Mibvundzo Inacitwa Na Anyakuleri

Tendeni tione kuti Bhibhlya inatawira tani mibvundzo ineyi.

Lemba ya Mabasa 24:15 isalonga kuti kunadzaoneka “kulamuswa muli akufa kwa anthu akulungama na akukhonda kulungama.” Anthu akulungama ndi ale akuti mbadzati kufa akhabvera Mulungu, natenepa madzina awo alembwa m’bukhu ya umaso. (Mal. 3:16) Mbwenye anthu akukhonda kulungama asaphataniza ale adafa mbadzati kukhala na mwai wakupfundza pya Yahova, natenepa madzina awo nee alembwa m’bukhu ya umaso.

Lemba ya Juwau 5:28, 29 isalonga misoka miwiri ya anthu inalongwambo pa Mabasa 24:15. Yezu alonga kuti ‘ale adacita pinthu pyadidi anadzalamuka toera kukhala m’maso, pontho ale adacita pinthu pyakuipa anadzalamuka toera kutongwa.’ Anthu akulungama ndi ale akhacita pinthu pyadidi mbadzati kufa. Iwo anadzalamuswa toera kukhala m’maso thangwi madzina awo asapitiriza m’bukhu ya umaso. Anthu akukhonda kulungama ndi ale akhacita pinthu pyakuipa mbadzati kufa. Iwo anadzalamuswa muli akufa toera kutongwa. Nakuti madzina awo nee alembwa m’bukhu ya umaso, iwo anadzapaswa ndzidzi toera kutongwa peno kuoniwa khala anacinja makhaliro awo peno nkhabe. Mu ndzidzi unoyu, iwo anadzakhala na mwai wakupfundza pya Yahova toera madzina awo alembwe m’bukhu ya umaso.

Lemba ya Apokalipse 20:12, 13 isafokotoza kuti onsene anafuna kudzalamuswa muli akufa asafunika kubvera ‘pinthu pidalembwa m’mipukutu,’ yakuti ndi mitemo ipswa inafuna kutipasa Mulungu n’dziko ipswa. Anthu anafuna kukhonda bvera mitemo ineyi anadzafudzwa na Yahova.—Iza. 65:20.

Lemba ya Danyele 12:2 ikhadalonga mwanyapantsi kuti anango mwa anthu adafa anadzalamuswa ‘toera akhale m’maso kwenda na kwenda, anango toera apaswe manyadzo na anango toera aidiwe kwenda na kwenda.’ Vesi ineyi isalonga pya kutongwa kwakumalisa kwa anthu anafuna kulamuswa muli akufa. Iwo anadzatambira “umaso wa kwenda na kwenda” peno “anadzaidiwa kwenda na kwenda.” Natenepa kunkhomo kwa pyaka 1.000, anango anadzatambira umaso wakukhonda mala; mbwenye anango anadzafudzwa mbakhonda kuonekabve kwenda na kwenda.—Apok. 20:15; 21:3, 4.

Onani citsandzo ici: Misoka ineyi miwiri ya anthu anafuna kulamuswa muli akufa inakwanisa kulandaniswa na anthu anafuna kwenda kakhala n’dziko inango. Anthu akulungama ndi ninga ale anatawiriswa kukhala n’dziko inango mwaufulu mbaphata basa na kucita pinthu pinango. Mbwenye anthu akukhonda kulungama ndi ninga ale anatawiriswa kukhala n’dziko inango mu ndzidzi wakucepa. Anthu anewa asafunika kupangiza makhaliro adidi toera akwanise kupitiriza kukhala n’dziko ineyi. Munjira ibodzi ene, anthu akukhonda kulungama anafuna kudzalamuswa muli akufa anadzafunika kubvera mitemo ya Yahova mbapangiza kuti ndi akulungama toera apitirize kukhala m’Paraizu. Natenepa, mwakukhonda tsalakana khala anthu anewa anakhala ndzidzi uzinji n’dziko ineyi peno nkhabe, anango mwa iwo anatawiriswa kupitiriza kukhala n’dziko ineyi mwaufulu, mbwenye anango anabuluswa. Cisankhulo ceneci cinacitwa mwakubverana na makhaliro anafuna kupangiza iwo n’dziko ineyi. Munjira ibodzi ene, cisankhulo cakumalisa kuna anthu anafuna kulamuswa muli akufa cinacitwa mwakubverana na cikhulupiro cawo na makhaliro anafuna kupangiza iwo n’dziko ipswa.

Yahova ndi Mulungu waufuni na waulungami. (Deut. 32:4; Masal. 33:5) Iye anadzapangiza ufuni unoyu mukulamusa muli akufa anthu akulungama na anthu akukhonda kulungama. Mbwenye iye anadzafuna kuti anthu onsene abvere mitemo yace yakusiyanisa pyadidi na pyakuipa. Basi ene ale ananfuna na kubvera mitemo yace anadzatawiriswa kukhala m’maso kwenda na kwenda n’dziko ipswa.