Yahova Ndzidzi Onsene Ali na Imwe

 1. Thangwi yanji atumiki a Yahova midzidzi inango asapibva kuti ali okhene?

AZINJI a ife midzidzi inango tisakhala akutsukwala. Anango asakhala akutsukwala mu ndzidzi wakucepa, mbwenye anango asakhala akutsukwala mu ndzidzi uzinji. Panango ife tinakwanisa kupibva kuti tiri tekhene maseze tikhale pabodzi na anthu anango. Anango asanentseka toera kucita uxamwali na abale na alongo mu mpingo upswa. Anango asakhala pabodzi na acibale awo mbacita pinthu pizinji pabodzi, mbwenye angaenda kakhala ku mbuto inango asapibva kuti ali okhene. Anango asapibva kuti ali okhene thangwi yakuferwa na nyakufunika wawo. Abale na alongo anango, makamaka ale akuti apfundza kwene cincino undimomwene asapibva kuti ali okhene angatcingwa na acibale peno na axamwali awo akuti nee asatumikira Yahova.

 2. Ndi mibvundzo ipi inafuna ife kutawira?

² Yahova asadziwa, pontho asabvesesa pinthu pyonsene pinathimbana na ife. Tingakhala akutsukwala, Yahova asadziwa pyenepi, pontho iye asafuna kutiphedza toera kukunda nyatwa ineyi. Kodi Yahova asatiphedza tani? Kodi tisafunika kucitanji toera tikhonde kupibva kuti tiri tekhene? Pontho tinaphedza tani anango akuti asapibva kuti ali okhene? Tendeni tione matawiro a mibvundzo ineyi.

 3. Kodi Yahova atsalakana tani Eliya?

³ Yahova asafuna kuti atumiki ace onsene akhale akutsandzaya. Iye ali dhuzi na m’bodzi na m’bodzi wa ife, pontho asadziwa nyatwa zinathimbana na ife. (Masal. 145:18, 19) Onani njira idatsalakana Yahova mprofeta Eliya mu ndzidzi ukhali iye wakutsukwala. Mamuna unoyu wakukhulupirika akhala m’maso mu ndzidzi wakunentsa kakamwe mu Izraeli. Anthu a cidzo a mu Izraeli akuti nee akhalambira Yahova akhatcinga atumiki a Yahova, pontho iwo akhafuna kupha mprofeta Eliya. (1 Ama. 19:1, 2) Cinthu cinango cidatsukwalisa Eliya ndi cakuti iye akhanyerezera kuti akhadasala ekhene ninga mprofeta wa Yahova. (1 Ama. 19:10) Mbwenye Mulungu acita pinthu mwakucimbiza toera kuphedza Eliya. Iye atuma anju toera kupanga Eliya kuti iye nee akhali ekhene, pontho toera kumpanga kuti pakhali na Aizraeli anango akuti akhapitiriza kutumikira Yahova mwakukhulupirika.—1 Ama. 19:5, 18.

 4. Kodi lemba ya Marko 10:29, 30 isapangiza tani kuti Yahova asatsalakana kakamwe ale adaluza ciphedzo ca acibale awo na axamwali awo akuti nee asatumikira Yahova?

⁴ Yahova asadziwa kuti anango a ife asafunika kuluza pinthu pizinji toera kuntumikira. Cibodzi mwa pinthu pyenepi ndi ciphedzo cikhatambira ife kuna acibale athu na axamwali athu akuti nee asatumikira Yahova. Panango ndi thangwi ineyi idacitisa mpostolo Pedhru kubvundza Yezu kuti: “Ife tasiya pinthu pyonsene mbatikutowerani; mphapo ninji cinafuna kudzapaswa ife?” (Mat. 19:27) Yezu apanga anyakupfundzace kuti abale na alongo awo mu mpingo mbadakhala ninga acibale awo. (Lerini Marko 10:29, 30.) Pontho Yahova, Babathu wakudzulu apikira kuti anaphedza ale anasankhula kuntumikira. (Masal. 9:10) Onani pinthu pingasi pisafunika imwe kucita toera mukwanise kuphedzwa na Yahova mungapibva kuti muli mwekhene.

 5. Thangwi yanji ndi pyakufunika kunyerezera mwadidi njira inakuphedzani Yahova?

⁵ Nyerezerani mwadidi njira zinakuphedzani Yahova. (Masal. 55:22) Pyenepi pinakuphedzani toera kuona kuti nee muli mwekhene. Mulongo unango wakuti adzati kumanga banja anacemerwa Carol,b wakuti acibale ace nee asatumikira Yahova alonga: “Ndinganyerezera njira zinandiphedza Yahova toera kupirira nyatwa zanga, pyenepi pisandiphedza toera kuona kuti nee ndiri ndekhene. Pontho pyenepi pisandipasa cinyindiro cakuti Yahova anapitiriza kundiphedza.”

 6. Lemba ya 1 Pedhru 5:9, 10 inaphedza tani ale akuti asapibva kuti ali okhene?

⁶ Nyerezerani ciphedzo cinapereka Yahova kuna abale na alongo akuti asapibva kuti ali okhene. (Lerini 1 Pedhru 5:9, 10.) M’bale Hiroshi wakuti amala pyaka pizinji mbatumikira ekhene Yahova m’banja mwawo alonga: “Ine ndisakwanisa kuona kuti abale na alongo mu mpingo asathimbana na nyatwa zakusiyana-siyana. Ife tisadziwa kuti tonsene tisawangisira toera kutumikira Yahova, pontho pyenepi pisaphedzambo ale akuti ali okhene mu undimomwene.”

 7. Kodi kucita phembero kusakuphedzani tani?

⁷ Ndzidzi onsene citani phembero, lerini Bhibhlya na gumanikani pa misonkhano. Imwe musafunika kupanga Yahova pinthu pyonsene pinakudzudzumisani. (1 Ped. 5:7) Massiel alonga: “Cinthu cibodzi cidandiphedza kakamwe toera ndikhonde kupibva kuti ndiri ndekhene ndi kucita phembero kuna Yahova ndzidzi onsene. Iye akhali ninga Baba kuna ine, pontho ndikhacita phembero kazinji kene pa ntsiku mbandimpanga pinthu pyonsene pikhandinentsa.” Mu ndzidzi udasankhula mulongo unoyu kutumikira Yahova, iye akhapibva kuti ali ekhene thangwi acibale ace nee akhatumikira Yahova.

 8. Kodi kuleri Bhibhlya na kunyerezera mwacidikhodikho pinaleri imwe kusakuphedzani tani?

⁸ Lerini Bhibhlya ntsiku zonsene, pontho nyerezerani mwacidikhodikho pitsandzo pya m’Bhibhlya pinapangiza kuti Yahova asakufunani. Mulongo Bianca wakuti akhatsalakanwa mwakuipa na acibale ace alonga: “Kuleri Bhibhlya na kunyerezera mwacidikhodikho pitsandzo pya atumiki a Yahova akuti athimbanambo na nyatwa ninga zanga kwandiphedza kakamwe.” Abale na alongo anango asakoya malemba m’manyerezero akuti asaabalangaza kakamwe ninga Masalmo 27:10 na Izaiya 41:10. Anango asabvesera ma audhyu mu ndzidzi unakhunganyika iwo misonkhano peno mu ndzidzi unaleri iwo Bhibhlya, pontho pyenepi pisaaphedza toera akhonde kupibva kuti ali okhene.

 9. Kodi kugumanika pa misonkhano kusakuphedzani tani?

⁹ Wangisirani toera kugumanika pa misonkhano mwakukhonda phonya. Imwe munaphindula kakamwe na misonkhano ineyi, pontho munakwanisa kudziwana na abale na alongo anu. (Aheb. 10:24, 25) Massiel adalongwa mu ndima 7 alonga: “Maseze ndikhali wamanyadzo kakamwe, ine ndikhawangisira toera kugumanika pa misonkhano yonsene na kupereka matawiro pa misonkhano ineyi. Pyenepi pyandiphedza toera kukhala cifupi na abale na alongo mu mpingo.”

10. Thangwi yanji ndi pyakufunika kucita uxamwali na abale na alongo mu mpingo?

¹⁰ Citani uxamwali na Akristu akukhulupirika. Citani uxamwali na abale na alongo akuti anakuphedzani toera kupfundza pizinji, mwakukhonda tsalakana thunga yawo peno makhaliro awo. Bhibhlya isatikumbusa kuti udziwisi uli na ‘ankhalamba.’ (Yobe 12:12) Ankhalamba anakwanisambo kupfundza pizinji kuna aphale na atsikana akukhulupirika. Yonatani akhali nkulu kakamwe kupiringana Dhavidhi, mbwenye pyenepi nee pyapingiza uxamwali wawo. (1 Sam. 18:1) Dhavidhi na Yonatani akhaphedzana toera kutumikira Yahova mwakukhonda tsalakana nyatwa zizinji. (1 Sam. 23:16-18) Mulongo Irina wakuti ndiye basi ene Mboni ya Yahova m’banja mwawo alonga: “Abale na alongo anakwanisa kukhala ninga anyakubala athu peno acibale athu. Yahova anakwanisa kuaphatisira toera kutiphedza.”

11. Tisafunika kucitanji toera kukhala na axamwali a ponda ndipondembo?

¹¹ Kucita axamwali apswa ndi kwakunentsa, makamaka khala ndimwe wamanyadzo. Mulongo wamanyadzo anacemerwa Ratna wakuti apfundza undimomwene mwakukhonda tsalakana kutcingwa alonga: “Ine ndadzindikira kuti ndikhafunika ciphedzo ca abale na alongo mu mpingo.” Midzidzi inango pisakhala pyakunentsa toera kupanga munthu mabvero anu, mbwenye mungacita pyenepi imwe munakwanisa kukhala xamwali wa ponda ndipondembo wa munthu unoyu. Axamwali anu asafuna kukuphedzani, mbwenye imwe musafunika kuapanga pinthu pinathimbana na imwe.

12. Kodi basa yakumwaza mphangwa inakuphedzani tani toera kucita axamwali adidi?

¹² Njira ibodzi yadidi kakamwe toera kucita axamwali ndi kumwaza mphangwa pabodzi na abale na alongo athu. Carol adalongwa mu ndima 5 alonga: “Ine ndakhala na axamwali azinji thangwi yakumwaza mphangwa kazinji kene na alongo na kucita mabasa anango auzimu. Yahova asandiphedza mu pyaka pizinji mukuphatisira axamwali anewa. Kucita uxamwali na abale na alongo akukhulupirika ndi pyakufunika kakamwe. Yahova asaphatisira axamwali anu anewa toera kukuphedzani mu ndzidzi unapibva imwe kuti muli mwekhene.—Mis. 17:17.

13. Ndi basa ipi iri na abale na alongo onsene mu mpingo?

¹³ Abale na alongo onsene mu mpingo ali na basa yakupangiza ufuni kuna unango na ndzace na kukhazikisa ntendere toera onsene akhale akutsandzaya. (Juwau 13:35) Pinthu pinacita ife na pinalonga ife pinakwanisa kuwangisa kakamwe abale athu. Onani pidalonga mulongo m’bodzi: “Pidapfundza ine undimomwene, abale na alongo mu mpingo adzakhala ninga acibale anga. Ine nee mbidakwanisa kukhala m’bodzi wa Mboni za Yahova mbidasowa ciphedzo cawo.” Munaphedza tani ale akuti acibale awo nee ali mu undimomwene toera kuona kuti ndi akufunika mu mpingo?

14. Musafunika kucitanji toera mukwanise kucita uxamwali na abale na alongo apswa?

¹⁴ Yeserani kucita uxamwali na abale na alongo apswa. Ife tinakwanisa kucita pyenepi tingaatambira mwadidi mu mpingo. (Aroma 15:⁠7) Mbwenye ife tisafunika kucita pizinji kupiringana basi ene kuamwanyika. Thangwi mukupita kwa ndzidzi ife tisafuna kukhala axamwali awo a ponda ndipondembo. Natenepa pangizani kuti musatsalakana kakamwe m’bodzi na m’bodzi wa iwo. Yeserani kubvesesa nyatwa zinathimbana na iwo, mbwenye calirani kuacita mibvundzo yakuti inaapasa manyadzo. Kuna anango pisakhala pyakunentsa kulonga mabvero awo, natenepa lekani kuakakamiza kuti alonge. M’mbuto mwace, aciteni mibvundzo yakuti inaaphedza toera kukhala akusudzuka, pontho bveserani mwakupirira matawiro anapereka iwo. Mwacitsandzo, imwe munakwanisa kuabvundza kuti adziwa tani undimomwene.

15. Kodi Akristu akukola mwauzimu anaphedza tani anango mu mpingo?

¹⁵ Ife tonsene, makamaka akulu a mpingo na abale na alongo akukola mwauzimu tingatsalakanana unango na ndzace, abale na alongo onsene anakwanisa kuthambaruka mwauzimu. Melissa adakuzwa mu undimomwene na mai wace alonga: “Ndisapereka takhuta kakamwe kuna abale akuti akhali ninga anyakubala anga, thangwi iwo amala ndzidzi uzinji na ine, pontho anditsalakana mu pyaka pizinji. Ndzidzi onsene pakhaoneka munthu toera kundibvesera ndingafuna kulonga pya ncifuwa mwanga.” M’bale anacemerwa Mauricio atsukwala mu ndzidzi udasiya mpfundzisi wace wa Bhibhlya undimomwene. Natenepa iye alonga: “Akulu a mpingo anditsalakana mwadidi, pontho pyenepi pyandiphedza kakamwe. Ndzidzi onsene iwo akhacedza na ine. Iwo akhamwaza mphangwa pabodzi na ine, akhandipanga pinthu pidapfundza iwo m’Bhibhlya, pontho tikhacita masendzekero pabodzi.” Lero, Melissa na Mauricio asatumikira Yahova m’basa ya ndzidzi onsene.

16-17. Ndi pinthu pipi pinango pisafunika ife kucita toera kuphedza anango mu mpingo?

¹⁶ Phedzani anango. (Agal. 6:10) Leo, wakuti asatumikira ninga misionaryo ku dziko yakutali na acibale ace alonga: “Kutsalakanwa mwadidi ndi cinthu cakufunika kakamwe. Ndisakumbuka ntsiku idacita ine cidengwa na karu. Pidafika ine kunyumba pa ntsiku ineyi ndikhali wakutsukwala kakamwe. Mbwenye banja ibodzi yandicemera toera ndiende kadya kunyumba kwawo. Ine nee ndisakumbuka pinthu pidadya ife, mbwenye ndisakumbuka kuti iwo andibvesera mwadidi mu ndzidzi ukhaapanga ine pinthu pidandicitikira. Njira idanditsalakana iwo yandiwangisa kakamwe.”

¹⁷ Ife tonsene tisakomerwa kakamwe na misonkhano ya cisa na ya gawo, thangwi tisacedza na anango mu ndzidzi uzinji thangwi ya pinthu pidapfundza ife pa misonkhano ineyi. Mbwenye Carol adalongwa mu ndima za nduli alonga: “Ine nee ndikhatsandzaya na misonkhano ya cisa na ya gawo.” Thangwi yanji? Iye athimiza: “Maseze ine ndikhali na abale na alongo azinji kakamwe pa misonkhano ineyi, kazinji kene iwo akhacedza na mabanja awo. Pyenepi pikhandicitisa kupibva kuti ndiri ndekhene.” Kuna anango pisakhala pyakunentsa toera kutoma kugumanika pa nsonkhano wa gawo peno wa cisa angaferwa na ndzawo wa m’banja. Kodi alipo anadziwa imwe wakuti asathimbana na nyatwa ineyi? Khala imwe musadziwa munthu unoyu, mphembeni toera mukhale naye pabodzi na banja yanu pa misonkhano ineyi.

18. Tinapangiza tani kuti tisaphatisira uphungu unagumanika pa 2 Akorinto 6:11-13 tingacemera abale na alongo m’manyumba mwathu?

¹⁸ Kucedza pabodzi. Cemerani abale na alongo akusiyana-siyana toera kudzacedza na imwe makamaka ale akuti asapibva kuti ali okhene. Ife tisafunika ‘kufungula mitima yathu,’ makamaka kuna anthu anewa anapibva kuti ali okha. (Lerini 2 Akorinto 6:11-13.) Melissa adalongwa mu ndima za nduli alonga: “Ndzidzi onsene ife tikhatsandzaya kakamwe tingacemerwa na abale na alongo m’manyumba mwawo toera kacedza pabodzi na mabanja awo.” Kodi pana m’bale peno mulongo mu mpingo mwanu wakuti munakwanisa kuncemera kunyumba kwanu?

19. Ndi ndzidzi upi wakuti ndi wakufunika kakamwe kucemera abale na alongo athu kunyumba kwathu toera kucedza nawo pabodzi?

¹⁹ Midzidzi inango abale na alongo athu asatsandzaya kakamwe tingacedza nawo pabodzi. Kuna anango pisakhala pyakunentsa kukhala pabodzi na acibale awo akuti nee ndi Mboni za Yahova mu ndzidzi unacita iwo maphwando awo a kudziko. Anango asakhala akutsukwala kakamwe ingafika ntsiku idafa nyakufunika wawo. Tingacemera abale na alongo anewa kunyumba kwathu toera kucedza nawo pabodzi tinapangiza kuti ‘tisaatsalakana mwadidi.’—Afil. 2:20.

20. Mafala a Yezu anagumanika pa Mateu 12:48-50 anatiphedza tani tingapibva kuti tiri tekhene?

²⁰ Pana mathangwi mazinji akuti anacitisa m’bale peno mulongo kupibva kuti ali ekhene. Mbwenye ife cipo tisafunika kuduwala kuti Yahova asadziwa nyatwa zinathimbana na ife. Kazinji kene, iye asaphatisira abale na alongo athu toera kutiphedza. (Lerini Mateu 12:48-50.) Munjira inango, ife tingawangisira toera kuphedza abale na alongo athu tinapangiza kuti tisapereka takhuta kuna Yahova thangwi ya masasanyiro anewa akutipasa abale na alongo. Mwakukhonda tsalakana nyatwa zinathimbana na ife, ife nee tisafunika kupibva kuti tiri tekhene thangwi Yahova ndzidzi onsene ali na ife.