiza pinafuna ife toera kukhala akutsandzaya. Na thangwi ineyi tisafunika kuleri Bhibhlya ntsiku zonsene na kucita pinalonga iyo. (Masalmo 1:1-3; lerini Machitiro 17:11.) Yahova asatipasambo ‘cakudya pa ndzidzi wakuthema’ kubulukira kwa ‘m’bandazi wakukhulupirika na wandzeru.’ (Mateo 24:45) Ninga atumiki a Yahova a ndzidzi wakale, ife tisafunika kuleri mwakukhonda phonya pya mapikiro a Mulungu na kuanyerezera mwacidikhodikho. Pyenepi pinadzatiphedza toera kukhala akukhulupirika kwa Mulungu na kupitiriza kudikhira ndzidzi wakuti Umambo wa Mulungu unadzatonga dziko yonsene.

 8. Kodi phembero inawangisa tani cikhulupiro cathu?

⁸ Ndi cinthu cipi cinango cidaphedza atumiki a Yahova a ndzidzi wakale toera kupitiriza kukhala na cikhulupiro cakuwanga? Iwo aphemba Yahova toera kuaphedza, pidaona iwo kuti iye atawira maphembero awo, cikhulupiro cawo cadzakhala cakuwanga. (Nehemiya 1:4, 11; Masalmo 34:4, 15, 17; Danyele 9:19-21) Munjira ibodzi ene, tingaona kuti Yahova asatawira maphembero athu na kutipasa pinafuna ife pa ndzidzi wakuthema, cikhulupiro cathu cisakhala cakuwanga. (Lerini 1 Jwau 5:14, 15.) Tisafunikambo ‘kupitiriza kuphemba’ Yahova toera atipase nzimu wace wakucena kuti tikhale na cikhulupiro cakuwanga.—Luka 11:9, 13.

 9. Ndi pinthu pipi pingasi pinafunika ife kulonga pakucita phembero?

⁹ Tingacita phembero kuna Yahova, nee tisafunika basi ene kumphemba toera kutipasa pinafuna ife. Tisafunikambo kupereka takhuta kuna iye na kunsimba ntsiku zonsene. Kusiyapo pyenepi, iye acita pinthu pizinji kakamwe pyakudzumatirisa! (Masalmo 40:5) Atumiki a Yahova asaphembambo kuna iye toera aphedze abale na alongo pa dziko yonsene. Mwacitsandzo, ‘tisakumbuka ale akuti ali nkaidi.’ Tisaphembambo Yahova toera aphedze ‘ale anatsogolera.’ Tingaona kuti Yahova asatawira maphembero athu, cikhulupiro cathu cisawanga mbatikhala na uxamwali wakuwanga na iye.—Ahebere 13:3, 7.

10. Ninji cidaphedza anthu azinji toera kukhala acipapo na akukhulupirika kuna Mulungu?

¹⁰ Pa Ahebere kapitulu 11, mpostolo Paulu alonga: ‘Akazi anango atambira anyakufa awo, adalamuswa muli akufa. Anthu anango atawira kusanyiwa, mbakhonda kupulumuswa, toera aone kulamuka muli akufa kwa mbiri kakamwe.’ (Ahebere 11:35) Anthu azinji apirira mayesero mbakhala akukhulupirika kuna Mulungu thangwi akhakhulupira kakamwe pikiro ya kulamuswa kwa anyakufa idacita Mulungu. Iwo akhadziwa kuti ntsogolo, Yahova anaalamusa muli akufa toera kukhala maso pa dziko yapantsi kwenda na kwenda. Nyerezerani pya Nabote na Zakariya. Thangwi yakubvera Mulungu iwo amenywa na miyala mpaka kufa. (1 Amambo 21:3, 15; 2 Pya dziko ya Israele 24:20, 21) Dhanyeli aponywa ndjenje ya nkhalamu zakuti zikhali na njala kakamwe, pontho axamwali ace aponywa ndjenje ya moto. Iwo akhadatonga kufa m’mbuto mwakukhonda kukhala akukhulupirika kuna Yahova. Amuna anewa akhakhulupira mwakukwana kuti Yahova mbadaapasa nzimu wakucena na kuaphedza toera kupirira nyatwa zenezi.—Danyele 3:16-18, 20, 28; 6:13, 16, 21-23; Ahebere 11:33, 34.

11. Ndi mayesero api adathimbana na aprofeta angasi thangwi ya cikhulupiro cawo?

¹¹ Aprofeta azinji, ninga Mikeya na Yeremiya akhasingirirwa peno kuikhwa nkaidi. Anango, ninga Eliya, ‘andzendza-ndzendza nthando, m’mapiri, m’mphako na m’madjenje a miyala.’ Onsene apirira mayesero mbakhala akukhulupirika kwa Mulungu thangwi akhali na “cidikhiro candimomwene ca pinthu pinadikhirwa.”—Ahebere 11:1, NM, 36-38; 1 Amambo 18:13; 22:24-27; Yeremiya 20:1, 2; 28:10, 11; 32:2.

12. Mbani adapangiza citsandzo cadidi kakamwe wakuti tisafunika kuntowezera? Ninji cidamphedza toera kupirira mayesero?

¹² Yezu Kristu apirira mayesero akunentsa kakamwe kupiringana onsene, mbakhala wakukhulupirika kwa Yahova. Ninji cidamphedza toera kupirira? Paulu alonga: “Thangwi ya kutsandzaya kukhadikhira iye, apirira nyatwa pamuti wakusikimiza, mbapwaza manyadzo, na akhala ku nkono wa madyo wa mpando wa Mulungu.” (Ahebere 12:2, NM) Buluka penepo, Paulu awangisa Akristu toera “kunyerezera mwacidikhodikho” citsandzo ca Yezu. (Lerini Ahebere 12:3, NM.) Ninga Yezu, Akristu azinji a pyaka dzana yakutoma aphiwa thangwi akhali akukhulupirika kwa Yahova. M’bodzi wa iwo akhali Antipa. (Apokalipse 2:13) Akristu anewa akhadatambira kale nkhombo zawo, mwakusiyana na atumiki anango a Mulungu adakhala maso nduli mwa iwo akuti asadikhira kukhala maso pa dziko yapantsi. (Ahebere 11:35) Pidapita ndzidzi ungasi, pidamala kukhazikiswa Yezu ninga Mambo mu caka 1914, Akristu akudzodzwa angafa asalamuswa toera kukhala na umaso wakukhonda kufa kudzulu, pontho iwo anadzatonga pabodzi na Yezu madzindza a anthu.—Apokalipse 20:4.

13, 14. Ndi mayesero api adapirira Rudolf Graichen? Ninji pidamphedza toera kukhala wakukhulupirika kuna Mulungu?

¹³ Atumiki azinji a Mulungu asatowezera citsandzo ca Yezu. Iwo asanyerezera mwacidikhodikho mapikiro a Mulungu mbakhala akukhulupirika pakuthimbana na mayesero. Dingani citsandzo ca Rudolf Graichen, adabalwa ku Alemanya mu caka 1925. Pikhali iye mphale, anyakubalace alemba pithundzithundzi pya mbiri za Bhibhlya pa mapfufu a nyumba yawo. Iye alonga: “Cithundzithundzi cibodzi cikhapangiza binzi na bira, mbuzi na nyalugwe, mwana ng’ombe na nkhalamu, pinyama pyonsene mbapikhala mwantendere, mbapitsogolerwa na mphale wang’ono.” (Izaiya 11:6-9) Pyenepi pyaphedza Rudolf toera kunyerezera kakamwe pya paradhizu pa dziko yapantsi na kuuwangisa cikhulupiro cace. Ninga maphindu, iye apitiriza kukhala wakukhulupirika kuna Yahova ngakhale mu ndzidzi ukhatcingwa iye mu pyaka pizinji na nsoka wa Nazi, buluka penepo, mbatcingwambo na nsoka wa Comunista wa Alemanya Oriental.

¹⁴ Rudolf apirira mayesero mu pyaka pizinji. Mai wace alowa na utenda unango ku mazunde a ku Alemanya. Babace akorondza tsamba idapangiza kuti nee akhafunabve kukhala Mboni ya Yahova. Mbwenye Rudolf apitiriza kukhala na cikhulupiro cakuwanga. Pidabuluswa iye nkaidi, atumikira ninga muyang’aniri wa cisa. Buluka penepo, acemerwa toera kuenda ku Xikola ya Gileade, mbaphembwa toera kuenda katumikira ku Chile, kwakuti atumikira pontho ninga muyang’aniri wa cisa. Kweneku iye amanga banja na mulongo anacemerwa Patsy wakuti akhali misionaryo. Mbwenye mwakutsukwalisa, pidapita caka cibodzi, nkhombwani wace wacikazi alowa. Pidapita ndzidzi ungasi, Patsy alowambo. Iye akhali basi ene na pyaka 43 pyakubalwa. Mwakukhonda tsalakana nyatwa zenezi zonsene, Rudolf apitiriza kutumikira Yahova. Ngakhale pidagwesera iye mbathimbana na nyatwa zaungumi, iye atumikira ninga mpainiya wa ndzidzi onsene, pontho ninga nkulu wa mpingo. Tinakwanisa kuleri mbiri yace ya umaso mu A Sentinela ya 1.° de Agosto de 1997, tsamba 20-25.^[1] (Onani cidzindikiro kunkhomo kwa nsolo uno.)

15. Perekani citsandzo ca abale na alongo a lero akuti asatumikira Yahova mwakutsandzaya maseze atcingwe.

¹⁵ Lero, abale na alongo azinji asatumikira Yahova mwakutsandzaya maseze atcingwe kakamwe. Azinji a iwo ali nkaidi ku Eritreya, Singapura na ku Koreya wa Kubangwe thangwi yakukhonda ‘kukwata supada.’ (Mateo 26:52) Mwacitsandzo, Isaac, Negede na Paulos ali nkaidi ku Eritreya mu pyaka pyakupiringana 20! Kweneku iwo asatsalakanwa mwakuipa kakamwe. Pyaka pyenepi pyonsene, iwo nee akwanisa kumanga banja peno kutsalakana anyakubalawo. Mwakukhonda tsalakana pyenepi, iwo ndi akukhulupirika kuna Yahova, pontho cikhulupiro cawo ndi cakuwanga. Ngakhale anyakuonera kaidi cincino asaalemedza. Mu site yathu ya jw.org musagumanika cithundzithundzi ca abale anewa. Iwo ali akutsandzaya maseze akuthabuka.

16. Kodi cikhulupiro cakuwanga cinakuphedzani toera kucitanji?

¹⁶ Atumiki azinji a Yahova nee anaikhwa nkaidi peno kutsalakanwa mwakuipa ninga abale adamala kulongwa. Mbwenye azinji asathabuka na utcerengi, cidengwa cacibaliro peno nkhondo. Anango asatowezera citsandzo ca Abhrahamu, Izaki, Yakobe na Mose mbasiya kubvekera peno kupfuma toera kuikha manyerezero awo mu kutumikira Yahova. Ninji cinaphedza abale na alongo toera kupitiriza kutumikira Yahova mwakutsandzaya? Ndi ufuni wawo kuna iye na cikhulupiro cawo cakuwanga ku mapikiro ace. Iwo asadziwa kuti Mulungu anadzapasa nkhombo atumiki ace akukhulupirika na umaso wakukhonda mala mu dziko ipswa, yakuti nkhabe kudzaonekabve kusowa cilungamo.—Lerini Masalmo 37:5, 7, 9, 29.

17. Kodi munapitiriza tani kukhala na cikhulupiro cakuwanga? Tinadzadinganji mu nsolo unatowera?

¹⁷ Mu nsolo uno, taona kuti cikhulupiro “ndi cidikhiro candimomwene ca pinthu pinadikhirwa.” Toera kukhala na cikhulupiro, tisafunika kucita phembero kuna Yahova na kupitiriza kunyerezera mwacidikhodikho mapikiro ace. Buluka penepo, tinakwanisa kupirira mayesero onsene. Mu nsolo unatowera tinadzadinga kuti pisabvekanji kukhala na cikhulupiro.