අප්‍රියෙල් 19, බ්‍රහස්පතින්දා
‘කෙනෙකු තුළ දෙවිගේ බලය ක්‍රියාත්මක වන විට විශ්වාසය යන ගුණාංගය ඔහු තුළ දැකගත හැකියි.’—ගලා. 5:22, 23.
දරුවන්ට දෙවි ගැන විශ්වාසයක් ඇති කරගන්න උදව් කරන්න නම් මුලින්ම ඔයාට දෙවි ගැන ශක්තිමත් විශ්වාසයක් තියෙන්න ඕනේ. ඔයා කරන කියන දේවල් දිහා දරුවා බලාගෙන ඉන්නවා කියලා මතක තියාගන්න. යෙහෝවා දෙවි ඔයාට සැබෑ කෙනෙක් කියලා දරුවා දකින්න ඕනේ. බර්මියුඩාවේ ඉන්න යුවළක් ප්‍රශ්නෙකට මුහුණ දීලා ඉද්දී එයාලා දුවලා දෙන්නත් එක්ක දෙවිට යාච්ඤා කරලා උදව් ඉල්ලනවා. ඒ ගැන යාච්ඤා කරන්න කියලා දුවලටත් කියනවා. “ඒකෙන් දෙවි ගැන දුවලාගේ විශ්වාසය පුදුම විදිහට ශක්තිමත් වුණා” කියලා ඒ යුවළ කියනවා. දෙමාපියෙනි, දරුවාගේ හිතේ බලෙන් විශ්වාසයක් ඇති කරන්න ඔයාලට බැහැ. සත්‍ය බීජය පැළ කරලා ඒකට වතුර දාන්න ඔයාලට පුළුවන්. ඒත් වර්ධනය දෙන්න පුළුවන් යෙහෝවා දෙවිට විතරයි. (1 කොරි. 3:6) ඒ නිසා දෙවි ගැන දරුවාට කියලා දෙන්න ඔයාට පුළුවන් උපරිමය කරන්න. විශ්වාසය ඇති කරගන්න දරුවාට උදව් කරන්න කියලා දෙවිට කන්නලව් කරන්න. ඔයා දරන වෙහෙසට දෙවි ආශීර්වාද කරයි.—එෆී. 6:4. w16.09 5:16-18
අප්‍රියෙල් 20, සිකුරාදා
‘ඒ වචන ඔබේ දූපුතුන්ගේ සිත්වලට කාවද්දන්න.’—ද්වි. 6:7.
සර්ජ් සහ මියුරියල් අවුරුදු 3කට වැඩි කාලයක් වෙනත් භාෂාවක් කතා කරන සභාවක සේවය කළා. එයාලගේ පුතාට අවුරදු 17ක් විතර වෙද්දී එයා රැස්වීම්, සේවයේ යන්නේ ආසාවකින් නෙමෙයි කියලා එයාලට තේරුණා. සර්ජ් මෙහෙම කියනවා. “සේවය කරන්න පුතාට තිබුණ ආසාව අඩු වෙන්නේ භාෂාව නිසයි කියලා අපිට තේරුණාම කලින් සභාවට ආයෙත් යන්න අපි තීරණය කළා.” මව් භාෂාවෙන් රැස්වීම් තියෙන සභාවකට ආයෙත් යනවාද නැද්ද කියන තීරණය ගන්න මේ පැති ගැන හිතන එක දෙමාපියන්ට උදව්වක්. මුලින්ම හිතන්න දරුවන්ට දෙවිට ළං වෙන්න උදව් කරන ගමන්ම භාෂාවකුත් උගන්වන්න තමන්ට කාලය, ශක්තිය තියෙනවාද කියලා. සමහරවිට දෙමාපියන්ට තේරෙයි දරුවන් රැස්වීම් යන්නේ, සේවයේ යන්නේ ආසාවෙන් නෙමෙයි කියලා. එයාලා සභාවේ ඉන්නේ එච්චර සතුටින් නෙමෙයි කියලා. ඒ පැති ගැන හිතන එක හොඳ තීරණයක් ගන්න උදව් වෙයි. යෙහෝවා දෙවි එක්ක දරුවෝ ශක්තිමත් බැඳීමක් ඇති කරගෙන කියලා තේරුණාම වෙන භාෂාවක් කතා කරන සභාවකට ආයෙත් යන්න සමහරවිට පුළුවන් වෙයි.—ද්වි. 6:5-7. w16.10 2:14, 15
අප්‍රියෙල් 21, සෙනසුරාදා
“නෝවා තුළ තිබූ විශ්වාසය නිසා ඒ වන තුරු නුදුටු දේවල් ගැන දෙවිගෙන් අනතුරු ඇඟවීමක් ලැබූ විට ඔහු දේවගරුබිය පෙන්වමින් තම පවුලට අයත් අයගේ ගැලවීම සඳහා නැවක් සෑදුවේය.”—හෙබ්‍රෙ. 11:7.
යෙහෝවා දෙවි කියපු දේවල් මුළු හදවතින්ම විශ්වාස කරපු නෝවා විශාල නැවක් හැදුවා. ‘ඇයි ඔයා මේක හදන්නේ’ කියලා අහළ පහළ අය එයාගෙන් අහන්න ඇති. නෝවා මුකුත් නොකියා හිටියේ නැහැ කියලා අපි දන්නවා. මොකද එයා “ධර්මිෂ්ඨකම ගැන දේශනා කළා.” (2 පේතෘ. 2:5) දෙවි කිව්ව මේ දේ ගැන එයා මිනිසුන්ට අනතුරු අඟවන්න ඇති. ‘ජීවත් වන සියල්ලන්ව විනාශ කිරීමට කාලය පැමිණ ඇත. මන්ද ඔවුන් නිසා මුළු පොළොවම සැහැසික ක්‍රියාවලින් පිරී තිබේ. මම මහා ජල කන්දරාවක් පොළොවට ඇද හැළෙන්න සලස්වන්නෙමි. මම එසේ කරන්නේ අහස යට ජීවත් වන සියල්ලන්ව විනාශ කරන පිණිසයි. මනුෂ්‍යයන් ඇතුළු සියලුම ජීවීහු මිය යන්නෝය.’ ජලගැල්මෙන් බේරෙන්න නම් දෙවි අණ කරපු විදිහට ‘නැවට ඇතුල් විය යුතුයි’ කියලත් නෝවා එයාලට කියන්න ඇති.—උත්. 6:13, 17, 18. w16.10 4:7